1, 2. (a) Chumanyi chitwatela kwila, nawa muloñadi? (b) Yumanyi yitukuhanjeka muchinu chibaaba?

ETU akwaKristu alala, twatela kuzata nañovu kulonda tuwaneña wunsahu walala hakwila nawu tukunkululeña mwaloña. (Yish. 3:21-23; 8:4, 5) Neyi tubula kuzata nañovu, Satana nikaayi kindi anateli kuluwañesha yitoñojoka yetu. (Efwes. 5:6; Kol. 2:8) Tunateli hohu kukunkulula mwaloña neyi twiluka wunsahu walala. Neyi chahosha Yishimu. 18:13 nawu, “muntu welaña wuchidi kanda atiyi chachiwahi hakwakula, chamuleñelaña niwusupi ninsonyi.”

² Muchinu chibaaba, tukuhanjeka hakukala kwekalaña hakuwana wunsahu walala hakwila nawu tukunkululi mwaloña. Kubombelahu, tukuhanjeka cheñi hayishina yamuBayibolu niyakutalilahu yikutukwasha kuzata nañovu hakuwana wunsahu walala.

3. Muloñadi chitwatela kuzatishila chishina chamuBayibolu chekala haYishimu 14:15? (Talenu mwevulu wakutachikilahu.)

³ Antu makonu anakuyiluwañesha nansañu yayivulu. Nsañu yeniyi anakutwalekahu kuyitiyakesha hamaintaneti, haTV  nihayikunzulemba. Antu amavulu ayitemeshelaña maemelu, mameseji ninsañu yikwawu kudi amabwambu jawu niantu amakwawu iyadiluka nawu. Chineli antu anasweji kutandisha nsañu yakutwamba nikuluwañesha wunsahu walala, dichi twatela kwikala asoñama nikutoñojoka hansañu yitwatiyaña. Chishinanyi chamuBayibolu chinateli kutukwasha? Yishimu 14:15 yahosha nawu: “Muntu wakadi maana wetiyaña mazu ejima, ilaña muntu wadihoñeshaña mumuchima watalaña chachiwahi mwakuyayi.”

4. Afwilipi 4:8, 9, yatukwashaña ñahi kutalisha hakusakula nsañu yitwatela kutaña, nawa muloñadi chichalemena kwiluka wunsahu walala? (Talenu chikasha chinakwila nawu “ Njila Jaloñeshawu Jinateli Kutukwasha Kuwana Wunsahu Walala.”)

⁴ Hakwila tukunkululi chiwahi, twatela kwiluka wunsahu walala. Dichi, twatela kwikala asoñama chikupu hakusakula nsañu yitwatela kutaña. (Tañenu Afwilipi 4:8, 9.) Bayi tumanishaña mpinji nakutala nsañu hamawebusayiti abula kushikilamu hela kutaña nyijimbu yakutwamba yatemeshañawu hamaemeluku. Sweje-e twatela kutondolwela kuyaña hamawebusayiti awakwakusekesha. Wena afwilaña kuluwañesha antu jaNzambi nikuluwañesha chalala. Nsañu yimunabuli kwilukisha yaleñelaña kukunkulula mwaluwa. Mwatela kwiluka nenu nsañu yakutwamba yinateli kuyiluwañesha.—1 Tim. 6:20, 21.

5. Wunsahwinyi wakutwamba wayilejeliwu aIsarela, nawa elili ñahi?

⁵ Kukuhwelela nsañu yakutwamba mwafumaña kukala. Chakutalilahu, shinshikenu chuma chamwekeni mumafuku aMosi hatemesheliwu akwakwendesha ituña 12 kuya nakwendesha Ituña daChikaninu, adi 10 aleteli wunsahu watama. (Kuch. 13:25-33) Wunsahu wawu watama nawa wakutiyisha woma, waletesheli antu jaYehova kutiya woma. (Kuch. 14:1-4) Muloñadi chatiyililiwu woma? Hadaha atoñojokeli nawu iwu wunsahu wadiña walala chineli akwakwendesha ituña amavulu aleteli wunsahu watama. Akaanini kwiteja wunsahu walala waleteliwu amayala ashinshika aYoshuwa naKalebi. (Kuch. 14:6-10) Chatela eteji wunsahu walala nikumukuhwelela Yehova, akuhweleleli wunsahu wakutwamba. Hiwusupi chikupu!

6. Muloñadi chitukubulila kuhayama neyi tutiya nsañu yakutwamba yinakuhosha hadi antu jaYehova?

⁶ Twatela kwikala asoñama sweje-e neyi tutiya nsañu yinakuhosha hadi aYinsahu jaYehova. Mwatela kwiluka nenu Satana himukwakwinka ambuña aNzambi ashinshika nyiloña. (Chim. 12:10) Dichi Yesu watusoñamishili nindi akwankunyi netu “[akatwitwambila] yuma yatama yeñi-nayeñi.” (Mat. 5:11) Neyi tutiyilila iku kusoñamisha, tukuhayamaña wanyi neyi tutiya nsañu yakutwamba yinakuhosha hadi antu jaYehova.

7. Chumanyi chitwatela kwila henohu kanda tutemeshi emelu hela meseji?

⁷ Komana mwakeña kutemesha maemelu nimameseji kudi amabwambu jenu nikudi antu imwadiluka nawu? Hadaha neyi mumona nsañu yayiha haintaneti hela mutiya nsañu, munateli kufwila kwikala neyi kamba nsañu wakeñaña kwikala watachi kutandisha nsañu yakuzañalesha. Hela chochu, henohu kanda mutemeshi meseji hela emelu, dihulenu nenu: ‘Komana iyi nsañu yinnakukeña kutandisha yalala? Komana nikweti wunsahu walala?’ Neyi mudana wunsahu walala, munateli kutandisha nsañu yakutwamba kudi amanakwetu. Neyi munayilukishi wanyi, bayi muyitemeshaku.

8. Yumanyi yeliliwu akwakudimbulula mumaluña amakwawu, nawa tunateli kudiñijamu ñahi chakadi kwiluka?

⁸ Kudi chuma chikwawu chafwana chafumaña  mukutemesha maemelu nimameseji swayi-swayi. Mumaluña amakwawu, mudimu wetu awukañeshaña hela awulekesha. Mumaluña amuchidiwu, antu atudimbululaña anateli kutandisha nsañu yinateli kututiyisha woma hela kutuleñela kubula kudikuhwelela wumu namukwawu. Talenu chuma chamwekeni muSoviet Union. Atupokola atenañawu nawu KGB, atandishili nsañu yakutwamba nawu amanakwetu amavulu alombolaña analeki kwikala aYinsahu jaYehova. * Amavulu akuhweleleli yina nsañu yakutwamba nawa afumini mukuloñesha kwaYehova. Chatamini nankashi! Ilaña mukuhita kwampinji, amavulu afuntili, amakwawu hiyafuntiliku. Chikuhwelelu chawu chakisikili. (1 Tim. 1:19) Tunateli kutondolwela ñahi chuma chamuchidiwu? Bayi mutandishaña nsañu yakutwamba hela yimunabuli kwilukishaku. Bayi mwitejaña nsañu yejimaku. Mwatela kwikala nawunsahu walala.

9. Kukalanyi kukwawu kwekalaña hakuwana wunsahu walala?

⁹ Nsañu yimunabuli kwilukisha hela yimukweti wunsahu wantesha, yakalaña kukunkulula chiwahi. Nsañu yimunabuli kwilukisha yinateli kuluwañesha antu amavulu. Tunateli kwila ñahi kulonda abuli kutuluwañesha nansañu yakutwamba hela chakwila yinakutiyakana neyi yalala?—Efwes. 4:14.

10. Muloñadi aIsarela chakeñeleleñawu kulukuka amanakwawu, nawa chumanyi chayikwashili abuli kuyilukuka?

¹⁰ Shinshikenu chuma chayimwekeneni aIsarela ashakamineña kukabadi kamujika kaKaloña Yodana mumafuku aYoshuwa. (Yosh. 22:9-34) Atambwilili mazu nawu aIsarela adiña nakushakama kukabadi kakumusela kakaloña Yodana (muchidi waRubeni niwaGadi nichibalu chamuchidi waManase) anatuñi kameña keneni nawa kakawahi kwakwihi naKaloña Yodana. Iyi nsañu yatiyiliwu yadiña yalala. Muloña wakubula kutiyishisha nsañu yejima, aIsarela ashakamineña kumujika akunkulwili nawu amanakwawu  anadikañi naYehova, dichi apompeli hamu kulonda ayi nakuyilukuka amanakwawu ashakamineña kukabadi kamusela. (Tañenu Yoshuwa 22:9-12.) Henohu kanda ayi nakuyilukuka, atemesheli akulumpi kulonda ayi nakutiya wunsahu walala. Wunsahwinyi wawaniniwu? A Isarela akumuchidi waRubeni niwaGadi nichibalu chamuchidi waManase hiyatuñili kameña nawu alambwileñahuku, ilaña nawu kayanukisheña. Akituñili kulonda kumbidi akanukileñahu nawu niwena adiña ambuña aYehova ashinshika. Awa aIsarela atela atiyili kuwaha hakubula kujaha amanakwawu hamuloña wawunsahu wabuliliwu kutiyishisha chiwahi, ilaña asambilili kukeñakeña wunsahu walala.

11. (a) Chumanyi chamwililiwu Mefwibosheti? (b) Davidi kachi wasambilili kwiladi?

¹¹ Hadaha ninetu antu anateli kututwambila. Shinshikenu chakutalilahu chaMefwibosheti naMwanta Davidi. Davidi wamumwekesheleli Mefwibosheti chisambu niluwi nakumufuntishila cheñi mpata yankaka yindi Sawulu yejima. (2 Sam. 9:6, 7) Mukuhita kwampinji, Davidi watambwilili nsañu yatama hadi Mefwibosheti. Chakubula nikuwana wunsahu walala, Davidi wamutambwili Mefwibosheti yuma yindi yejima. (2 Sam. 16:1-4) Davidi chamwihwiliyi Mefwibosheti, wamweni nindi naluwañeshi nawa wamufuntishilili Mefwibosheti chibalu chayuma. (2 Sam. 19:24-29) Davidi neyi wasambilili kuwana wunsahu walala kachi wakoñeli chuma chatama wanyi.

12, 13. (a) Yesu welili ñahi nansañu yakutwamba? (b) Tunateli kwila ñahi neyi muntu yatutwambila nsañu?

¹² Munateli kwila ñahi neyi ayitwambila nsañu? Yesu niYowanu Mupapatishi niwena ayitwambilili. (Tañenu Matewu 11:18, 19.) Yesu welili ñahi nansañu yakutwamba? Yesu washiliku maana wanyi. Ilaña wayikolesheli antu kuwana wunsahu walala nikusha maana hayuma yelileñayi ninsañu yatañishileñayi. Yesu wahosheli nindi: “Yuma yaloña yelañayi muntu, diyamwekeshaña nawu wukweti maana.”—Mat 11:19.

¹³ Kudi chikuma chalema chitwadizilaña kunawa mazu. Mpinji yikwawu antu anateli kuhosha mazu atama hadi etu. Tunateli kukeña kudiyiñisha nikuzata nañovu kulonda ijina detu dibuli kutama. Ilaña kudi chuma chitwatela kwila. Neyi muntu yatutwambila, twatela kudiwulaku neyi kwiji kwosi chuma chinamwekani. Chakutalilahu chaYesu chinakumwekesha nawu, yilwilu yetu yayiwahi yawakwaKristu, yinateli kutuyiñisha kunsañu yakutwamba ninsañu yinabuli kwilukishawu antu.

14, 15. Kushindamena hakashinshi ketu etu aweni kunateli kwikala ñahi muhetu?

¹⁴ Chakala kuwana wunsahu walala hakwila nawu tukunkululi chiwahi. Kubula kuwanina nikwena hikukala kukwawu. Indi neyi tunamukalakeli Yehova nakashinshi yaaka yayivulu? Hadaha tuneluki yuma yayivulu. Hadaha antu anateli kutulemesha muloña wamaana nikashinshi kitukweti. Komana chumichi chinateli kwikala muhetu?

¹⁵ Eña, chinateli kwikala muhetu neyi tutachika kushindamena hakashinshi ketu etu aweni. Yilwilu yetu yinateli kutachika kuyuula yitoñojoka yetu. Tunateli kutachika kutoñojoka netu tukumanisha kukala hela chakwila hitukweti wunsahu walalaku. Munateli kufuma yuma yatama! Bayibolu yatusoñamishaña kubula kushindamena hakashinshi ketu etu aweni.—Yish. 3:5, 6; 28:26.

16. Chumanyi chamwekeni mulesitilanti, nawa manakwetu Tom washikeneni kukunkulula nindidi?

¹⁶ Fwikijenu chumichi. Ifuku dimu namelela  mulesitilanti, Tom, eluda wahayamini hakumona mukwawu eluda, John nashakami hamesa namumbanda wabula kwikala ñodindi. Manakwetu Tom wamweni anakuhanjeka nikuseha nankashi. Manakwetu Tom wahayamini chikupu. Komana chumichi chikuletesha adiseñi? Ñoda manakwetu John wukwila ñahi neyi yachitiya? Indi anyanindi akwila ñahi? Manakwetu Tom wamonahu dehi yuma yamuchidiwu. Neyi iyenu mwamweni chuma chamuchidiwu mwadi kwila ñahi?

17. Chumanyi chenjili nakwilukayi manakwetu Tom munichi chakutalilahu, nawa chumichi chinakutudizishadi?

¹⁷ Ilaña tiyenu chichadiña, hela chakwila manakwetu Tom wakunkulwili nindi manakwetu John hadiña washinshika kudi ñodindiku, komana welukili wunsahu walala? Hadodina ifuku, manakwetu Tom wamutuminini manakwetu John foni. Manakwetu Tom watiyili nsonyi chelukiliyi nindi ona mumbanda wadiña muhela aJohn, wenjili nakuyihempula kufuma kumbaka yikwawu. Hashimbwili kufuma hadimweneniwu. Chineli wadiña hohu nakapinji kantesha, hadiña nampinji yakuya kwitalaku nawa dichaletesheli adiili kulesitilanti. Ñodindi wakañenyi mpinji yakudiila nawu hamu. Chawahili, muloña manakwetu Tom watandishili makudi wanyi. Tukudizilaku chumanyi? Hela chakwila tunashimbuli mukuloñesha, mpinji yejima tuwaneña wunsahu walala henohu kanda tukunkululi.

18. Kuhemba nkunyi kunateli kutuleñela kwiladi?

¹⁸ Chinateli cheñi kwikala chakala kuwana wunsahu walala hadi manakwetu itwabulaña kutiyañana nindi muchipompelu. Neyi tusweja kutoñojoka nankashi hakubula kutiyañana namanakwetu, chikutuleñela kumuhembela nkunyi. Nawa neyi tutiya nsañu yatama hadi iwu manakwetu, hadaha tukushikena kwiteja netu dimu. Yumanyi yitukudizilaku? Kuhembela amanakwetu nkunyi kunateli kuletesha kuyinka nyiloña hansañu yitunabuli kwilukisha wunsahu walala. (1 Tim. 6:4, 5) Twatela kutondolwela lwisu niichima kutanda mudetu kulonda tukunkululeña mwaloña. Chatela twitejeña iyi yilwilu yatama kutanda mudetu, twanukeña lushimbi lwakukeña amanakwetu nikuyanakena chakufuma hamuchima.—Tañenu Akolosi 3:12-14.

19, 20. (a) Yishinanyi yamuBayibolu yinateli kutukwasha kuwana wunsahu walala? (b) Chumanyi chitukahanjekahu muchibaaba chinalondelihu?

¹⁹ Makonu chakala kuwana wunsahu walala nikukunkulula mwaloña muloña wansañu yayivulu yabula kushikilamu, nsañu yitunabuli kwilukisha nikubula kuwanina kwetu. Chumanyi chikutukwasha? Twatela kwiluka yishina yamuBayibolu nikuyizatishaña. Chishina chimu chidi chakwila nawu kwakula henohu kanda mutiyi wunsahu walala hiwusupi ninsonyi. (Yish. 18:13) Chishina chikwawu chatwanukishaña kubula kwiteja mazu adi ejima henohu kanda tukeñakeñi wunsahu walala. (Yish. 14:15) Nawa, hela chakwila tunashimbuli mukuloñesha, bayi tushindamena hakashinshi ketu etu aweniku. (Yish. 3:5, 6) Yishina yamuBayibolu yinateli kutukiña neyi tuzatisha wunsahu walala kulonda tukunkululi nikufuukula chiwahi.

²⁰ Ilaña kudi cheñi kukala kukwawu. Chaaku chakusompesha kwesekeja nachinakumwekanayi muntu. Muchibaaba chinalondelihu, tukashinshika hayiluwa yitunateli kukoña niyuma yinateli kutukwasha kuyitondolwela.