CHAKETWANKESHELEÑAWU hakaluñalwiji kaAtlantic nakuya kuEurope, manakwetu George Young wadiña mumbopolu wanukili mudimu waWanta wazatiliyi muBrazil. * Hela chochu, hampinji yayileñawu, manakwetu Young watachikili kutoñojoka hamudimu wayileña nakuzatayi, kushimwina mumaluña amaneni abulawu dehi kushimwina amuSpain niPortugal. Watoñojokeleña nindi chashikayi, wakatanjika yuma chiwahi kulonda Manakwetu J. F. Rutherford yakenzi yakahani jimpanji jaBayibolu nawa akahani matilakiti 300,000.

Chashikiliyi muLisbon mu 1925, Manakwetu Young wawanini yuma yinaluwankani chikupu. Wawanini Chechi yaKatolika anayitambuli wuswa kudi chiyuulu chayilihu mu 1910. Antu asubukili, ilaña madombu atwalekelihu mwituña.

Manakwetu Young chamuloñesheleleñayi Manakwetu Rutherford yuma, nfulumendi yashiliku nshimbi yakukañesha madombu muloña antu akeñeleña kufumishahu chiyuulu chadiñahu. Nsoneki waBritian and Foreign Bible Society, wamusoñamishili Manakwetu Young nindi mukumonaña ikañesha. Hela chochu, Manakwetu Young walombeli lusesa kuzatisha kapeka kakudinyikilamu mujimba (gym) hashikola yaCamões Secondary kulonda akapompelimu nawa amwitejeli.

Ifuku damuloñesheleliwu Manakwetu Rutherford kuhana mpanji dashikili, hadiña haMay 13. Antu afwilileña chikupu kutiyilila kumpanji. Yipapilu yalamikiliwu hambañu niyipapilu yansañu yadiña nakutiyakesha mpanji yadiña namutu nawu “Chakushakama haMaseki Haya Nyaaka.” (“How to Live on the Earth Forever.”) Akwansakililu anyakeli kusoneka chibaaba muchipapilu chansañu nakusoñamisha antu jawu nawu ana anenzi “hiyatuprofwetu akutwamba.” Awa akwakudimbulula emeni hachisu chakwiñilila nakuhana mabroshuwa amavulu adiña nansañu yatadikishileña yuma yatañishileñayi Manakwetu Rutherford.

Hela chochu, antu akushika ku 2,000 apompeli, ilaña antu amakwawu akushika ku 2000 ayitejeli wanyi kwiñila. Antu amakwawu apompeli emeni hajindalu nawa amakwawu ashakamini hayikuñu yadiña mukapeka.

Bayi neyi yuma yejima yendeli chiwahiku. Akwakudimbulula aleteli ipumba nikukotola yitwamu. Ilaña Manakwetu Rutherford watwalekelihu kuhosha nawa wakandamini hamesa kulonda antu atiyi chikuhoshañayi. Chamanishiliyi kuhana mpanji mukachi kawufuku, antu kwakwihi na 1,200 asonekesheli majina kulonda akayinki nyikanda yashindamena haBayibolu. Ifuku dalondelelihu, muchipapilu chansañu chaO Século ashilimu chibaaba chahosheleña hampanji yahaniniyi Manakwetu Rutherford.

MuSeptember 1925, Kaposhi Kakutalila kamwidimi daPortuguese atachikili kukidisha muPortugal.  (Hakusambila Kaposhi Kakutalila kamwidimi daPortuguese adiña atachika dehi kukidisha muBrazil.) Haniyi mpinji, Kadizi waBayibolu Virgílio Ferguson, wafuukwilihu kuya kuPortugal nakukwasha mudimu waWanta. Hakusambila, wazatileña naManakwetu Young hakasanji kamutayi kamuBrazil kawaTudizi aBayibolu. Hashimbwili wanyi, Virgílio niñodindi Lizzie ayili nakumuwana cheñi Manakwetu Young. Manakwetu Ferguson washikili hampinji yayiwahi muloña diyi mpinji yadiloñesheleñayi Manakwetu Young kuya nakushimwina kumaluña acheñi kushilahu niSoviet Union.

Chelili mashidika atambuli chiyuulu muPortugal, ikañesha daswejeli. Manakwetu Ferguson wahamukili nawa wakiñili izanvu dawaTudizi aBayibolu nikuyikwasha kudikita chikupu mumudimu. Walombeli lusesa kunfulumendi kulonda apompeleña mwitala dindi. MuOctober 1927, amwitejeli.

Hampinji yayuulileña muntu wakalisha, antu akushika ku 450 muPortugal atambwili Kaposhi Kakutalila. Kubombela haKaposhi Kakutalila, matilakiti ninyikanda yikwawu yaletesheli chalala kushika mumatuña ejima aYuulileñawu kudi antu akuPortugal, matuña adi neyi Angola, Azores, Cape Verde, East Timor, Goa, Madeira, niMozambique.

Muchaaka cha 1929, iyala wahoshaña Portuguese, Manuel da Silva Jordão wabukilili kuLisbon. Hampinji yadiñayi muBrazil, watiyili mpanji yahaniniyi Manakwetu Young. Wadiña weluka dehi chalala nawa wakeñeleña chikupu kumukwashaku Manakwetu Ferguson kutwala mudimu wakushimwina hambidi. Hakwila yeli mwenimu, Manuel watachikili wukolopota anakutenawu makonu nawu apayiniya. Hamuloña wakuhana nyikanda yakupulinta yashindamena haBayibolu, yipompelu yavulili chikupu muLisbon.

Mu 1934, Manakwetu Ferguson niñodindi afuntili kuBrazil. Hela chochu, akuwili mbutu yachalala. Izanvu dawamanakwetu ashinshika amuPortugal atwalekelihu kwikala akola kuspiritu nihampinji yikwadiña njita muEurope kuSpain niNjita Yakaayi Yamuchiyedi. Haniyi mpinji antu akeheli, ilaña mu 1947, henjili mishonali watachi John Cooke wafumini kushikola yaGileyadi, antu atachikili kuvula. Nkumininaku, akwakushimwina aWanta avulilileñaku hohu. Nihampinji yelili nfulumendi yilekeshi mudimu wawaYinsahu jaYehova mu 1962, antu avulilileñaku. MuDecember 1974, chelili aYinsahu jaYehova ayiteji kuzata nyidimu yawu, akwakushimwina mwituña avulili kubadika ha 13,000.

Makonu, akwakushimwina aWanta kubadika ha 50,000, anakushimwina nsañu yayiwahi yaWanta waNzambi muPortugal nihayitutu yayivulu hahoshañawu idimi daPortuguese, kushilahu Azores niMadeira. Hakachi kanawa akwakushimwina, hadi niantu atiyilili kumpanji yahaniniyi Manakwetu Rutherford mu 1925.

Twamusakililaña Yehova niamanakwetu niahela ashinshika adiñaku hayina mpinji amwekesheli kuhamuka nakutiyakesha mudimu hamu neyi ‘añamba jaKristu Yesu kudi akwanyuza.’—Rom. 15:15, 16.—Kufuma munkalaña jetu muPortugal.