1. Chumanyi chitwakeñaña kudi antaña jetu?

MUHELA Pauline * wahosheli nindi: “Kufuma tuhu hinadizili chalala nakeñeleña nami ejima muchisaka chetu akekali nanami muparadisa. Sweje-e dinu nakeñesheleña nfumwami Wayne, nimwanetu weyala kumukalakela Yehova.” Mwekalahu nawantaña jenu abulaña kumukalakela Yehova? Kufwana Pauline, ninenu munakukeña antaña jenu amukalakeleña Yehova.

2. Malwihwinyi itukuhanjekahu muchinu chibaaba?

² Hitunateli kukanjikija antaña jetu kwiteja nsañu yayiwahiku, ilaña tunateli kuyikolesha kutoñojoka nikwiteja nsañu yamuBayibolu. (2 Tim. 3:14, 15) Muloñadi chitwatela kuyishimwina antaña jetu? Muloñadi chitwatela kuyimwekeshela wushona? Chumanyi chitwatela kwila hakwila tukwashi antaña jetu kumukeña Yehova? Nawa ejima muchipompelu anateli kutukwasha ñahi?

3. Kwesekeja na 2 Petulu 3:9 muloñadi chitwatela kushimwina antaña jetu?

³ Katataka, Yehova yajilumuni nshakaminu yamakonu. Chiña hohu antu adi “nanyichima yashinshika yakukeña kwikala nawumi wahaya nyaaka” diwu akamwinawu. (Yil. 13:48) Twazatishaña mpinji yeneni niñovu jetu kushimwina antu itwabula kwiluka muchituñilu chetu, dichi chidi hohu chiwahi kushimwina niantaña jetu kulonda amukalakeleña Yehova. Tata yetu wukweti kukeña Yehova “hakeñaña muntu  hela wumu akamujilumuniku, ilaña wakeñaña nindi antu ejima ekali nakukooleka kwakubalumuka munyichima.”—Tañenu 2 Petulu 3:9.

4. Chiluwanyi chitunateli kukoña neyi tunakushimwina antaña jetu?

⁴ Twatela kwiluka netu kudi njila yayiwahi niyatama yakushimwinamu nsañu yawamwinu. Neyi tunakushimwina muntu itwabula kwiluka twahanjekaña nindi munjila yakumudimbeka, ilaña neyi tunakushimwina ntaña yetu twahoshaña chakubula kuhita mumbadi.

5. Chumanyi chitwatela kwanuka henohu kanda tutachiki kuyishimwina antaña jetu?

⁵ Neyi tweseka kwanuka mpinji yitwashimwininihu antaña jetu katachi, etu amavulu twaditoñeshaña, netu kachi nazatishili njila yacheñi. Kapostolu Pawulu wafumbili akwaKristu nindi: “Mazu enu mpinji yejima ekaleña amawahi, akutoweja namuñwa kulonda mwiluki chimwatela kwakula muntu-himuntu.” (Kol. 4:5, 6) Chachiwahi kwanuka iku kufumba neyi tunakushimwina antaña jetu. Neyi nehi, tukuyineñeshaña chatela tuyikwashi atiyilili nsañu yitunakuyishimwina.

6-7. Shimunenu chakutalilahu chinakumwekesha nawu chalema kutiyila wushona mwinikwetu wabulaña kumukalakela Yehova.

⁶ Mwekeshenuña wushona. Muhela Pauline, itwatena hakusambila, wahosheli nindi: “Hatachi nakeñeleña hohu nami tuhanjekeña namwanta wami yuma yakuspiritu. Hitwahanjekeleña ‘yuma’ yacheñiku.” Hela chochu, nfumwa amuhela Pauline, Wayne, wadiña weluka wanyi Bayibolu, nawa watiyishishileña wanyi yuma yahosheleña Pauline. Dichi yena wamweneña nsañu yejima yahosheleña ñodindi nindi yamukwitiya kwindi. Wadakameneni nindi nakudikunda nawantu atama nawa nindi anakumudimba.

 ⁷ Pauline wetejeli nindi wadiña nakuumba mpinji yeneni nawamanakwetu niahela kunsa yanyilungu, nakupompa, kushimwina nikuhanjeka. Pauline wahosheli nindi: “Kakavulu nfumwami wenjileña hetala kuwana hosi muntu hela wumu nawa watiyileña wudi.” Hela chochu, Wayne waditoñesheleña nindi kachi ñodami nimwanami adiña hohu. Welukili wanyi antu adiña nañodindi nimwanindi nawa chamwekeni neyi ñodindi Pauline walemesheli amabwambu jindi kubadika yena. Wayne wamuchinishili Pauline nindi wukumuseña. Chumanyi chateleleli kwilayi Pauline hakwila nawu yamwekeshi wushona?

8. Kwesekeja na 1 Petulu 3:1, 2, chumanyi chitwatela kwila hakwila nawu tuyikoki antaña jetu?

⁸ Lekenu yilwilu yenu yiyihakwiliku. Kakavulu antaña jetu amonaña yuma yitwelaña kubadika yitwahoshaña. (Tañenu 1 Petulu 3:1, 2.) Dichuma chenjili nakwiluka Pauline. Wahosheli nindi: “Nelukili nami Wayne watukeña nawa hakeñeleña kunseñaku. Ilaña chanchinishiliyi chanletesheli kutoñojoka nami natela kutachika kwila yuma yahoshayi Yehova hawulu. Chatela nimushimwineña hohu nateleli kwila yuma yayiwahi kuhitila muyilwilu yami.” Pauline walekeli kumukanjikija Wayne kuhosha nindi nsañu yamuBayibolu, ilaña watachikili kuhanjeka nindi nsañu yacheñi. Wayne wamweni chawundili ñodindi nichekaliliyi mwanindi nayilwilu yayiwahi. (Yish. 31:18, 27, 28) Chelili Wayne yamoni Bayibolu chiyakwashileña chisaka chindi, chamuleñeleli kutachika kutoñojoka nikwiteja nsañu yaMwiizu daNzambi.—1 Kor. 7:12-14, 16.

9. Muloñadi chitwatela kutwalekelahu kukwasha antaña jetu?

⁹ Twalekenuhu kweseka kukwasha antaña  jenu. Yehova watuleja chuma chitwatela kwila. ‘Kakavulu’ wayinkaña antu kukooleka kwakwiteja nsañu yayiwahi kulonda akatambwili wumi wahaya nyaaka. (Yere. 44:4) Nawa kapostolu Pawulu wamulejeli Timotewu kutwalekahu kukwasha amakwawu. Muloñadi? Muloña mukwila mwenimu, wadi kudamwina yamwini niantu amutiyilileña. (1 Tim. 4:16) Twakeña antaña jetu, dichi tunakukeña eluki chalala chidi Mwiizu daNzambi. Chimwahitili mpinji, mazu niyilwilu yaPauline yakwashili chisaka chindi. Chayinu mpinji nakutiya kuwaha kumukalakela Yehova hamu nanfumwindi. Wejima wawu hiyapayiniya nawa Wayne himukulumpi.

10. Muloñadi chitwatelela kwikalila adiwunjika?

¹⁰ Ikalenu adiwunjika. Neyi tutachika kushakama kwesekeja nanshimbi jaNzambi, chinateli kuyikalila antaña jetu kwiteja yuma yitwakuhwelela. Chuma chatachi chamonañawu kakavulu, hikuleka kudibomba nawu mukwanakana yidika yamukudifukula nimunsañu jamapolitiki. Hakusambila antaña jetu amakwawu anateli kutuhilila. (Mat. 10:35, 36) Ilaña bayi tuzeyaku. Neyi tukuleka kuyikwasha kwiluka yuma yitwakuhwelela, dikwila nawu tunakuhosha netu hiyanateleli kutambwila wumi wahaya nyaakaku. Yehova hatwinka mudimu wakusompeshaku, ilaña wamwinka Yesu iwu mudimu. (Yow. 5:22) Neyi twikala adiwunjika, mukuhita kwampinji antaña jetu akatiyilila kunsañu yetu.—Talenu chikasha chinakwila nawu “ Zatishenu Webusayiti Yetu haKudizisha.”

11-13. Yumanyi yimunadizili kudi Alice cheliliyi nawanvwali jindi?

¹¹ Ikalenu nawushona ilaña bayi muhimpa yitoñojoka yenuku. (Yish. 15:2) Toñojokenu chuma chamumwekeneni Alice. Wamwilukili Yehova hampinji yashakamineñayi kwakulehi nawanvwali jindi adiñijili munsañu jamapolitiki nawa abulili kumwiluka Nzambi. Watoñojokeli nindi wateleleli kuyilejamu swayi-swayi nsañu yadizileñayi. Alice wahosheli nindi: “Neyi wushimbula kuleja chisaka cheyi yuma yiwunadizi niyiwunakuhweleli, anateli kutiya kutama.” Wayisonekeli avwali jindi nyikanda nakuyihula chatoñojokeleñawu hayuma yatañishaña Bayibolu, hanyitu yamweniyi nindi yinateli kuyisañumuna, chidi neyi kukeña. (1 Kor. 13:1-13) Wayisakilili anvwali jindi chamukulishiliwu nichamwakameneneñawu nawa wayitemesheleleli yawana. Chayiliyi nakuyimona anvwali jindi wayikwashiliku amama yindi nyidimu yejima yahetala. Hakusambila anvwali jindi atiyili kutama chelili Alice yayileji yuma yakuhweleleliyi.

¹² Mpinji yadiñayi Alice kwitala dawanvwali jindi watwalekelihu kutaña Bayibolu mpinji yejima. Dichi wahosheli nindi: “Chumichi chayikwashili amama kwiluka nawu nalemesha chikupu Bayibolu.” Nawa haniyi mpinji atata yindi afuukwilihu kutaña Bayibolu kulonda eluki chuma chaletesheli mwanawu kuhimpa chihandilu chindi. Cheñi afwilileña kukeñakeña yiluwa muBayibolu. Alice wahosheli nindi: “Nayinkeli Bayibolu nawa nasonekelimu nsañu yayikundamini. Chumanyi chafuminimu? Chatela atata yaAlice awani yiluwa Mwiizu daNzambi, ilaña mazu atañiliwu ayishikili hamuchima.

¹³ Twatela kwikala nawushona nawa bayi tuhimpa yitoñojokaku, hela chakwila twatela kuumika kukala. (1 Kor. 4:12b) Chakutalilahu, Alice womikili ikañesha dafumineña kudi amama yindi. Wahosheli nindi: “Chinapapatisheweli aMama anteneni nawu ‘natama.’” Alice welili ñahi? Wahosheli nindi, “Chatela nileki kuhosha hansañu yinakuhweleleli, nayilejeli munjila yakalemesha nami ami kwami ichi nekali dehi Chinsahu chaYehova  nawa nikahimpa wanyi mwinafuukuli. Nayilejeli amama nami nayikeña. Twadilili wejima wetu nawa nayitelekeleli yakuda yayiwahi. Kufuma tuhu hayina mpinji, amama atachikili kwiluka nawu Bayibolu yankwashileña kwikala nayilwilu yayiwahi.”

14. Muloñadi chitwatela kubulila kwiteja ikañesha dawantaña jetu kuhimpa mutunafuukuli?

¹⁴ Hanateli kuhita mpinji hakwila nawu antaña jetu eluki chikupu chuma chatuleñelaña kumukalakela Yehova. Chakutalilahu, cheliliyi Alice yatondihu kuzata wupayiniya chatela yazati mudimu wamutondeleliwu anvwali jindi, amama yindi adilili cheñi. Ilaña Alice wahimpili wanyi yitoñojoka yindi. Wahosheli nindi: “Neyi witeja chisaka cheyi kuhimpa yitoñojoka yeyi muyuma yimu, akakukanjikija cheñi kuhimpa nimuyuma yikwawu. Ilaña neyi mudi naluwi nawa kuhimpa yitoñojoka yenu nehi, amakwawu muchisaka akuyitiyilila.” Dichamumwekeneni Alice. Anvwali jindi ejima ayedi hiyapayiniya nawa atata yindi hiyakulumpi muchipompelu.

15. Kwesekeja na Matewu 5:14-16 ni 1 Petulu 2:12, “nyidimu yayiwahi” yawantu amakwawu yinateli kukwasha ñahi antaña jetu?

¹⁵ Yehova wakokolaña antu kuhitila ‘munyidimu yayiwahi’ yamuchipompelu chawakwaKristu. (Tañenu Matewu 5:14-16; 1 Petulu 2:12.) Neyi ñodenu hela nfumwenu hiChinsahu chaYehova wanyi, wahanjekahu dehi nawantu amuchipompelu chenu? Muhela Pauline itwashimuna hakusambila watambikili amanakwetu niahela kwitala dindi kulonda nfumwindi Wayne, yayiluki. Wayne wanukaña chamukwashiliwu kudi manakwetu kwiluka  chekalawu aYinsahu. Dichi wahosheli nindi: “Wanokeli ifuku dimu kumudimu kulonda yatali ngunja hamu nanami. Nawa nelukili nami komana ‘niyena welaña yuma yitwelaña!’”

16. Muloñadi chitwatela kutambikila antaña jetu kwinza nakupompa nanetu?

¹⁶ Njila yimu mutunateli kukwashila antaña jetu hikuyitambikaku kulonda enzeña nakupompa hamu nanetu. (1 Kor. 14:24, 25) Kupompa kwatachi kwapompeliyi Wayne kwadiña kwaChanukishu muloña iku kupompa kwadiñaku hanyima yakukomboka kumudimu nawa kwadiña kwakwihi. Wahosheli nindi: “Natiyishishili wanyi mpanji yejima ilaña nanukañaku hohu antu. Antambwilili nikuñimusha. Nelukili nami hiyantu amawahi chikupu.” Chisaka chimu chatachikili dehi kumukwasha Pauline nimwanindi hakupompa nimumudimu wamwinha. Nkumininaku, Wayne wafuukwilihu nindi yeluki yuma yakuhweleleliyi ñodindi Pauline, dichi walombeli iwu manakwetu nindi yatachiki kumudizisha Bayibolu.

17. Yumanyi yitwatela kubula kudinkelahu nyiloña, nawa muloñadi chitwatela kubula kuzeya kushimwina antaña jetu?

¹⁷ Twakuhwelela chikupu netu antaña jetu ejima akatachika niwena kumukalakela Yehova. Hela chakwila, tukuzata nañovu jejima netu tukwashi antaña jetu ekali ambuña aNzambi, hadaha hiyanateli kwinza muchalalaku. Muniyi njila, hitwatela kudinka muloña hakufuukula kwawuku. Hitunateli kukanjikija muntu wudi wejima kwiteja yuma yitwakuhwelelaku. Hela chochu, neyi antaña jenu amona muzañalu wumukweti hakumukalakela Yehova, niwena anateli kwikala nampwila. Yilombelenuñaku. Hanjekenu nawu mukubabala. Bayi muleka kuyikwashaku! (Yilw. 20:20) Kuhwelelenu chikupu nenu Yehova wukuyikwasha. Nawa neyi antaña jenu atondahu kuyitiyilila, dikwila nawu akayamwina!