1. Chumanyi chatela kwilawu akwaKristu hakwila amanishi kutemuka lufuchi lwakuwumi?

AKWAKRISTU adi mulufuchi lwakuwumi. Hela chakwila dihu hitunatachiki kutemuka hela twatachikili dehi, twatela kutwalekahu kutemuka sampu nikumufunda. Kufumba kwahaniniyi Pawulu kudi akwaKristu amuFwilipi kunateli kutukwasha ninetu kumanisha lufuchi lutunakutemuka. Antu amakwawu amuchipompelu chamuFwilipi amukalakeleleli Yehova yaaka yayivulu mpinji yatambwililiwu mukanda wayisonekeleliwu kudi Pawulu. Adiña nakumukalakela Yehova nakashinshi, ilaña Pawulu wayanukishili nindi atwalekihu kutemuka nakuumika. Wakeñeleña nindi atwalekihu kwimbujola chakutalilahu chindi “chakutemuka lufuchi nachikwonkwanyi.”—Fwi. 3:14.

2. Muloñadi Pawulu chayifumbiliyi Afwilipi hampinji yatelela?

² Pawulu wayifumbili Afwilipi hampinji yatelela. Antu amuFwilipi akabishileña amanakwetu kufuma tuhu mpinji yatuñiliwu chipompelu. Atachikili mu 50 C.E, chelili Pawulu naSilasi ovwahilili mutambi ‘wakuzambukila kuMasidoniya.’ (Yil. 16:9) Kwenoku awanini mumbanda wejina daLidiya “wadiña nakutiyilila, dichi Yehova wenzunwini muchima windi” kulonda yatiyi nsañu yayiwahi. (Yil. 16:14) Hashimbwili wanyi yena niamwitala dindi ejima apapatisheweli. Hela chochu, Satana watachikili kuyiletela kukala. Amayala amumusumba ayikwatili aPawulu naSilasi nakuyitadañesha nakuyitwala kudi anyuuli nikuyitwambila nawu anakuleta ipumba. Chafuminimu, aPawulu naSilasi ayeteli, ayikasili, nawa nkumininaku ayilejeli kufuma mumusumba. (Yil. 16:16-40) Komana azeyeli? Inehi!  Indi amanakwetu niahela muchipompelu chachiha chatuñiliwu? Niwena omikili. Chakadi nikujina akolesheweli chikupu nachakutalilahu chemikiliwu aPawulu naSilasi.

3. Pawulu welukili chumanyi, nawa malwihwinyi itukuhanjekahu?

³ Dichi Pawulu wafukwilihu kubula kuzeya. (2 Kor. 4:16) Hela chochu, welukili nindi hakwila yamanishi kutemuka kushika nikunsa wateleli kusha maana hachikonkwanyi chakutemuka. Yumanyi yitunateli kudizila kuyuma yeliliyi Pawulu? Yumanyi yelañawu antu ashinshika makonu yinakumwekesha nawu tunateli kuumika makabi itunakumona makonu? Nawa kuchiñeja kwetu kwayuma yitwatalilaña kunateli kutukwasha ñahi kubula kuzeya?

4. Pawulu watwalekelihu ñahi kumukalakela Yehova hela chakwila wamweneña kukala?

⁴ Toñojokenu hayuma yejima yelileñayi Pawulu hampinji yasonekeleliyi aFwilipi mukanda. Amukasilili mwiitala muRoma. Nawa hatwesheleña kwidika nakuya nakushimwinaku. Hela chochu, watwalekelihu kushimwina antu amuhempwileña nikusonekela yipompelu yakwakulehi nyikanda. Nimakonu, akwaKristu amavula akañanyaña kwenda, ekalaña nakukoleka kwakushimwina nsañu yayiwahi kudi antu ayihempulaña kumatala awu. Asonekelaña cheñi nyikanda yakukolesha antu anateli kubula kwendelawu.

5. Kwesekeja namazu adi haAfwilipi 3:12-14, chumanyi chamukwashili Pawulu kusha maana hadi Yehova?

⁵ Pawulu wetejeli wanyi yuma yayiwahi hela yatama yeliliyi kunyima yimukañeshi kumukalakela Yehova. Dichi wahosheli nindi, ‘kuvulamena yuma yakunyima’ dikwadiña kwalema “nakufwila yuma yidi kumbidi,” dikwila nawu, kutemuka lufuchi nakushika nikunsa. (Tañenu Afwilipi 3:12-14.) Yumanyi yikwawu yadi kumukañesha Pawulu? Chatachi, wadiña walema nankashi henohu kanda yekali mukwaKristu. Hela chochu, wamweneña yuma yejimiyi nindi “hinswadi hohu.” (Fwi. 3:3-8) Chamuchiyedi, hela chakwila chinleji chindi chamukabishileña muloña wakukabisha akwaKristu, hetejeli yumiyi kumukañesha kumukalakela Yehovaku. Nawa chamuchisatu hatoñojokeli nindi yuma yamukalakeleliyi Yehova yinawaniniku. Pawulu wamukalakeleli Yehova chikupu hela chakwila amukasili, amweteli, amwasili malola nawa matu akisikili kushilahu tuhu nikushakama nanzala nikubula yakuvwala. (2 Kor. 11:23-27) Hela chochu, hichikweti muloña nayuma yeliliyi hela makabisha amweniyiku, Pawulu welukili nindi watela kutwalekahu kumukalakela Yehova. Ninetu dichitwatela kwila.

6. Yumanyi “yakunyima” yitwatela kuvulamena?

⁶ Tunateli ‘kuvulamena ñahi yuma yakunyima’ neyi cheliliyi Pawulu? Etu amakwawu twafwilaña kuleka kudinka nyiloña hanshidi yitwakoñeli kunyima. Neyi twadinkaña nyiloña, chinateli kuwaha neyi tutachika kudiza hansañu yefutu danyiloña dahaniniyi Kristu. Neyi tudiza, kutoñojokahu chikupu nikulombelahu chikupu hansañu yitunakudiza yakukolesha, chikutukwasha kuleka kudinka nyiloña. Tunateli nikuleka kudinka nyiloña hanshidi yatwanakenayi dehi Yehova. Shinshikenu hayuma yikwawu yitunateli kudizila kudi Pawulu. Amakwawu aleka nyidimu yawu yamali kulonda azatiku nyidimu yaYehova. Dichi bayi tufwilaña yuma yejima yitwaleka dehiku. (Kuch. 11:4-6; Mukwa. 7:10) “Yuma yakunyima” mwabombela nyidimu yitwamukalakeleli Yehova hela makabi itwomikili kunyima. Hela chochu, neyi tutoñojoka chatukwashiliyi Yehova kunyima, tunateli kuswina kwakwihi naTata yetu. Nawa, tunakukeña wanyi kutoñojoka  netu yuma yitunamukalakeli Yehova yinavuli.—1 Kor. 15:58.

7. (a) Kwesekeja na 1 Akorinda 9:24-27, yumanyi yesekejeliyi Pawulu hakwila nawu muntu yashindi nakushika kulufuchi lwakuwumi? Lumbululenu.

⁷ Pawulu watiyishili mazu aYesu akwila nawu: “Zatenu nañovu chikupu.” (Luka 13:23, 24) Pawulu welukili nindi, hakwila yamufwani Kristu, wateleli kuzata nañovu kushika nikunsa. Dichi wesekejeli chihandilu chamukwaKristu nakutemuka lufuchi. (Tañenu 1 Akorinda 9:24-27.) Mukwakutemuka wafwilaña kushika kumufunda nawa washaña wanyi maana kuyuma yinateli kumuluwañesha. Chakutalilahu, akwakutemuka lufuchi makonu anateli kutemukila mumukwakwa mudi masitolu niyuma yinateli kuyiluwañesha. Munatoñojoki nenu muntu wunakutemuka lufuchi nateli kwimana nakutachika kubanjila yuma yidi mumasitolu? Inehi! Mulufuchi lwakuwumi, ninetu twatela kutondolwela yuma yinateli kutuluwañesha. Neyi tuzata nañovu nikumukalakela Yehova neyena neyi cheliliyi Pawulu, tukatambwila nkisu.

8. Kukalanyi kusatu kutukuhanjekahu?

⁸ Ichi dinu tuhanjekenu hayuma yisatu yinateli kutuzeyesha. Kukala kwatachi hikubula kumona yuma yitwakuhweleleli netu yikumwekana. Kwamuchiyedi neyi ñovu yimana muloña wakukula. Nawa kwamuchisatu neyi tunakuhita mumakabi atwalekañahu. Tunateli kuumika neyi twiluka chomikiluwu antu amakwawu iku kukala.—Fwi. 3:17.

9. Chumanyi chinateli kumwekana neyi yuma yitwakuhwelela kumwekana nehi?

⁹ Neyi yuma yimwakuhwelelaña kumwekana nehi. Twafwilaña kumona yuma yejima yashiikayi Yehova. Kafwampi, kaprofwetu kaYehova Habakuki chafwilileñayi nindi Yehova yafumishi yuma yatama muYuda, Yehova wamulejeli ‘kuchiñilila.’ (Hab. 2:3) Hela chochu, neyi yuma yitwakuhwelela yishimbula kushika swayi, iyena dinateli kumana. Tunateli nikuzeya. (Yish. 13:12) Chumichi chamwekeni muchaaka cha1914. Haniyi mpinji, akwaKristu amavulu awayishewa akuhweleleli kuya mwiwulu  mu 1914. Ilaña, chumichi chamwekeni wanyi. Hanu dinu elili ñahi nachumichi?

10. Chumanyi cheliliwu adisumbula chelili yuma yachiñejeleñawu yibuli kumwekana?

¹⁰ Talenu cheliliwu antu ayedi ashinshika. Manakwetu Royal Spatz wapapatisheweli mu 1908 henohu wudi nayaaka 20. Wakuhweleli chikupu nindi katataka yatambwili wuloku windi. Dichi chelili yoti mumbanda mu 1911, walejeli nkeñi yindi Pearl nindi: “Wuneluki chuma chikamwekana mu 1914. Neyi tukudisumbula, chikuwaha tudisumbuli swayi!” Komana awa akwaKristu adisumbula azeyeli muloña wakubula kutambwila wuloku wawu wamwiwulu mu 1914? Inehi, muloña ashili maana hakumukalakela Nzambi nakashinshi bayi hawulokuku. Adikasili munyichima yawu kutemuka lufuchi nakuumika. Manakwetu Royal niñodindi Pearl atwalekelihu kwikala ashinshika sampu nichamanishiliwu mudimu wawu wahamaseki yaaka yayivulu yinahitihu. Chakadi nikujina, mwafwilaña kumona Yehova chakajilikayi ijina dindi niWanta windi nichakashikijayi yikaninu yindi. Ilukenu nenu yumiyi yikamwekana mumpinji yatoñolayi dehi Yehova. Kushika ninoyu mpinji, tutwalekihu kumukalakela Nzambi yetu, bayi tuzeyaku hela chakwila yuma yitwachiñejaña yinamwekani wanyi.

11-12. Muloñadi chitwatela kutwalekahu kumuzatila Nzambi hela chakwila tunazeyi kumujimba? Shimunenu chakutalilahu.

¹¹ Neyi ñovu yinayimani hamuloña wakukula. Kwambukaku namukwakutemuka lufuchi, hitwakeñekaña ñovu hakwila nawu tumukalakeli Yehova nikwikala neyena mumudimu windiku. Dichi, antu amavulu azeya dehi kumujimba anatwalekihu kumukalakela Yehova kwesekeja nahakumina ñovu jawu. (2 Kor. 4:16) Chakutalilahu, Manakwetu Arthur Secord * wadiña nayaaka 88 nawa hanyima yakuzatila haBeteli hadi yaaka 55 wakatili. Ifuku dimu, nansi wenjili nakumwakamena. Wamutalili nawa wamutiyilili wushona nakuhosha nindi: “Manakwetu Secord, munamuzatili Yehova chikupu.” Hela chochu, Manakwetu Arthur hashili maana hanyidimu yamukalakeleliyi Yehova kunyimaku. Wamutalili iku natumbi chimwemweta nawa wamwakwili nindi: “Dimu. Bayi neyi yuma yitunamukalakeli diyi yalemaku. Ilaña chuma chalema hikwikala ashinshika chayinu mpinji.”

¹² Hadaha munamukalakeli Yehova hadi yaaka yayivulu nawa chayinu mpinji munakukañanya kumukalakela neyi chimwelileña kunyima muloña wakukatakata. Neyi dimu, bayi muzeyaku. Ilukenu chikupu nenu Yehova wanukaña nyidimu yimwamukalakeleli nakashinshi kunyima. (Heb. 6:10) Nawa mwatela kwiluka nenu, bayi neyi kumukalakela Yehova nañovu  dichuma chikumwekesha nawu twamukeñaku. Ilaña twamwekeshaña netu twamukeña Yehova neyi twikala nayilwilu yayiwahi nikuzata hanakumini ñovu jetu. (Kol. 3:23) Yehova weluka kuzeyazeya kwetu nawa hakeñaña nindi twili yuma yitukukañanyaku.—Maku 12:43, 44.

13. Chuma chamumwekeneni Anatoly niLidiya, chinakutukolesha ñahi kumukalakela Yehova hela chakwila tunakumona kukala kwakuvulu?

¹³ Makabi atwalekañahu. Ambuña aYehova amakwawu anomiki chikupu makabisha. Chakutalilahu, manakwetu Anatoly Melnik * wadiña hohu nayaaka 12 hayikasiliwu atata yindi nakuyitwala kuSiberia muwunkoli, hadiña makilomita 7,000 nakwadiña chisaka chindi muMoldova. Chimwahitili chaaka chimu, Anatoly niamama yindi kushilahu niankaka jindi ayitwalili muwunkoli kuSiberia. Mukuhita kwampinji, atachikili kupompela mumukala wukwawu, ilaña endeleña makilomita 30 mwiluña mwadiña nvula yachishika, kwadiña kututa nankashi. Nkumininaku, manakwetu Melnik washakamini yaaka yisatu mukaleya, kwakulehi nakwadiña ñodindi Lidiya nawa washili mwana wadiña nachaaka chimu. Hela chakwila amweni yihuñu yayivulu, manakwetu Anatoly nichisaka chindi atwalekelihu kumukalakela Yehova nakashinshi. Chayinu mpinji manakwetu Anatoly wudi nayaaka 82, nawa wekala membala waKometi yaMutayi kuCentral Asia. Kufwana manakwetu Anatoly nimuhela Lidiya, tuzatenu nahanakumini ñovu yetu mumudimu waYehova nikuumika neyi chochitwomikileña kunyima.—Ñal. 6:9.

14. Pawulu welukili nindi wateleleli kwiladi hakwila nawu yatambwili wufwetu?

¹⁴ Pawulu wakuhweleleli chikupu nindi wukutemuka lufuchi nakumanisha chikonkwanyi. Chineli wadiña mukwaKristu wawayishewa, wadiña nakuchiñeja “wufwetu wamutambi wamwiwulu waNzambi.” Hela chochu, hakwila nindi yatambwili iwu wufwetu, welukili nindi wateleleli kutwalekahu ‘kutemuka lufuchi.’ (Fwi. 3:14) Pawulu wazatishili chakutalilahu hakwila nawu yakwashi Afwilipi kutwalekahu kusha maana hachikonkwanyi chawu.

15. Pawulu wazatishili ñahi chakutalilahu chakwikala mwenimbu hakukolesha akwaKristu amuFwilipi kutwalekahu ‘kutemuka lufuchi’?

¹⁵ Pawulu wayanukishileña Afwilipi nindi adiña enimbu amwiwulu. (Fwi. 3:20) Muloñadi chateleleliwu kwanuka chumichi? Muloña munana mafuku, antu akeñeleña nankashi  kwikala enimbu amuRoma. * Hela chochu, akwaKristu awayishewa adiña nawenimbu wabadika wadi kuyiletela yuma yayiwahi yayivulu. Kwambukaku, wenimbu wamuRoma wadiña wakehelamu chikupu neyi tukuwesekeja nanfulumendi yamwiwulu. Muloña wachumichi, Pawulu wakolesheli aFwilipi nindi “shakamenuña neyi enimbu nayilwilu yatelela nsañu yayiwahi yaKristu.” (Fwi. 1:27, tth.) AkwaKristu awayishewa makonu amwekeshaña chakutalilahu chachiwahi chinakutemukawu lufuchi lwakwikala nawumi wahaya nyaaka mwiwulu.

16. Hela chakwila tukweti kuchiñeja kwamwiwulu hela kwaheseki, yumanyi yitwatela kutwalekahu kwila kwesekeja naAfwilipi 4:6, 7?

¹⁶ Hela chakwila twachiñejaña wumi wahaya nyaaka mwiwulu hela muparadisa hamaseki, twatela kutwalekahu kumanisha chikokwanyi chetu. Hela chakwila tunomiki kukala kwakuvulu, bayi twiteja yuma yatumwekeneni kunyima hela yuma yidi yejima yitukañeshi kumukalakela Yehovaku. (Fwi. 3:16) Hadaha tunahembeleli hadi mpinji yayilehi hakwila nawu yikaninu yaYehova yishikijewi indi kwiji tunashinakaji dehi. Hadaha tunomiki kukala kwasweja nimakabisha hadi yaaka yayivulu. Hichidi namuloña nakukala kwejima kumukwetiku, “bayi mwakama chuma hela chimuku.” Ilaña muyuma yejima, mukulomba kwakulembelela, mulejenuña Nzambi yuma yonsu yimunakukeña nawa wakayinka kuwunda kwabadika hayuma yejima yimunateli kutoñojokahu.—Tañenu Afwilipi 4:6, 7.

17. Tukahanjekadi muchibaaba chinalondelihu?

¹⁷ Kufwana mukwakutemuka wadishañaku chikupu kushika nikumufunda, tutwalekihu kusha muchima hachikonkwanyi chakumanisha lufuchi lwakuwumi. Neyi chinatwesheki kwesekeja nañovu yitukweti, tutwalekihu kuzata nañovu nikufwila chikupu kutambwila yuma yayiwahi yidi kumbidi. Chumanyi chitwatela kwila hakwila nawu tutwalekihu kuumika? Chibaaba chinalondelihu chikatukwasha kwiluka yuma yitwatela kutwamijaku muchihandilu chetu “[nikwiluka] yuma yalema nankashi.”—Fwi. 1:9, 10.