1. Anyi azatiliku mudimu wakutuña chipompelu muFwilipi?

KAPOSTOLU PAWULU, Silasi, Luka, niTimotewu chashikiliwu mumusumba waFwilipi wayuulileñawu kudi aRoma, awanini antu amavulu akeñesheli nankashi nsañu yaWanta. Awa amanakwetu adikita azatiliku mudimu wakutuña chipompelu nawa atumbanji ejima atachikili kupompela hamu, hadaha mwitala daLidiya mukwakwitiya wadiña nachisambu.—Yil. 16:40.

2. Kukalanyi kwamweni ichi chipompelu?

² Hashimbwili wanyi ichi chipompelu chachiha chatachikili kumona kukala. Satana wasañumwini antu aheleli chalala kutachika kudimbulula mudimu wakushimwina wazatileña akwaKristu ashinshika. Pawulu naSilasi ayikasili, ayeteli natubama nikuyisha mukaleya. Hanyima yakuyifumisha mukaleya, ayili nakuhempula atumbanji amaha nikuyikolesha. Nkumininaku, Pawulu, Silasi niTimotewu afumini mumusumba hadaha Luka washalili. Awa amanakwetu niahela ekalili akwaKristu elili ñahi? Yehova wayikwashili naspiritu yindi nawa atwalekelihu kumukalakela neyena. (Fwi. 2:12) Dichi, Pawulu wayitiyili kuwaha!

3. Kwesekeja nachinashimuniwu haAfwilipi 1:9-11, chumanyi chalombeliyi Pawulu?

³ Kwakwihi nayaaka 10 yahitilihu, Pawulu wasonekeleli chipompelu chamuFwilipi mukanda. Neyi mutaña iwu mukanda, munateli kumona kukeña kwakeñeliyi Pawulu amanakwindi. Wasonekeli nindi: “[Innakufwila] kwikala hamu  nanenu ejima muloña nayikeña neyi chayikeñeliyi Kristu Yesu.” (Fwi. 1:8) Wayisonekeleli nindi wadiña nakuyilombelaku. Wamulombeli Yehova nindi yayikwashi kulonda kukeña kwawu kusweji, kulonda eluki yuma yalema nankashi, abuli hakuyinkela muloña, atondolweleña kuhukesha antu amakwawu nikutwalekahu kusoña nyikabu yakuloña. Makonu, ninetu tunateli kudizilaku yuma yayivulu kumazu aPawulu akufuma hamuchima. Dichi tutañenu nsañu yayisonekeleliwu Afwilipi kudi Pawulu. (Tañenu Afwilipi 1:9-11.) Tukuhanjeka cheñi hayikuma yashimwiniyi nichitunateli kuyizatisha.

4. Kwesekeja na 1 Yowanu 4:9, 10, Yehova watumwekesheleli ñahi kukeña kwindi? (b) Tunateli kumukeña ñahi Nzambi?

⁴ Yehova wamwekesheli kukeña kwindi hakutemesha Mwanindi hamaseki kulonda yatufwili kukola nshidi jetu. (Tañenu 1 Yowanu 4:9, 10.) Kukeña kwaNzambi kwatuleñelaña kumukeña yena. (Rom. 5:8) Tunateli kumukeña ñahi Nzambi? Yesu wakwili ilu lwihu hamulejeliyi kaFwarisi nindi: “Keñaku Yehova Nzambi yeyi namuchima weyi wejima, nawumi weyi wejima, nayitoñojoka yeyi yejima.” (Mat. 22:36, 37) Twatela kumukeña Nzambi namuchima wetu wejima. Nawa tunakukeña kutwalekahu kumukeña nankashi. Pawulu wayilejeli Afwilipi nindi kukeña kwawu “kusweji nankashi.” Yumanyi yitwatela kwila hakwila nawu tusweji kumukeña Nzambi?

5. Kukeña kwetu kunateli kuswejelaku ñahi?

⁵ Twatela kumwiluka Nzambi hakwila nawu tumukeñi. Bayibolu yahosha nawu: “Muntu wejima wabulaña kumwekesha kukeña, hamwiluka Nzambiku, muloña Nzambi hikukeña.” (1 Yow. 4:8) Kapostolu Pawulu wamwekesheli nindi kukeña kutwamukeña Nzambi kwaswejaña nankashi “nakwiluka kwalala nikashinshi kakeni” hadi Yena. (Fwi. 1:9) Mpinji yitwatachikili kudiza Bayibolu, twatachikili kumukeña Nzambi hela chakwila hitwelukili yuma yayivulu hadi yenaku. Ilaña chitwadizili nankashi hadi Yehova, twatachikili kusweja kumukeña. Dimuloña waweni wutwalemeshela nankashi kudiza Bayibolu mpinji yejima nikutoñojoka chikupu Hezu daNzambi muchihandilu chetu!—Fwi. 2:16.

6. Kwesekeja na 1 Yowanu 4:11, 20, 21, munjilanyi mutwatela kuswejela kwikala nakukeña?

⁶ Kukeña kutwamukeña Nzambi kukutuletesha kukeña amanakwetu. (Tañenu 1 Yowanu 4:11, 20, 21.) Tunateli kutoñojoka netu chinateli kwikala chaswayi kukeña amanakwetu. Muloña twadifukulaña kudi Yehova nikweseka kwimbujola yilwilu yindi yayiwahi. Twalondelaña chakutalilahu chaYesu, wadiña nakukeña kwasweja chakwila wahanini niwumi windi kukola etu. Hela chochu, mpinji yikwawu chinateli kutukalila kulondela lushimbi lwakudikeña wumu namukwawu. Talenu chuma chamwekeni muchipompelu chamuFwilipi.

7. Yumanyi yitwadizilaña kukufumba kwayifumbiliwu aEyodiya naSintiki kudi Pawulu?

⁷ Eyodiya niSintiki adiña ahela adikita nankashi azatilili “hamu” nakapostolu Pawulu. Hadaha, wubwambu wawu wamanini muloña wakubula kutiyañana. Pawulu wasonekeleli chipompelu mwadiña awa ahela mukanda. Dichi muniwu mukanda wayikonkomweneni aEyodiya naSintiki kwikala “nayitoñojoka yoyimu.” (Fwi. 4:2, 3) Pawulu watoñojokeli cheñi nindi chidi hohu chiwahi kuleja  chipompelu chejima, nindi: “Ilenuña yuma yejima chakadi kutooba nikutaadeka.” (Fwi. 2:14) Chakadi nikujina, iku kufumba kwayikwashili awa ahela ayedi ashinshika kushilahu nichipompelu chejima kudikeña nankashi wumu namukwawu.

8. Chumanyi chatukañeshaña kukeña amanakwetu, nawa tunateli kuchitondolwela ñahi?

⁸ Kufwana Eyodiya naSintiki, hadaha chatukalilaña nankashi kudikunda nawamanakwetu, muloña twashaña muchima hayiluwa yawu. Wejima wetu twaluwañeshaña mpinji yejima. Neyi tushaña maana hayiluwa yawakwetu, tukuleka kuyikeña. Chakutalilahu, neyi manakwetu yajimbalaku kwinza nakutukwashaku kuwahisha Itala daWanta, twaneñaña. Neyi tutachika kuchinda yiluwa yejima yinakoñiyi manakwetu, tukuhila nankashi chakwila tukumuhela. Neyi mwekala nakukala kwamuchidiwu namanakwenu muchipompelu, chikuwaha neyi mukwanukaña nenu: Yehova weluka nindi twawanina wanyi kushilahu niamanakwetu. Ilaña, hela chakwila twawanina wanyi, watukeña hamu nawamanakwetu. Muloña wachumichi, twatela kwimbujola kukeña kwaYehova nikumona yuma yayiwahi mudi amanakwetu. Neyi tuzata nañovu nakukeña amanakwetu, tukwikala anuñañana.—Fwi. 2:1, 2.

9. Yumanyi yalema nankashi’ yashimwiniyi Pawulu mumukanda wasonekeleliyi chipompelu chamuFwilipi?

⁹ Spiritu yajila yamukwashili Pawulu kuleja antu adiña muFwilipi niakwaKristu ejima ‘kwiluka yuma yalema nankashi.’ (Fwi. 1:10) Iyi yuma yalema munabombeli kujilika ijina daYehova, kushikijewa kwayikaninu yindi, kuwunda nikunuñañana kwachipompelu. (Mat. 6:9, 10; Yow. 13:35) Neyi chihandilu chetu chishindamena haniyi yuma yalema, tukumwekesha netu twamukeña Yehova.

10. Yumanyi yitwatela kwila kulonda tubuli kwikala nahakutwinkela muloña?

¹⁰ Pawulu wahosheli cheñi nindi twatela kwikala ‘nahakubula kutwinkela muloña.’ Ichi hichinatalishi mukwila nawu twatela kwikala awaninaku. Hitunateli kwikala awanina neyi chekalayi Yehova Nzambiku. Ilaña neyi tuzata hanakumini ñovu jetu kulonda tuswejeshi kukeña nikufwila yuma yalema chikupu, Yehova wukutumona nindi tudana hakutwinkela muloña. Njila yimu mutwamwekeshelaña kukeña kwetu hikuzata nañovu kulonda tutondolweleña kuhukesha antu amakwawu.

11. Muloñadi chitwatela kutondolwela kuhukesha antu?

¹¹ Kufumba kwakwila nawu tondolwelenuña kuhukesha amakwawu hikusoñamisha chikupu. Tunateli kuhukesha ñahi muntu? Kuhitila muyisela, yakuvwala yitwavwalaña hela nyidimu yitwazataña. Hadaha twelaña wanyi yuma yahelayi Yehova. Ilaña neyi yuma yitukutonda yinateli kuneñesha chinleji chamuntu nawa yahukana, dikwila nawu himuloña weneni. Yesu wahosheli nindi chikuwaha atukasila ilola dalema munshiñu nakutunatila hakaluñalwiji kakunama kubadika kuhukesha mukoku windi!—Mat. 18:6.

12. Yumanyi yitunadizili kudi apayiniya adisumbula?

¹² Talenu apayiniya ayedi adisumbula chazatishiliwu mazu aYesu. Adiña muchipompelu chimu nawakwakushimwina adisumbula ayedi afumini nakupapatishewa nawa akulilili muchisaka mwakanishiliwu yuma yikwawu. Awa adisumbula akuhweleleli nawu akwaKristu hiyatela kuya nakutala mavidiyo adi ejimaku. Ilaña chelukiliwu nawu apayiniya adisumbula atalili fwilimu aneñeli nankashi. Hanyima yachumichi, apayiniya adisumbula  alekeli kuya nakutala mafwilimu sampu nichadizishiliwu awa adisumbula yinleji yawu, yakwambula yuma yayiwahi nayatama. (Heb. 5:14) Chuma chelili awa apayiniya chinakumwekesha nawu akeñeli nankashi iwu manakwetu nimuhela mumazu nimuyilwilu.—Rom. 14:19-21; 1 Yow. 3:18.

13. Tunateli kuleñela ñahi muntu kukoña nshidi?

¹³ Njila yikwawu mutunateli kuhukeshela antu amakwawu hikuyileñela kukoña nshidi. Chumichi chinateli kuzatika ñahi? Fwikijenu ichi chakutalilahu. Iwu kadizi waBayibolu nazati nañovu yejima hakwila nawu yaleki kunwa walwa, nkumininaku nakeheshiku kunwa. Dichi namoni nindi watela kuleka kunwa chikupu. Hakushikena kuhimpa yilwilu yindi nawa napapatishewi. Mukuhita kwamafuku, mukwaKristu wapama hakumutambika nindi adiluñishi yakuda nawa hakumwinka walwa nindi: “Nwaku! Ichi dinu wunekali mukwaKristu; spiritu yaYehova yidi naneyi. Chilwilu chimu chaspiritu yajila hikudihemba. Wukudihemba kwakama nehi, nwakuhu hohu twantesha.” Chinateli kwikala chatama nankashi neyi iwu manakwetu wunapapatishewi katataka wukwiteja idi ikakeja nawa yatachika cheñi kuteñuka nawalwa.

14. Kupompa kwetu kwatukwashaña ñahi kuzatisha nshimbi yekala haAfwilipi 1:10?

¹⁴ Kupompa kwetu kwawakwaKristu kwatukwashaña kuzatisha kufumba kwekala haAfwilipi 1:10 munjila jashiyashana. Chatachi, yuma yitwadizaña kukupompa  yatukwashaña kwiluka yuma yamonañayi Yehova nindi yalema nankashi. Chamuchiyedi, twelukaña chakuzatisha yuma yitwadizaña kulonda twikali nahakubula kutwinkela muloña. Nawa chamuchisatu, twadisañumunaña “kukeña nikukoña nyidimu yayiwahi.” (Heb. 10:24, 25) Neyi tunakudikolesha nawamanakwetu, kukeña kutwamukeña Nzambi niamanakwetu kwaswejelañaku nankashi. Neyi tumukeña Nzambi niamanakwetu namuchima wejima tukutondolwela kuhukesha amanakwetu.

15. ‘Kwinzala nanyikabu yaloña’ kwatalisha mudihi?

¹⁵ Pawulu walombeli chakufuma hamuchima nindi Afwilipi “[enzali] nanyikabu yaloña.” (Fwi. 1:11) Chakadi nikujina, muniyi “nyikabu yaloña” mwabombeleli kumukeña Yehova niantu jindi. Mwabombeleli cheñi chahanjekeleñawu nawantu hayuma yakuhweleleliwu hadi Yesu nikuchiñeja kwawu. Afwilipi 2:15 yazatisha chakutalilahu chikwawu, chakwila nawu ‘kutoñeka neyi yejeji mukaayi.’ Ichi chakutalilahu chinateleli muloña Yesu wateneni atumbanji twindi nindi “chejeji chamukaayi.” (Mat. 5:14-16) Wayilejeli cheñi akwakumulondela nindi ‘mwakelishi atumbanji’ nawa wayilejeli nindi “mwakekala ayinsahu . . . nikwakumina iseki dejima.” (Mat. 28:18-20; Yilw. 1:8) Twasoñaña “nyikabu yaloña” neyi tuzataku iwu mudimu walema nankashi.

16. Afwilipi 1:12-14 yinakumwekesha ñahi nawu tunateli kutoñeka neyi yejeji hela chakwila tunakumona kukala? (Talenu mwevulu wudi hakava.)

¹⁶ Hichikweti muloña nakukala kutunakumonaku, tunateli kutoñeka neyi yejeji. Mpinji yikwawu, yuma yamwekanaña neyi ikañesha dakushimwinamu yekalaña hikukooleka kwakwila nawu tushimwinimu.  Chakutalilahu, kapostolu Pawulu amukasilili muRoma mwitala hampinji yayisonekeleliyi Afwilipi mukanda. Ilaña hela chakwila wadiña mukaleya, walekeli wanyi kuyishimwina antu amuhembeleña niantu enjileña nakumutala. Pawulu washimwinineña chikupu muniji mpinji nawa chumichi chayikolesheli amanakwetu “kuhosha izu daNzambi chakadi woma.”—Tañenu Afwilipi 1:12-14; 4:22.

17. Shimunenu chakutalilahu chamakonu chinakumwekesha kusoña nyikabu mumpinji yakala.

¹⁷ Amanakwetu amavulu niahela amwekeshaña kuhamuka neyi kwamwekesheliyi Pawulu. Ashakamaña mumatuña mwabulaña kushimwinawu hatooka hela kwitala nikwitala, ilaña awanaña njila yakushimwinamu nsañu yayiwahi. (Mat. 10:16-20) Mwituña dimu nkoñi wañinza wahosheli nindi mukwakushimwina wejima yashimwineña ‘mwiluña’ mudi antaña jindi, akwawu mwashakaminañawu, akashikola, mwazatilañawu nimwahemenañawu. Hadi yaaka yiyedi yipompelu yavulili muniyi ñinza. Hadaha kutwashakamaña akanishaña wanyi kushimwina. Hela chochu tunateli kudizilaku kudi awa amanakwetu niahela: Mpinji yejima dikitenuña chikupu mudimu wakushimwina, kuhwelelenuña nenu Yehova wukuyinka ñovu yabadika kulonda mutwesheña kushinda kukala kwejima.—Fwi. 2:13.

18. Chumanyi chitunakufwila kwila?

¹⁸ Dichi muyinu mpinji yinashaliku, tushiku muchima nakuzatisha kufumba kwaPawulu kwonenewa kwasonekeleliyi Afwilipi. Tutwalekihu kusha muchima kuyuma yasweja kulema, kwikala nahakubula kutwinkela muloña, kutondolwela kuhukesha akwetu nikusoña nyikabu yaloña. Kuhiñahu kukeña kwetu kukusweja nankashi nikuleta kalemesha kudi Yehova, Tata yetu wukweti kukeña.