CHIKUHWELELU chatwinkaña ñovu. Chakutalilahu, neyi Satana nakukeña kuluwañesha wubwambu wetu naYehova, chikuhwelelu chatukwashaña “kujima nachu nyivu yakesi yanowu watama.” (Efwe. 6:16) Neyi tudi nachikuhwelelu tunateli kuumika kukala kweneni kudi neyi jimpidi. Yesu walejeli atumbanji twindi nindi: “Neyi mukweti chikuhwelelu chesekana naluchacha lwamositadi, mukuleja iyi mpidi nenu, ‘Fumaku aha wuyi hana,’ yikufumahu.” (Mat. 17:20) Chineli tuneluki netu chikuhwelelu chinateli kukolesha wubwambu wetu naYehova, twatela kutoñojoka hanawa malwihu: Chikuhwelelu hichumanyi? Chikuhwelelu chetu chinateli kwikala ñahi neyi twalemesha chalala? Tunateli kukolesha ñahi chikuhwelelu chetu? Nawa hinyi itwatela kukuhwelela ?—Rom. 4:3.

Chikuhwelelu chabadika hakukuhwelela hela hakwiteja hohu chalala, muloña ‘Andemoni niwena akuhwelela [nawu kwekala Nzambi] nawa azaalaña.’ (Yak. 2:19) Hanu dinu, chikuhwelelu hichumanyi?

Bayibolu yalumbulula chikuhwelelu munjila jiyedi. Yatachi, “chikuhwelelu hikwiluka chikupu netu yuma yitwachiñejaña yidi kwoku.” (Heb. 11:1a) Neyi mukweti chikuhwelelu dikwila nawu mwakuhwelela chikupu nenu yuma yejima yahoshañayi Yehova yalala nawa yikashikijewa. Chakutalilahu Yehova wayilejeli aisarela nindi: “Neyi mwakatwesha kujaha chitiyañenu chami chamwaana nichitiyañenu chami chawufuku mwaka mwakabuli kwikala mwana nawufuku hawu hekalilañawu komana nichitiyañenu chami chinatiyañeni nakambuñami Davidi akatwesha kuchijaha.” (Yere. 33:20, 21) Komana mwatiyaña woma nenu itena dikaleka kusela hela kuhuma, chuma chikaletesha kukabuli kwikala mwaana niwufuku? Neyi mwajinokaña wanyi nshimbi yaleteshaña iseki dinyeñumukeña kwitena munjila mudanyeñumukilaña, komana mukujinoka nenu Nleñi washaku iji nshimbi nateli kubula kushikija yikaninu yindi? Inehi mwani!—Isa. 55:10, 11; Mat. 5:18.

Yamuchiyedi, chikuhwelelu “hichinjikijilu chamwekeshaña nawu yuma yitwakuhwelela yalala hela chakwila hitwayimonaku.” Chikuhwelelu achishimuna nawu “hichinjikijilu chamwekeshaña” hela “hiwunsahu walala wamwekeshaña” yuma yitwabulaña kumona namesu nawa netu yalala. (Heb. 11:1b; tth.) Munjilanyi? Fwikijenu mwana nayihuli nindi, muneluki ñahi nenu mpepela yekala kwoku? Hela chakwila kanda mumoneñahu dehi mpepela, mukumuleja yuma yekalaku yamwekeshaña nawu mpepela yekala kwoku chidi neyi, kwona, chiyazataña kushila tuhu niyuma yikwawu. Neyi mwana yakuhwelela nindi iyi yuma mwalala yekala kwoku, chikwikala chaswayi kukuhwelela yuma yabulaña kumwekana. Munjila yoyimu, chikuhwelelu chashindamena hawunsahu walala.—Rom. 1:20.

Chineli chikuhwelelu chashindamena hachinjikijilu, hakwila nawu muntu yekali nachikuhwelelu, chatachi watela kwikala “nakwiluka kwalala kwakwiluka chalala.” (1 Tim. 2:4) Bayi neyi watela kukumina hohenahaku. Kapostolu Pawulu wasonekeli nindi: “Namuchima, muntu wakuhwelelaña.”  (Rom. 10:10) Muntu watela kukuhwelela chalala nikuchikeña. Kuhiñahu dinu hakumwekesha chikuhwelelu, dikwila nawu kushakama kwesekeja nachakeñañayi Nzambi. (Yak. 2:20) Muntu wabulaña kusakilila chalala nateli nikukaana wunsahu walala, muloña nakukeña kuleka wanyi yuma yakuhwelelayi hela kufwila kwila yuma yinakukeñayi. (2 Pet. 3:3, 4; Yuda 18) Dimuloña waweni waletesheli antu ejima amweni yihayamisha kubula kwikala nachikuhwelelu. (Kuch. 14:11; Yow. 12:37) Spiritu yajila yaNzambi yakwashaña hohu antu akeña yuma yalala kwikala nachikuhwelelu.—Ñal. 5:22; 2 Tes. 2:10, 11.

Mwanta Davidi wadiña hakachi kawantu adiña nachikuhwelelu chakola. (Heb. 11:32, 33) Hela chochu, bayi neyi ejima muchisaka chaDavidi adiña nachikuhwelelu chakolaku. Chakutalilahu, hampinji yimu Eliyabi, yaya aDavidi wamwekesheli nindi wadiña wudana chikuhwelelu chamuzuwililiyi Davidi, hakumumona nakuhosha hansañu yaGoliyati. (1 Sam. 17:26-28) Kwosi muntu wavwalikaña nachikuhwelelu hela wachiswanaña kudi anvwali jindiku, dichi Davidi wekalili nachikuhwelelu muloña wakwikala ibwambu daNzambi.

Mumukanda wa Masamu 27, Davidi nashimuni chekaliliyi nachikuhwelelu chakola. (Muvasi. 1) Davidi watoñojokeli nankashi hayuma yamumwekeneni kunyima nicheliliyi Yehova nawayilumbu jindi. (Muvasi. 2 ni 3) Wamusakililili nankashi Yehova chashiliku ntanjikilu yakudifukula. (Muvasi. 4) Davidi wadifukwileña kudi Nzambi hamu nawakwawu akwakwitiya hatabanaka. (Muvasi. 6) Wamukeñakeñeli Yehova mukulomba. (Muvasi. 7 ni 8) Davidi wakeñeleña cheñi nindi Nzambi yamulomboli munjila yindi. (Muvasi. 11) Chikuhwelelu chadiña chalema nankashi kudi Davidi chakwila wenhwili nindi: ‘Nadi kwikala kudihi neyi nabulili chikuhwelelu?’—Muvasi. 13.

Munateli kwikala nachikuhwelelu neyi chaDavidi neyi mwimbujola yitoñojoka niyilwilu yashimunawu haMasamu 27. Chineli chikuhwelelu chashindamena hakwiluka kwalala, chimwadiza nankashi Izu daNzambi ninyikanda yashindamena haBayibolu, chikuyikwasha kumwekesha nyikabu yaNzambi yakuspiritu. (Mas. 1:2, 3) Ikalenuñaku nampinji yakutoñojoka chikupu neyi munakudiza. Neyi mutoñojokaña chikupu hayuma yimunakudiza, mukusweja kusakilila kudi Yehova. Nawa muloña wakumwekesha kusakilila kudi Yehova mukufwilaña kumwekesha chikuhwelelu chenu kuhitila mukudifukula kudi yena hakupompa nikushimwina kuchiñeja kumukweti kudi akwenu. (Heb. 10:23-25) Cheñi, twamwekeshaña chikuhwelelu neyi tutwalekahu “kulomba mpinji yejima chakadi kuleka.” (Luka 18:1-8) Dichi, “lombenuña mpinji yejima” kudi Yehova, nakukuhwelela nenu “wayakamenaña.” (1 Tes. 5:17; 1 Pet. 5:7) Chikuhwelelu chatuleñelaña kukoñahu chuma nawa yuma yitwakoñaña yakoleshaña chikuhwelelu chetu.—Yak. 2:22.

Hawufuku wakwila Yesu kanda yafwi, walejeli atumbanji twindi nindi “Mukuhwelelenu Nzambi;  kuhwelelenu ninami nawa.” (Yow. 14:1) Dichi twatela kumukuhwelela Yehova niYesu. Munateli kumukuhwelela ñahi Yesu? Tushinshikenu njila jisatu.

Chatachi, monenuña ifutu danyiloña nenu hichawaana chayinkayi Nzambi nkawenu. Kapostolu Pawulu wahosheli nindi: “Nahandaña muloña wakukuhwelela mudi Mwana kaNzambi, wankeñeli nawa wadihanini yomweni kukoola ami.” (Ñal. 2:20) Neyi mumukuhwelela Yesu, dikwila nawu munakuhweleli chikupu nenu ifutu danyiloña dinayikundami, didu dakayanakenawu nachu nshidi yenu nawa dihashindamena kuchiñeja kwenu kwawumi wahaya nyaaka nawa dichinjikijilu chamwekeshaña nawu Nzambi wayikeña. (Rom. 8:32, 38, 39; Efwe. 1:7) Neyi mukuhwelela chikupu nenu ifutu danyiloña dinateli kuyikwasha, mukudinkaña wanyi nyiloña nikuditiya kutama.—2 Tes. 2:16, 17.

Chamuchiyedi, Swinenu kwakwihi naYehova mukulomba kuhitila mumulambu waYesu. Muloña wefutu danyiloña, tunateli kulomba kudi Yehova “nakuhosha nakukasunuka, kulonda atutiyili wushona niluwi lwasweja lwakutukwasha hampinji yatelela.” (Heb. 4:15, 16; 10:19-22) Kulomba kwatukwashaña kukaana kweseka kunateli kutuleñela kukoña nshidi.—Luka 22:40.

Chamuchisatu, mwovwahilenu Yesu. Kapostolu Yowanu wasonekeli nindi: “Muntu wamukuhwelelaña Mwana wakekala nawumi wahaya nyaaka; hakwila muntu wadikañaña naMwana hakekala nawumiku, ilaña kuzuwa kwaNzambi kwakekala hadi yena.” (Yow. 3:36) Yowanu wamwekesheli chaambu chekala hakwikala nachikuhwelelu nakubula kwovwahila. Dichi, mwamukuhwelelaña Yesu neyi mumwovwahila. Mwamwovwahilaña Yesu neyi mulondelaña “lushimbi lwaKristu,” dikwila nawu yuma yejima yatañishileñayi ninshimbi jindi. (Ñal. 6:2) Mwamwovwahilaña cheñi Yesu kuhitila mukulondela wunlomboli watwinkañayi kuhitila mudi “nduñu wamaana nikashinshi.” (Mat. 24:45) Kuhitila mukumwovwahila Yesu, mukwikala nañovu yakuumika kukala kwasweja kudi neyi mankanda añovu.—Luka 6:47, 48.

Iyala wumu wamubidikili Yesu nindi: “Nikweti chikuhwelelu! Nkwashi niikali nachikuhwelelu chakola!” (Maku 9:24) Wadiña nachikuhwelelu chantesha, iwu iyala wadiña wadizoza nawa welukili nindi wakeñekeleña kwikala nachikuhwelelu chakola. Kufwana iwu iyala, kukekala mpinji yitwakakeña wejima wetu kwikala nachikuhwelelu chakola. Dichi wejima wetu twatela kukolesha chikuhwelelu chetu. Neyi chitunadizi, twakoleshaña chikuhwelelu chetu neyi tunakudiza Izu daNzambi nikutoñojokahu chikupu nawa chikutukwasha kumukeña Yehova. Chikuhwelelu chetu chakolaña cheñi neyi etu, hamu nawakwetu akwakwitiya, tunakudifukula kudi Yehova, kuleja antu amakwawu yuma yitwachiñejaña nikutwalekahu kulomba. Kubombelahu, neyi tukolesha chikuhwelelu chetu, twatambwilaña nkisu yayivulu. Izu daNzambi datulejaña nawu: “Enu akwetu itwakeña, dituñenuña enu aweni muchikuhwelelu chenu chajila chikupu . . . kulonda mushakameña mukukeña kwaNzambi.”—Yuda 20, 21.