1. Davidi wahosheli nindidi hakudizoza kwaYehova?

KOMANA mwalala Yehova wadizoza? Eña. Mpinji yimu Davidi wahosheli nindi: “Wunanyinki nkebu yawamwinu wami; kuwunda kweyi [kudizoza kweyi NWT] kunanyinki kulema.” (2 Sam. 22:36; Mas. 18:35) Hadaha Davidi wadiña nakutoñojoka hefuku denjili kaprofwetu Samweli kwitala datata yindi nakuwayisha wakaswana hawanta muIsarela. Davidi diyi wadiña kansi hadi anyana 8, ilaña diyi atondeliwu kudi Yehova kumusinsa Mwanta Sawulu.—1 Sam. 16:1, 10-13.

2. Tukuhanjekadi muchinu chibaaba?

² Davidi wadi kwiteja mazu ahosheli ñimbi yamasamu kutalisha hadi Yehova nindi: “Wadizozaña nakutala niyuma yamumawulu niyuma yahamaseki. Diyi wanonaña kazweñi hamaseki diyi wanyamunaña wabula yuma . . . kulonda amushakamishi hamu nawayilolu.” (Mas. 113:6-8) Muchinu chibaaba, tukuhanjeka ntahi hayuma yalema kutalisha hakudizoza kuhitila mukuhanjeka njila jimu mwamwekesheleliyi Yehova ichi chilwilu. Nkumininaku tukushinshika cheñi yuma yitunateli kudizila kudi Mwanta Sawulu, kaprofwetu Danyeli niYesu kutalisha hachilwilu chakudizoza.

3. Yehova welaña ñahi nawantu jindi, nawa chumichi chamwekeshañadi?

³ Yehova wamwekeshaña nindi wadizoza kwesekeja nachelañayi nawakwakudifukula indi abula kuwanina. Wetejaña kudifukula kwetu nawa watumonaña nindi tudi amabwambu jindi. (Mas. 25:14) Hakwila nawu twikali amabwambu jindi, Yehova wahanini Mwanindi kwikala mulambu wahanshidi jetu. Yehova wukweti luwi niwushona.

4. Chumanyi chatwinkayi Yehova, nawa muloñadi?

 ⁴ Toñojokenu cheñi hanjila yikwawu mwamwekeshelañayi Yehova nindi wadizoza. Chineli Yehova diyi Nleñi, kachi watuleñeli nawuswa wakubula kudifuukwila etu aweni yuma yitukukeña kwila. Ilaña dicheliliyi wanyi. Watuleñeli muchifwana chindi nawa watwinka wuswa wakudifuukwila. Wakeñaña nindi tumukalakeleña chakufuma hamuchima muloña wakumukeña nawa tweluka yuma yayiwahi yafumaña mukumwovwahila. (Kuhit. 10:12; Isa. 48:17, 18) Twasakililaña chikupu muloña wakwila Yehova wadizoza.

5. Yehova watudizishaña ñahi kwikala adizoza? (Talenu mwevulu wudi hakava.)

⁵ Yehova watudizishaña kwikala adizoza kwesekeja nachatwilañayi. Yehova diyi wasweja maana mukuleña kwejima. Hela chochu, wetejaña yitoñojoka yawantu. Chakutalilahu, Yehova wamwitejeli mwanindi kumukwashaku kuleña yuma yejima. (Yish. 8:27-30; Kol. 1:15, 16) Nawa hela chakwila Yehova diyi wañovu jejima, wenkaña antu amakwawu nyidimu. Chakutalilahu, wamutonda Yesu kwikala Mwanta waWanta nawa wakenka a 144,000 wuswa wakuyuula hamu naYesu. (Luka 12:32) Yehova wamudizisha Yesu kwikala Mwanta nawa kaPristu Muneni. (Heb. 5:8, 9) Wayidizisha cheñi antu akayuula hamu naYesu, ilaña helaña yayinka mudimu yafunta cheñi nakuyimena kulonda yayilomboleña mutuyuma twejimaku. Ilaña wayikuhwelela nindi akwila nkeñelu yindi.—Chim. 5:10.

6-7. Yumanyi yitunateli kudizila kudi Tata yetu wamwiwulu kutalisha hakwinkaku amakwawu nyidimu?

⁶ Neyi chakwila Tata yetu wamwiwulu wukweti ñovu yakuzata nyidimu yejima yahana nyidimu kudi antu amakwawu, indi  etu tukubuliladi. Chakutalilahu, komana mudi mutu wachisaka hela mukulumpi muchipompelu? Mwimbujolenu Yehova kuhitila mukuyinkaku amakwawu nyidimu nikubula kuyitalatala neyi anakuzata. Neyi mumwimbujolaña Yehova, nyidimu yikwendaña swayi nawa mukudizisha amakwawu nyidimu nikuyikwasha kukuhwelela nawu niwena anateli kuzataku. (Isa. 41:10) Yumanyi yikwawu yinateli kudizilawu antu akweti wuswa kudi Yehova?

⁷ Bayibolu yamwekeshaña nawu Yehova watiyililaña nimwahoshañawu añelu. (1 Anya. 22:19-22) Enu anvwali, munateli kumwimbujola añahi Yehova? Neyi chinatwesheki, yihulenu anyanenu ayileji chinakutoñojokawu chakuzata owu mudimu. Neyi yitoñojoka yawu yidi chiwahi, ilenu mwenomu.

8. Yehova wadiwunjikili ñahi kutalisha hadi Abarahama naSara?

⁸ Yehova wamwekeshaña cheñi nindi wadizoza kuhitila mukudiwunjika. Chakutalilahu, Yehova wadiwunjikaña neyi antu adifukulaña kudi yena anakumwihula nakalemesha munafuukuliyi. Wamutiyilili Abarahama chadiña nakudakamenayi mwafuukwiliyi kutalisha hakukisañana Sodoma naGomora. (Kutach. 18:22-33) Anukenu cheñi cheliliyi Yehova naSara ñoda Abarahama. Chelili Sara yasehi hakutiya nawu wakabaaba ivumu muwushinakaji, Yena haneñeli hela kuhilaku. (Kutach. 18:10-14) Ilaña wamulemesheli Sara.

9. Yumanyi yinateli kudizilawu anvwali niakulumpi kudi Yehova?

⁹ Enu anvwali niakulumpi, yumanyi yimunateli kudizila kudi Yehova? Mwelaña ñahi neyi anyanenu hela amakwawu muchipompelu akaana mumunafuukuli? Komana mwashikenaña kuyifumba? Tahindi mwayihulaña chinakutoñojokawu? Yisaka niyipompelu yahetelañamu neyi anakulombola anakumwimbujola Yehova. Tunahanjeki yuma yitunateli kudizila kudi Yehova kutalisha hakwikala adizoza. Ichi dinu tuhanjekenu yuma yitunateli kudizila kudi antu ashimunawu muBayibolu kutalisha hakudizoza.

10. Yehova wazatishaña ñahi yakutalilahu yamuBayibolu hakutudizisha?

¹⁰ Chineli diyi ‘Ntañishi yetu Wabadika,’ Yehova wasoneka yakutalilahu Mwiizu dindi kulonda yatudizisheña. (Isa. 30:20, 21) Twadizilaña kuyakutalilahu yamuBayibolu kutalisha hadi antu adiña nayilwilu yamuzañaleshaña Nzambi, kushilahu tuhu nikudizoza. Twadizilaña cheñi kuyuma yayimwekeneni antu abulili kumwekesha iyi yilwilu yayiwahi.—Mas. 37:37; 1 Kor. 10:11.

11. Yumanyi yitukudizila kuchakutalilahu chaSawulu?

¹¹ Toñojokenu chuma chamumwekeneni Mwanta Sawulu. Wadiña wadizoza henohu kanda yekali mwanta. Welukili mwakukumina nawa wachinineña kumudiisha wanta. (1 Sam. 9:21; 10:20-22) Ilaña mukuhita kwampinji, Sawulu wadivwimbili. Wamwekesheli ichi chilwilu chatama hanyima yakwikala hohu mwanta. Mpinji yimu hadiña nakumuchiñililawu kaprofwetu Samweli, wakañenyi kudiwunjika. Chatela yadizozi nikumukuhwelela Yehova nindi wukuyikwasha antu jindi, Sawulu wahanini mulambu wakushita hela chakwila wadiña wanyi nawuswa wakushita nyilambu. Chafuminimu, wajimbesheli wuselewa windi naYehova nawa amukaanini kwikala mwanta. (1 Sam. 13:8-14) Ichi  chakutalilahu chinakutudizisha nawu twatela kutondolwela kwila yuma yitunabuli kwikala nawuswa wakuyila.

12. Danyeli wamwekesheli ñahi kudizoza?

¹² Kwambukaku naSawulu, talenu yuma yayiwahi yeliliyi kaprofwetu Danyeli. Muchihandilu chindi chejima, Danyeli wadiña kambuña Nzambi wadizoza nawa mpinji yejima walombeleña kudi Yehova kulonda yamulomboleña. Chakutalilahu, Yehova wamuzatishili Danyeli kumulumbulwila Nebukaneza chilota, dichi Danyeli hetejeli kumulemesha muloña wakulumbulula chilotaku. Ilaña wahanini kalemesha kejima nimpuhu kudi Yehova. (Dan. 2:26-28) Tunakudizilaku kwodi? Neyi amanakwetu atiyaña kuwaha nampanji jitwahanaña nawa twelaña chiwahi mumudimu wakushimwina, twatela kumulemesha Yehova. Twatela kwanuka netu hitunateli kwila yuma yejimiyi chakadi wukwashu waYehovaku. (Fwi. 4:13) Neyi twilaña mwenimu, dikwila nawu tunakumwimbujola cheñi Yesu. Munjilanyi?

13. Kwesekeja naYowanu 5:19, 30, yumanyi yitwadizilaña kudi Yesu kutalisha hakudizoza?

¹³ Hela chakwila Yesu wadiña wawanina nawa Mwana kaNzambi, wamushindameneni Yehova. (Tañenu Yowanu 5:19, 30.) Hesekelihu kutambula wuswa waTata yindi wamwiwuluku. Afwilipi 2:6 yashimuna nawu Yesu “hadiña nayitoñojoka yakwila nindi kwesekana naNzambi dichuma chakeñeleñayi nankashiku.” Chineli wadiña Mwana wovwahila, Yesu welukili mwakukumina nawa walemesheli wuswa waTata yindi.

14. Yesu wakwili nindidi chamulombeliwu kwila chuma chabuliliyi kwikalayi nawuswa wakuhana?

¹⁴ Talenu chakwiliyi Yesu chelili kambanji Yakoba niYowanu hamu nimama yawu enzi nakumulomba nawu akayinki chuma chakwila yena wadiñahu wanyi nawuswa wakuhana. Chakadi kushintajala, Yesu wayilejeli nindi Tata yindi wamwiwulu hohu diyi wunateli kutonda watela kushakama kuchikasa chaYesu chachidiilu nichakuchimunswa muWanta. (Mat. 20:20-23) Yesu wamwekesheli nindi wukweti mwakukumina. Wadiña wadizoza. Helilihu chuma chabuliliwu kumuleja kudi Yehova nindi yeliku. (Yow. 12:49) Tunateli kumwimbujola ñahi Yesu?

15-16. Tunateli kuzatisha ñahi kufumba kwamuBayibolu kudi ha 1 Akorinda 4:6?

 ¹⁵ Twembujolaña chakutalilahu chaYesu chakwikala adizoza kuhitila mukuzatisha kufumba kwamuBayibolu kwekala ha1 Akorinda 4:6. Atulejaña nawu: “Bayi mubadika hayuma yasonekawuku.” Dichi neyi anatulombi wukwashu, bayi tukanjikijaña antu kulondela yitoñojoka yetuku hela kuhosha chakadi kutoñojoka chidi yumaku. Ilaña, twatela kulondela kufumba kwekala muBayibolu nimunyikanda yetu yashindamena haBayibolu. Muniyi njila, twamwekeshaña netu tuneluki hakukumina. Neyi twikala adizoza, twahanaña kalemesha kudi mwini ‘nshimbi jaloña’ Wañovu Jejima.—Chim. 15:3, 4.

¹⁶ Kubombela hakumulemesha Yehova, kudi cheñi yuma yikwawu yinateli kuletesha twikali adizoza. Ichi dinu tushinshikenu kudizoza nikwiluka hakukumina chikunateli kutuletela muzañalu nikutiyañana nawakwetu.

17. Muloñadi antu adizoza chekalilañawu namuzañalu?

¹⁷ Neyi twikala adizoza nawa twiluka hakumina, tukwikala namuzañalu chikupu. Munjilanyi? Neyi twiluka netu kudi yuma yitwatela kwila niyitwatela kubula kwila, tukusakililaña hawukwashu wutunatambwili kudi akwetu. Toñojokenu hampinji yokiliyi Yesu amayala 10 adiña nambumba. Wumu hohu diyi wafuntili nakumusakilila Yesu hakumuuka musoñu watama, chuma chadi kubula kwilayi halwindi. Iwu iyala wadizoza wasakilili chamuukiliwu nawa wamulemesheli Nzambi hachumichi.—Luka 17:11-19.

18. Kudizoza kwatukwashaña ñahi kutiyañana nawakwetu? (Aroma 12:10)

¹⁸ Antu adizoza atiyañanaña chiwahi  nawakwawu nawa ekalaña amabwambu. Munjilanyi? Amonaña yilwilu yayiwahi mudi akwawu nawa ayikuhwelelaña. Antu adizoza atiyaña kuwaha neyi amona akwawu anakuzata chiwahi mudimu wunayinkiwu nawa ayihamekaña nikuyilemesha.—Tañenu Aroma 12:10.

19. Muloñadi chitwatela kutondolwela kudivwimba?

¹⁹ Kwambukaku, chayikalilaña antu adivwimba kuhameka akwawu, ilaña wena akeñaña kuyihameka. Akeña kudesekeja nawakwawu nawa afwilaña kwikala abadika hadi akwawu. Chatela adizisheña akwawu nikuyinka wuswa, wena ahoshaña nawu, “Neyi wunakukeña neyi yuma yendi chiwahi, watela kuyizata eyi aweni.” Muntu wadivwimba wakeñaña kwikala walema nawa wekala nechima. (Ñal. 5:26) Kakavulu antu adivwimba hiyekalaña nawubwambu wakola nawakwawuku. Neyi twiluka netu twadivwimba, twatela kulomba chikupu kudi Yehova kulonda yotukwashi ‘kuhimpa yitoñojoka yetu’ kulonda kudivwimba kubuli kutanda mudi etu.—Rom. 12:2.

20. Muloñadi chitwatela kwikalila adizoza?

²⁰ Twasakililaña chikupu muloña wakwila Yehova wadizoza. Twamonaña chadizozayi kwesekeja nachelañayi nawambuña indi nawa twatela kumwimbujola. Kubombelahu, tunakukeña kwimbujola antu ashimunawu muBayibolu adiña adizoza nawa endeli naNzambi. Tumulemesheña Yehova mpinji yejima nikumutumbakesha. (Chim. 4:11) Neyi twila yuma yejimiyi, tukwikala amabwambu jaTata yetu wamwiwulu muloña yena wakeña antu adizoza.