1. Yehova weteja ambuñindi ashinshika kwiladi?

YEHOVA weteja ambuñindi ejima ashinshika kwikala muchipompelu chindi. Hela chakwila tukweti nyidimu yashiyashana, wejima wetu twalema nawa twatela kuzatilaña hamu. Kapostolu Pawulu watukwashaña kwiluka chichalemena kwila mwenimu. Munjilanyi?

2. Kwesekeja naAefwesesa 4:16, muloñadi chitwatela kudilemeshela wumu namukwawu?

² Neyi chinashimuniwu munsona hanashindameni achinu chibaaba, Pawulu wakonkomweneni nindi kwosi muntu wunateli kuleja mukwawu wamukalakelaña Yehova nindi “hinnakukukeña eyiku.” (1 Kor. 12:21) Hakwila muchipompelu mwikali kuwunda, twatela kudilemesha wumu namukwawu nikuzatila hamu. (Tañenu Aefwesesa 4:16.) Neyi twikala anuñañana, chipompelu chikwikala chakola nawa mukwikala muzañalu hama.

3. Yumanyi yitukuhanjeka muchinu chibaaba?

³ Njilanyi jikwawu mutunateli kumwekeshela netu twalemesha akwetu akwaKristu muchipompelu? Muchinu chibaaba tukudiza akulumpi chanateli kulemesha akwawu akulumpi. Kuhiñahu tukuhanjeka chitunateli kulemesha ajiki. Nkumininaku, tukudiza chitunateli kulemesha antu anakudiza idimi detu.

4. Kufumbanyi kwaPawulu kudi haAroma 12:10 kwatela kulondelawu akulumpi?

⁴ Akulumpi ejima muchipompelu ayitondaña naspiritu yajila yaYehova. Hela chochu, ejima wawu akweti yawaana niwuswa washiyashana. (1 Kor. 12:17, 18) Amakwawu hadaha anayitondi katataka nawa akulukila wanyi. Amakwawu anakuzata wanyi neyi chazatileñawu muloña wawushinakaji hela yikatu. Hela chochu, kwosi mukulumpi watela kuleja mukwawu nindi, “hinnakukukeña eyiku.” Ilaña mukulumpi wejima watela kulondela kufumba kwaPawulu kudi haAroma 12:10.—Tañenu.

5. Akulumpi amwekeshaña ñahi nawu alemesha akwawu akulumpi, nawa chumichi chalemenadi?

⁵ Akulumpi amwekeshaña nawu alemesha akwawu akulumpi kuhitila mukuyitiyilila. Chumichi chalema sweje-e neyi akulumpi anabulakani hamu nakuhanjeka hayuma yalema. Muloñadi? Talenu chahosheli Kaposhi Kakutalila kaOctober 1, 1988, nawu: “Akulumpi atela kwiluka nawu Kristu nateli kuzatisha spiritu yajila kukwasha mukulumpi wudi wejima hezanvu dawakulumpi kutoñojoka hachishina chamuBayibolu chinateli kuyikwasha kufuukulahu chiwahi. (Yilw. 15:6-15) Spiritu yajila yakwashaña akulumpi ejima muchipompelu, bayi wumu hohuku.”

6. Akulumpi anateli kuzatila ñahi hamu mukunuñañana, nawa chipompelu chikuhetelamu ñahi?

⁶ Mukulumpi walemesha akwawu akulumpi hafwilaña mpinji yejima kwikala watachi kuhosha neyi anabulakaniku. Mpinji yejima hakeñaña kuhosha kubadika akwawuku nawa hatoñojokaña nindi yitoñojoka yindi diyinawahi kubadika akwawuku. Ilaña waletaña yitoñojoka yindi mukudizoza. Watiyililaña nakanañachima yuma yinakuhoshawu akwawu. Chuma chasweja kulema, wafwilaña kuhanjeka nawakwawu  hayishina yekala muNsona nawa walondelaña wunlomboli wafumaña kudi “nduñu wamaana nikashinshi.” (Mat. 24:45-47) Neyi akulumpi adikeña nikudilemesha wumu namukwawu mpinji yinakuhanjekawu, spiritu yajila yaNzambi yikwikala hadi wena nawa yikuyikwasha kufuukula yuma yikukolesha chipompelu.—Yak. 3:17, 18.

7. Yesu wamweneña ñahi wujiki?

⁷ Makonu muyipompelu mudi antu adisumbula niyisaka. Hela chochu, mudi cheñi niamanakwetu niahela ajiki. Twatela kuyimonaña ñahi ajiki? Talenu Yesu chamweneñayi wujiki. Mpinji yadiñayi Yesu nakuzata mudimu windi wakushimwina hanu hamaseki wadiña mujiki. Wasumbwili wanyi nawa washili muchima hamudimu windi. Yesu wahosheli wanyi nindi muntu wejima chiña hohu yasumbula hela yekala mujiki. Hela chochu, wahosheli nindi akwaKristu amakwawu anateli kufuukulahu kwikala ajiki. (Mat. 19:11, 12) Yesu walemesheli ajiki. Hayimweneña nindi amukunkulwayi hela nawu anakushalahu yuma yimu muloña wawujikiku.

8. Kwesekeja na 1 Akorinda 7:7-9, Pawulu wayikolesheli akwaKristu kutoñojoka hachumanyi?

⁸ Kufwana Yesu, Kapostolu Pawulu niyena wazatili mudimu windi wakushimwina muwujiki. Pawulu wahosheli nindi chatama wanyi mukwaKristu kusumbula. Welukili nindi muntu yomweni watela kufuukulahu. Hela chochu, Pawulu wakolesheli akwaKristu kutoñojokahu neyi chakwila anateli kumukalakela Yehova muwujiki. (Tañenu 1 Akorinda 7:7-9.) Chakadi nikujina, Pawulu hadiwili akwaKristu ajikiku. Kafwampi, watondeli mukwenzi Timotewu wadiña manakwetu mujiki kwakamena nyidimu yaYehova yalema. * (Fwi. 2:19-22) Dichi, chinateli kwikala chaluwa kutoñojoka netu manakwetu nashikihu hela nashikihu wanyi muloña wakwila wasumbula hela wasumbula wanyi.—1 Kor. 7:32-35, 38.

9. Tukuhoshahu netudi kutalisha hakusumbula nihawujiki?

⁹ Chili Yesu hela Pawulu kwosi washimwini nindi mukwaKristu watela kusumbula hela  kwikala mujikiku. Hanu dinu tukuhoshahu netudi kutalisha hakusumbula nihawujiki? Kaposhi Kakutalila kaOctober 1, 2012, kaEnglishi kahosheli nawu: “[kusumbula niwujiki] hiyawaana kufuma kudi Nzambi. . . . Yehova hamonaña [wujiki] neyi chuma chakutiyisha nsonyi hela chakuneñeshaku.” Dichi twatela kulemesha amanakwetu niahela ajiki adi muchipompelu.

10. Tunateli kumwekesha ñahi netu twayilemesha amanakwetu niahela ajiki?

¹⁰ Tunateli kulemesha ñahi yitoñojoka nichihandilu chawamanakwetu niahela ajiki? Twatela kwanukaña netu akwaKristu amakwawu afuukulahu kushakama wujiki. AkwaKristu amakwawu ajiki akeñaña kusumbula hela kusumbuka, ilaña kanda awani muntu watelela. Amakwawu niwena afwisha enikwawu. Hichikweti muloña nayumiyiku, komana antu adi muchipompelu atela kuyihula akwaKristu ajiki chabulilawu kusumbula hela kusumbuka hela kuyihula neyi chakwila atela kuyikeñela muntu wakwiñila nindi muwulu? Hela chochu, amakwawu anateli kulomba wukwashu. Hanu dinu neyi anakukeña wanyi wukwashu, amanakwetu niahela ajiki anateli kutiya ñahi? (1 Tes. 4:11; 1 Tim. 5:13) Tutalenu chahoshañawu amanakwetu niahela ashinshika ajiki.

11-12. Tunateli kuyineñesha ñahi ajiki?

¹¹ Nkoñi wañinza wumu wabula kusumbula wahosheli nindi muwujiki mwekala muzañalu. Ilaña wahosheli nindi chamuneñeshaña neyi amanakwetu niahela akuhwelelayi amwihula nawu: “Muloñadi chimwabulila kusumbula?” Manakwetu wabula kusumbula wazatilaña hakasanji kamutayi wahosheli nindi: “Namonaña nami amanakwetu niahela atoñojokaña nawu atela kutiyila ajiki luwi. Chumichi chamwekeshaña neyi wujiki hichuma chatama chatela chikali chawaana.”

¹² Muhela mujiki wazatilaña haBeteli wahosheli nindi: “Akwakushimwina amakwawu atoñojokaña nawu ajiki ejima akeñaña muntu wakwiñila nindi muwulu hela nawu ajiki ejima amonaña nawu anateli kuwana muntu wakwiñila nindi muwulu kunapompeli antu amavulu. Ifuku dimu hinayili kwiluña dimu nakuzata mudimu wahaBeteli, nashikili hefuku dakupompa. Muhela kunashikeneni wanlejeli nindi muchipompelu mwadiña amanakwetu ayedi inesekeneña nawu. Wanlejeli nindi hankeñeleleña iyalaku. Ilaña chitweñilili Mwitala daWanta, wantwalili kudi awa amanakwetu nindi niyimoni. Chumichi chatutiyishili nsonyi wejima wetu asatu.”

13. Yakutalilahwinyi yamukolesheli muhela mujiki?

¹³ Muhela mukwawu wabula kusumbuka wazatilaña haBeteli wahosheli nindi: “Neluka apayiniya ajiki akula dehi adihana asha maana nimuchima hamudimu wawu nawa akwashaña chipompelu. Amonaña nawu chidi hohu chiwahi kushakama wujiki nawa hiyadimonaña nawu abadika muloña wakushakama wujiki hela kutoñojoka nawu hiyanateli kwikala namuzañalu muloña wakubula kusumbuka hela kwikala nanyanaku.” Dichi chichawahila kwikala muchipompelu mwakwila antu ejima adilemesha wumu namukwawu. Chakwila muneluki nenu hiyayitiyilaña wushona hela ichimaku, hiyayidiwula hela kusweja kuyilemeshaku. Mweluka hohu nenu ayikeña.

14. Tunateli kumwekesha ñahi netu twalemesha ajiki?

¹⁴ Amanakwetu niahela ajiki akutiya kuwaha neyi tuyilemeshaña muloña wayilwilu yawu yayiwahi bayi muloña wawujikiku. Chatela tuyitiyileña luwi, twatela kuyisakililaña  hakashinshi kawu. Chikufumamu, amanakwetu niahela ajiki hiyakutoñojokaña nawu tunakuyila netu: “Hinnakuyikeña enuku.” (1 Kor. 12:21) Ilaña akwiluka nawu twayilemesha nawa twalemesha mudimu wazatañawu muchipompelu.

15. Amanakwetu amakwawu afuukulahu kwiladi hakwila atwali mudimu wakushimwina hambidi?

¹⁵ Hadi yaaka yayivulu, akwakushimwina amavulu anafuukulihu kudiza idimi dacheñi kulonda atwali mudimu wakushimwina hambidi. Hakwila adizi, ahimpili chihandilu chawu. Awa amanakwetu niahela ashiya yipompelu mwahoshañawu idimi dawu nakuya muchipompelu mwahoshañawu idimi dacheñi nawa mudi kukankila kwawakwakushimwina aWanta. (Yilw. 16:9) Awa akwaKristu afuukulahu awenawu kulonda atwali mudimu waWanta hambidi. Hela chakwila hahitaña yaaka hakwila elukishi idimi, akwashaña chipompelu munjila jajivulu. Yilwilu yawu yayiwahi niyuma yelukawu yakoleshaña chipompelu. Twayilemesha nankashi awa amanakwetu niahela adihana.

16. Chumanyi chatela kulondelawu akulumpi neyi chakwila manakwetu nashikuhu kwikala mukulumpi hela nkoñi wakuzatila?

¹⁶ Izanvu dawakulumpi hidatela kubula kumuhameka manakwetu kulonda yekali mukulumpi hela nkoñi wakuzatila hamuloña wakubula kwilukisha idimi dahoshañawu muchipompeluku. Akulumpi atela kulondela chahosha Bayibolu neyi anakumuhameka manakwetu kulonda yekali mukulumpi hela nkoñi wakuzatila bayi hakwilukisha idimiku.—1 Tim. 3:1-10, 12, 13; Tit. 1:5-9.

17. Yumanyi yatela kufuukulahu anvwali neyi anakubuukila kwituña dacheñi?

¹⁷ Yisaka yikwawu yawakwaKristu yabuukila kumatuña acheñi nakushakamaku hela nakukeña nyidimu. Hamuloña wakubuuka, anyanawu kushikola anakuzatisha idimi damwituña mwabuukilawu. Anvwali jawu niwena atela kudiza idimi dahoshañawu hakwila nawu awani mudimu. Indi neyi mudi chipompelu hela izanvu dahoshaña idimi dawu? Muchipompelunyi mwatela kuyaña chisaka? Komana akuyaña muchipompelu mwahoshañawu idimi damunodu ituña tahindi muchipompelu mwahoshañawu idimi dawu?

18. Kwesekeja naAñalija 6:5, tunateli kulemesha ñahi munafuukuli mutu wachisaka?

¹⁸ Mutu wachisaka watela kufuukulahu chipompelu mwatela kuya chisaka chindi. Chineli iku hikufuukula kwamuntu, watela kwiluka yuma yinateli kukwasha chisaka chindi. (Tañenu Añalija 6:5.) Twatela kulemesha munafuukuli mutu wachisaka. Yuma yejima yikufuukulayi, twitejenu munafuukuliyi  nikutambwila chisaka chindi muchipompelu.—Rom. 15:7.

19. Yumanyi yinateli kutoñojokahu nyitu yayisaka nikulombelahu?

¹⁹ Yisaka yikwawu yinateli kwikala muchipompelu chazatishaña idimi dawanvwali, ilaña anyana hiyanateli kwilukisha idimiku. Neyi chipompelu chidi mwiluña mwazatishañawu idimi damunodu ituña, chinateli kuyikalila anyana kutiyishisha yuma yinakudizawu hakupompa nawa hiyakupama kuspirituku. Muloñadi? Muloña anyana anakuya kushikola kwazatishañawu idimi damunodu ituña bayi dawanvwali jawuku. Hansañu yamuchidiwu, nyitu yisaka yatela kutoñojokahu chiwahi nikulomba maana kudi Yehova kulonda afuukulihu yuma yinateli kukwasha anyanawu kukundama kwakwihi naYehova niantu jindi. Anvwali atela kudizisha anyanawu idimi dawu hela kubuukila muchipompelu mudi idimi delukisha anyanawu. Mwonsu munafuukuli mutu wachisaka, antu amuchipompelu munayiwu atela kulemesha ichi chisaka.

20. Tunateli kumwekesha ñahi netu twalemesha amanakwetu niahela anakudiza idimi?

²⁰ Hayuma yejima yitunahanjekihu, muyipompelu yayivulu mudi amanakwetu niahela anakukabakana hakudiza muchidi. Chinateli kuyikalila kuhosha yuma yinakutoñojokawu. Neyi tubula kusha maana hachinakukabakanawu namuchidi, tukumonaña chamukeñawu Yehova niiyena dakumukalakela. Neyi tumonañamu iyi yilwilu yayiwahi, tukuyikeña nikuyilemesha chikupu awa amanakwetu niahela. Hitukuhoshaña netu “Hinnakuyikeña enuku” hamuloña wakwila anakukañanya kuhosha chiwahi idimiku.

21-22. Kukoolekanyi kutukweti?

²¹ Twamusakililaña Yehova hakutwiteja kwikala muchipompelu chindi. Hela chakwila tudi amayala hela ambanda, ajiki hela asumbula, akulumpi hela atwansi nawa hela twahoshaña chiwahi idimi hela nehi, twalema kudi Yehova nikudi wumu namukwawu.—Rom. 12:4, 5; Kol. 3:10, 11.

²² Dichi tutwalekihu kuzatisha yuma yayivulu yayiwahi yitunadizi kuchakutalilahu chaPawulu chamujimba wamuntu. Chumichi chikutukwasha kwiluka yuma yitwatela kwila hakwila tukolesheña amanakwetu niahela. Chikutukwasha cheñi kuyikeña nikuyilemesha mpinji yejima.