1. Kukoolekanyi kutukweti?

TWAKOOLEKA chikupu hakwikala muchipompelu chaYehova. Twekala mukuwunda nawa tukweti muzañalu hakudifukula hamu nawamanakwetu niahela muchipompelu. Mudimwinyi wumukweti muchipompelu?

2. Chakutalilahwinyi chazatishiliyi Kapostolu Pawulu munyikanda yindi yonenewa?

² Tunateli kudizilaku yuma yayivulu haniyi nsañu kuchakutalilahu chakapostolu Pawulu chazatishiliyi munyikanda yindi yonenewa. Muniyi nyikanda yejima, Pawulu wesekejeli chipompelu namujimba wamuntu. Wesekejeli cheñi antu ejima muchipompelu nayiidi yamujimba.—Rom. 12:4-8; 1 Kor. 12:12-27; Efwe. 4:16.

3. Yumanyi yisatu yitukuhanjeka muchinu chibaaba?

³ Muchinu chibaaba tukuhanjeka hayuma yisatu yalema yitunateli kudizila kuchakutalilahu chaPawulu. Chatachi, tukwiluka netu wejima wetu tukweti mudimu wutwatela kuzata muchipompelu chaYehova. Chamuchiyedi, tukuhanjeka yuma yitwatela kwila neyi chatukalilaña kwiluka mudimu * wutwatela kuzata muchipompelu. Nawa chamuchisatu, tukuhanjeka muloña waweni wutwatela kushilaku muchima kukuzata mudimu wutukweti muchipompelu chaNzambi.

4. Aroma 12:4, 5 yatudizishañadi?

⁴ Chuma chatachi chitukudizila kuchakutalilahu chaPawulu chidi chakwila nawu, wejima wetu tukweti mudimu walema wutwatela kuzata muchisaka chaYehova. Pawulu watachikili chakutalilahu chindi nindi: “Neyi chochitwekala nayiidi yayivulu kumujimba wumu, ilaña yiidi yejima hiyakalakalaña mudimu wowumuku, dichi chitwekala ninetu nawa, hela tudi amavulu, tudi mujimba wumu mudi Kristu, ilaña hamuntu-hamuntu tudi yiidi yanuñawu kudi wumu namukwawu.” (Rom. 12:4, 5) Pawulu watalishili mudihi? Wejima wetu twalema hela chakwila tukweti nyidimu yamboka-mboka muchipompelu.

5. “Yawaana” yamuchidinyi yahanayi Yehova muchipompelu?

⁵ Neyi munakutoñojoka hadi antu akweti nyidimu muchipompelu, hadaha mukushikena kutoñojoka hadi antu alombolaña. (1 Tes. 5:12; Heb. 13:17) Eña, Yehova wahana “amayala kwikala yawaana” muchipompelu Chindi kuhitila mudi Kristu. (Efwe. 4:8) Awa ‘amayala ekala yawaana’ munabombeli mamembala amwiIzanvu Dalombolaña, ankwashi akwashaña Izanvu Dalombolaña, mamembala aKometi yaMutayi, ankoñi añinza, ankoñi adizishaña mumashikola aWanta, akulumpi muyipompelu niankoñi akuzatila. Awa amanakwetu ejima ayitondaña naspiritu yajila kulonda akameni nyikoku yaYehova nikukolesha chipompelu.—1 Pet. 5:2, 3.

6. Kwesekeja na 1 Atesalonika 2:6-8, yumanyi yafwilañawu kwila amanakwetu atondawu naspiritu yajila?

⁶ Amanakwetu ayitondaña naspiritu yajila kulonda azati nyidimu yayivulu muchipompelu. Neyi chochazataña yiidi yamujimba, chidi neyi makasa ninyendu kukwasha mujimba wejima, amanakwetu atondawu naspiritu yajila azataña nañovu kulonda akwashi chipompelu chejima. Hiyakeñaña kuya mpuhuku. Ilaña afwilaña kukwasha nikukolesha amanakwawu niahela. (Tañenu 1 Atesalonika 2:6-8.) Twamusakililaña Yehova hakutwinka awa amanakwetu ashikahu atwakameneña kuspiritu.

7. Yumanyi yayiwahi yadiluñishañawu antu adi mumudimu wampinji yejima?

⁷ Amakwawu ayitonda kwikala amishonali, apayiniya adimena hela ampinji yejima muchipompelu. Kafwampi, amanakwetu niahela mukayi kejima adihana muchihandilu chawu chejima kuzata mudimu wakushimwina nikwilisha atumbanji. Muloña wakudihana kwawu, anakwashi antu amavulu kwikala atumbanji twaKristu Yesu. Hela chakwila awa akwakushimwina adi mumudimu wampinji yejima hiyakweti yuma yakumujimba yayivuluku, Yehova nayinki yuma yayiwahi yayivulu. (Maku 10:29, 30) Twayikeña awa amanakwetu niahela nawa twasakililaña hakwikala nawu muchipompelu.

8. Akwakushimwina ejima ansañu yayiwahi alemenadi kudi Yehova?

⁸ Komana amanakwetu atondawu ninawa adi mumudimu wampinji yejima diwu akweti hohu nyidimu muchipompelu? Inehi mwani! Mukwakushimwina wejima wansañu yayiwahi walema kudi Nzambi nimuchipompelu. (Rom. 10:15; 1 Kor. 3:6-9) Kafwampi, chuma chasweja kulema muchipompelu hikwilisha atumbanji twaMwanta wetu Yesu Kristu. (Mat. 28:19, 20; 1 Tim. 2:4) Akwakushimwina ejima, alemesha iwu mudimu muchihandilu chawu.—Mat. 24:14.

9. Muloñadi chitwayilemeshela ahela akwaKristu?

⁹ Yehova wayilemesha ahela akwaKristu kuhitila mukuyinka mudimu walema muchipompelu. Walemesha ambanda asumbuka, amama jawantu, anfwila niahela ajiki amukalakelaña nakashinshi. Bayibolu yahosha nankashi  hadi ambanda amavulu amutiyishileña Nzambi kuwaha. Ayihameka nawu adiña namaana, chikuhwelelu, iyena, kuhamuka, achisambu nawa azatileña nyidimu yayiwahi. (Luka 8:2, 3; Yilw. 16:14, 15; Rom. 16:3, 6; Fwi. 4:3; Heb. 11:11, 31, 35) Twamusakililaña Yehova hakwikala nawambanda akwaKristu muyipompelu yetu akweti yilwilu yoyimu yayiwahi.

10. Muloñadi chitwayilemeshela atushinakaji?

¹⁰ Tudi namuzañalu hakwikala nawatushinakaji muchipompelu. Yipompelu yikwawu yikweti amanakwetu niahela ashinakaja dehi anamukalakeli Yehova nakashinshi muchihandilu chawu chejima. Atushinakaji amakwawu dihu hanadiziwu chalala. Hichikweti muloña nampinji yadiziliwu chalalaku, atushinakaji amavulu anakukabakana nayikatu yenzaña muloña wakukula kumujimba. Iku kukala kunateli kuyikañesha kuzata chiwahi muchipompelu nimumudimu wakushimwina. Hela chochu, awa atushinakaji adikitaña chikupu mumudimu wakushimwina nawa azataña hanakumini ñovu yawu kukolesha nikudizisha amakwawu. Yuma yatulejañawu yatukoleshaña. Yehova wayilemesha ninetu nawa twayilemesha.—Yish. 16:31.

11-12. Atwansi adi muchipompelu chenu ayikoleshaña ñahi?

¹¹ Toñojokenu cheñi hadi atwansi. Amonaña kukala kwakuvulu chinakukulawu mukanu kaayi katama kadi mumakasa aSatana Diyabolu niyitoñojoka yindi yatama. (1 Yow. 5:19) Hela chochu, atukoleshaña nañakwilu yawu hakupompa, kushimwina nichiyahakwilañaku yuma yakuhwelelawu. Enu atwansi mukweti mudimu walema muchipompelu chaYehova.—Mas. 8:2.

¹² Hela chochu, amanakwetu niahela amavulu chayikalilaña kukuhwelela nawu akweti mudimu walema muchipompelu. Chumanyi chinateli kutukwasha kwiluka netu tukweti mudimu walema muchipompelu hamuntu-hamuntu? Tuhanjekenu.

13-14. Muloñadi antu amakwawu chinateli kutoñojokelawu nawu kwosi mudimu wunateli kuzatawu muchipompeluku?

 ¹³ Talenu chuma chamuchiyedi chitunateli kudizila kuchakutalilahu chaPawulu. Nahoshi hakukala kukwetiwu antu makonu; chayikalilaña kukuhwelela nawu anateli kuzata nyidimu muchipompelu. Pawulu wasonekeli nindi: “Neyi mwendu wukuhosha nawu, ‘Chineli ami nidi chikasa wanyi, hinidi chiidi chamujimbaku,’ chumichi hichinateli kuleñela mwendu kubula kwikala chiidi chamujimbaku. Nawa neyi itu dikuhosha nawu: ‘Chineli ami nidi disu wanyi, hinidi chiidi chamujimbaku,’ chumichi hichinateli kuleñela itu kubula kwikala chiidi chamujimbaku.” (1 Kor. 12:15, 16) Chikumanyi chahosheleñayi Pawulu?

¹⁴ Neyi mudesekejaña nawantu amakwawu muchipompelu, mukudimonaña nenu mwashikilamu wanyi. Amakwawu muchipompelu ayinka chawaana mukutañisha, mukuloñesha yuma chiwahi hela mukukundeja nikukolesha akwawu. Hadaha munakutoñojoka nenu mukutwesha wanyi kuzata neyi chazatañawu. Chumichi chinakumwekesha nawu mwadizoza. (Fwi. 2:3) Ilaña mwatela kwikala asoñama. Neyi mutwalekahu kudesekeja nawakwenu eluka yuma yayivulu, mukuzeya. Mukutachika kutoñojoka neyi chahosheli Pawulu, nenu kwosi mudimu wumukutwesha kuzata muchipompeluku. Chumanyi chinateli kuyikwasha kushinda yitoñojoka yamuchidiwu?

15. Kwesekeja na 1 Akorinda 12:4-11, chumanyi chitwatela kwiluka hayawaana yejima yitukweti?

¹⁵ Toñojokenu hanichi chikuma, Yehova wayinkeli akwaKristu akusambila yawaana yaspiritu yajila muchihayamisha, ilaña akwaKristu ejima hiyayinkeli chawaana chochimuku. (Tañenu 1 Akorinda 12:4-11.) Yehova wayinkeli yawaana niwuswa wamboka-mboka, ilaña mukwaKristu wejima wadiña namudimu wakuzata. Makonu hitwatambwilaña yawaana yaspiritu muchihayamishaku. Ilaña chikuma chochimu. Tukweti wuswa wamboka-mboka, hela chochu, wejima wetu tukweti mudimu kudi Yehova.

16. Kufumbanyi kwakapostolu Pawulu kutwatela kulondela?

 ¹⁶ Chatela tudesekejeña nawakwetu akwaKristu, twatela kuzatisha kufumba kwonenawu kwakapostolu Pawulu, nawu: “Muntu-himuntu, yashinshiki chekala yilwilu yindi yomweni, kuhiñahu dinu yazañaleli muyuma yindi yomweni, bayi kudesekeja namukwawuku.”—Ñal. 6:4.

17. Kufumba kwaPawulu kunateli kutukwasha ñahi?

¹⁷ Neyi tuzatisha kufumba kwaPawulu kwonenewa nawa tudishinshika chidi yilwilu yetu, tukutachika kwiluka netu tukweti yawaana niwuswa wabula akwetu. Chakutalilahu, mukulumpi hanateli kwikala nachawaana chakuhana jimpanjiku, ilaña nateli kwikala nachawaana chakwilisha atumbanji. Indi kwiji weluka wanyi kuloñesha yuma chiwahi neyi akwawu akulumpi muchipompelu, ilaña akwakushimwina anateli kumwiluka nawu hikabiña wukweti luwi nikukeña nawa waswayi kusolomoka neyi anakukeña wukwashu kushindamena haNsona. Hela nateli kwikala nejina dadiwahi muloña wachisambu. (Heb. 13:2, 16) Neyi twiluka wuswa wetu niyawaana yitukweti, tunateli kutiya kuwaha hakwiluka netu kudi mudimu wutunateli kuzataku muchipompelu. Nawa hitukutiyilaña ichima amanakwetu akweti yawaana yambukaku nayetuku.

18. Tunateli kwikala ñahi antañishi amawahi?

¹⁸ Hichikweti muloña namudimu wutukweti muchipompeluku, wejima wetu tuwahisheñaku nzatilu yetu nikwikala antañishi amawahi. Yehova waloñeshaku njila jajivulu mukuloñesha kwindi jinateli kutukwasha kuwahishaku nzatilu yetu. Chakutalilahu, hakupompa kwetu kwamukachi kamulungu, atudizishaña chitunateli kuwahishaku nzatilu yetu mumudimu wakushimwina. Komana munakuzatisha yuma yimunakudiza haniku kupompa?

19. Munateli kushikahu ñahi kuya kuShikola Yawakwakushimwina aWanta?

¹⁹ Shikola Yawakwakushimwina aWanta hinjila yikwawu yinateli kutukwasha kwikala antañishi amawahi. Antu anateli kuya kuniyi shikola hiyamanakwetu niahela apayiniya ampinji yejima adi nayaaka 23 nakushika 65. Munateli kutoñojoka nenu himukutwesha kuya kuniyi shikolaku. Ilaña chatela mutoñojokeña hayuma yinateli kuyikañesha kuya kuniyi shikola, toñojokenuña hayuma yimunakukeñela kuya kuniyi shikola. Kuhiñahu, ilenu yuma yinateli kuyikwasha kulonda mushikuhu kuya kuniyi shikola. Nawukwashu waYehova nawa neyi muzata nañovu, mukutwesha kwila yuma yimunakumona nenu yakala.

20. Yumanyi yitunateli kudizila kumukanda waAroma 12:6-8?

²⁰ Chuma chamuchisatu chitwatela kudizila kuchakutalilahu chaPawulu chidi hamukanda waAroma 12:6-8. (Tañenu.) Munawa mavasi Pawulu namwekeshi cheñi nindi muntu wejima muchipompelu wukweti chawaana chambukaku. Ilaña natukonkomweni nindi twatela kuzatisha chawaana chitukweti kukwasha nikukolesha chipompelu.

21-22. Yumanyi yitunadizili kudi manakwetu Robert nimanakwetu Felice?

²¹ Talenu chuma chamumwekeneni manakwetu wejina daRobert. Hanyima yakuzatila kwituña dacheñi, amutumini kuya nakuzatila haBeteli kwituña dawu. Hela chakwila amulejeleña kudi amanakwetu nawu kwosi chuma chatama cheliliyi, wahosheli nindi: “Naneñeli hadi tukweji twatuvulu muloña natoñojokeleña nami nakañanyi kuzata mudimu. Mpinji yikwawu natoñojokeleña kuleka kuzatila haBeteli.” Chumanyi chaletesheli yekali cheñi namuzañalu? Mukwawu mukulumpi wamulejeli  nindi, Yehova watudizishili mudimu wutwazatileña kulonda yatuzatishi cheñi mumudimu wutunakuzata chakatataka. Manakwetu Robert welukili nindi watela kuleka kutoñojoka hayuma yakunyima nikutachika kusha maana hamudimu wunakuzatayi chayinu mpinji.

²² Manakwetu Felice Episcopo niyena wamweni kukala kokumu. Yena niñodindi amanishili Shikola yaGileyadi mu 1956 nawa wadiña nakuzata mudimu wawunkoñi wañinza muBolivia. Mu 1964 ekalili namwana. Manakwetu Felice wahosheli nindi: “Chatukalilili kushiya mudimu wutwakeñeli nankashi. Kuhosha hohu walala, naneñeli hadi chaaka chamukuma. Ilaña nawukwashu waYehova, nahimpili yitoñojoka yami nawa nashili maana hamudimu wakuhemba chisaka.” Komana ninenu mwatiyaña neyi chatiyiliyi Robert hela Felice? Komana mwaneñaña muloña wakwila munakuzata mudimu wumwazatileña kunyima wanyi? Neyi dichi mwatiyaña, mukwikala namuzañalu neyi muhimpa yitoñojoka yenu nawa musha maana hamudimu wumunakuzata chayinu mpinji wakumukalakela Yehova niamanakwenu. Shenu muchima hamudimu, zatishenuña yawaana yenu niwuswa wumukweti kulonda mukwasheña akwenu nawa mukwikala namuzañalu hampinji yimunakukolesha chipompelu.

23. Yumanyi yitwatela kutoñojokañahu, nawa yumanyi yitukahanjeka muchibaaba chinalondelihu?

²³ Wejima wetu twalema kudi Yehova. Nakukeña nindi twikali muchisaka chindi. Neyi twikala nampinji yakutoñojoka chikupu chitunateli kukwasha amanakwetu niahela nikutoñojoka chitunateli kuzata iwu mudimu, tukuleka kutoñojoka netu kwosi mudimu wutukutwesha kuzata muchipompeluku. Indi antu amakwawu muchipompelu twayimonaña ñahi? Tunateli kumwekesha ñahi netu twayikeña nawa twayilemesha? Tukahanjeka haniyi nsañu muchibaaba chinalondelihu.