1. Malwihwinyi itwatela kudihula neyi tutoñojoka hayuma yejima yaleñayi Yehova?

NEYI tutoñojoka hadi Yehova chaleñeliyi mawulu nimaseki, tunateli kutiya neyi chatiyiliyi ñimbi yamasamu walombeli nindi: “Chinukushinshika mawulu eyi, himudimu wanyinu yeyi, nikakweji nitutumbwa tuwunashuku; Nami, Muntu hichumanyi, mwaka wumushi kumuchima? Hela mwana kamuntu, mwaka wumuhempuli?” (Mas. 8:3, 4) Kufwana Davidi, tunateli kutoñojoka ochu chitwakehelamu neyi tudesekeja natutumbwa twaleñayi Yehova nawa tukuhayama hakwiluka netu Yehova watwisha kumuchima. Yehova wayakameneneña antu atachi Adama naEva nawa wayishili muchisaka chindi.

2. Yehova wakeñeleña nindi Adama naEva elidi?

² Adama naEva diwu adiña anyana kaYehova atachi ahamaseki nawa Yehova Tata yawu wamwiwulu wayikeñeli chikupu. Nzambi wakeñeleña awa adisumbula asemununi. Dichi Nzambi wayilejeli nindi: “Semununenu, muvuleña, muwanini heseki, mudovwahishi.” (Kutach. 1:28) Ateleleli kuvwala anyana nikuhemba mukala wawu chiwahi. Neyi amwovwahilili Yehova nikuzatila hamu neyi chakeñeleñayi, Adama naEva nanyanawu adi kutwalekahu kushakama muchisaka chaNzambi haya nyaaka.

3. Tukuhosheladi netu Adama naEva ayinkeli mudimu walema muchisaka chaYehova?

³ Adama naEva adiña namudimu walema muchisaka chaYehova. Neyi chashimunawu haMasamu 8:5, Davidi washimwini chamuleñawu muntu kudi Yehova nindi: “Wunamwili wakukuminamu chanti hadi añelu, wunamuvwiki chibañula nichakulema.” Eña, antu hiyayileña nañovu, maana niwuswa neyi  wayinkawu añeluku. (Mas. 103:20) Hela chochu, muntu “wakuminamu chanti” hadi añelu. Ichi chuma chakuhayamisha! Yehova wayinkeli anvwali jetu atachi chihandilu chachiwahi.

4. Chumanyi chayimwekeneni Adama naEva muloña wakudikaña naYehova, nawa yumanyi yitukuhanjekahu muchinu chibaaba?

 ⁴ Chawushona, Adama naEva afumini muchisaka chaYehova. Ichi chuma chaleteli kukala hadi anyanawu neyi chitukuhanjeka muchinu chibaaba. Ilaña yuma yafuukulayi Yehova yahimpika wanyi. Nakukeña antu ovwahila akekali anyanindi haya nyaaka. Chatachi, tukuhanjeka Yehova chamwekeshayi nindi twalema kudi yena. Cheñi, tukuhanjeka hayuma yitwatela kwila chayinu mpinji kulonda tumwekeshi netu tunakukeña kwikala muchisaka chaNzambi. Nkumininaku, tukuhanjeka yuma yikadiluñishawu anyana kaYehova ahamaseki haya nyaaka.

5. Tunateli kumulemesha ñahi Nzambi chatuleñayi muchinfwana chindi?

⁵ Yehova chatuleñayi muchinfwana chindi wamwekeshaña nindi watulemesha. (Kutach. 1:26, 27) Chineli Yehova watuleña muchinfwana chindi tunateli kwikala nayilwilu yayiwahi yindi neyi kukeña, luwi, kashinshi nikuloña. (Mas. 86:15; 145:17) Neyi twikalaña naniyi yilwilu, tukumwekesha netu twamulemesha Yehova nawa twamusakililaña. (1 Pet. 1:14-16) Neyi tumuzañaleshaña Tata yetu wamwiwulu, tukwikalaña namuzañalu. Nawa chatuleñayi muchinfwana chindi, Yehova watwinka wuswa wakwikala muchisaka neyi antu akeñañayi muchisaka chindi.

6. Yehova wayilemesheli ñahi antu chaleñeliyi iseki?

⁶ Yehova watuloñesheleli mukala wawuwahi. Henohu kanda yaleñi muntu watachi Yehova wayiloñesheleli antu iseki kulonda ashakameñamu. (Yoba 38:4-6; Yere. 10:12) Chineli watutoñojokelañaku nawa wekala nachisambu, Yehova watuloñesheleli yuma yayiwahi nawa yayivulu yitwatela kudiluñisha. (Mas. 104:14, 15, 24) Mpinji yimu, washinshikili hayuma yaleñeliyi nawa ‘wamweni nindi yinawahi.’ (Kutach. 1:10, 12, 31) Wayilemesheli antu kuhitila mukuyinka mudimu wakutala yuma yejima yaleñayi hamaseki. (Mas. 8:6) Nkeñelu yaNzambi yidi yakwila nawu antu awanina ekaleña namuzañalu hakwakamena yuma yaleñayi. Komana mwamusakililaña Yehova hayuma yayiwahi yakanayi?

7. Yoshuwa 24:15 yamwekeshaña ñahi nawu muntu wukweti wuswa wakufuukula?

⁷ Yehova watwinka wuswa wakudifuukwila. Tunateli kutondahu chuma chidi chejima chitunakukeña kwila muchihandilu chetu. (Tañenu Yoshuwa 24:15.) Nzambi yetu wukweti kukeña watiyaña kuwaha neyi tutondahu kumukalakela. (Mas. 84:11; Yish. 27:11) Tunateli kuzatisha chiwahi wuswa wetu wakufuukula muyuma yayivulu. Talenu chakutalilahu chatushilayi Yesu.

8. Njilanyi yimu mwazatishililiyi Yesu wuswa windi wakufuukula?

⁸ Tunateli kumwimbujola Yesu kuhitila mukutwamijaku yuma yakeña akwetu kubadika yetu. Mpinji yimu, helili Yesu nawapostolu indi azeyi nankashi, ayili kwiluña dimu kwamwena nawu anooki. Hela chochu, hiyanookeliku. Izaza dayiwanini nawa afwilileña chikupu kuyidizisha kudi Yesu. Ilaña Yesu wahilili wanyi. Wayitiyilili wushona. Hanu dinu chumanyi cheliliyi Yesu? Watachikili kuyitañisha yuma yayivulu. (Maku 6:30-34) Neyi tumwimbujola Yesu kuhitila mukuzatisha mpinji yetu niñovu kukwasha akwetu, tukuleta kalemesha kudi Tata yetu wamwiwulu.  (Mat. 5:14-16) Twamwekeshaña cheñi kudi Yehova netu tunakukeña kwikala muchisaka chindi.

9. Chumanyi chatela kwanukañawu anvwali?

⁹ Yehova wayinka antu wuswa wakuvwala anyana nimudimu wakuyidizisha kumukeña nikumukalakela. Neyi mudi anvwali, komana mwasakililaña hanichi chawana? Hela chakwila añelu ayikiswila chikupu kudi Yehova, hiyekala naniku kukoolekaku. Dichi neyi mudi anvwali, mwekeshenuña kusakilila haniwu mudimu wayinkawu wakukulisha anyana. Anvwali ayinka mudimu weneni wakukulisha anyana, “[kuyifumba] nikuyikonkomwena kwesekeja nachakeñañayi Yehova.” (Efwe. 6:4; Kuhit. 6:5-7; Mas. 127:3) Hakwila nawu chiyikwashiku anvwali, kuloñesha kwaYehova kwaloñesha yuma yashindamena haBayibolu chidi neyi nyikanda, mavidiyo, tumina niyibaaba yahaintaneti. Tata yetu wamwiwulu niMwanindi ayikeña atwansi. (Luka 18:15-17) Dichi Yehova watiyaña kuwaha neyi anvwali amushindamena nawa azata hakumina ñovu jawu kwakamena anyanawu. Nawa anvwali amuchidiwu ayikwashaña anyanawu kwikala muchisaka chaYehova chahaya nyaaka.

10-11. Njilanyi yatwenzunwinayi Yehova muloña wefutu danyiloña?

¹⁰ Yehova wahanini mwanindi alemeshayi kulonda twikali cheñi muchisaka chindi. Neyi chitwashimuna  muparagilafu 4, Adama naEva afumini muchisaka chaYehova nawa aletesheli nianyanawu kubula kwikala muchisaka chaYehova. (Rom. 5:12) Adama naEva afuukwilihu kudikaña naNzambi, dichi chateleleli chayifumishiliwu muchisaka chaYehova. Indi anyanawu? Yehova waloñesheli njila kulonda antu adi nanyichima yashinshika ekali muchisaka chindi. Wazatishili ifutu danyiloña daMwanindi wumu hohu Yesu Kristu. (Yow. 3:16; Rom. 5:19) Muloña wamulambu waYesu, a 144,000 ayitonda kwikala anyana kaNzambi.—Rom. 8:15-17; Chim. 14:1.

¹¹ Kubombelahu, antu amavulu ashinshika nawa ovwahila anakwila nkeñelu yaNzambi. Adi nakuchiñeja kwakwikala muchisaka chaNzambi hanyima yakuhita mukweseka kwakukumishaku kwayaaka ikombakaji. (Mas. 25:14; Rom. 8:20, 21) Nichayinu mpinji amutenaña Yehova Nleñi yawu nawu “Tata.” (Mat. 6:9) Antu akasañulawu niwena akadiza yuma yakeñañayi Yehova nindi eleña. Nkumininaku, ana akwovwahila nshimbi jindi niwena akekala muchisaka chindi.

12. Lwihwinyi lutukwakula?

¹² Neyi chitunamoni, Yehova wela yuma yayivulu yinakumwekesha nawu wayilemesha antu. Watonda dehi awayishewa kwikala anyanindi nawa wayikwasha antu ‘amwizaza deneni’ kwikala nakuchiñeja kwakwikala anyanindi mwituña dadiha. (Chim. 7:9) Chumanyi chitwatela kwila chayinu mpinji hakwila tumwekeshi kudi Yehova netu tunakukeña kwikala muchisaka chindi haya nyaaka?

13. Chumanyi chitwatela kwila hakwila nawu twikali muchisaka chaNzambi? (Maku 12:30)

¹³ Mwekeshenuña nenu mwamukeña Yehova kuhitila mukumukalakela namuchima wenu wejima. (Tañenu Maku 12:30.) Hayuma yejima yatwinkawu kudi Nzambi, chawaana chasweja kulema hiwuswa wakudifukula kudi Nzambi. Twamwekeshaña netu twamukeña Yehova neyi “tuhembaña nshimbi jindi.” (1 Yow. 5:3) Lushimbi lumu lwatwinkeliyi Yesu lwakeñañayi Yehova nindi tulwovwahileña, hikwilisha atumbanji nikuyipapatisha. (Mat. 28:19) Watuleja cheñi nindi tudikeñi wumu namukwawu. (Yow. 13:35) Yehova  wakelisha antu amwovu kwikala muchisaka chindi chawakwakudifukula alala mukaayi kejima.—Mas. 15:1, 2.

14. Tunateli kumwekeshela ñahi akwetu kukeña? (Matewu 9:36-38; ARoma 12:10)

¹⁴ Keñenuña akwenu. Kukeña dichilwilu chaYehova chabadika. (1 Yow. 4:8) Yehova watukeñeli henohu kanda tumwiluki. (1 Yow. 4:9, 10) Dichi twamwimbujolaña neyi tuyikeña akwetu. (Efwe. 5:1) Njila yimu mutwatela kumwekeshela antu kukeña hikuyikwasha kulonda amwiluki Yehova hikuchidi mpinji. (Tañenu Matewu 9:36-38.) Neyi tuyikwasha, akwiluka yuma yatela kwilawu hakwila niwena ekali muchisaka chaNzambi. Neyi muntu napapatishewi, twatela kutwalekahu kumukeña nikumulemesha. (1 Yow. 4:20, 21) Tunateli kwila ñahi mwenimu? Chuma chimu chitwatela kwila, hikumukuhwelela netu wukweti yilwilu yayiwahi. Neyi tuneluki wanyi chuma chaletesha yeli chuma chimu, hitwatela kutoñojoka netu welilamu hohu kulonda yaditiyishi kuwahaku. Ilaña tukumulemesha manakwetu nakumumona netu watubadika.—Tañenu ARoma 12:10; Fwili. 2:3.

15. Anyi itwatela kutiyila luwi niwushona?

¹⁵ Yitiyilenuña antu ejima luwi niwushona. Neyi tunakukeña kwikala muchisaka chaYehova haya nyaaka, twatela kuzatishaña Izu daNzambi muchihandilu chetu. Chakutalilahu, Yesu washimwini nindi twatela kutiyila antu ejima luwi niwushona kushilahu tuhu niayilumbu jetu. (Luka 6:32-36) Mpinji yikwawu, chinateli kutukalila kwila mwenimu. Neyi chatukalilaña twatela kutoñojokaña nikwila yuma neyi chelileñayi Yesu. Neyi tuzata nañovu kumwovwahila Yehova nikumwimbujola Yesu, tukumwekesha kudi Tata yetu wamwiwulu netu tunakukeña kwikala muchisaka chindi haya nyaaka.

16. Tunateli kukiña ñahi ijina dachisaka chaYehova?

¹⁶ Bayi mutamishaña ijina dachisaka chaYehovaku. Muchisaka, mwana wanyanya wembujolaña yilwilu yelañayi yayindi. Neyi yayindi yazatishaña yishina yamuBayibolu muchihandilu chindi nimwanyikindi niyena wukamwimbujola. Neyi yaya awantu yelaña yuma yatama, mwanyikindi niyena wakembujola yilwilu yindi yatama. Dichichekala nimuchisaka chaYehova. Neyi muntu wadiña mukwaKristu yekala mukwakusekesha hela yatachika kwila yuma yatama, nateli kuletesha antu amakwawu kutachika kwimbujola yilwilu yindi yatama. Antu elaña mwenimu atamishaña ijina dachisaka chaYehova chawakwakudifukula indi. (1 Tes. 4:3-8) Bayi twimbujolaña antu adi nayilwilu yatama nikwiteja chuma chidi chejima kutufumisha kudi Tata yetu wamwiwulu wukwetu kukeñaku.

17. Yitoñojoka yamuchidinyi yitwatela kutondolwela, nawa muloñadi?

¹⁷ Mukuhwelelenu Yehova bayi yuma yakumujimbaku. Yehova watukana nindi wukutwinkaña yakuda, yakuvwala nihakukama neyi tutwamijañaku Wanta nikwovwahila nshimbi jindi muchihandilu chetu. (Mas. 55:22; Mat. 6:33) Neyi tutoñojokaña mwenimu, tukuleka kutoñojoka netu yuma yakumujimba yidi mukanu kaayi yikutukiña nawa yikutuletelaña muzañalu. Tweluka netu njila yimu yinateli kutukwasha kwikala nakuwunda kwamuyitoñojoka hikwila nkeñelu yaYehova. (Fwili. 4:6, 7) Hela chakwila tudi nawuswa wakulanda yuma yayivulu, twatela kumona neyi chakwila tukweti mpinji niñovu yakuzatisha nikuyihemba oyu yuma. Ntahindi tukusweja kukeña nankashi maheta itukweti? Dichi twatela kwanukaña netu Nzambi nakukeña twikali antu amuchisaka chindi adikita. Chumichi chinatalishi mukwila nawu hitwatela kwiteja kulonda  atuluwañeshiku. Hitwatela kwikala neyi iyala wumu wakaanini mutambi wakumukalakela Yehova nikwikala mwanindi hamuloña wakusweja kukeña maheta ahanu hamasekiku.—Maku 10:17-22.

18. Kulemanyi ninkisu jakatambwilawu antu amwovwahilaña Yehova haya nyaaka?

¹⁸ Antu ovwahila akayilemesha kudi Yehova nawa akamukeña nikudifukula kudi yena haya nyaaka. Antu akweti kuchiñeja kwakushakama hamaseki niwena akekala namuzañalu hakwakamena iseki daleñeliyi Yehova nindi dikali mukala wawu. Katataka iseki niyuma yejima yekalamu ayibalumuni kwikala yayiha muchiyuulu chaWanta. Yesu wukafumishahu kukala kwejima kwaleteliwu aAdama naEva muloña wakwila afuukwilihu kufuma muchisaka chaNzambi. Yehova wakasañula antu amavulu nawa wakayinka kukooleka kwakwikala nawumi wahaya nyaaka nanyijimba yakola muParadisa hamaseki. (Luka 23:42, 43) Hampinji yikela chisaka chaYehova chahamaseki chawakwakudifukula indi chinekali chawanina muntu himuntu wakekala ‘nachibañula nikulema’ kwashimwiniyi Davidi.—Mas. 8:5.

19. Yumanyi yimwatela kwanukaña?

¹⁹ Neyi mwekala ‘amwizaza deneni’ mukweti kuchiñeja kwakuwahi. Nzambi wayikeña, nakukeña mwikali antu amuchisaka chindi. Dichi zatenuña nañovu kulonda mumuzañalesheña. Mpinji yejima anukenuña yikaninu yaNzambi. Lemeshenuña kukooleka kutukweti kwakudifukula kudi Tata yetu wamwiwulu nawa lemeshenuña kuchiñeja kumukweti kwakumushimeka haya nyaaka.