1-2. Yumanyi yitukuhanjekahu muchinu chibaaba?

MWATIYAÑA ñahi neyi chuma chimunakuchiñilila chibula kushika kwesekeja nachimwakuhwelela? Komana mwakamenaña? Yishimu 13:12 yashimuna nawu: “Chikuhwelela chakwila hachike-e chaleteshaña muchima kukata.” Indi neyi mwiluka nenu kudi chuma chaletesha hakwila chuma chenu chibuli kushika hampinji yimwakuhwelela? Neyi mwiluka chuma chinaleteshi, mukudiwunjika nawa mukuchiñililaña.

² Muchinu chibaaba, tukuhanjeka hayishina yamuBayibolu yinateli kutukwasha ‘kuchiñilila.’ (Mika 7:7) Cheñi, tukuhanjeka hayuma yiyedi yinateli kutukwasha kumuchiñilila Yehova kulonda yakawahishi yuma. Nkumininaku, tukuhanjeka hankisu yikatambwilawu antu amuchiñililaña Yehova.

3. Chishina chidi haYishimu 13:11 chatudizishañadi?

³ Chakutalilahu chalumbulula muloña waweni wutwatela kwikalila adiwunjika achishimuna haYishimu 13:11. Hahoshaña nawu: “Maheta akuhetela kuyuma yakuhemesha amba kaya nakukeha; ilaña muntu wapompeshaña yuma yindi nakukabakana wakamona yakaya nakuvula.” Chumanyi chitunadizili kuniyi vasi? Muntu wukweti maana welaña yuma mukubabala nawa mukudiwunjika nawa mwafumaña yuma yayiwahi.

4. Chishina chekala haYishimu 4:18 chatulejañadi?

⁴ Yishimu 4:18 yatulejaña nawu: “Njila yawantu aloña yidi neyi mwaana wahakucha, wayaña nakutooka nichikushika itañwa mwiwulu.” Mazu atalisha munjila yasolwelañamu Yehova nkeñelu yindi chovu-chovu kudi antu jindi. Hela chochu, iyi vasi yinateli cheñi kutukwasha kwiluka mukwaKristu  chahimpañayi yilwilu yindi muchihandilu chindi nakuswina kwakwihi naYehova. Muntu hanateli kushikena kwikala ibwambu daNzambi hohenohuku. Hahitaña mpinji. Neyi tudizaña nankashi nikuzatisha kufumba kwekala Mwizu daNzambi nikutwatambwilaña mukuloñesha kwindi, tukutachika kwikala nayilwilu neyi yaKristu chovu-chovu. Tukusweja cheñi kumwiluka Nzambi. Talenu Yesu chalumbulwiliyi ichi chikuma.

5. Chakutalilahwinyi chazatishiliyi Yesu hakumwekesha nindi hahitaña mpinji hakwila muntu yahimpi yilwilu yindi?

⁵ Yesu wazatishili chakutalilahu hakulumbulula nsañu yaWanta yitwashimwinaña chiyekala neyi kalubutu kanyanya kakulaña chovu-chovu munyichima yawantu ashinshika. Wahosheli nindi: “Mbutu yamenaña nakukula chakwila [mukwakukuwa] wakañanyaña kwiluka chiyakulaña. Iseki nkawadu dasoñaña nyikabu chovu-chovu, kwatachikilaña kumena nsaachi, kuhiñahu mutu, nkumininaku nchacha hiyikumena mumutu.” (Maku 4:27, 28) Yesu watalishili mudihi? Walumbulwileña nindi neyi chochakulaña mutondu chovu-chovu, nimuntu wetejaña nsañu yaWanta niyena wahimpaña yilwilu yindi chovu-chovu. Chakutalilahu, atudizi etu aBayibolu chaswinañawu kwakwihi naYehova, twatachikaña kumona yilwilu yayiwahi mudi wena. (Efwe. 4:22-24) Ilaña twatela kwanukaña netu Yehova diyi waleteshaña kalubutu kanyanya kukula.—1 Kor. 3:7.

6-7. Chumanyi chitwadizilañaku munjila yaleñelelimu Yehova iseki?

⁶ Muyuma yejima yelañayi, Yehova wadiwunjikaña kulonda yamanishi kuzata mudimu windi. Welaña mwenimu kulonda yajiliki ijina dindi nikukwasha antu. Chakutalilahu, toñojokenu Yehova chayileñeleliyi antu iseki chovu-chovu.

⁷ Hakulumbulula Yehova chaleñeliyi Iseki, Bayibolu yashimuna “yesekelu yachu, kushimika “chikuku” nikusha “ilola  dakwiwombu.” (Yoba 38:5, 7) Nawa wadiña ninampinji yakubanjila yuma yaleñeliyi. (Kutach. 1:10, 12) Fwikijenu chatiyiliwu añelu hakumona yuma yaleñeleñayi Yehova chovu-chovu. Azañaleli chikupu. Hamuloña wachumichi “hiyakudikuwa nakuzañalala.” (Yoba 38:6) Chumanyi chitunakudizilaku? Hahitili yaaka yayivulu hakwila nawu Yehova yamanishi kuleña, ilaña chatalileñayi yuma yaleñeliyi, wahosheli nindi “yinawahi.”—Kutach. 1:31.

8. Yumanyi yitukuhanjekahu?

⁸ Neyi chitunamoni muyakutalilahu yitunashimuni dehi, tunateli kuwana yishina yayivulu Mwizu daNzambi yikutukwasha kwikala adiwunjika. Ichi dinu tuhanjekenu hayuma yiyedi mutunateli kumuchiñilila Yehova.

9. Njilanyi yimu mutunateli kumuchiñilila Yehova?

⁹ Twatela kuchiñilila hakwila nawu kulomba kwetu akwakuli. Neyi tunakulomba netu atwinki ñovu yikutukwasha kuumika kukala hela netu atukwashi kulonda tutondolweli kuzeyazeya kwetu, tunateli kumona netu kulomba kwetu anakukwakula swayi wanyi kwesekeja nachitwakuhweleleli. Muloñadi Yehova chabulilañayi kushikena kwakula kulomba kwetu hohenohu?

10. Muloñadi chitwatela kumuchiñilila Yehova hakwila nawu yakuuli kulomba kwetu?

¹⁰ Yehova watiyililaña kulomba kwetu. (Mas. 65:2) Wamonaña chitwalombaña chakufuma hamuchima nindi tukweti chikuhwelelu. (Heb. 11:6) Wakeñaña cheñi ochu chitwafwilaña kuhanda kwesekeja nachitwalombaña nikwila nkeñelu yindi. (1 Yow. 3:22) Dichi twatela kudiwunjika nikwila kwesekeja nachitunakulomba neyi tunakukeña kuleka yilwilu yatama hela kuzeyazeya kwetu. Yesu wahosheli nindi kulomba kwetu kukwawu hiyanateli kukwakula hohenohuku. Washimwini nindi: “Twalekenuhu kulomba, akayinkachu; twalekenuhu kukeñakeña, mwakawana; twalekenuhu kudondomwena, akayenzunwinaku; muloña muntu wejima walombaña, watambwilaña, muntu wejima wakeñakeñaña, wawanaña, nimuntu wejima wadondomwenaña, amwenzunwinañaku.” (Mat. 7:7, 8) Neyi tuzatisha iku kufumba “[nikulomba] chakadi kuzeya,” tukukuhwelela netu Tata yetu wamwiwulu wukutiya nawa wukwakula kulomba kwetu.—Kol. 4:2.

11. AHeberu 4:16 yikutukwasha ñahi neyi tumona netu kulomba kwetu anakwakuli swayi wanyi?

¹¹ Hela chakwila hakushimbula hakwila nawu kulomba kwetu akwakuli, Yehova watushiika nindi wukwakula kulomba kwetu “hampinji yatelela.” (Tañenu AHeberu 4:16.) Dichi bayi tumutwika Nzambi nyiloña neyi kulomba kwetu anakwakuli wanyi mukunyakashana kwesekeja nachitunakutoñojoka. Chakutalilahu, hadi yaaka yayivulu antu amavulu analombi nawu Wanta waNzambi winzi nakufumishahu yinu nshakaminu. Yesu niyena wahosheli nindi twatela kulomba haniwu Wanta. (Mat. 6:10) Hiwusupi neyi muntu yaleka kumukuhwelela Nzambi muloña wakwila kukuma hikunashiki kwesekeja nachakuhweleleliwu antuku. (Hab. 2:3; Mat. 24:44) Chikuwaha neyi tutwalekahu kumuchiñilila Yehova nikulomba nakukuhwelela netu wukwakula kulomba kwetu. Kukuma kwakenza hampinji yatelela, muloña Yehova watonda dehi “ifuku niora” yikwakenza. Iyi yakekala mpinji yayiwahi kudi antu ejima.—Mat. 24:36; 2 Pet. 3:15.

12. Mpinjinyi yinateli kwikala yakala kwikala adiwunjika?

 ¹² Twatela kwikala adiwunjika neyi anakutwila chatama. Mukanu kaayi kakavulu antu akabishaña antu ambukaku nawena, akweti ikowa dambukaku, chitachi, chisemwa hela muza wacheñi. Amavulu ayikabishaña muloña wakukata kumujimba hela muyitoñojoka. Antu jaYehova amavulu anakuumika makabisha muloña wayuma yamuBayibolu yakuhwelelawu. Neyi anakutukabisha twatela kwanukaña mazu aYesu. Wahosheli nindi: “Muntu wakomika kushika nikunsa, diyi akamwinawu.” (Mat. 24:13) Chumanyi chimwatela kwila neyi mwiluka nenu kudi muntu wamuchipompelu wunakoñi nshidi? Neyi akulumpi aneluki dehi oyu nsañu, komana mukudiwunjika nakukuhwelela nenu akusompa kwesekeja nachakeñayi Yehova? Yumanyi yatela kwilawu akulumpi neyi muntu yakoña nshidi?

13. Yehova wakeñaña akulumpi kwiladi neyi muntu nakoñi nshidi yeneni?

¹³ Neyi akulumpi eluka nawu kudi muntu wamuchipompelu wunakoñi nshidi, alombaña maana “afumaña mwiwulu” kulonda amoni oyu nsañu kwesekeja nachayimonañayi Yehova. (Yak. 3:17) Afwilaña kukwasha muntu wunakoñi nshidi “kufuma kuyuma yatama yinakoñiyi” neyi chinatwesheki. (Yak. 5:19, 20) Azataña cheñi nañovu kulonda akiñi chipompelu nikukundeja antu ananeñi. (2 Kor. 1:3, 4) Neyi anakusompa nsañu yamuntu wunavulumuni, akulumpi akeñakeñaña wunsahu walala wejima, nawa hanateli kuhita mpinji hakwila eli mwenimu. Nkumininaku, alombaña nawa amufumbaña kuzatisha Nsona nikumwolola “mwawuñaji” muntu wunavulumuni. (Yere. 30:11) Hela chakwila akulumpi ashimbwishaña wanyi muloña, hiyanyakalaña kufuukulaku. Neyi akulumpi azatisha nshimbi jaYehova, chipompelu chikumona yuma yayiwahi yakufumamu. Hela chakwila akulumpi anasompi nsañu munjila yayiwahi, muntu wakadi muloña chinateli kumukata. Neyi ichi chuma chiyimwekena, chumanyi chimwatela kwila hakwila nawu muleki kutiya kutama?

14. Chakutalilahwinyi chamuBayibolu chinateli kuyikwasha kuumika neyi anayineñeshi kudi mukwenu mukwaKristu?

¹⁴ Komana ayineñeshahu dehi kudi muntu  indi kwiji manakwenu hela muhela muchipompelu? Mwizu daNzambi mudi yakutalilahu yawantu yayiwahi yatudizishaña chakumuchiñilila Nzambi kulonda yakawahishi yuma. Chakutalilahu, hela chakwila Yosefu amuyandishili kudi amanakwindi, hetejeli nshidi jawu jimuleteshi kuhilaku. Ilaña watwalekelihu kumukalakela Yehova wenjili nakumukiswila hamuloña wakudiwunjika kwindi nikuumika. (Kutach. 39:21) Nkumininaku, Yosefu wayanakeneni antu amwilili chatama nawa wenjili nakumona chamukiswililiwu kudi Yehova. (Kutach. 45:5) Kufwana Yosefu, tukukundejewa neyi tuswina kwakwihi naYehova nikushiya kukala kwejima mumakasa indi.—Mas. 7:17; 73:28.

15. Chumanyi chamukwashili muhela kuumika nakudiwunjika nikwikala nakuwunda?

¹⁵ Hela chochu, hitunateli kumona kukala neyi kwamweniyi Yosefuku, ilaña twaneñaña neyi anakutwila chatama munjila yidi yejima. Chinateli kutukwasha neyi tuzatishaña yishina yamuBayibolu neyi tudi nakukala hela anatuneñeshi kudi muntu wabulaña kudifukula kudi Yehova. (Fwili. 2:3, 4) Talenu ichi chuma chamwekeni. Muhela waneñeli nankashi chelukiliyi nindi mukwawu mwazatilañawu wadiña nakumutuñula. Chatela yashikeni kwilahu chuma, muhela watoñojokeli hachakutalilahu chaYesu. Chamutukiliwu hafuntishili cheñi matukaku. (1 Pet. 2:21, 23) Chumichi chamukwashili kudiwunjika nayuma yamwekeni. Nkumininaku, welukili nindi mukwawu mwazatilileñawu wadiña wakata nankashi nawa wadiña nakwakama nankashi. Dichi muhela wenjili nakukunkulula nindi mukwakwu mwazatilañawu wahosheli chumichi muloña wayikatu. Muhela wazañaleli chelukiliyi nindi wadiwunjikili nakuumika kukala nawa wadiña nakuwunda.

16. Chumanyi chinateli kuyikundeja neyi munakuumika makabisha? (1 Petulu 3:12)

¹⁶ Neyi munakukabakana muloña wakuyila chatama, hela kukala kukwawu, anukenuña nenu Yehova wudi kwakwihi “nawantu abaluka nyichima.” (Mas. 34:18) Wayikeña nanochu chimwadiwunjika nichimwombilaña yiteli yenu hadi yena. (Mas. 34:18) Diyi Nsompeshi weseki dejima. Wamonaña yuma yejima. (Tañenu 1 Petulu 3:12.) Neyi munakumona kukala kumukubula kutwesha kumanisha, komana mukumuchiñililaña Yehova?

17. Yehova watukana nindidi haIsaya 30:18?

¹⁷ Katataka Tata yetu wamwiwulu yazatishi Wanta windi kulonda yatukiswili. Isaya 30:18 yahoshaña nawu: “Yehova [nadiwunjika nakuchiñilila] kulonda ayitiyili luwi; dichi chakaditwalilayi kwiwulu kulonda akayitiyili wushona; muloña Yehova hiNzambi wawuñaji; antu ejima akumuchiñilila yena anakooleki.” Antu akumuchiñililaña Yehova akutambwila nkisu jajivulu makonu nimwituña dadiha.

18. Yumanyi yayiwahi yitunakuchiñilila?

¹⁸ Neyi antu jaNzambi aneñili dehi mwituña dadiha, hiyakakamaña hela kumona kukala kunakumonawu chayinu mpinjiku. Wuñanji waheña wukamana nawa hikwakekala kukataku. (Chim. 21:4) Hitwakakamaña nakuchiñilila yuma yitunakukeñaku, muloña kwakekala yuma yayivulu. (Mas. 72:16; Isa. 54:13) Iyi yakekala mpinji yayiwahi chikupu!

19. Yehova nakutudizisha ñahi chayinu mpinji?

¹⁹ Yehova nakutudizisha chayinu mpinji hakwila tukashakami muchiyuulu chindi kuhitila mukutukwasha kuleka yilwilu yatama nakwikala nayilwilu yayiwahi yamuzañaleshaña. Bayi muneña chakwila muleka nikumukalakela Yehovaku. Yuma yayiwahi yinakwinza! Chineli tunakutalila chihandilu chachiwahi kumbidi, tutwalekenuhu kumuchiñilila Yehova nakudiwunjika kulonda yakamanishi mudimu windi.