1-2. Kwesekeja naMasamu 34:8, tunateli kwila ñahi hakwila twiluki kuwaha kwaYehova?

FWIKIJENU anayinki yakuda yimwabulahu dehi kuda. Munateli kuyiluka neyi muyitala chiyinakumwekana, muyinunka, mwiluka chakuyiteleka, hela mutiyilila kudi antu amakwawu neyi chakwila ayikeña. Hela chochu, njila yimu yinateli kuyikwasha kwiluka neyi yayiwahi hikuditompela enu aweni.

² Tunateli kwiluka chawahayi Yehova neyi tutañaña Bayibolu, nyikanda yetu nikutiyilila kuyuma yayiwahi yahoshañawu antu yayililañayi Yehova. Ilaña tukwiluka chikupu chawahayi Yehova neyi ‘tuditompela’ etu aweni kuwaha kwindi. (Tañenu Masamu 34:8.) Tuhanjekenu njila yimu mutunateli kwilila mwenimu. Hadaha tunakukeña kumukalakela Yehova mumudimu wampinji yejima, ilaña hakwila tushikiji mutunafuukuli, twatela kupeleshaku chihandilu chetu. Hadaha tunatañi kakavulu chikaninu chaYesu chakwila nawu, neyi tutwamijaku Wanta waYehova wukutwinka yuma yejima yitunakukeña ilaña kanda tumumoneñahu dehi Yehova kutwilila iyi yuma. (Mat. 6:33) Hela chochu, chineli twakuhwelela muchikaninu chaYesu, twatela kupeleshaku jakulandalanda, kukeheshaku nyidimu, nikuzata hakumina ñovu yetu mumudimu wakushimwina. Chitwela mwenimu, tukwiluka chikupu netu Yehova watwakamenaña nayuma yitwakeñaña. ‘Tukuditompela’ kuwaha kwaYehova.

3. Kwesekeja naMasamu 16:1, 2, anyi enkañayi Yehova yuma yayiwahi?

³ Yehova “himuwahi kudi antu ejima,” kushilahu ninana abula kumwiluka. (Mas. 145:9; Mat. 5:45) Sweje-e wayililaña yuma yayiwahi antu amukeña nawa amukalakelaña nawumi wawu wejima. (Tañenu Masamu 16:1, 2.) Tuhanjekenu yuma yayiwahi yikwawu yatwililayi Yehova.

4. Yehova wayinkaña ñahi yuma yayiwahi antu aswinaña kwakwihi nayena?

 ⁴ Mpinji yejima yitwazatishaña yuma yatudizishañayi Yehova, twamonaña chiyatukwashaña muchihandilu chetu. Chakutalilahu, chitwadizili yuma yayivulu hadi yena nichitwamukeñeli, chatukwashili kuleka kutoñojoka hayuma yatama nikuleka kwila yuma yahelayi. (Kol. 1:21) Chitwadihanini kudi Yehova nikupapatishewa, watwinkeli yuma yayivulu yayiwahi chidi neyi chinleji chachiwahi nikwikala amabwambu jindi.—1 Pet. 3:21.

5. Yehova watukwashaña ñahi mumudimu wakushimwina?

⁵ Twamonaña kuwaha kwaYehova chitwazataña mudimu wakushimwina. Komana mwekala nansonyi? Antu jaYehova amavulu ekala nansonyi. Hadaha henohu kanda mwikali kambuña aYehova, mwatoñojokeleña nenu mwakatweshaña wanyi kudondomwena hetala damuntu imwabula kwiluka nakumushimwina nsañu yamuBayibolu. Ilaña makonu, mwadondomwenaña nakuyishimwina mpinji yejima. Nawa Yehova nayikwashi kudiluñisha mudimu wakushimwina! Munamoni Yehova chinayikwashiyi munjila jamboka-mboka. Nayikwashi kwikala adiwunjika hampinji yayikaanañawu mumudimu wakushimwina. Nayikwashi cheñi kwanuka Nsona yatelela yakuhanjeka namwiniitala. Nawa nayikwashi kutwalekahu kushimwina hela chakwila antu akeñaña wanyi kuhanjeka nenu.—Yere. 20:7-9.

6. Yuma yatudizishañayi Yehova yamwekeshaña ñahi nawu himuwahi?

⁶ Yehova natumwekesheli cheñi kuwaha kwindi kuhitila mukutudizisha chakushimwina. (Yow. 6:45) Hakupompa kwetu kwamukachi kamulungu, twatiyililaña kunsañu yinakuhosha hachakuhanjeka nawantu, nawa atukoleshaña kuyizatisha mumudimu wakushimwina. Hakusambila, twatiyaña woma kuzatisha iji njila jajiha, ilaña neyi tujizatishi, jazatikaña chiwahi. Hakupompa kwachipompelu nihakupompa kwamaneni atukoleshaña kuzatisha njila jamboka-mboka jakushimwinamu jitwabula dehi kuzatishahu. Iji njila jinateli kututiyisha woma ilaña neyi tujizatisha Yehova nateli kutukiswila. Tuhanjekenu yuma yayiwahi yafumañamu neyi tuzatisha njila jajiha hakumukalakela Yehova hakumina ñovu jetu, hichikweti muloña nachidi chihandilu chetuku. Nkumininaku, tukuhanjeka hajinjila mutunateli kuzatila nankashi mumudimu wakushimwina.

7. Yumanyi yayiwahi yafumañamu neyi tuzata nañovu jejima mumudimu wakushimwina?

⁷ Twaswejelañaku nikuswina kwakwihi naYehova. Talenu chakutalilahu chamukulumpi Samuel, * wazatilaña kuColombia hamu nañondidi. Awa adisumbula azatileña wupayiniya muchipompelu chamumukala wawu, ilaña akeñeleña kuya nakuzataku nankashi muchipompelu mwadiña kukankila. Dichi hakwila nawu ayi, alekeli yuma yikwawu yadiña nakwilawu. Manakwetu Samuel wahosheli nindi: “Twazatishili Matewu 6:33 nawa twalekeli kulanda yuma yitwabulileña kukeña nankashi. Ilaña chuma chaswejeli kutukalila nankashi hikushiya itala detu. Adituñili tuhu neyi chochitwakeñeleña nawa hitwadiililihu mali adi ejimaku.” Chayiliwu nakuzatila kudi kukankila, awa adisumbula akeñekeleña mali antesha akuhanda nachu kubadika azatishileñawu kunyima. Manakwetu Samuel wahosheli nindi: “Namoni Yehova chatulombolañayi nichakulañayi kulomba kwetu. Tweluka netu Yehova watiyaña kuwaha namudimu wetu nawa tuneluki chikupu netu watukeña.” Komana ninenu  munateli kuzataku chikupu mumudimu wakushimwina? Dichi, mwatela kwiluka nenu mukuswina kwakwihi naYehova nawa wukuyakamenaña.—Mas. 18:25.

8. Yumanyi yimunadizili kumazu ahosheliyi manakwetu Ivan nimuhela Viktoria?

⁸ Twekala namuzañalu mumudimu wetu. Talenu chahosheli aIvan niaViktoria, apayiniya adisumbula akalakelaña kuKyrgyzstan. Apelesheliku chihandilu chawu kulonda adihani kumudimu wudi wejima, kushilahu nimudimu wakutuña. Manakwetu Ivan wahosheli nindi: “Twazatileña hakumina ñovu jetu mumudimu wudi wejima. Hela chakwila twazeyeleña hakumana kwefuku, twazañaleleña muloña twelukileña netu twazatileña nañovu mumudimu waYehova. Twatiyileña cheñi muzañalu muloña twekalileña nawamabwambu amaha nawa twadiluñishileña cheñi yuma yayiwahi.”—Maku 10:29, 30.

9. Yumanyi yelañayi muhela wukweti kukala kwasweja kulonda yazati nankashi mumudimu wakushimwina, nawa yumanyi yafumañamu?

⁹ Twekalaña namuzañalu mumudimu waYehova hela chakwila tunakumona kukala muchihandilu. Chakutalilahu, muhela Mirreh, wakula dehi nawa nfwila wakuWest Africa, chamanini mudimu windi wawundotolu watachikili kuzata wupayiniya. Muhela Mirreh wakatakataña nawa wazataña hohu ora yimu hakushimwina kwitala nikwitala. Ilaña wazataña maora amavulu kushimwina kumaluña kwekalaña antu amavulu. Wukweti kufuntila kwakuvulu niatudizi aBayibolu amavulu, amakwawu wayitemeshelaña hohu mafoni. Chumanyi chamuletesheli muhela Mirreh kumukalakela Yehova nankashi? Wahosheli nindi: “Namukeña nankashi Yehova niKristu Yesu. Nawa kakavulu namulombaña Yehova nami yankwashi kuzata nankashi mumudimu windi.”—Mat. 22:36, 37.

10. Neyi chinamwekeshiwu ha 1 Petulu 5:10, yumanyi yayiwahi yatambwilaña antu adihanaña kudikita mumudimu waYehova?

¹⁰ Yehova watudizishaña yuma yayivulu. Manakwetu Kenny, payiniya wakalakelaña kuMauritius, anamudizishi yuma yayivulu. Chadiziliyi chalala wafumini kuyunivesiti, wapapatisheweli nawa weñilili mumudimu wampinji yejima. Wahosheli nindi, “Nakeñaña kwikala neyi kaprofwetu Isaya wahosheli nindi: ‘Yamonu! Ntemeshami!’” (Isa. 6:8) Manakwetu Kenny nazati nyidimu yayivulu mumudimu wakutuña, nawa nazatiku cheñi mudimu wakubalumuna nyikanda yashindamena haBayibolu mwidimi dawu. Wahosheli nindi: “Andizishili yuma yayivulu yankwashili kuzata chiwahi munyidimu yami.” Welukili hohu chakuzata nyidimuku. Wabombelelihu nindi: “Nadizili cheñi yuma yadiña nakunkalila niyilwilu yinatela kwikala nayu hakwila nawu nikali kambuña aYehova wamuwahi.” (Tañenu 1 Petulu 5:10.) Ninenu mwatela kushinshika chihandilu chenu kulonda Yehova yayizatishi munyidimu yikwawu.

11. Yumanyi yelili ahela amuSouth Korea kulonda azati mudimu wakushimwina nawa yumanyi yafuminimu? (Talenu mwevulu wudi hakava.)

¹¹ NiaYinsahu anashimbuli akeñekaña kuyidizisha kulonda eluki chakuzata mudimu wawuha wunakutachikawu. Mumpinji yachipupu chaCOVID-19, akulumpi amuchipompelu chamuSouth Korea asonekeli nawu: “Niantu atoñojokeleña nawu akutwesha wanyi kushimwina muloña wakukatakata ichi anakushimwina kuzatisha mavidiyo konfalensi. Ahela asatu adi nayaaka 80 anadizi chakushimwina kuzatisha jakutuñatuña nawa anakushimwina mafuku ejima.” (Mas. 92:14, 15) Komana kwila muzataku nankashi mumudimu wakushimwina kulonda mumutompi Yehova chawahayi nehi? Talenu yuma yimunateli kwila kulonda mwili mwenimu.

12. Indi Yehova wayikana nindidi antu amushindamenaña?

¹² Mushindamenenuña Yehova. Watukana nindi wakatukiswila neyi tumukuhwelela nawa tuzata hakumina ñovu jetu. (Mal. 3:10) Muhela Fabiola wakuColombia wamweni Yehova chashikijiliyi ichi chikaninu hadi yena. Wakeñeleña kwikala payiniya wampinji yejima neyi napapatishewi. Hela chochu, wazatileña kulonda yakwashi chisaka chindi. Dichi chashikili mpinji yakumana mudimu, wamulombeli kudi Yehova kulonda yamukwashi. Wahosheli nindi: “Kakavulu hahitaña mpinji hakwila akwinki mali apenshoni, ilaña ami mwahitili hohu kakweji kamu. Nahayami chikupu!” Chimwahitili tukweji tuyedi watachikili wupayiniya. Chayinu mpinji wudi nayaaka 70 nawa nazati wupayiniya kubadika hadi yaaka 20. Muniyi mpinji yinazatiyi, nakwashi antu 8 kupapatishewa. Wahosheli nindi: “Hela chakwila nazeyaña mpinji jikwawu, Yehova wankwashaña mpinji yejima kulonda nitwalekihu kuzata wupayiniya.”

13-14. Yakutalilahwinyi yinateli kuyikwasha kumukuhwelela Yehova nikuzata nankashi mumudimu wakushimwina?

¹³ Dizilenu kudi antu amushindameneni Yehova. MuBayibolu mwekala yakutalilahu yawantu azatileña nañovu mumudimu waYehova. Kakavulu awa ambuña aYehova elileñahu chuma chimu hakwila nawu Yehova yayikiswili. Chakutalilahu, Abarahama amukiswilili kudi Yehova hanyima yakushiya mukala windi “hela chakwila helukili kwayileñayi.” (Heb. 11:8) Yakoba niyena  amukiswilili hanyima yakulwisha nakañelu. (Kutach. 32:24-30) Muza waIsarela hiwadiña kwakwihi nakwiñila Mwituña daChikaninu, wazambukili hohu hanyima yakwila atupristu anadati dehi muKaloña Yodana.—Yosh. 3:14-16.

¹⁴ Yakutalilahu yawaYinsahu amakonu anakumushindamena Yehova nikudikita mumudimu windi yinateli kuyikwasha. Chakutalilahu, manakwetu Payton niñondidi Diana, atañileña nsañu yawamanakwetu nihela adikitili nañovu mumudimu waYehova, chidi neyi yibaaba yahoshaña nawu “Adihanini naMuchima Wumu.” * Manakwetu Payton wahosheli nindi: “Chitwatañileña nsañu yawu, twatiyileña neyi tunakumona muntu wunakuda yakuda yayiwahi. Chitwatalileña hadi mpinji yayilehi twakeñeleña ‘kutompa’ kulonda tutiyi chawahayi Yehova.’” Nkumininaku, aPayton niaDiana ayili nakuzatila kwadiña kukankila. Komana mwayitañahu dehi iyi yibaaba? Komana mwatalahu dehi mavidiyo adi neyi Kushimwina Kumaluña aKwakulehi—Australia niKushimwina Kumaluña aKwakulehi—Ireland adi ha jw.org? Iyi nsañu yinateli kuyikwasha kumona njila mumunateli kuzatila nankashi mumudimu wakushimwina.

15. Kudikunda nawantu amawahi kunateli kutukwasha ñahi?

¹⁵ Tondenu chiwahi amabwambu. Chekala chaswayi kuda yakuda yitwabulahu dehi kuda neyi tudi nawantu ayikeña. Munjila yoyimu, neyi tudikundaña nawantu amutwamijaku Yehova muchihandilu chawu, hadaha ninetu tukwikala adikita chikupu mumudimu waNzambi. Dichuma chamumwekeneni manakwetu Kent namuhela Veronica. Manakwetu Kent wahosheli nindi: “Amambwambu jetu niyisaka, atukolesheli kuzatishaku njila jamboka-mboka mumudimu wakushimwina. Twamweni netu kudikunda nawantu atwamijaku Wanta, kwatukwashili kwesekaku nyidimu yikwawu.” Chayinu mpinji manakwetu Kent nimuhela Veronica hiyapayiniya adimena muSerbia.

16. Neyi chinamwekeshiwu muchishimu chaYesu chekala haLuka 12:16-21, muloñadi chitwatela kudibondelaña muyuma yimu?

¹⁶ Dihanenuña kulonda mumukalakeleña Yehova. Hitwatela kuleka yuma yejima yitwakeña kulonda tumuzañalesheña Yehovaku. (Mukwa. 5:19, 20) Hela chochu, neyi tufuukulahu kubula kumukalakela Yehova nankashi mumudimu windi muloña wakukaana kuleka yuma yikwawu yitwakeña tukwikala neyi ona iyala wamuchishimu chaYesu, wazatili nañovu nakwikala nayuma yayivulu ilaña yamudiwula Nzambi. (Tañenu Luka 12:16-21.) Manakwetu Christian, wakuFrance, wahosheli nindi: “Hinazatishileña chikupu mpinji yami niñovu kulonda nimukalakeli Yehova nichisaka chamiku.” Yena niñondidi afuukwilihu kuzata wupayiniya. Ilaña hakwila azati wupayiniya, ateleleli kuleka nyidimu yawu. Hakwila adikwasheña, atachikili kuzata mudimu wakukomba-komba, nawa elukili chakuhanda natuyuma twantesha. Komana akweti muzañalu muloña wakwila alekeli yuma yikwawu kulonda ekali apayiniya? Manakwetu Christian wahosheli nindi: “Ichi twatiyaña kuwaha kuzataku mudimu wakushimwina nikumona atudizi aBayibolu niantu itwafuntilañaku anakumwiluka Yehova.”

17. Muloñadi chichinateli kutukalila kuzatisha njila jikwawu mumudimu wakushimwina?

¹⁷ Zatishenuña njila jamboka-mboka jakushimwinamu. (Yilw. 17:16, 17; 20:20, 21) Muhela Shirley, payiniya wakuUnited States, wahimpili njila yakushimwinamu mumpinji  yachipupu chaCOVID-19. Hakusambila, wajinokeleña kuzatisha foni hakushimwina. Chelili ayidizishi hampinji yayendeleliwu kudi nkoñi wañinza, watachikili kushimwina mpinji yejima kuzatisha foni. Wahosheli nindi: “Hakutachika natiyileña woma, ilaña ichi diyi njila yinakuzatisha nankashi. Tunakushimwina antu amavulu kubadika chitwashimwinineña kwitala nikwitala.”

18. Chumanyi chinateli kutukwasha neyi kudi chuma chinakutukañesha kuzata nankashi mumudimu wakushimwina?

¹⁸ Fuukulenu nawa ilenu mumunafuukuli. Neyi tunakumona kukala, twalombaña wukwashu nawa twatoñojokaña njila mutunateli kumanishila oku kukala. (Yish. 3:21) Sonia, payiniya wampinji yejima wakalakelaña mwizanvu dahoshaña idimi dachiRoman kuEurope, wahosheli nindi: “Nasonekaña hachipapilu yuma yinafuukulaña nawa nachilamikaña hakwila nitaleñahu mpinji yejima. Hamesa yami nafunjekahu nyikwakwa yiyedi yikweti mansaña. Neyi kudi yuma yinakukeña kufuukula, natalaña hamansaña nawa natoñojokaña nami iyi yuma yinkutwala kudihi.” Muhela Sonia wazataña nañovu kulonda yabuleña kudakamena nakukala kukwetiyi. Wahosheli nindi: “Namonaña kukala kudi kwejima neyi mbañu yinateli kunkañesha kushikija munafuukuli hela neyi chaawu chinateli kunkwasha kushikija munafuukula.”

19. Chumanyi chitunakufwila kwila?

¹⁹ Yehova watukiswilaña munjila jajivulu. Twatela kumuhamekaña Yehova kulonda tumwekesheña netu twasakililaña nayuma yatwililañayi. (Heb. 13:15) Munabombeli kumuzatila Yehova nyidimu yamboka-mboka nawa Yehova wukutukiswila chikupu. Ifuku nifuku, tumoneña njila mutunateli ‘kumutompela Yehova nikutiya chawahayi.’ Kuhiñahu, tukwikala neyi Yesu, wahosheli nindi: “Yakuda yami yowu kwila nkeñelu yanowu wantemesheli nikumanisha mudimu windi.”—Yow. 4:34.