1. Chumanyi chinateli kutukwasha kutachika kudiluñisha kudiza wuprofwetu wamuBayibolu?

 MANAKWETU wakansi Ben wahosheli nindi, “Natiyaña kuwaha kudiza wuprofwetu wamuBayibolu.” Komana ninenu dichimwatiyaña? Indi kwiji mwatiyaña nenu wuprofwetu wakala kutiyishisha? Hadaha munateli kutiya nenu kudiza nsañu yawuprofwetu kwaletaña wuudi. Ilaña, neyi mwiluka chikupu chaletesheli Yehova awusoneki Mwizu dindi, munateli kuhimpa yitoñojoka yenu.

2. Achinu chibaaba chikuhosha hayumanyi?

² Muchinu chibaaba, tukuhanjeka muloña waweni wutunateli kudizila wuprofwetu wamuBayibolu nichitunateli kuwudiza. Tukudiza cheñi wuprofwetu wuyedi wekala mumukanda waDanyeli kulonda twiluki chiwunateli kutukwasha chayinu mpinji neyi tuwutiyishisha.

3. Chumanyi chitwatela kwila neyi tunakukeña kutiyishisha wuprofwetu wamuBayibolu?

³ Twatela kulomba wukwashu neyi tunakukeña kutiyishisha wuprofwetu wamuBayibolu. Talenu ichi chakutalilahu. Fwikijenu munakuya kwiluña dimwabula kwiluka, ilaña ibwambu denu imunakuya nindi weluka chiwahi chekala idi iluña. Neluki chiwahi himunashiki nawa neluki kwaya njila-hinjila. Chakadi nikujina, mukutiya kuwaha ibwambu denu chetejayi kuya nenu! Munjila yoyimu, Yehova weluka mpinji yitunakushakamamu nimbidi yetu. Dichi hakwila tutiyishishi wuprofwetu wamuBayibolu, twatela kudizoza nakulomba wukwashu kudi Yehova.—Dan. 2:28; 2 Pet. 1:19, 20.

4. Muloñadi Yehova chetejeleliyi wuprofwetu kuwusoneka Mwizu dindi? (Yeremiya 29:11) (Talenu cheñi mwevulu.)

⁴ Kufwana nvwali wamuwahi, Yehova wakeñaña nindi anyanindi akekali nambidi yayiwahi. (Tañenu Yeremiya 29:11.) Ilaña kwambukaku  nawanvwali awuntu, Yehova nateli kushimuna yuma yakamwekana kumbidi, nawa mpinji yejima washimunaña mwalala. Wetejeli wuprofwetu kuwusoneka Mwizu dindi kulonda twiluki yuma yalema yakamwekana henohu kanda yimwekani. (Isa. 46:10) Wuprofwetu wejima wamuBayibolu hichawaana chachiwahi chatwinkayi Tata yetu wamwiwulu. Hanu dinu munateli kwiluka ñahi nenu yuma yashimuna Bayibolu mwamweni yakashikijewa?

5. Chumanyi chatela kudizilayi kansi kudi Max?

⁵ Kushikola, kakavulu anyanetu awanikaña nawantu abula kulemesha Bayibolu. Yuma yahoshañawu niyilwilu yawu yinateli kuletesha Chinsahu wakansi kutachika kujinoka yuma yakuhwelelayi. Talenu chuma chamwekeni kudi Max. Wahosheli nindi, “Hinadiña kampululu, natachikili kujinoka neyi chakwila kudifukula kwanlejeleñawu anvwali jami kwadiña kwalala nawa najinokeleña neyi chakwila Bayibolu ayonena kudi Nzambi.” Chumanyi cheliliwu anvwali jindi? Wahosheli nindi, “Adiwunjikili, hela chakwila nelukili nami akameneni.” Anvwali jindi akwili malwihu indi kuzatisha Bayibolu. Max niyena welilihu chuma chimu. Wahosheli nindi: “Nadizileña wuprofwetu wamuBayibolu nkawami, nawa nalejeleñaku akwetu atwansi yuma yinadizileña.” Chumanyi chafuminimu? Max wahosheli nindi, “Kufuma haniyi mpinji, nelukili chikupu nami Bayibolu ayonena kudi Nzambi!”

6. Chumanyi chimwatela kwila neyi munakujinoka, nawa muloñadi?

⁶ Kufwana Max, neyi mutachika kujinoka neyi chakwila muBayibolu mwekala chalala hela nehi, bayi mudinka nyiloñaku. Ilaña mwatela kwilahu chuma chimu. Kujinoka kudi neyi kadala. Neyi kukifumisha nehi, chovu-chovu kanateli kukisañana chuma chalema. Hakwila mutachiki kufumisha “kadala” kuchikuhwelelu chenu, mwatela kudihula nenu, ‘Komana nakuhwelela yuma yakumbidi yahosha Bayibolu?’ Neyi munakujinoka, mwatela kudiza wuprofwetu wamuBayibolu washikijewa dehi. Munateli kwila ñahi mwenimu?

7. Yumanyi yeliliyi Danyeli yinateli kutukwasha ñahi kwiluka chakudiza wuprofwetu? (Danyeli 12:10) (Talenu cheñi mwevulu.)

⁷ Yuma yeliliyi Danyeli yinateli kutukwasha kwiluka chakudiza wuprofwetu. Kudi chuma chachiwahi chaletesheli adizeña wuprofwetu, wakeñeleña kwiluka chalala. Danyeli wadiña cheñi wadizoza, welukili nindi Yehova wakwashaña antu amwiluka nawa alondelaña nshimbi jindi jaloña kwiluka mwatalisha wuprofwetu. (Dan. 2:27, 28; tañenu Danyeli 12:10.) Wamwekesheli hatooka nindi wadiña wadizoza kuhitila mukushindamena hawukwashu waYehova. (Dan. 2:18) Danyeli cheñi wadizileña nakanañachima. Wasandujolileña muNsona jonenewa jadiñayi naju. (Yere. 25:11, 12; Dan. 9:2) Munateli kumwimbujola ñahi Danyeli?

8. Muloñadi antu amakwawu chakaaninañawu nawu wuprofwetu wamuBayibolu washikijewaña wanyi, ilaña etu chumanyi chitwatela kwila?

⁸ Toñojokenu hachuma chayileteshaña kudiza wuprofwetu. Komana kufwila kwiluka chalala dikwayileteshaña mufwileña kudiza wuprofwetu wamuBayibolu? Neyi dichuma chayileteshaña, Yehova wukuyikwashaña. (Yow. 4:23, 24; 14:16, 17) Hanu dinu, muloñadi antu  amakwawu chadizilañawu wuprofwetu? Amakwawu elaña mwenimu nakukuhwelela nawu akuwana wunsahu wamwekeshaña nawu Bayibolu ayonena wanyi. Chumichi chaleteshaña atachiki kutoñojoka nawu anateli kudituñila nshimbi jawu aweni kutalisha hayuma yayiwahi nayatama nikulondela oju nshimbi jawu. Hela chochu, etu twatela kwiluka chuma chachiwahi chinakutuletesha kudiza wuprofwetu. Kubombelahu, etu twatela kwikala nachilwilu chalema hakwila tutiyishishi wuprofwetu wamuBayibolu.

9. Chilwilwinyi chitwatela kwikala nachu hakwila tutiyishishi wuprofwetu wamuBayibolu? Lumbululenu.

⁹ Ikalenu adizoza. Yehova washiika nindi wukuyikwashaña antu adizoza. (Yak. 4:6) Dichi twatela kulomba wukwashu kudi Yena hakwila tutiyishishi wuprofwetu wamuBayibolu. Neyi twadizoza, tukwiteja cheñi wukwashu wafumaña kudi nduñu washinshika wunakuzatishawu kudi Yehova kutwinka yakuda yakuspiritu hampinji yatelela. (Luka 12:42) Yehova hiNzambi wabulaña kuluwañesha, dichi chinateleli yena kuzatisha hohu njila yimu kulonda atukwashi kutiyishisha chalala chekala Mwizu dindi—1 Kor. 14:33; Efwe. 4:4-6.

10. Chumanyi chimunadizili kudi muhela Esther?

¹⁰ Dizenuña nakanañachima. Tondenu wuprofwetu wayitiyishaña kuwaha nawa tachikenu kusandujola hanowu wuprofwetu. Dicheliliyi muhela Esther. Watiyileña kuwaha wuprofwetu wahosha hakwinza kwaMesiya. Wahosheli nindi: “Hinadiña nayaaka 15, natachikili kukeñakeña wunsahu wamwekesheleña neyi chalala iwu wuprofwetu awusonekeli henohu Yesu kanda enzi.” Nsañu yelukiliyi hanyima yakutaña muNyivuñilu yakuKaluñalwiji Kafwa yamukwashili chikupu kwikala nachikuhwelelu. Wenjili nakuhosha nindi: “Wuprofwetu wukwawu awusonekeli henohu Kristu kanda enzi, dichi wuprofwetu wadiñamu wateleleli hohu kufuma kudi Nzambi.” Muhela Esther wahosheli nindi, “Natañileña nsañu kakavulu hakwila niyitiyishishi.” Hela chochu, wazañalalaña muloña wazatili nañovu. Hanyima yakudiza wuprofwetu wawuvulu wamuBayibolu nakanañachima, wahosheli nindi, “Ichi neluka chikupu nami yuma yahosha Bayibolu yalala!”

11. Yumanyi yayiwahi yafumañamu neyi tudiwanina etu aweni wunsahu wunakumwekesha nawu nsañu yamuBayibolu yalala?

¹¹ Neyi twiluka chashikijewa dehi wuprofwetu wukwawu waMwizu daNzambi, twamukuhwelelaña chikupu Yehova ninjila munakutulombwelayi. Kubombelahu, wuprofwetu wamuBayibolu watukwashaña kutwalekahu kuchiñeja yuma yayiwahi yakumbidi, hela chakwila tunakumona kukala kwamuchidinyi chayinu mpinji. Tuhanjekenu chanti hawuprofwetu wuyedi wasonekeliyi Danyeli wunakushikijewa chayinu mpinji. Kutiyishisha iwu wuprofwetu kukutukwasha kufuukula chachiwahi.

12. Nyendu “[yachikuñu] chakubombashana nandambu” yinakwimenaku kwodi? (Danyeli 2:41-43)

¹² Tañenu Danyeli 2:41-43. Muchilota chamulumbulwililiwu Mwanta Nebukaneza kudi  Danyeli, nyendu yankishi wamweniyi mwanta yadiña “[yachikuñu] chakubombashana nandambu.” Neyi twesekeja iwu wuprofwetu nawuprofwetu wukwawu wekala mumukanda waDanyeli niChimwekeshu, tukukunkulula netu nyendu yemenañaku Anglo-America, nfulumendi yañovu mukaayi makonu. Kutalisha haniyi nfulumendi yañovu mukaayi, Danyeli wahosheli nindi iwu “[wanta wakekala] aha wakola aha nehi.” Wawovu munjilanyi? Muloña antu abula kulema, amenañaku ndambu, adiwulaña wuswa waniwu wanta wakwikala wakola neyi chikuñu. b

13. Chalalanyi chalema chitunakudizila kuniwu wuprofwetu?

¹³ Kuchalumbulwiliyi Danyeli chilota chankishi, sweje-e madatilu indi, twadizilañaku chalala chalema. Chatachi, Anglo-America Wanta waÑovu muKaayi wunamwekeshi ñovu yawu munjila jikwawu. Chakutalilahu, wazatili nañovu kushinda Njita yaKaayi Yatachi niYamuchiyedi. Hela chochu, iwu wanta wañovu mukaayi anawuzeyeshi nawa akutwalekahu kuwuzeyesha muloña wakudizuñañesha kwawantu ekalamu. Chamuchiyedi, iwu wanta wañovu diwakekala wakukumishaku kuyuula henohu Wanta waNzambi kanda wujiyishi mawanta ejima awantu. Hela chakwila mpinji yikwawu matuña amakwawu anateli kudikaña naAnglo-America Wanta waÑovu muKaayi, kwila atwesha kuwusinsa nehi. Tuneluki chumichi muloña “ilola” dinakwimenaku Wanta waNzambi dakachika madatilu, owu emenañaku Anglo-America.—Dan. 2:34, 35, 44, 45.

14. Kutiyishisha mwatalisha wuprofwetu wahosha hamadatilu achikuñu nandambu kunateli kutukwasha ñahi kufuukula chachiwahi?

¹⁴ Komana munakuhweleli chikupu nenu wuprofwetu waDanyeli wahosha hamadatilu achikuñu nandambu walala? Neyi diimu, chumichi chikuyikwasha kwiluka chimwatela kuhanda. Himukufwilaña kwikala namaheta amavulu mukanu kaayi kadi kwakwihi nakujilumunawuku. (Luka 12:16-21; 1 Yow. 2:15-17) Kwiluka mwatalisha iwu wuprofwetu kunateli kuyikwasha cheñi kwiluka kulema kwamudimu wakushimwina nikudizisha. (Mat. 6:33; 28:18-20) Hanyima yakudiza iwu wuprofwetu, kwila mudihula ilu lwihu nehi, ‘Komana yuma yinafuukulaña yamwekeshaña nawu nakuhweleli nami Wanta waNzambi wudi kwakwihi nakujiyisha nfulumendi jawantu jejima?’

15. “Mwanta wakukabeta kakuchidiilu” “[nimwanta] wakukabeta kakuchimunswa” hiyanyi makonu? (Danyeli 11:40)

¹⁵ Tañenu Danyeli 11:40. Danyeli kapetulu 11 kahosha hadi anyanta ayedi, hela nfulumendi jiyedi jadizuñishaña. Neyi twesekeja iwu wuprofwetu nawuprofwetu wukwawu wekala muBayibolu, tukwiluka netu “mwanta wakukabeta kakuchimunswa” hiRussia nimatuña amukwashañaku nawa “mwanta wakukabeta kakuchidiilu” hiAnglo-America Wanta waÑovu muKaayi. c

16. Kukalanyi kwamonañawu antu ashakamaña muchiyuulu ‘chamwanta wakukabeta kakuchimunswa’?

¹⁶ Antu jaNzambi ashakamaña muchiyuulu ‘chamwanta wakukabeta kakuchimunswa’ anakuyikabisha kudi iwu mwanta. AYinsahu amakwawu ayetaña nikuyisha mutuleya muloña wayuma yakuhwelelawu. Chatela amanakwetu achiineña, ilaña yuma yelañayi “mwanta wakukabeta kakuchimunswa” yakoleshaña chikuhwelelu chawu. Muloñadi? Muloña amanakwetu eluka nawu kukabishewa kwawantu jaNzambi kwashikijaña mazu awuprofwetu ashimwiniyi  Danyeli. d (Dan. 11:41) Kwiluka chumichi kunateli kutukwasha kwikala nachikuhwelelu chakola nikutwalekahu kwikala ashinshika kudi Yehova.

17. Kukalanyi kwamweniwu antu jaNzambi muchiyuulu ‘chamwanta wakukabeta kakuchidiilu’?

¹⁷ Kunyima, “mwanta wakukabeta kakuchidiilu” niyena walukukileña antu jaYehova. Chakutalilahu, hampinji yaNjita yaKaayi Yatachi niYamuchiyedi, amanakwetu amavulu ayishili mutuleya muloña wakubula kudiñija munsañu jamatuña nachiyuulu nawa anyana kawaYinsahu amakwawu ayihañili kumashikola muloña wachuma chochimu. Hela chochu, muyaaka yinahitihu, kashinshi kawantu jaYehova ashakamaña muchiyuulu chaniwu mwanta kadiña mukweseka. Chakutalilahu, hampinji yakuvota, mukaKristu nateli kwikala mukweseka kwakuhakwilaku izanvu dimu damapolitiki hela muntu wumu. Hanateli kuya nakuvotaku; ilaña muyitoñojoka nimumuchima windi nakuhakwilaku kabadi  kamu. Dichi chalema kubula kudiñija munsañu jamapolitiki muyuma yitwelaña, muyitoñojoka yetu nichitwatiyaña!—Yow. 15:18, 19; 18:36.

18. Twelaña ñahi nakubula kutiyañana kwekala hakachi kanawa anyanta ayedi? (Talenu cheñi mwevulu.)

¹⁸ Antu abula kukuhwelela wuprofwetu wamuBayibolu anateli kwakama nankashi chamonawu “mwanta wakukabeta kakuchidiilu” “nadipiki nseñu” “[namwanta] wakukabeta kakuchimunswa.” (Dan. 11:40, tth.) Awa anyanta ejima ayedi akweti yitwa yanjita yinateli kujilumuna antu ejima hamaseki. Ilaña tweluka netu Yehova haketeja chumichi kumwekanaku. (Isa. 45:18) Dichi, chatela kubula kutiyañana kudi hakachi “[kamwanta] wakukabeta kakuchimunswa” “[namwanta] wakukabeta kakuchidiilu” kutwakamisheña, ilaña kwakoleshaña chikuhwelelu chetu. Chumichi chamwekeshaña nawu kukuma kwanshakaminu yamakonu kudi kwakwihi.

19. Chumanyi chitwatela kwiluka kutalisha hawuprofwetu wamuBayibolu?

¹⁹ Tweluka wanyi chakashikijewa wuprofwetu wukwawu wamuBayibolu. Kaprofwetu Danyeli niyena hatiyishishili mwatalishili yuma yejima yasonekeliyiku. (Dan. 12:8, 9) Ilaña neyi hituneluki chikupu wuprofwetu wumu chiwakashikijewaku, chinatalishi wanyi mukwila nawu hiwakashikijewaku. Chakadi nikujina, twatela kukuhwelela netu Yehova wakatukwasha kutiyishisha yuma yitwakeñaña kwiluka hampinji yatelela, neyi cheliliyi kunyima.—Amosi 3:7.

20. Wuprofwetwinyi wakuhayamisha wamuBayibolu wutukumona wukushikijewa katatakichi, nawa twatela kutwalekahu kwiladi?

²⁰ Akabidika mbila “[yakuwunda] nikukiñewa.” (1 Tes. 5:3) Kuhiñahu, nfulumendi jamukaayi jakabalumukilamu kudifukula kwakutwamba nakukwijiyisha. (Chim. 17:16, 17) Nkumininaku, akalukuka antu jaNzambi. (Ezek. 38:18, 19) Iyi yuma yakamwekanaña yakaletesha njita yakukumishaku yaAmagedoni yakatachiki. (Chim. 16:14, 16) Twatela kukuhwelela chikupu netu iyi yuma keña yimwekani. Henohu iyi mpinji kanda, tutwalekenuhu kumwekesha kusakilila kudi Tata yetu wamwiwulu wukweti kukeña kuhitila mukusha muchima kuwuprofwetu wamuBayibolu nikukwasha akwetu kulonda eleña mwomumu.