Muchina chibaaba, twadizili netu kudi hohu chuma chimu chalema chatela kwilawu antu niañelu: hikujilika ijina daYehova dabadika. Hela chikali hela chibuli kukala, njila yayuulilañamu Yehova yayiwahi, munabombeli kujilika ijina daYehova. Munjila yoyimu, hela chakwila muntu wukuhemba kashinshi kindi kudi Yehova hela nehi, nimwena munabombeli chuma chalema chikupu chakujilika ijina daYehova.

Muloñadi chitunakukonkomwena chayinu mpinji netu chuma chalema nankashi chinashindameni hejina daYehova nikudijilika? Tuhanjekenu hayuma yisatu yinaleteshi tuhoshi mwenimu.

Chatachi, Satana watamishili ijina daYehova, mwitempa daEdeni. Lwihu lwaSatana lwamwihwiliyi Eva lwamwekesheli nawu Yehova wadiña nachisambu wanyi nawa nindi nshimbi jayinkeliyi aAdama naEva jadiña chiwahi wanyi. Kuhiñahu Satana watadikishili mazu aYehova nakumutena Nzambi nindi hisakutwamba. Dichi watamishili ijina daYehova. Wekalili “Diyabolu,” daya mukwila nawu “mukakutwamba.” (Yow. 8:44) Chineli Eva wakuhweleleli mumakudi aSatana, wakaanini kumwovwahila Nzambi, nakudikaña nachiyuulu chindi. (Kutach. 3:1-6) Kushika nikulelu, Satana natwalekihu kutamisha ijina daNzambi, nakutaandisha makudi kutalisha hachekalayi Yehova. Antu akuhwelelaña awa makudi chekalaña chaswayi kubula kumwovwahila Yehova. Dichi kutamisha ijina daYehova dajila, kudi antu jaNzambi hichuma chatama nankashi. Dichuma chaletesha makabi nikutama kwejima kudi mukaayi.

Chamuchiyedi, hakwila akwashi yileñaleña yejima, Yehova nakufwila chikupu kujilika ijina dindi, kulonda diikali cheñi ditooka. Ichi dichuma chalema nankashi kudi Yehova. Dichaletesha ahoshi nindi: “Chakadi nikujina, nakajilika ijina dami dabadika.” (Ezek. 36:23) Nawa Yesu washimwini hatooka chuma chatela kutenañawu ambuña aYehova ashinshika mukulomba hahosheliyi nindi: “Ijina deyi diikali dajila.” (Mat. 6:9) Bayibolu yakonkomwena cheñi kakavulu chalemena kujilika ijina da Yehova. Talenu iyi yakutalilahu yantesha: “Mwinkenu Yehova kalemesha katelela ijina dindi.” (1 Kushi. 16:29; Mas. 96:8) “Imbenu tumina twakushimeka ijina dindi dalema.” (Mas. 66:2) “Nakalemesha ijina deyi haya nyaaka.” (Mas. 86:12) Mpinji yimu yahosheleliyi Yehova mwiwulu yadiña mpinji yadiñayi Yesu hatembeli muYerusalema kwahosheleliyi nindi: “Tata, lemeshaku ijina deyi.” Kuhiñahu Yehova wamwakwili nindi: “Nadilemesha dehi, inakudilemesha nawa cheñi.”—Yow. 12:28. a

Chamuchisatu, nkeñelu yaYehova mpinji yejima yakundama kwijina dindi. Toñojokenu haniyi yuma: Hanyima yakweseka kwakukumishaku kwakalondela hanyima yakukuma kwaChiyuulu chaYesu chaYaaka Ikombakaji, chumanyi chakahiñahu? Indi añelu niantu jaYehova akela ñahi kutalisha  hakujilika ijina daYehova hayina mpinji? Hakwila tuwani ñakwilu yanilu lwihu, twanukenu yuma yiyedi yalema yadifwana, kashinshi kawantu nichiyuulu chaNzambi. Komana antu ashinshika akatwalekahu kumona kukula kwakukeña kufumpa kashinshi kawu? Inehi. Akekala awanina nawa anesekiwu dehi chikupu. Akekala nawumi wahaya nyaaka. Twakakeñaña cheñi wanyi kwiluka neyi chakwila njila mwayuulilañayi Yehova yayiwahi hela nehi. Hayina mpinji, añelu niantu ejima hamaseki akanuñañana nawa aketeja chiyuulu chaYehova. Hanu dinu, chumanyi chakamwekana kwijina daYehova?

Haniyi mpinji ijina daYehova akadijilika chikupu, hidakatamishewahu cheñiku. Hela chochu, dikatwalekahu kwikala dalema chikupu kudi ambuñindi ashinshika ejima amwiwulu niahamaseki. Muloñadi? Muloña akamona Yehova natwalekihu kwila yuma yakuhayamisha. Ilukenu chumichi: Chineli Yesu wakadizoza nakufuntisha wanta wejima kudi Yehova, Nzambi wakekala “yuma yejima kudi antu ejima.” (1 Kor. 15:28) Kuhiñahu, antu akekala hamaseki akazañalela “mukusubuka kwakulema kwawanyana kaNzambi.” (Rom. 8:21) Nkumininaku, Yehova wakashikija chuma chafwilañayi kwila, chakuleta yileñaleña yindi yejima yamwiwulu niyahamaseki hamu nakwikala chisaka cheneni nawa chanuñañana.—Efwe. 1:10.

Iku kuhimpika kwejima kwakaletesha chisaka chaYehova chamwiwulu nichahamaseki kwiladi? Chakadi nikujina, twakafwilaña chikupu kutwalekahu kushimeka ijina daYehova dadiwahi. Ñimbi yaMasamu Davidi amwoneneni kusoneka nawu: “Yehova Nzambi amushimeki . . . Ijina dindi dalema adishimeki haya nyaaka.” (Mas. 72:18, 19) Tukutwalekahu kwilukilahu yuma yayiha nawa yayiwahi yakumushimekelahu Yehova haya nyaaka nanyaaka.

Ijina daYehova damulumbulula chikupu chekalayi. Chasweja kubadika, ijina dindi datwanukishaña hakukeña kwindi. (1 Yow. 4:8) Mpinji yejima tukwanukaña netu kukeña dikwamuletesheli Yehova atuleñi, ahani ifutu danyiloña nawa dikwaletesheli amwekeshi nindi njila yayuulilañamu yaloña nawa yayiwahi. Ilaña twakatwalekahu kumona Yehova chamwekeshelañayi yileñaleña yindi kukeña. Twakaswinaña kwakwihi nayena chikupu hamu neyi Tata yetu, nawa twakashimekaña ijina dindi dalema haya nyaaka nanyaaka.—Mas. 73:28.