• “Natiyili tuhu neyi nfumwami natwalekihu kwila wujila.”

• “Natiyili nsonyi, namweneña nami natama nawa nidi wamukunkulwayi.”

• “Nalejelihu muntu wejima wanyi iyi nsañu. Nafwilileña hohu mukachi.”

• “Namweneña tuhu neyi Yehova wañakamenaña wanyi.”

Awa mazu adi hewulu anakumwekesha mumbanda chakabakanañayi neyi nfumwindi watalaña nyevulu yanzekesi. Nawa neyi watachikili dehi kwila mwenimu mukuswamujoka, hadaha hadi tukweji hela hadi yaaka yayivulu, mumbanda neteli kutoñojoka nindi kwila amukuhwelela cheñi nfumwindi nehi. Mumbanda wumu wahosheli nindi, ‘Natiyaña neyi hinamwilukisha chiwahi nfumwamiku. Kudihu yuma yikwawu yinakunswekayi?’

Achinu chibaaba anachiloñeshi kulonda chikwashi mumbanda wukweti nfumwindi watalaña nyevulu yanzekesi. a Chikushimuna yishina yamuBayibolu yinateli kumukundeja, kumukolesha nawu Yehova wukumukwashaña nikumukwasha kwikala nakuwunda kwamuyitoñojoka nikutwalekahu kwikala nawubwambu wakola naYehova. b

Hela chakwila himukutwesha kumuyuula nfumwenu muyuma yejima yelañayiku, kudi yuma yimwatela kwila hakwila mukeheshiku chineñi kulonda musweji kwikala nakuwunda kwamuyitoñojoka. Talenu iyi yuma yinateli kuyikwasha.

Bayi mudinkaña nyiloñaku. Mumbanda nateli kutoñojoka nindi yena diyi waletesha nfumwindi kutachika kutala nyevulu yanzekesi. Alice c watoñojokeleña nindi wadiña mumbanda washikilamu wanyi kudi nfumwindi. Wadihwileña nindi, ‘Muloñadi nfumwami chatalilañayi ambanda amakwawu chatela asheña maana hadi ami?’ Ambanda amakwawu adinkaña nyiloña nayuma yelañawu, nakutoñojoka nawu wena diwu anakuletesha yuma kutaminaku. Danielle wahosheli nindi, “Natoñojokeleña nami yami nakisañeneña wulu wetu muloña wakusweja kuhila.”

Neyi dichimwatiyaña ninenu, ilukenu nenu Yehova hayinkaña nyiloña hayilwilu yanfumwenuku. Yakoba 1:14 yahosha nawu: “Muntu wejima amwesekaña kuhitila mukumukokola nikumudimbeka nakufwila  kwindi yomweni.” (Rom. 14:12; Fwili. 2:12) Chatela ayinkeña nyiloña, Yehova walemesha chimwekala ashinshika kudi yena.—2 Kushi. 16:9.

Chalema cheñi kwiluka nawu neyi iyala nakutala nyevulu yanzekesi hichinayi mukwila nawu ñodindi hashikilamuku. Antu adiza ahosha haniyi nsañu nawu kutala nyevulu yanzekesi kunateli kuletesha muntu kwikala nampwila yakwila wuvumbi yinateli kubula kumanishawu kudi mumbanda wudi wejima.

Bayi mwakamaña nankashiku. Catherine wahosheli nindi mpinji yejima watoñojokeleña hohu nindi nfumwindi watalaña nyevulu yanzekesi. Frances wahosheli nindi: “Nadakamenaña mpinji yejima yinnabuli kwiluka kunayiyi nfumwami. Nakamaña ifuku dejima damukuma.” Ambanda amakwawu ashimunaña nsonyi jatiyañawu neyi adi hamu nawakwawu akaKristu eluka kukala kwawanfumu jawu. Amakwawu niwena ahoshaña nawu atiyaña neyi adi nkawawu muloña atoñojokaña nawu kwosi aneluki kukala kwawu.

Chidi hohu chiwahi kutiya muniyi njila. Hela chochu, kutoñojoka nankashi haniyi nsañu kukuletesha hohu kusweja kuneñelaku. Ilaña shenu maana hakukolesha wubwambu wenu naYehova. Kwila mwenimu kukuyikwasha kwikala akola chikupu.—Mas. 62:2; Efwe. 6:10.

Hadaha kutaña nikutoñojoka chikupu hansañu yamuBayibolu yahosha hadi ambanda adiña nachineñi akundejelewi muloña wakumulomba Yehova, kukuyikwasha. Hamanishileña mpinji yejima kukala kwadiñawu nakuku, ilaña wayinkeleña kuwunda. Chakutalilahu, Hana “waneñeli nankashi” muloña wakukala kwadiñayi naku. Ilaña “chalombeliyi kudi Yehova mpinji yayilehi,” wekalili nakuwunda, hela chakwila welukili wanyi yuma yakamwekana kumbindi.—1 Sam. 1:10, 12, 18; 2 Kor. 1:3, 4.

Lombenu wukwashu kudi akulumpi muchipompelu. Anateli kwikala “iluña mwakuswama mpepela, iluña mwakwiyama nvula yeneni.” (Isa. 32:2) Anateli nikuyilejaku muhela imunateli kuhanjeka nindi kumbadi nawa wunateli kuyikundeja.—Yish. 17:17.

Komana munateli kumukwashaku nfumwenu kuleka chaaku chakutala nyevulu yanzekesi? Hadaha munateli. Bayibolu yashimuna nawu hakwila mumanishi kukala, hela kushinda chilumbu wukweti ñovu, “ayedi anabadiki wumu.” (Mukwa. 4:9-12) Antu adiza awana nawu neyi adisumbula azatilaña hamu, iyala nateli kuleka kutala nyevulu yanzekesi nawa ñodindi nateli kutachika kumukuhwelela cheñi.

 Hela chochu, chumichi chikushindamena hadi mwinikwenu neyi chalala nakufwila kuleka kutala nyevulu yanzekesi. Komana wamulembelelahu dehi Yehova nindi amwinki ñovu nikulomba wukwashu kudi akulumpi? (2 Kor. 4:7; Yak. 5:14, 15) Komana kudihu yuma yelañayi yikuletesha abuli kwikala muniku kweseka—chakutalilahu, kukeheshaku kuzatisha yozelu nikutondolwela yuma yinateli kuletesha eli wuvumbi? (Yish. 27:12) Komana nakufwila kutambwila wukwashu nikwikala washinshika chikupu kudi enu? Neyi dichelañayi, munateli kumukwasha.

Munjilanyi? Talenu ichi chuma chamwekeni. Felicia wasumbukili naEthan wateñukili nanyevulu yanzekesi kufuma tuhu kuwansi windi. Felicia waleteshaña chimupeleleña nfumwindi kuhanjeka nayena neyi natachiki kutiya mpwila yakutala nyevulu yanzekesi. Ethan walumbulwili nindi: “Nahoshaña nañodami mukukasunuka. Wankwashaña munjila yayiwahi chakutondolwela kweseka nawa wañihulaña mpinji yejima chinnakwila. Nawa wankwashaña kukeheshaku kuya haintaneti.” Felicia watiyaña kutama Ethan chafwilañayi kutala nyevulu yanzekesi. Wahosheli nindi, “Ilaña kuzuwa kwami nikutiya kutama hikwamukwashaña kutondolwela ichi chaakuku. Hanyima yakuhanjeka hakukala kukwetiyi, wankwashaña kumanisha chineñi chami.”

Kuhanjeka kwamuchidiwu kunateli kukwasha iyala kubula kutala nyevulu yanzekesi nawa kunateli kumukwasha ñodindi kumukuhwelela cheñi. Neyi iyala nakuleja ñodindi kuzeyazeya kwindi, kunakuyayi niyuma yinakuya nakwilayi, chikumupelela ñodindi kumukuhwelela cheñi muloña kwosi yuma yinakumuswekayi.

Komana ninenu munakuhweleli nenu munateli kumukwasha nfumwenu munjila yoyimu? Neyi dichimwatoñojokaña, kwila mutaña nikuhanjekela hamu achinu chibaaba nehi? Chuma chikufwilañayi kwila hikuleka kutala nyevulu yanzekesi nikwila yuma yikuletesha mumukuhweleli. Chatela ahileña neyi munakukeña kuhanjeka hakukala kwindi, wukwiluka kukala kwindi chikunakuyitiyisha kumuchima. Chuma chimunakufwila kwila hikumukwasha kulonda azatili hakukala kwindi nikumwinkaku mpinji yakwila yuma yikuletesha mutachiki kumukuhwelela cheñi. Wejima wenu mukwiluka chuma chaleteshaña antu akeñeña kutala nyevulu yanzekesi nichakumanisha iku kukala. d

Neyi mumona nenu mukuhanjeka kwenu mukufuma kubobola, lejenuku mukulumpi wumu imwakasunukila wejima wenu kulonda ekali nanenu hampinji yimukuhanjekaña. Anukenuña nenu hela chakwila  mwinikwenu naleki kutala nyevulu yanzekesi, hanateli kuhita mpinji hakwila mwakatachiki kumukuhwelela cheñi. Bayi muzeyaku. Talenu hatuyuma twanyanya tunahimpiki muwulu wenu. Kuhwelelenu nenu mukuya kwampinji neyi mudiwunjika wejima wenu, wulu wenu wakakola cheñi.—Mukwa. 7:8; 1 Kor. 13:4.

Neyi mwinikwenu atala cheñi nyevulu yanzekesi hanyima yakuleka kuyitala hadi mpinji yayilehi, komana chumichi chinayi mukwila nawu hakutwesha kubalumuka mumuchima indi kwiji kuleka chaaku chindiku? Inehi. Sweje-e neyi wateñuka, hanateli kuhita mpinji hakwila aleki chaaku chindi. Nateli cheñi kutala nyevulu yanzekesi hanyima yakuleka kuyitala hadi yaaka yayivulu. Hakwila akabuli kuyitala cheñi, watela kuzata nañovu kulonda ayikañeshi, hadaha kutwalekahu kudiyuula nihanyima yakumona nindi iku kukala kwamana dehi. (Yish. 28:14; Mat. 5:29; 1 Kor. 10:12) Watela kwikala “[wamuha] muyitoñojoka nimuyilwilu” yindi nawa watela ‘kuhela yatama,’ dikwila nawu, kutala nyevulu yanzekesi kushilahu niyaaku yawuzondu chidi neyi kudichuka. (Efwe. 4:23; Mas. 97:10; Rom. 12:9) Komana nakufwila kwila iyi yuma yitunashimuni? Neyi diimu, mukuhita kwampinji nateli kuleka chaaku chindi. e

Indi neyi mwinikwenu nakukeña wanyi kumanisha iku kukala? Munateli kutwalekahu kuneña, kuhila nikumona nenu anakuyila chatama. Muumbilenu Yehova kwakama kwenu, chumichi chikuyikwasha kwikala nakuwunda kwamuyitoñojoka. (1 Pet. 5:7) Twalekenuhu kuswina kwakwihi naYehova kuhitila mukudiza, kulomba nikutoñojokahu chikupu. Chimukwilaña mwenimu, kuhwelelenu chikupu nenu niyena nakuswina kwakwihi nanenu. Neyi chashimunawu haIsaya 57:15, yena wakashakamaña nawantu “achikeka nawa adizoza mumuchima,” kulonda yakoleshi nyichima yawu. Fwilenuña kwikala mukaKristu wamuwahi. Lombenu wukwashu kudi akulumpi. Nawa twalekenuhu kukuhwelela nenu kumbidi, nfumwenu nateli kuhimpa chakufuma hamuchima.—Rom. 2:4; 2 Pet. 3:9.