CHIBAABA CHAKUDIZA 36
Sendenu Yuma Yimukutwesha nawa Natenu Yinashali
“Tunatenu yuma yejima yalema . . . , nawa tutemukenu nakuumika lufuchi lunatuloñesheliwu.”—HEB. 12:1.
KAMINA 33 Umbilaku Chiteli Cheyi Hadi Yehova
NSAÑU YIDI MUCHIBAABA a
1. Kwesekeja naAHeberu 12:1, chumanyi chitwatela kwila hakwila tushiki kumufunda mulufuchi lwetu lwakuwumi?
BAYIBOLU yesekeja chihandilu chanetu akaKristu nalufuchi. Akakutemuka lufuchi ashikaña kumufunda akatambwila wumi wahaya nyaaka. (2 Tim. 4:7, 8) Twatela kuzata nañovu kulonda tutwalekihu kutemuka, sweje-e chineli tudi kwakwihi chikupu nakushika kumufunda. Kapostolu Pawulu watemukili chikupu lufuchi nakushika kumufunda wawumi, washimwini chuma chikutukwasha kutemuka nakushika kumufunda. Watulejeli “[kunata] yuma yejima yalema . . . [nikutemuka] nakuumika lufuchi lunatuloñesheliwu.”—Tañenu AHeberu 12:1.
2. ‘Kunata yuma yejima yalema’ kwatalisha mudihi?
2 Pawulu chasonekeliyi nindi twatela ‘kunata yuma yejima yalema,’ komana watalishili mukwila nindi kwosi chisenda chatela kusendayi mukaKristu? Inehi, dimwatalishiliyi wanyi. Ilaña watalishili mukwila nindi twatela kunata chuma chejima chalema chamukunkulwayi. Chisenda chamuchidiwu chinateli kutukañesha kutemuka chiwahi nikutuzeyesha. Hakwila tutwalekihu kutemuka twatela kunyakala kwiluka nikunata chuma chalema chamukunkulwayi chejima chinateli kutukañesha kutemuka chiwahi. Hela chochu, hampinji yoyimu hitwatela kunata yisenda yitwatela kusendaku. Neyi nehi, tunateli kudifumisha etu aweni hamukanka wawantu anakutemuka lufuchi. (2 Tim. 2:5) Yisenda yamuchidinyi yitwatela kusenda?
3. (a) Kwesekeja naAÑalija 6:5, yumanyi yitwatela kusenda? (b) Yumanyi yitukuhanjekahu muchinu chibaaba, nawa muloñadi?
3 Tañenu AÑalija 6:5. Pawulu washimwini yuma yitwatela kusenda. Wasonekeli nindi “muntu-himuntu wakadisendela chisenda chindi yomweni.” Haniyi vasi Pawulu watalishili kuchisenda chitwatela kudisendela etu aweni hampinji yitunakumukalakela Nzambi. Muchinu chibaaba, tukuhanjeka yuma yinabombeli ‘muchisenda’ chetu nichitunateli kuchisenda. Tukwiluka cheñi yuma yalema yamukunkulwayi hadaha yitunasendi nikwiluka chitunateli kuyinata. Kudisendela chisenda chetu nikunata yuma yalema yamukunkulwayi kukutukwasha kutemuka chiwahi lufuchi lwakuwumi.
YISENDA YITWATELA KUSENDA
(Talenu maparagilafu 4-9)
4. Muloñadi chikaninu chetu chakudihana chichabulila kwikala chiteli? (Talenu cheñi mwevulu.)
4 Chikaninu chetu chakudihana. Chitwadihanini kudi Yehova, twakanini netu tukudifukulaña kudi yena nikwila nkeñelu yindi. Twatela kuhemba ichi chikaninu. Kukakela kuchikaninu chetu hichuma chalema, ilaña hichiteli wanyi. Muloña Yehova watuleñeli nindi twileña nkeñelu yindi. (Chim. 4:11) Washa mudi etu muchima wakufwila kudiza hadi yena nawa watuleña muchifwanisha chindi. Chafumañamu, twaswinaña kwakwihi nayena nawa twatiyaña kuwaha kwila nkeñelu yindi. (Mas. 40:8) Chasweja kubadika, neyi twila nkeñelu yaNzambi nikumulondela Mwanindi, ‘twanookaña.’—Mat. 11:28-30.
(Talenu maparagilafu 4-5)
5. Yumanyi yinateli kutukwasha kukakela kukudihana kwetu? (1 Yowanu. 5:3)
5 Munateli kusenda ñahi ichi chisenda? Yuma yiyedi yinateli kuyikwasha. Chatachi, twalekenuhu kusweja kumukeña Yehova. Munateli kwila mwenimu kuhitila mukutoñojoka chikupu hayuma yayiwahi yejima yinayililiyi niyakayililayi kumbidi. Chimwasweja kumukeña Nzambi, chikuyipelela kumwovwahila. (Tañenu 1 Yowanu 5:3.) Chamuchiyedi, mwimbujolenuña Yesu. Watwesheli kwila nkeñelu yaNzambi muloña walombeleña kudi Yehova nawa washili muchima hawufwetu windi. (Heb. 5:7; 12:2) Neyi chelileñayi Yesu, lombenuña kudi Yehova kulonda ayinki ñovu nawa twalekenuhu kuchiñeja chikupu wumi wahaya nyaaka. Chimukuswejelañaku kumukeña Nzambi nikumwimbujola Mwanindi, mukutwesha kukakela kukudihana kwenu.
6. Muloñadi chitwatela kwakamena nyidimu yamuchisaka? (Talenu cheñi mwevulu.)
6 Nyidimu yitukweti muchisaka. Mulufuchi lwetu lwakuwumi, twatela kumukeña Yehova niYesu kubadika antaña jetu. (Mat. 10:37) Hela chochu, chumichi hichinatalishi mukwila nawu twatela kudiwula nyidimu yitwatela kuzata muchisaka neyi kwiji iyi yuma yinakutukañesha kumutiyisha Nzambi niKristu kuwahaku. Kwambukaku, hakwila tumutiyishi Nzambi niKristu kuwaha, twatela kuzata mudimu wutukweti muchisaka. (1 Tim. 5:4, 8) Neyi twila mwenimu, tukwikala namuzañalu chikupu. Kafwampi, Yehova weluka nindi yisaka yikwikala namuzañalu neyi eyala namumbanda adikeña nikudilemesha, neyi anvwali akeña anyanawu nikuyidizisha, nawa neyi anyana ovwahilaña anvwali jawu.—Efwe. 5:33; 6:1, 4.
(Talenu maparagilafu 6-7)
7. Munateli kuzata ñahi mudimu wumukweti muchisaka?
7 Munateli kusenda ñahi ichi chisenda? Chili mudi iyala, mumbanda hela mwana, kuhwelelenu maana amuBayibolu chatela mushindameneña hayitoñojoka yenu, chisemwa hela hayuma yahoshaña antu adiza chikupu. (Yish. 24:3, 4) Zatishenuña nyikanda yetu yashindamena haBayibolu. Muniyi nyikanda mwekala yuma yikuyikwasha kwiluka chakuzatisha yishina yamuBayibolu. Chakutalilahu, broshuwa ‘yaChisaka Chenu Chinateli Kwikala naMuzañalu’ nimukanda ‘waMunateli Kwikala naMuzañalu Haya Nyaaka,’ kudiza 49 ni 50, mwekala yishina yinateli kukwasha adisumbula, anvwali niatumpululu. Fwilenuña kuzatisha yuma yahosha Bayibolu hela chakwila amakwawu muchisaka anakwilamu wanyi. Neyi mwila mwenimu, chisaka chenu chikuhetelamu nawa mukudiluñishaña nkisu yaYehova.—1 Pet. 3:1, 2.
8. Yumanyi yinateli kufuma mukufuukula kwetu?
8 Yuma yafumaña mukufuukula kwetu. Yehova watwinka chawaana chakudifuukwila nawa wakeña tudiluñisheña yuma yayiwahi yafumaña mukufuukula chiwahi. Ilaña cheñi hatukiñaña kuyuma yatama yafumaña mukufuukula kwetuku. (Ñal. 6:7, 8) Muloña wachumichi, twetejaña yuma yatama yinakutumwekena muloña wakufuukula chatama, kuhosha chakadi kutoñojokahu nikwila yuma mulufuchi. Chinleji chetu chinateli kutukabisha muloña wayuma yituneli. Hela chochu, kwiluka netu kufuukula kwetu dikunaleteshi tumoni kukala, chumichi chikutuletesha kunyakala kushimuna nshidi jetu, kwiteja yiluwa yetu nikubula kuyikoña cheñi. Kwila mwenimu kukutukwasha kutwalekahu kutemuka lufuchi lwakuwumi.
(Talenu maparagilafu 8-9)
9. Yumanyi yimwatela kwila neyi munafuukuli mwaluwa? (Talenu cheñi mwevulu.)
9 Munateli kusenda ñahi ichi chisenda? Neyi mwafuukula mwaluwa nawa mukutwesha wanyi kuhimpamu, itejenu chidi yuma hanoyu mpinji. Ilukenu nenu mukutwesha wanyi kuhimpa yuma yinahiti dehi. Bayi mumanisha mpinji yenu niñovu nakudiyiñisha hela kudinka enu aweni nyiloña indi kwiji kwinka akwenu nyiloña hakufuukula kwenu kwatamaku. Ilaña, itejenu yiluwa yenu nawa zatenu hanakumini ñovu jenu kwesekeja nachidi yuma hanoyu mpinji. Neyi munakudinka nyiloña hachiluwa chimwakoñeli, dizozenu nakumulejamu Yehova mukulomba, itejenu chiluwa chenu nawa mulombenu ayanakeni. (Mas. 25:11; 51:3, 4) Lombenu kwanakena kudi antu imwavulumwini, nawa neyi chinatwesheki, lombenu wukwashu kudi akulumpi. (Yak. 5:14, 15) Dizilenu kuyiluwa yenu nawa tondolwelenu kuyikoña cheñi. Chimukwilaña mwenimu, ilukenu nenu Yehova wukuyitiyilaña luwi nawa wukuyikwashaña kwesekeja nakukala kumukweti.—Mas. 103:8-13.
YUMA YALEMA YITWATELA “KUNATA”
10. Kufwila yuma yitukubula kutwesha kunateli kwikala ñahi chiteli chalema? (AÑalija 6:4)
10 Kufwila yuma yitukubula kutwesha. Neyi tudesekejaña nawakwetu tukuditwika chiteli chinateli kutuzeyesha. (Tañenu AÑalija 6:4.) Neyi tudesekejaña nawakwetu mpinji yejima, tukwikala nalwisu nawa tukudibechaña. (Ñal. 5:26) Neyi tufwilaña kwila yuma yinakwilawu akwetu hela chakwila hitukutwesha kuyilaku, munateli kufuma yuma yatama. Nawa neyi “chuma chinakuchiñejayi muntu kushikijewa swayi nehi, chakataña kumuchima,” dikwila nawu chikutukata kumuchima nankashi neyi tufwilaña kwila yuma yitukubula kutwesha! (Yish. 13:12) Kwila mwenimu kukutuzeyesha chakwila tukukañanya kutemuka lufuchi lwakuwumi.—Yish. 24:10.
11. Yumanyi yinateli kuyikwasha kubula kukuhwelela kwila yuma yimukubula kutwesha?
11 Munateli kunata ñahi ichi chiteli? Bayi mukuhwelela kwila yuma yinabadiki hayinakukeñayi Yehovaku. Hakeñaña nindi mumwinki yuma yimunabuliku. (2 Kor. 8:12) Ilukenu nenu Yehova wesekejaña wanyi yuma yimwelaña nayelañawu akwenu. (Mat. 25:20-23) Walemesha mudimu wumwamukalakelaña nawumi wenu wejima, kashinshi kenu nikuumika kwenu. Dizozenu nakwiluka nenu hadaha mukutwesha wanyi kwila yuma yejima yimunakukeña kwila chayinu mpinji muloña wakukula, kubula kukola kumujimba nichidi yuma muchihandilu. Neyi cheliliyi Bazilayi, kaanenuña nyidimu yikwawu neyi muneluki nenu mukutwesha wanyi muloña wakukula kumujimba indi kwiji kukata. (2 Sam. 19:35, 36) Neyi cheliliyi Mosi, itejenuña wukwashu nawa inkenuku akwenu nyidimu neyi chinatwesheki. (Kwid. 18:21, 22) Kudizoza kwamuchidiwu kukuyikwasha kubula kukuhwelela kwila yuma yimukubula kutwesha yinateli kuyizeyesha hampinji yimunakutemuka lufuchi lwakuwumi.
12. Komana iyetu twaleteshaña akwetu afuukuleña mwaluwa? Lumbululenu.
12 Kutiya neyi iyetu twaleteshaña akwetu afuukuleña mwaluwa. Hitunateli kuyifuukwilaku akwetu, hela kuyikiña kukukala kwafumaña mukufuukula kwawu kwatamaku. Chakutalilahu, mwanenu nateli kufuukulahu kuleka kumukalakela Yehova. Kufuukula kwamuchidiwu kunateli kuyineñesha chikupu anvwali. Hela chochu, anvwali adinkaña nyiloña muloña wakufuukula kwaluwa kwamwanawu aditwikaña aweni chiteli chalema. Ichi hidichiteli chakeñañayi Yehova nindi anvwali asendeñaku.—Rom. 14:12.
13. Nvwali watela kwila ñahi neyi mwana afuukula mwaluwa?
13 Munateli kunata ñahi ichi chiteli? Ilukenu nenu Yehova watwinka wejima wetu wuswa wakudifuukwila. Weteja muntu wejima kudifuukwila yomweni. Imu munabombeli kumukalakela hela nehi. Yehova weluka nindi mudi nvwali wabula kuwanina; wakeñaña hohu nindi muzateña kwesekeja nahanakumini ñovu jenu. Chuma chinafuukuliyi mwanenu chinamukundami yomweni, bayi enuku. (Yish. 20:11) Hela chochu, hadaha munateli kutwalekahu kutoñojoka hayiluwa yimwakoñeli hamu neyi anvwali. Neyi dichimunakutoñojoka, mulejenumu Yehova chimunakutiya nawa mulombenu ayanakeni. Weluka nindi kwila mufunta kunyima nakuhimpa yuma yamwekana dehi nehi. Hampinji yoyimu, hakeñaña nindi mukañeshi mwanenu kumona kukala hayuma yatumbiliyiku. Ilukenu nenu neyi mwanenu azata nañovu kulonda afunti kudi Yehova, wukumutambwila.—Luka 15:18-20.
14. Muloñadi kudinka nyiloña chikunekalili chiteli chalema chitwatela kunata?
14 Kusweja kudinka nyiloña. Neyi tukoña nshidi, chidi hohu chiwahi kudinka nyiloña. Hela chochu, Yehova hakeñaña nindi tuswejeña kudinka nyiloñaku. Hichiteli chitwatela kunata. Tukwiluka ñahi neyi tunasweji kudinka nyiloña? Neyi tushimuna nshidi yetu, tubalumuka mumuchima, nawa neyi tuzataña nañovu kubula kufuntilahu kukoña nshidi, twatela kukuhwelela netu Yehova natwanakeni. (Yilw. 3:19) Neyi twila yuma yejimiyi, Yehova hakeñaña nindi tutwalekihu kudinka nyiloñaku. Weluka kutama kwafumañamu neyi tutwalekahu kudinka nyiloña. (Mas. 31:10) Neyi tusweja kuneña, tunateli kuleka kutemuka lufuchi lwakuwumi.—2 Kor. 2:7.
Hanyima yakwila munabalumuki chikupu mumuchima, Yehova hatwalekañahu kutoñojoka hanshidi jimwakoñeliku, ninenu himwatela kutoñojokañahuku (Talenu paragilafu 15)
15. Chumanyi chinateli kuyikwasha kuleka kusweja kudinka nyiloña? (1 Yowanu 3:19, 20) (Talenu cheñi mwevulu.)
15 Munateli kunata ñahi ichi chiteli? Neyi mutwalekahu kudinka nyiloña, toñojokenuña hadi Nzambi ‘chanakenañayi chikupu.’ (Mas. 130:4) Neyi nanakeni ana anabalumuki mumuchima chikupu, wayishiikaña nindi: “Hinakanukahu cheñi nshidi yawuku.” (Yere. 31:34) Chumichi chinatalishi mukwila nawu Yehova hakayanukilaña nshidi yimwakoñeli kunyimaku. Dichi bayi mumona nenu yuma yatama yinafumi munshidi jenu hiwunsahu wunakumwekesha nawu hayanakenaku. Nawa bayi mudihilila enu aweni neyi muleka kuzata nyidimu yimu muchipompelu muloña wayiluwa yimwakoñeli kunyimaku. Yehova hatwalekañahu kutoñojoka hanshidi jimwakoñeliku, ninenu himwatela kutoñojokañahuku.—Tañenu 1 Yowanu 3:19, 20.
TEMUKENU KULONDA MWAKATAMBWILI WUFWETU
16. Hamu neyi akakutemuka lufuchi, chumanyi chitwatela kwiluka?
16 Hampinji yitunakutemuka lufuchi lwakuwumi, twatela ‘kutemuka chakwila twakatambwili wufwetu.’ (1 Kor. 9:24) Tunateli kwila mwenimu neyi twiluka chaambu chekala hayisenda yitwatela kusenda nayuma yalema yitwatela kunata. Muchinu chibaaba, tunahanjeki hohu hayuma yantesha yitwatela kusenda niyitwatela kunata. Ilaña kudi yikwawu yinateli kutenawu. Yesu wahosheli nindi tunateli “kulema nakusweja kuda, kusweja kunwa nikwakama kwamuwumi.” (Luka 21:34) Iji nsona ninsona jikwawu jinateli kuyikwasha kwiluka yuma yimwatela kuhimpa hampinji yimunakutemuka lufuchi lwakuwumi.
17. Muloñadi wutwatela kukuhwelela netu tukutwesha kutemuka lufuchi lwakuwumi nakutambwila wufwetu?
17 Twatela kukuhwelela netu tukutwesha kutemuka lufuchi lwakuwumi nakutambwila wufwetu muloña Yehova wukutwinkaña ñovu yitwakeñaña. (Isa. 40:29-31) Dichi, bayi mufunta hanyimaku! Imbujolenu kapostolu Pawulu watemukili lufuchi kulonda atambwili wufwetu wamushiikiliwu. (Fwili. 3:13, 14) Kwosi wunateli kuyitemukilaku ilu lufuchiku, ilaña nawukwashu waYehova mukutwesha. Yehova nateli kuyikwasha kusenda yiteli nakunata yuma yalema yamukunkulwayi. (Mas. 68:19) Neyi Yehova wudi kukabadi kenu, mukutwesha kutemuka lufuchi nakuumika nikutambwila wufwetu!
KAMINA 65 Twalekenuñahu!
a Achinu chibaaba chikutukwasha kutemuka lufuchi lwakuwumi. Chineli tudi akakutemuka lufuchi, kudi yisenda yitwatela kusenda. Muniyi yisenda munabombeli chikaninu chetu chakudihana, nyidimu yamuchisaka niyuma yafumaña mukufuukula kwetu. Ilaña twatela kunata chuma chejima chalema chamukunkulwayi chinateli kutukañesha kutemuka chiwahi. Mukwila mwenimu mwabombeladi? Achinu chibaaba chikwakula ilu lwihu.