1-2. (a) Yehova wamonaña ñahi muntu wunakoñi nshidi mumushikila? (b) Yehova wakuhwelelaña chumanyi kudi antu anavulumuni?

 YEHOVA hiNzambi wetejaña yuma yatama wanyi; wadiwulaña wanyi nshidi. (Mas. 5:4-6) Wakeñaña nindi tulemesheña nshimbi jindi jaloña, jashayi Mwizu dindi. Hela chochu, Yehova hakuhwelelaña antu jindi abula kuwanina kwila yuma munjila yawaninaku. (Mas. 130:3, 4) Hampinji yoyimu, wetejaña wanyi antu ‘abulaña kumwakama Nzambi abalumunaña luwi lwindi lwasweja nakukoñelamu yilwilu yawukapwa nsonyi.’ (Yuda 4) Eña, Bayibolu yahosha hakujilumuna “antu abulaña kumwakama Nzambi” hanjita yaNzambi yaAmagedoni.—2 Pet. 3:7; Chim. 16:16.

² Hela chochu, Yehova hakeñaña muntu hela wumu nindi akajilumukiku. Neyi chitwahanjekeli muyibaaba yinafumihu, Bayibolu yashimuna hatooka nawu “wakeñaña antu ejima abalumuki munyichima.” (2 Pet. 3:9) Akulumpi akaKristu amwimbujolaña Yehova hampinji yadiwunjikañawu nakukwasha antu anavulumuni ahimpi yilwilu yawu kulonda Yehova ayitiyili luwi. Hela chochu, bayi neyi antu ejima anavulumuni  akeñaña kubalumuka munyichimaku. (Isa. 6:9) Amakwawu atwalekañahu nakukoña yuma yatama hela chakwila akulumpi akuyikwasha kakavulu nawu abalumuki munyichima. Yumanyi yatela kwilawu neyi chuma chamuchidiwu chinamwekani?

“FUMISHENU MUNTU WATAMA”

3. (a) Bayibolu yahosha nawu chumanyi chatela kumwilawu muntu wunabuli kubalumuka mumuchima? (b) Tukuhosheladi netu, munjila yikwawu, muntu wunavulumuni nafuukulihu kumufumisha muchipompelu?

³ Neyi muntu wunavulumuni nakukeña kubalumuka mumuchima wanyi, akulumpi akulondela wunlomboli wekala ha 1 AKorinda 5:13, wahosha nawu: “Fumishenu muntu watama mukachi kenu.” Munjila yikwawu, muntu wunavulumuni dichuma chinakeñiyi yomweni; nakumuna chuma chinakuwiyi. (Ñal. 6:7) Tunahoshelidi mwenimu? Muloña nakaani kutiyilila kuwukwashu wawakulumpi wunamukwashiwu mapampa amavulu kulonda abalumuki mumuchima. (2 Anya. 17:12-15) Yilwilu yindi yinamwekeshi nawu nakaani kwovwahila nshimbi jaYehova.—Kuhit. 30:19, 20.

4. Muloñadi chabidikilañawu neyi muntu wunavulumuni wunabuli kubalumuka mumuchima anamufumishi muchipompelu?

⁴ Neyi muntu wunavulumuni wunabuli kubalumuka mumuchima anamufumishi muchipompelu, abidikaña kuchipompelu nawu hadi cheñi Chinsahu chaYehovaku. a Nkeñelu yaniku kubidika bayi neyi yakukeña kumusawula muntu wunavulumuniku. Ilaña, yakuleja chipompelu kulonda chovwahili kufumba kwamuNsona ‘kwakuleka kudibomba’ nanowu muntu, nikubula ‘kudiila nindi hamu.’ (1 Kor. 5:9-11) Iwu wunlomboli wawuwahi. Kapostolu Pawulu wasonekeli nindi: “Iluñi dantesha davuvumwishaña chikanka chejima.” (1 Kor. 5:6) Antu anavulumuni anabuli kubalumuka munyichima anateli kuluwañesha antu anakufwila kulondela nshimbi jaYehova jaloña.—Yish. 13:20; 1 Kor. 15:33.

5. Twatela kumumona ñahi muntu anafumishiwu muchipompelu, nawa muloñadi?

⁵ Hanu dinu twatela kumumona ñahi mukwetu mukakwitiya anafumishiwu muchipompelu? Hela chakwila hitukudikundaña nindiku, twatela kumumona neyi himukoku wunajimbali, bayi neyi nayi lwejimaku. Mukoku wunafumi hamukanka nateli kufunta cheñi. Anukenu nenu, iwu mukoku wunajimbali wadihanini kudi Yehova. Chawushona, haniyi mpinji hanakwila mwakaniniyiku, nawa chumichi chinamushi muwubanji. (Ezek. 18:31) Hela chochu, chineli Yehova wukweti luwi, twatela kukuhwelela netu iwu muntu wakafunta. Akulumpi anateli kukuhwelela ñahi nawu muntu wunavulumuni anafumishiwu muchipompelu wakafunta?

AKULUMPI CHAKWASHAÑAWU ANTU ANAFUMISHIWU MUCHIPOMPELU

6. Yumanyi yikwilawu akulumpi hakwila akwashi muntu anafumishiwu muchipompelu?

⁶ Komana muntu anafumishiwu muchipompelu amushiyaña chisayikila, nakumuleka nkawindi nawu akadifuntili yomweni kudi Yehova? Inehi. Hampinji yinakumulejawu muntu wunabuli kubalumuka mumuchima nawu akumufumisha muchipompelu, kometi yawakulumpi yikumulumbulwila yuma yatela kwilayi hakwila akafunti muchipompelu. Ilaña akulumpi hiyakuminaña hohenahaku. Kakavulu, akumuleja muntu wunavulumuni nawu akukeña kudimona nindi cheñi neyi munahiti tukweji twantesha kulonda akamoni neyi nabalumuki mumuchima.  Neyi muntu wunavulumuni wukwiteja kudibulakana nawu cheñi, hakudibulakana kukalondelahu akulumpi akamulembelela kulonda akabalumuki mumuchima nakufunta. Hela chakwila haniyi mpinji wukubalumuka mumuchima wanyi, akulumpi akutwalekahu kumubulakana nakumukolesha kulonda abalumuki mumuchima.

7. Akulumpi azataña ñahi nañovu kumwekesha wushona wukwetiyi Yehova kwesekeja nachelañawu namuntu afumishawu muchipompelu? (Yeremiya 3:12)

⁷ Akulumpi azataña nañovu kumwekesha wushona wukwetiyi Yehova kwesekeja nachelañawu namuntu afumishawu muchipompelu. Chakutalilahu, Yehova wahembeleleli wanyi muza waIsarela wasenukili kulonda wilihu chuma. Ilaña, watachikililihu kuya kudi wena henohu kanda atachiki kumwekesha yinjikijilu yakubalumuka munyichima. Neyi chashimwiniwu muchibaaba chamuchiyedi muyinu magazini, Yehova wamwekesheli wushona windi nanochu chamulejeliyi kaprofwetu Hoseya kufuntisha ñodindi, watwalekelihu kuvulumuna. (Hos. 3:1; Mal. 3:7) Hakumwimbujola Yehova, akulumpi akaKristu afwilaña kukwasha chikupu muntu wunavulumuni kulonda afunti, nawa hiyamukoleshelaña yuma hakwila afuntiku.—Tañenu Yeremiya 3:12.

8. Indi chishimu chaYesu chamwana wajimbeli chatukwashaña ñahi kutiyishisha wushona niluwi lukwetiyi Yehova? (Luka 15:7)

⁸ Anukenu chishimu chaYesu chamwana wajimbeli, neyi chitwahanjekeli muchibaaba chamuchiyedi muyinu magazini. Chamumweniyi mwanindi nakufunta kwitala, tata yindi “wamukinkililili nawa wamukumbatili nakumufufwa.” (Luka 15:20) Neyi chitunamoni tata yawantu hahembeleleli nindi mwanindi alombi kwanakenaku. Ilaña, watachikililihu, neyi chinateli kwila tata yawantu wudi wejima wukweti kukeña. Akulumpi niwena azataña nañovu kumwekesha chilwilu chochimu kudi antu anasenuki. Akeñaña anyikoku anajimbali ‘afunti.’ (Luka 15:22-24, 32) Mwiwulu mwekalaña muzañalu neyi mukanshidi afunta, niheseki hekalaña muzañalu!—Tañenu Luka 15:7.

9. Yehova wayilejaña akanshidi kwiladi?

⁹ Kwesekeja nayuma yitunadizi, chinamwekani hatooka nawu Yehova hetejaña muntu wunavulumuni wunabuli kubalumuka mumuchimaku. Hela chochu, hayishiyaña chisayikilaku. Wakeñaña nindi afunti. Yehova chatiyañayi nawantu anavulumuni ilaña anabalumuki mumuchima, achimwekesha haHoseya 14:4, hahosha nawu: “Kubula kushinshika kwenu nakakuuka. Nakayikeña namuchima wami wejima, muloña kuzuwa kwami kunayifumi dehi.” Chumichi chinakukolesha akulumpi kumona yinjikijilu mudi muntu yinakumwekesha nawu nabalumuki mumuchima. Nawa chumichi chinakukolesha antu amushiya Yehova kufunta kudi yena chakadi kushintajala.

10-11. Akulumpi anateli kukwasha ñahi antu afumishiliwu dehi muchipompelu?

¹⁰ Indi antu afumishiliwu muchipompelu kunyima, hadaha munahiti dehi yaaka yayivulu? Antu amuchidiwu hekwawu hiyatwalekahu kukoña nshidi yaletesheli ayifumishi muchipompeluku. Mpinji jikwawu, hiyanukaña chuma chaletesheli ayifumishi muchipompeluku. Hela chakwila yuma yidi muniyi njila, akulumpi atela kukeñakeña kudiwu nikuya nakuyihempula. Neyi anayi nakuyihempula, akulumpi anateli nikulombela hamu nawu nikuyilembelela nawu afunti muchipompelu. Hela chochu, neyi muntu wafumini dehi muchipompelu, chakadi nikujina wukwikala wazeya nankashi kuspiritu. Dichi, neyi nakumwekesha nindi nakukeña kufunta  muchipompelu, akulumpi akuleja mukakushimwina watela kudiza nindi Bayibolu, hela chakwila kanda amufuntishi. Kutalisha haniyi nsañu, akulumpi diwu atela kushaku iyi ntanjikilu yakudiza nindi Bayibolu.

¹¹ Hakwimbujola wushona wukwetiyi Yehova, akulumpi afwilaña kukwasha antu amavulu kulonda eluki nawu akasunuka kufunta. Neyi mukanshidi amwekesha nindi nabalumuki mumuchima nawa naleki yuma yelileñayi, anateli kumufuntisha chakadi kumba mpinji.—2 Kor. 2:6-8.

12. (a) Nyiloña yamuchidinyi yakeñekaña akulumpi kwikala asoñama? (b) Muloñadi chitwatela kubulila kutoñojoka netu akanshidi amakwawu hiyatela kuyanakena kudi Yehovaku? (Talenu cheñi tumazu twaheshina.)

¹² Munyiloña yikwawu akulumpi atela kwikala asoñama henohu kanda amufuntishi muntu. Chakutalilahu, neyi owu muntu wakoñeli muloña wakukaama mwana wanyanya,  wakwikala mukakusekesha hela wakukwatila mwinikwindi makasu nakumuseña, akulumpi atela kwiluka neyi mwamweni nabalumuki chikupu mumuchima. (Mal. 2:14; 2 Tim. 3:6) Atela kukiña anyikoku. Hampinji yoyimu, twatela kwiluka netu Yehova wukutambwila mukanshidi wejima wamwekeshaña nindi nabalumuki chikupu mumuchima nawa naleki yilwilu yindi yatama. Hela chakwila akulumpi atela kwikala asoñama chikupu nawantu akoñeli akwawu yuma yatama, hiyatela kukunkulula nawu akanshidi amakwawu hiyatela kuyanakena kudi Yehovaku. b—1 Pet. 2:10.

YUMA YATELA KWILA CHIPOMPELU

13. Chambwinyi chekala hachitwatela kwila namuntu anazuwiliwu kudi akulumpi namuntu anafumishiwu muchipompelu?

¹³ Neyi chitwahanjekeli muchibaaba chinafumihu, mpinji jikwawu abidikaña kuchipompelu nawu muntu anamuzuwili. Neyi chuma chamuchidiwu chimwekana, tunateli kutwalekahu kudikunda nindi, muloña tuneluki netu wabalumuka mumuchima nawa naleki chuma chatama chakoñeliyi. (1 Tim. 5:20) Wuchidi muchipompelu nawa nakukeñeka kumukolesha kudi amanakwetu niahela. (Heb. 10:24, 25) Hela chochu, chumichi chinambukiku namuntu anafumishiwu muchipompelu. ‘Twalekaña kudibomba’ nanowu muntu, nawa twalekaña “nikudiila nindi hamu.”—1 Kor. 5:11.

14. AkaKristu anateli kuzatisha ñahi chinleji chawu chamuchima chadizishewa naBayibolu nachatela kwilawu nawantu afumishawu muchipompelu? (Talenu cheñi mwevulu.)

¹⁴ Komana yuma yitunahanjekihu yinatalishi mukwila nawu twatela kumudiwula chikupu muntu anafumishiwu muchipompelu? Inehi. Hela chochu, hitwatela kudikunda nindiku. Ilaña akaKristu anateli kuzatisha chinleji chawu chamuchima chadizishewa naBayibolu neyi chakwila anateli kumutambika muntu afumishawu muchipompelu, hadaha ntaña yawu hela muntu adikundiliwu nindi nankashi kunyima, kulonda enzi nakupompa. Indi neyi enza nakupompa? Kunyima, muntu wamuchidiwu hitwamwimushileñaku. Kutalisha haniyi nsañu cheñi, mukaKristu yomweni watela kuzatisha chinleji chindi chamuchima  chadizishewa naBayibolu. Amakwawu anateli kumona nawu chidi hohu chiwahi kumwimusha owu muntu hela kumushikija neyi nenzi nakupompa. Hela chochu, hitwatela kuhanjeka nindi hakapinji kakalehi hela kudikunda nindiku.

15. Akanshidi amuchidinyi ashimunawu ha 2 Yowanu 9-11? (Talenu cheñi chikasha chinakwila nawu “ Komana Yowanu niPawulu Ateneneña Nshidi Yoyimu?”)

¹⁵ Amakwawu anateli kudihula nawu, ‘Komana Bayibolu yahosha wanyi nawu mukaKristu wukwimusha muntu wamuchidiwu nadibombi nindi munyidimu yindi yatama?’ (Tañenu 2 Yowanu 9-11.) Nsañu yekala muniyi nsona yamwekeshaña nawu wunlomboli wekalahu wahoshaña hadi akakusekesha niantu amakwawu atwalekañahu kutaandisha yilwilu yatama. (Chim. 2:20) Dichi, neyi owu muntu nakutaandisha ntañishilu yakasekesha hela yuma yikwawu yatama, akulumpi hiyatela kuya nakumuhempulaku. Hela chochu, twakuhwelelaña netu wakahimpa yitoñojoka yindi. Sampu nahimpi, hitwatela kumwimusha muntu wamuchidiwu hela kumutambika kwinza nakupompaku.

KWIMBUJOLA WUSHONA NILUWI LWAYEHOVA

16-17. (a) Yehova wakeñaña akanshidi eli chumanyi? (Ezekeli 18:32) (b) Akulumpi anateli kukalakela ñahi hamu naYehova hampinji yinakukwashawu antu anavulumuni?

¹⁶ Yumanyi yitunadizi muniyi yibaaba yitanu? Yehova hakeñaña muntu hela wumu akakisikiku! (Tañenu Ezekeli 18:32.) Wakeñaña nindi akanshidi adinuñi cheñi kudi yena. (2 Kor. 5:20) Dimuloña waweni kufuma tuhu kunyima, Yehova natwalekihu kuyikonkomwena antu jindi asenuka, niantu amakwawu, kubalumuka mumuchima nakufunta kudi yena. Akulumpi muchipompelu adi nakukooleka kwakukalakela hamu naYehova kukwasha antu anavulumuni kubalumuka mumuchima.—Rom. 2:4; 1 Kor. 3:9.

¹⁷ Fwikijenu muzañalu watiyañawu mwiwulu neyi akanshidi abalumuka mumuchima! Tata yetu wamwiwulu, Yehova, niyena wazañalalaña mpinji yejima neyi mukoku windi wajimbala nafunti muchipompelu. Kukeña kutwamukeña Yehova kwaswejelañaku neyi tutoñojoka chikupu hawushona, luwi nihaluwi lwindi lwasweja.—Luka 1:78.