1. Yehova wakeñaña nindi antu ejima elidi?

 YEHOVA wayileñeli antu nawuswa wakudifuukwila. Mwazatishaña ichi chawaana neyi kudi yuma yimunakufuukula. Chuma chalema nankashi chatela kufuukulayi muntu hikudihana yomweni kudi Yehova nikwikala muchisaka chindi chawakakudifukula. Yehova wakeñaña antu ejima kwila mwenimu. Muloñadi? Muloña wayikeña antu nawa wakeñaña ekali nachihandilu chachiwahi. Wakeñaña ekali nawubwambu wawuwahi nayena nawa ashakameña haya nyaaka.—Kuhit. 30:​19, 20; Ñal. 6:​7, 8.

2. Yehova watiyaña ñahi nawantu anavulumuni anabuli kubalumuka munyichima? (1 Yowanu 2:1)

² Hela chochu, Yehova hakanjikijaña muntu wudi wejima kumukalakelaku. Wetejaña muntu wudi wejima kudifuukwila chuma chatela kwilayi. Indi neyi mukaKristu wapapatishewa afumpa nshimbi yaNzambi kuhitila mukukoña nshidi yeneni? Neyi nabalumuki wanyi mumuchima, atela kumufumisha muchipompelu. (1 Kor. 5:13) Hela chochu, Yehova wakeñaña chikupu nindi muntu wunavulumuni afunti kudi yena. Kafwampi, dichaletesheli ahani ifutu danyiloña, kulonda anakeneña akanshidi anabalumuki munyichima.  (Tañenu 1 Yowanu 2:1.) Tata yetu wakukeña wayilembelelaña antu anavulumuni, nakuyileja nindi abalumuki munyichima.—Zek. 1:3; Rom. 2:4; Yak. 4:8.

3. Yumanyi yitukuhanjekahu muchinu chibaaba?

³ Yehova wakeñaña nindi tumoneña yuma yatama niantu anavulumuni neyi chayimonañayi. Achinu chibaaba chikushimuna chitunateli kwila mwenimu. Chimukutañaña achinu chibaaba, talenu (1) chazatiliwu namuloña wahamesu bwi-i muchipompelu chamuKorinda chawakaKristu amumafuku akusambila, (2) wunlomboli wahaniniyi kapostolu Pawulu chelili mukanshidi abalumuki mumuchima, nawa (3) nsañu yamuBayibolu yamwekeshaña Yehova chamonañayi akaKristu anakoñi nshidi yahamesu bwi-i.

CHAZATILIWU NAMULOÑA WAHAMESU BWI-I MUMAFUKU AWAKAKRISTU AKUSAMBILA

4. Chumanyi chamwekeni muchipompelu chamumafuku awakaKristu akusambila muKorinda? (1 AKorinda 5:​1, 2)

⁴ Tañenu 1 AKorinda 5:​1, 2. Halwendu lwindi lwamuchisatu lwawumishonali, Pawulu watiyili nsañu yakala yamwekeni muchipompelu chachiha chamuKorinda. Manakwetu wumu muchina chipompelu welileña wuvumbi nañoda tata yindi. Achina chilwilu chadiña chatama nankashi nawa ‘hiyachiilileña nikudi antu akunyuzaku’! Chipompelu chadiwili ichi chilwilu chatama nawa achimweneña hohu chiwahi. Hadaha amakwawu atoñojokeleña nawu amwekesheleña luwi neyi lwamwekeshelañayi Nzambi antu abula kuwanina. Ilaña Yehova wetejaña wanyi yuma yatama yakoñaña antu jindi. Muloña wanichi chilwilu chawukapwa nsonyi, ona iyala wadiña nakutamisha ijina dadiwahi dachina chipompelu. Watela waluwañesheleña cheñi niakaKristu amakwawu adikundileñayi nawu. Dichi, Pawulu walejeli chipompelu kwiladi?

5. Pawulu walejeli chipompelu kwila chumanyi, nawa watalishili mudihi? (1 AKorinda 5:13) (Talenu cheñi mwevulu.)

⁵ Tañenu 1 AKorinda 5:13. Chamwoneneniwu, Pawulu wasonekeli mukanda nakuyileja nindi mukanshidi wunabuli kubalumuka mumuchima amufumishi muchipompelu. AkaKristu ashinshika ateleleli kumumonaña ñahi iwu muntu? Pawulu wayilejeli “[kuleka] kudibomba” nindi. Chumichi chatalishili mudihi? Pawulu walumbulwili nindi munilu lushimbi mwabombeleli ‘kubula nikudiila nindi hamu.’ (1 Kor. 5:11) Kushakama nakudiila hamu namuntu chinateli kwikala chaswayi kutwalekahu kudikunda nindi. Chakadi nikujina, Pawulu watalishili mukwila nindi chipompelu hichateleleli kudikunda nanona iyalaku. Chumichi chadi kukiña chipompelu kuyilwilu yindi yatama. (1 Kor. 5:​5-7) Kubombelahu,  neyi abulaña kudikunda nindi, ona iyala wadi kumona nindi namuvulumuni chikupu Yehova, chadi kumutiyisha nsonyi nawa chadi kumukwasha kubalumuka mumuchima.

6. Mukanda waPawulu wakwashili ñahi chipompelu ninona wavulumwini?

⁶ Hanyima yakutemesha mukanda windi kudi akaKristu muKorinda, Pawulu watachikili kujinoka chadi kwila chipompelu nanona mukanda. Nkumininaku, Titusa wamuleteleli nsañu yamutiyishili kuwaha. Chipompelu chovwahilili nsañu yadiña mumukanda waPawulu. (2 Kor. 7:​6, 7) Elili kwesekeja nachayilejeliyi mumukanda. Kubombelahu, mutukweji twahitilihu kufuma hatemesheliyi Pawulu iwu mukanda, ona iyala wavulumwini wabalumukili mumuchima nakuleka nshidi yindi! Wahimpili yilwilu yindi nikuleka yuma yatama yelileñayi nakutachika kulondela nshimbi jaYehova jaloña. (2 Kor. 7:​8-11) Haniyi mpinji Pawulu walejeli chipompelu kwila chumanyi?

 CHIPOMPELU CHICHATELELI KUMUMONAÑA MUKANSHIDI WABALUMUKILI MUMUCHIMA

7. Yumanyi yayiwahi yafuminimu chelili afumishi muntu wakoñeli nshidi? (2 AKorinda 2:​5-8)

⁷ Tañenu 2 AKorinda 2:​5-8. Pawulu wamweni nindi ‘kuzuwila kwamuzuwililiwu muntu wamuchidiwu kudi antu amavulu kwateleleli.’ Munjila yikwawu, kufumba kwazatili mudimu waku hadi iwu muntu. Mudimwinyi? Wakumuletesha abalumuki mumuchima.—Heb. 12:11.

8. Chumanyi chikwawu chalejeliyi Pawulu chipompelu kwila?

⁸ Dichi Pawulu walejeli chipompelu nindi: “Mwatela kumwanakena nikumukundeja” manakwetu waluwañesheli nawa “mumumwekesheli kukeña.” Talenu Pawulu wakeñeleña nindi chipompelu chili yuma yikwawu kubadika kumutambwila hohu ona iyala hakachi kawantu jaYehova. Pawulu wakeñeleña nindi amumwekesheli muntu wunabalumuki nawu anamwanakeni chikupu nawa amukeña kuhitila mumazu awu, muyilwilu nimuyuma yelileñawu. Chumichi chadi kumwekesha nawu mwamweni anamutambwili muchipompelu.

9. Muloñadi antu amakwawu chashintajalileñawu kumwanakena muntu wabalumukili mumuchima?

⁹ Komana antu amakwawu muchipompelu ashintajalili kumutambwila mukanshidi wabalumukili mumuchima? Nsona yahosha wanyi, ilaña atela ashintajalili. Kafwampi, yilwilu yindi yaleteli kukala muchipompelu chejima nawa hadaha nikasawuntu kudi antu amakwawu. Amakwawu atela atiyili nawu chadiña chiwahi wanyi kumushikija ona iyala namuzañalu neyi manakwawu henohu wena azatili nañovu kulonda atwalekihu kwikala atooka. (Esekejenu Luka 15:​28-30.) Hela chochu, muloñadi chichalemeneni chipompelu kumumwekeshela kukeña kwakweni manakwawu wafuntili?

10-11. Yumanyi yadi kumwekana neyi akulumpi akaanini kumwanakena ona mukanshidi wabalumukili mumuchima?

¹⁰ Fwikijenu chuma chadi kumwekana neyi akulumpi akaanini kumufuntisha muchipompelu ona iyala wabalumukili mumuchima hela neyi hanyima yakufunta, chipompelu chikaana kumumwekeshela kukeña. Wadi “kusweja kuneña.” Wadi kudimonaña nindi washikilamu wanyi. Wadi nikuleka kuzata nañovu kuwahisha wubwambu windi naNzambi.

¹¹ Chasweja kutama, neyi amanakwetu niahela muchipompelu akaanini kumwanakena muntu wabalumukili mumuchima, adi kuluwañesha wubwambu wawu naYehova. Muloñadi? Muloña adi kumwekesha yilwilu yaSatana yatama yakadi kumwekesha luwi, bayi chilwilu chaYehova chakwanakena muntu wunabalumuki mumuchimaku. Adi kuyizatishaña kudi Diyabolu kulonda akisañani wuspiritu wanona iyala.—2 Kor. 2:​10, 11; Efwe. 4:27.

12. Chipompelu chamwimbujoleli ñahi Yehova?

¹² Hanu dinu chipompelu chamuKorinda chamwimbujoleli ñahi Yehova, bayi Satanaku? Kuhitila mukulondela chelañayi Yehova namuntu wunabalumuki mumuchima. Talenu ansoneki aBayibolu amakwawu chahosheliwu hadi Yehova. Davidi wahosheli nindi: “Wudi muwahi nawa wanakenaña swayi.” (Mas. 86:5) Mika wasonekeli nindi: “Nzambinyi wudi neyi eyi, wanakenaña yiluwa nikupandakana nshidi.” (Mika 7:18) Nawa Isaya wahosheli nindi: “Muntu watama aleki kukoña yatama, nawa mukakuluwalala aleki kutoñojoka yuma yatama; afunti kudi Yehova, nawa yena wukumutiyila luwi, afunti kudi Nzambi yetu, muloña yena wukumwanakena nankashi.”—Isa. 55:7.

13. Muloñadi chichateleleli kumufuntisha muchipompelu mukanshidi wabalumukili mumuchima? (Talenu chikasha chinakwila nawu “ Mpinjinyi Yamufuntishiliwu muChipompelu Ona Iyala wamuKorinda?”)

 ¹³ Hakwila amwimbujoli Yehova, chipompelu chamuKorinda chateleli kumutambwila iyala wabalumukili mumuchima nikumumwekeshela kukeña. Kuhitila mukulondela wunlomboli wahaniniyi Pawulu wakutambwila mukanshidi wabalumukili mumuchima, chipompelu chamwekesheli “kwovwahila muyuma yejima.” (2 Kor. 2:9) Dimu tuhu, mwahitili tukweji twantesha kufuma hamufumishiliwu muchipompelu, ilaña kufumba kwamufumbiliwu kwamukwashili kubalumuka mumuchima. Dichi kwosi chuma chadi kuletesha ashintajali kumufuntisha muchipompeluku.

KUMWEKESHA WUÑANJI NILUWI NEYI YEHOVA

14-15. Yumanyi yitunadizili kuchazatiliwu namuloña wamuKorinda? (2 Petulu 3:9) (Talenu cheñi mwevulu.)

¹⁴ Nsañu yahosha hachazatiliwu namuloña wamuKorinda ayisonekeli nikuyihemba “kulonda etu tudiziliku.” (Rom. 15:4) Kuniyi nsañu, twadizilañaku netu Yehova hadiwulaña nshidi yahamesu bwi-i yakoñaña antu jindiku. Hetejaña yitoñojoka yakwila nawu antu anavulumuni nawa anabuli kubalumuka mumuchima ayitiyili “luwi” nakuyiteja kutwalekahu kudikunda nawakakudifukula indi  ashinshikaku. Yehova wukweti luwi, ilaña hetejaña yilwilu yatamaku; nawa hahimpaña nshimbi jindi jaloñaku. (Yuda 4) Mwamweni, kwila mwenimu kukumwekesha wanyi luwi muloña kukukisañana chipompelu chejima.—Yish. 13:20; 1 Kor. 15:33.

¹⁵ Hela chochu, twadizaña netu Yehova hakeñaña muntu hela wumu akajilumukiku. Wafwilaña kupulwisha antu amavulu. Watiyilaña luwi antu abalumukaña munyichima nawa afwilaña kuwahisha wubwambu wawu nayena. (Ezek. 33:11; tañenu 2 Petulu 3:9.) Dichi, chelili ona iyala wamuKorinda abalumuki mumuchima nawa aleki nshidi yakoñeleñayi, Yehova wamuzatishili Pawulu kulumbulwila chipompelu nindi atela kumwanakena nikumutambwila.

16. Munatiyi ñahi nachazatiliwu namuloña wamuKorinda?

¹⁶ Chitunahituluki munsañu yachazatiliwu namuloña wamuKorinda chinatukwashi kumona Yehova chamwekeshañayi kukeña, kuloña niwuñanji. (Mas. 33:5) Komana chumichi chinayisañumuni wanyi kumushimeka Nzambi? Kafwampi, wejima wetu tudi akanshidi nawa twakeñaña netu atwanakeneña kudi yena. Wejima wetu twatela kumusakilila Yehova hamuntu-hamuntu hefutu danyiloña, daleteshaña atwanakeneña. Chatukundejaña nikutukolesha kwiluka netu Yehova wakeña antu jindi nawa wakeñaña nindi ashakameña chiwahi!

17. Yumanyi yitwakahanjekahu muyibaaba yinalondelihu?

¹⁷ Indi makonu nyiloña ayizatilañahu ñahi? Akulumpi muchipompelu anateli kumwimbujola ñahi Yehova kwikala namuchima wakukwasha muntu wunavulumuni kubaluka mumuchima? Chipompelu chatela kwila ñahi neyi akulumpi afuukulahu kumufumisha hela kumufuntisha muntu? Awa malwihu twakayihanjekahu muyibaaba yinalondelihu.