1. Yumanyi yabombela mukubalumuka mumuchima?

 NEYI kudi chuma chatama chitunakoñi, chalema nankashi kubalumuka mumuchima. Kwesekeja nachahosha Bayibolu, muntu wunabalumuki mumuchima wahimpaña yitoñojoka yindi kutalisha hanochu chilwilu, kuleka kuchiila nikuzata nañovu kulonda abuli kufuntishahu cheñi.—Talenu Kulumbulula Mazu amuBayibolu, “Kubalumuka mumuchima.”

2. Muloñadi chitwakeñekelaña wejima wetu kudiza hakubalumuka mumuchima? (Nehemiya 8:​9-11)

² Muntu wejima watela kwiluka mwatalisha kubalumuka mumuchima. Muloñadi? Muloña twakoñaña nshidi ifuku niifuku. Chineli tudi anyana kaAdama naEva, wejima wetu twaswana nshidi nikufwa. (Rom. 3:23; 5:12) Kwosi niwumu washalahuku. Niantu adiña nachikuhwelelu chikupu, chidi neyi kapostolu Pawulu, niwena alwishileña nanshidi. (Rom. 7:​21-24) Komana chumichi chinatalishi mukwila nawu tukumonaña yihuñu mpinji yejima muloña wanshidi jetu? Inehi, Yehova wekala naluwi nawa wakeñaña tuzañalaleña. Talenu chuma chayimwekeneni aYudeya amumafuku aNehemiya. (Tañenu Nehemiya 8:​9-11.) Yehova hakeñeleña nindi aneñeña muloña wanshidi jakoñeliwu kunyimaku, ilaña wakeñeleña nindi ekaleña namuzañalu hakudifukula kudi yena. Yehova weluka nindi kubalumuka mumuchima kwaletaña muzañalu. Dichi watudizishaña hachumichi. Neyi tubalumuka nakuleka nshidi jetu, twatela kukuhwelela netu Tata yetu wukweti luwi wukutwanakena.

3. Yumanyi yitukuhanjekahu muchinu chibaaba?

³ Dizilenuhu yuma yikwawu hakubalumuka mumuchima. Muchinu chibaaba tukuhanjeka hayuma yisatu. Chatachi, tukudiza yuma yayidizishiliwu aIsarela kudi Yehova hakubalumuka  mumuchima. Kuhiñahu, tukushinshika Yehova chakwashiliyi akanshidi kulonda abalumuki munyichima. Nkumininaku, tukuhanjeka yuma yadiziliwu akakumulondela Kristu hakubalumuka mumuchima.

YUMA YAYIDIZISHILIWU AISARELA KUDI YEHOVA HAKUBALUMUKA MUMUCHIMA

4. Yumanyi yadizishiliyi Yehova muza waIsarela hakubalumuka mumuchima?

⁴ Yehova chelishiliyi aIsarela kwikala muza, watiyañeni nawu chitiyañenu chalema. Neyi atwalekelihu kuhemba nshimbi jindi, wadi kuyikiña nikuyikiswila. Kutalisha hajina nshimbi, wayilejeli nindi: “Dichi, ilu lushimbi lwinnakuyileja dalelu lukuyikalila wanyi kulondela nawa hiludi kwakulehi nanenuku.” (Kuhit. 30:​11, 16) Ilaña neyi adikañili nayena—chakutalilahu, neyi afuukulahu kudifukula kudi anzambi akutwamba—wadi kuleka kuyikiswila nawa adi kukabakana. Hela chochu, nihanyima yakwila chuma chamuchidiwu, Nzambi wadi kutwalekahu kuyitiya kuwaha. Adi ‘kufunta kudi Yehova Nzambi yawu nikutiyilila kwizu dindi.’ (Kuhit. 30:​1-3, 17-20) Munjila yikwawu, adi kubalumuka munyichima. Neyi elili mwenimu, Yehova wadi kuswina kwakwihi nawena nawa wadi kuyikiswila cheñi.

5. Yehova wamwekesheli ñahi nindi halekeli kuyikwasha antu jindiku? (2 Anyanta 17:​13, 14)

⁵ Antu jaYehova atondewa adikañileña nayena kakavulu. Adifukwileña kudi ankishi, nawa akoñeleña yuma yikwawu yatama chikupu. Chafumineñamu, akabakeneña. Ilaña Yehova watwalekelihu kukwasha antu jindi kulonda amukalakeleña cheñi. Watwalekelihu kutemesha atuprofwetu nakusoñamisha antu jindi kulonda abalumuki munyichima nakufunta kudi yena.—Tañenu 2 Anyanta 17:​13, 14.

6. Yehova wazatishili ñahi atuprofwetu indi kulonda adizishi antu jindi chichalemena kubalumuka mumuchima? (Talenu cheñi mwevulu.)

⁶ Yehova kakavulu wazatishileña atuprofwetu twindi kulonda asoñamisheña nikwolola antu jindi. Chakutalilahu, Nzambi wahosheli kuhitila mudi Yeremiya nindi: “Funtaku, eyi Isarela mukakusekesha . . . Nakakutala nakuzuwa wanyi, muloña ami nashinshika . . . Hinakatwalekahu kukuhilila haya nyaakaku. Kuminaku dakwiteja nshidi jeyi, muloña wunadikañi  naYehova Nzambi yeyi.” (Yere. 3:​12, 13) Kuhitila mudi Yoweli, Yehova wahosheli nindi: “Funtenu kudi ami nanyichima yenu yejima.” (Yoweli 2:​12, 13) Wamulejeli Isaya kulonda ahoshi nindi: “[Ikalenu] akadi majilu; fumishenu yuma yatama kumesu ami; lekenu kwila yuma yatama.” (Isa. 1:​16-19) Nawa kuhitila mudi Ezekeli, Yehova wehwili nindi: “Komana natiyaña kuwaha neyi muntu watama afwa? Komana hinakeñaña nami aleki yuma yatama yinakukoñayi kulonda atwalekihu kuhandaku? . . . Natiyaña kuwaha wanyi neyi muntu wudi wejima afwa. Dichi balumukenu kulonda muhandi.” (Ezek. 18:​23, 32) Yehova watiyaña kuwaha kumona antu anakubalumuka munyichima muloña wakeñaña atwalekihu kuhanda haya nyaaka! Dichi Yehova hakuminaña dakuhembelela antu akanshidi abalumuki henohu kanda ayikwashiku. Tutalenu yakutalilahu yinakumwekesha chumichi.

7. Kuzatisha nsañu yahosha hadi kaprofwetu Hoseya nañodindi, yumanyi yayidizishiliyi Yehova antu jindi?

⁷ Talenu chuma chayidizishiliyi Yehova antu jindi kuzatisha chuma chamwekeni, chaGomeri, ñoda kaprofwetu Hoseya. Hanyima yakukoña wujila, wamushili Hoseya nakuya kudi amayala acheñi. Komana wadi kuhimpa? Yehova wamonaña jidi mumuchima, wamulejeli Hoseya nindi: “Yaku cheñi, wukeñi mumbanda anakeñiwu kudi iyala wacheñi nawa wunakwila [wujila], wumukeñi neyi Yehova chakeñayi antu jaIsarela hela chakwila anabalumukili kudi anzambi amakwawu.” (Hos. 3:1; Yish. 16:2) Neyi chitunamoni, ñoda Hoseya watwalekelihu kukoña nshidi yahamesu bwi-i. Ilaña, Yehova wamulejeli Hoseya kuya nakumusenda, kumwanakena nikumufuntisha. a Munjila yoyimu, Yehova walekeli wanyi kuyikwasha antu jindi achinchika nyichima. Hela chakwila akoñeleña nshidi jamaneni, watwalekelihu kuyikeña nikuya kudi wena nakuyikwasha kulonda abalumuki munyichima nikuhimpa yilwilu yawu. Komana ichi chakutalilahu chinakumwekesha nawu Yehova, “mukakushinshika nyichima,” wukuya kudi muntu wunakukoña nshidi yeneni nakumuleja nindi abalumuki mumuchima? (Yish. 17:3) Tutalenu.

YEHOVA CHAKWASHAÑAYI AKANSHIDI KULONDA ABALUMUKI MUNYICHIMA

8. Yehova welili ñahi naKena hakwila amukwashi kubalumuka mumuchima? (Kutachika 4:​3-7) (Talenu cheñi mwevulu.)

⁸ Kena wadiña wedi waAdama naEva. Waswanini nshidi kufuma kudi anvwali jindi. Kubombelahu, Bayibolu yahosha nawu: “Nyidimu yaKena yadiña yatama.” (1 Yow. 3:12) Hadaha dichaletesheli Yehova ‘abuli kumutiya kuwaha Kena nimulambu windi’ hampinji yalambwiliyi mulambu. Chatela ahimpi yilwilu yindi, “Kena wahilili nankashi nikudihomba.” Chumanyi cheliliyi Yehova? Wahosheli naKena. (Tañenu Kutachika 4:​3-7.) Neyi chitunamoni, Yehova wahanjekeli naKena munjila yayiwahi, nakumuleja nindi wukumukwasha nawa wamusoñamishili hayuma yatama yikufumamu neyi akoña nshidi. Chawushona, Kena wakaanini kutiyilila. Wetejeli wanyi kumukwasha kudi Yehova kulonda abalumuki mumuchima. Chelili akaani kumukwasha, komana Yehova walekeli kukwasha akanshidi amakwawu kubalumuka munyichima? Kwakulehi!

9. Yehova wamukwashili ñahi Davidi kubalumuka mumuchima?

⁹ Yehova wamukeñeli chikupu Mwanta Davidi. Wamuteneni nikumutena nindi: “Iyala innatiyi kuwaha mumuchima wami.” (Yilw. 13:22) Ilaña Davidi wakoñeli nshidi yahamesu bwi-i, mwabombeleli kwila wujila nikujahana. Kwesekeja naNshimbi jaMosi, Davidi wateleli kufwa.  (Lev. 20:10; Kuch. 35:31) Ilaña, Yehova wamukwashili. b Watemesheli kaprofwetu kindi Natani kuya nakumuwana mwanta, hela chakwila Davidi wamwekesheli wanyi chinjikijilu chakubalumuka mumuchima. Natani wazatishili chakutalilahu chamushikili Davidi hamuchima. Chamweniyi nindi naluwañeshi, Davidi wabalumukili mumuchima. (2 Sam. 12:​1-14) Wasonekeli isamu dakufuma hamuchima damwekeshaña chabalumukiliyi mumuchima. (Mas. 51, mutu) Idi isamu dinakundeji akanshidi amavulu nawa dinayikwashi kubalumuka mumuchima. Komana chatuzañaleshaña wanyi kwiluka netu Yehova wamukwashili kambuñindi Davidi kubalumuka mumuchima?

10. Mwatiyaña ñahi chadiwunjikañayi Yehova nichanakenañayi antu akanshidi?

¹⁰ Yehova wahela nshidi, nawa kwosi nshidi yidi yejima yetejayiku. (Mas. 5:​4, 5) Hela chochu, weluka nindi wejima wetu tudi akanshidi, nawa muloña wakutukeña, watukwashaña kushinda nshidi. Mpinji yejima wakwashaña ninowu anavulumuni nshidi yahamesu bwi-i kulonda abalumuki mumuchima nikuswina kwakwihi nayena. Iyi hinsañu yatukundejaña nankashi! Chitunakutoñojoka hakudiwunjika kwaYehova nichanakenañayi, tukufwilaña kutwalekahu kwikala ashinshika kudi Yena nikunyakala kubalumuka mumuchima neyi tunavulumuni. Ichi tuhanjekenu kulonda tumoni chipompelu chawakaKristu chachidizishiliwu yuma yikwawu kutalisha hakubalumuka mumuchima.

YUMA YADIZILIWU AKAKUMULONDELA KRISTU HAKUBALUMUKA MUMUCHIMA

11-12. Yesu wayidizishili chumanyi antiyilili jindi hachanakenañayi Tata yindi? (Talenu mwevulu wudi .)

¹¹ Muyaaka nkulakaji yakusambila C.E., mpinji yashikili yakwinza kwaMesiya. Neyi chashimwiniwu muchibaaba chinafumihu, Yehova wazatishili Yowanu Mpapatishi niYesu Kristu kudizisha antu chalemena kubalumuka mumuchima.—Mat. 3:​1, 2; 4:17.

¹² Mumudimu windi wejima, Yesu wayidizishili antiyilili jindi hachanakenañayi Tata yindi. Yesu welili mwenimu munjila yakuhayamisha chelili ayileji chishimu chamwana wajimbeli. Ona kansi weyala wafuukwilihu kushakama  chihandilu chanshidi hadi mpinji yayilehi. Hela chochu, watachikili “kutoñojoka cheñi chiwahi” nawa wafuntili kwitala. Tata yindi welili ñahi? Yesu wahosheli nindi henohu mwanindi “wuchidi hahalehi, tata yindi wamumweni nawa wamutiyilili wushona, wamukinkililili nawa wamukumbatili nakumufufwa.” Mwana wakeñeleña kulomba nindi ekali ñamba mwitala datata yindi, ilaña tata yindi wamuteneni nindi “iwu mwanami” nawa wamufuntishili muchisaka chindi. Tata yindi wahosheli nindi: “Wajimbeli ilaña namwekani.” (Luka 15:​11-32) Yesu hadiñayi mwiwulu henohu kanda enzi hamaseki, wamweni Tata yindi chamwekesheleleñayi wushona akanshidi abalumukili munyichima. Iyi nsañu yahosheliyi Yesu yatukwashaña kwiluka nawu Tata yetu, Yehova, wukweti luwi niwushona!

13-14. Yumanyi yadiziliyi kapostolu Petulu kutalisha hakubalumuka mumuchima, nawa wayidizishilidi amakwawu kutalisha haniyi nsañu? (Talenu cheñi mwevulu.)

¹³ Kapostolu Petulu wadizili nsañu yayivulu kudi Yesu kutalisha hakubalumuka mumuchima nikwanakena. Kakavulu Petulu wakeñekeleña kumwanakena, nawa Yesu wamwanakeneneña chakufuma hamuchima. Chakutalilahu, hanyima yakwila Petulu amukaani Mwanta kapampa kasatu nindi wamwiluka wanyi, watiyili kutama chikupu. (Mat. 26:​34, 35, 69-75) Ilaña hanyima yakwila Yesu anamusañuli, wamwekeni kudi Petulu, hadaha kwakankawawu. (Luka 24:​33, 34; 1 Kor. 15:​3-5) Chakadi nikujina hayina mpinji, muloña wakukeña Yesu wamwanakeneni iwu kapostolu wabalumukili mumuchima.—Maku 16:7.

¹⁴ Chelili Petulu amwanakeni, watachikili kudizisha antu mwatalisha kubalumuka mumuchima nikwanakena. Chimwahitili mpinji hanyima yachawija chaPentekosta, Petulu wahanini mpanji kudi aYudeya amavulu abulili kwitiya, nakuyilumbulwila nindi amujahili Mesiya. Ilaña mukukeña wayikonkomweneni nindi: “Dichi dinu, balumukenu munyichima yenu, mufunti kulonda nshidi jenu  ajijimañeshi, kulonda Yehova yomweni ayinookeshi.” (Yilw. 3:​14, 15, 17, 19) Dichi Petulu wamwekesheli nindi kubalumuka mumuchima kwakwashaña mukanshidi kubalumuka, nakuhimpa njila yindi yatama mwatoñojokelañayi nimwelilañayi yuma nakutachika kwila yuma yamutiyishaña Nzambi kuwaha. Kapostolu cheñi wamwekesheli nindi Yehova nateli kujimañesha nshidi jawu, hela kujikojeja nshidi jawu kubula kumwekana. Nawa chimwahitili yaaka yayivulu, Petulu wayilejeli akaKristu nindi: “Yehova . . . wadiwunjika nanenu muloña hakeñaña muntu hela wumu akakisikiku, ilaña wakeñaña antu ejima abalumuki munyichima.” (2 Pet. 3:9) Neyi akaKristu abalumuka munyichima hela chakwila akoñeli nshidi yeneni chamuchidinyi, chatukundejaña kwiluka netu Yehova watwanakenaña!

15-16. (a) Yumanyi yadiziliyi kapostolu Pawulu kutalisha hakwanakena? (1 Timotewu 1:​12-15) (b) Yumanyi yitwakahanjekahu muchibaaba chinalondelihu?

¹⁵ Sawulu wakuTarusa wakoñeli yuma yatama yayivulu nankashi. Wadiña mukakukabisha chikupu antu amulondeleleña Kristu. AkaKristu amavulu atela amumweneña nawu wajimbala chikupu, kwila abalumuka nehi. Ilaña yitoñojoka yaYesu asañwiliwu yambukili chikupu nayina yitoñojoka yawantu. Yena naTata yindi amweni yilwilu yayiwahi mudi Sawulu. Yesu wahosheli nindi: “Iwu iyala namutondi.” (Yilw. 9:15) Yesu wazatishili nichihayamisha kulonda amukwashi Sawulu kubalumuka mumuchima. (Yilw. 7:58–8:3; 9:​1-9, 17-20) Chekaliliyi mukaKristu, Sawulu, enjiliwu nakutachika kutenawu nawu kapostolu Pawulu, kakavulu wamwekesheleña kusakilila nanochu chamumwekesheleliwu wushona niluwi. (Tañenu 1 Timotewu 1:​12-15.) Iwu kapostolu wamwekesheli kusakilila wahosheli nindi: “Nzambi muluwi lwindi nakukeña nindi wubalumuki [mumuchima].”—Rom. 2:4.

¹⁶ Pawulu chatiyiliyi kukala kwansañu yawujila kwadiña muchipompelu chawakaKristu muKorinda, wamanishili ñahi iku kukala? Welili mwenimu munjila yatudizishaña Yehova chafumbañayi munjila yakukeña nichichalemena kumwekesha luwi. Tukahanjeka haniyi nsañu chikupu mukapetulu kanalondelihu.