Kapostolu Pawulu wasonekeleli akaKristu muTesalonika, nindi: “Neyi kudi muntu wunakudikaña namazu itunasoneki muwunu mukanda, mwilukenu chiwahi yenowu muntu.” (2 Tes. 3:14) Kunyima, twahosheleña netu iwu wunlomboli wakundamini kudi akulumpi. Neyi muntu atwalekahu kudiwula yishina yamuBayibolu hela chakwila anamufumbi kakavulu, akulumpi ahanineña mpanji yakusoñamisha kuchipompelu. Kuhiñahu, akakushimwina alekeleña kudikunda naniwu muntu.

Hela chochu, kuhimpika kunakukeñeka. Kufumba kwahaniniyi Pawulu chakadi nikujina kunakutalisha kuchuma chatela kwilawu akaKristu aweni kwesekeja nachidi yuma. Dichi akulumpi hiyatela kuhana mpanji yakusoñamishaku. Muloñadi chikunekalili iku kuhimpika? Talenu nsañu yahosheleñayi Pawulu hahanineñayi iku kufumba.

Pawulu wamweni nindi antu amakwawu muchina chipompelu ‘hiyendeleña mukuloñaku.’ Adiña nakudiwula kufumba kwonenewa. Halwendu lwindi lwafuminihu, wayilejeli nindi: “Neyi muntu nakukeña kuzata wanyi, bayi adaku.” Ilaña, amakwawu akaanineña kuzata kulonda adikwasheña aweni, hela chakwila adiña nawuswa wakwila mwenimu. Cheñi adiña nakudiñija munsañu yinabuli kuyikundama. Dichi akaKristu ateleli kuyimona ñahi antu abulileña kwenda mukuloña?—2 Tes. 3:​6, 10-12.

Pawulu wahosheli nindi: “Mwilukenu chiwahi yenowu muntu.” Izu dachiGiriki datalisha mukumwilukisha kulonda yilwilu yindi yibuli kuyiluwañesha. Pawulu walejeli chipompelu chejima iwu wunlomboli, bayi akulumpi hohuku. (2 Tes. 1:1; 3:6) Dichi akaKristu aweni anamoni mukwawu mukaKristu wunakufumpa kufumba kwonenewa diwu anateli kufuukulahu ‘kuleka kudikunda nanowu’ muntu wunakubula kwenda mukuloña.

Komana chumichi chinatalishi mukwila nawu owu muntu amumweneña neyi muntu anafumishiwu muchipompelu? Inehi, Pawulu wabombelelihu nindi: “Twalekenuhu nakumufumba chineli himanakwenu.” Dichi akaKristu awenawu adikundileña naniwu muntu hakupompa nimumudimu wakushimwina, ilaña afuukwileñahu kubula kudikunda nindi hampinji yinakuhemenawu hamu. Muloñadi? Pawulu wahosheli nindi: “Kulonda atiyi nsonyi.” Chuma chafumineñamu neyi anamwiluki chiwahi, mukaKristu wunakubula kwenda mukuloña watiyileña nsonyi muloña wayilwilu yindi nawa wahimpileña.—2 Tes. 3:​14, 15.

AkaKristu anateli kuzatisha ñahi iku kufumba makonu? Chatachi, twatela kumona neyi ochu chilwilu mwamweni chinakumwekesha nawu owu muntu hanakwenda “mukuloñaku,” neyi chashimwiniyi Pawulu. Wateneneña wanyi antu itwambuka nawu yinleji yanyichima hela yuma yitwakeña. Nawa wateneneña wanyi antu anatuneñeshi. Ilaña, wateneneña sweje-e antu afuukulañahu kubula kwovwahila mumushikila, kufumba kwaNzambi kwakuwahi.

Makonu, neyi tumona mukwetu mukaKristu nakumwekesha ichi chilwilu chakubula kwovwahila, a tukufuukulahu etu aweni kubula kudikunda nindi hampinji yitunakuhemena hamu. Chineli iku hikufuukula kwamuntu yomweni, hitwatela kuhanjeka namuntu wunabuli kwikala wamuchisaka chetu iyi nsañuku. Ilaña tunateli kutwalekahu kudikunda naniwu muntu hakupompa nimumudimu wakushimwina. Neyi ahimpa yilwilu yindi, tunateli kutachika cheñi kudikunda nindi.