1. Kupapatishewa kwalemenadi? (Talenu mwevulu wakutachikilahu.)

MAKOMBAKAJI awatudizi aBayibolu anakupapatishewa hachaaka-hachaaka. Amavulu hiyatwansi—atumpululu niachidi kanda ekali atumpululu. Hadaha avwalikila muchalala. Wudi hakachi kawu? Neyi dimu, tunakusakilili. AkwaKristu ejima atela kupapatishewa nawa hinjila yinateli kuyikwashi kupuluka.—Mat. 28:19, 20; 1 Pet. 3:21.

2. Muloñadi chimwatela kubulila kutiya woma kudihana?

² Hela chakwila chipapatishu chenzununaña chiisu chankisu yayivulu, ilaña chenzaña nanyidimu yayivulu. Munjilanyi? Hefuku diwapapatisheweli, wakwili neyi eña kunilu lwihu, “Kushindamena hamulambu waYesu Kristu, munabalumuki munyichima nakuleka nshidi yenu nakudihana enu aweni kudi Yehova kulonda mwili nkeñelu yindi?” Chipapatishu cheyi chamwekeshaña nawu wadihanini. Hikukana kuwamukanini Yehova neyi wukamukeñaña nikutwamijaku kwila nkeñelu yindi kubadika yuma yejima. Ichi chikaninu watela kuchishikija. Komana  watela kuditoñeshaña neyi chiña wabulili kukana? Inehi, hiwatela kuditoñeshaku. Chatama wanyi kudihana neyi akuzatisheña kudi Yehova. Talaku chichekala neyi wubula kudihana. Muntu wabula kumwiluka Yehova amuyuulaña kudi Satana. Diyabolu hakeñaña nindi wakapulukiku. Watiyaña kuwaha neyi wujimbesha kuchiñeja kweyi kwawumi wahaya nyaaka kuhitila mukudibomba nindi hakudikaña nachiyuulu chaYehova.

3. Nkiswinyi jafumañamu neyi mudihana kudi Yehova?

³ Chatela wumuhakwileñaku Satana, toñojokaña hankisu yiwukweti hamuloña wakwikala mukwaKristu wadihana nawa wapapatishewa. Chineli wunahani wumi weyi kudi Yehova, watela kuhosha nachikuhwelelu neyi: “Yehova wadikuma nanami; hinukutiya womaku; chumanyi chakañilawu antu?” (Mas. 118:6) Kwosi chuma chabadika kudihana kudi Nzambi nikwikala ibwambu dindiku.

4, 5. (a) Munjilanyi kudihana chikwekalila kufuukula kwamuntu yomweni? (b) Kukalanyi kwamonañawu antu ejima?

⁴ MukwaKristu wejima wapapatishewa watela kwiluka nindi, wubwambu windi naYehova ‘hikufukula kwachisaka’ wanyi. Ilaña, hikufuukula kweyi eyi aweni, hela chakwila ayihembaña kudi anvwali. Chawahiladi kwiluka ichi chikuma? Muloña wukutwesha wanyi kwiluka kukala kukamwekana kumbidi. Chakutalilahu, neyi wapapatisheweli henohu wuchidi kansi, neyi hiwukukula wakatachika kutiya wuvumbi nawa akwenu akakukakejaña kwila yuma yashiyashana. Kankaña wumu wahosheli nindi: “Kansi wukuneña wanyi neyi yabula kwanakana ifuku dakuvwalika kushikola muloña wakwila hiChinsahu chaYehova. Ilaña neyi yakula nawa mpwila yawuvumbi yisweja, watela kwiluka chikupu chichalemena kwovwahila nshimbi jaYehova.”

⁵ Hela chochu, bayi neyi atwansi hohu diwu amonaña kukala kwakuhaku. Ninana apapatisheweli iku akula dehi, chikuhwelelu chawu achesekaña munjila yabulili kukuhwelelawu. Iku kweseka kunabombelimu kukala kwamuwulu, yikatu ninyidimu. Mwamweni, muntu wejima, kansi hela mukulumpi watela kwiluka nindi nateli kumona kukala kukukeñeka yekali washinshika kudi Yehova.—Yak. 1:12-14.

6. (a) Kudihana kudi Yehova chatalisha mudihi? (b) Yumanyi yimunadizili kumukanda waAfwilipi 4:11-13?

⁶ Hakwila nawu wutwalekeñahu kwikala wanshinshika, anukaku neyi watela kushikija muwamukanini Yehova hela yuma yinakali. Ichi chinayi mukwila nawu wunamuleji Mwanta wakuleña kwejima neyi wakatwalekahu kumukalakela hela chakwila amabwambu jeyi hela anvwali analeki kumukalakela. (Mas. 27:10) Muyuma yejima, mulombi Yehova kulonda yakwinki ñovu yikukukwasha kwila yuma kwesekeja nachiwadihanini.—Tañenu Afwilipi 4:11-13.

7. Kufwila kutambwila wamwinu “nawoma nikuzaala” kwatalisha mudihi?

⁷ Yehova nakukeña nindi wikali ibwambu dindi. Ilaña chakeñekaña kuzata nañovu hakwila nawu wutwalekihu kwikala ibwambu dindi nikufwila kutambwila wamwinu. Afwilipi 2:12 yahosha nawu: “Ikalenuña nawoma nikuzaala hampinji yimunakufwila kutambwila wamwinu.” Awa mazu amwekeshaña nawu watela kutoñojoka chiwunateli kutwalekahu kwikala ibwambu daYehova nikwikala washinshika kudi yena hela chakwila wunakumona kukala. Bayi mudikuhwelelaku. Muloña niambuña jaNzambi anakalakali yaaka yayivulu aluwañeshahu  dehi. Dichi, yumanyi yimunateli kwila hakwila nawu mufwileña kutambwila wamwinu?

8. Kudiza kwahalwenu kwabombelamu yumanyi nawa muloñadi chikwalemena?

⁸ Hakwila nawu twikala amabwambu jaYehova, twatela kumutiyilila nikuhosha nindi. Kudiza Bayibolu hinjila yimu yitwatiyililaña kudi Yehova. Chumichi chinabombelimu kwiluka kuhitila mukutaña nikutoñojokahu Hezu daNzambi nihanyikanda yashindamena haBayibolu. Chiwukwilaña mwenimu, anukaku neyi kudiza Bayibolu bayi hikutañamu neyi chatañañawu kushikola. Hiwatela kutaña neyi chelañawu akashikola ahembelaña hohu nsañu kumutu kulonda apasiku. Kudiza kwakuwahi kwakeñekaña kusandujola chikupu nyikabu yayilwilu yaYehova. Chumichi chikukukwasha kuswina kudi Nzambi nawa niyena wukuswina kwakwihi naneyi.—Yak. 4:8.

9. Yitwanyi yinayikwashi kudiza kwahalwenu?

⁹ Kuloñesha kwaYehova kunaloñeshi yitwa yayivulu kulonda yiyikwasheña kuhetala muprogilamu yenu yakudiza. Chakutalilahu, ha jw.org hekala yibaaba yahoshaña nawu “Bible Study Activities,” hadi kamutu nawu “Teenagers” yinateli kuyikwasha kudiza nsañu yamuBayibolu. Ha jw.org/lun nihena hadi yitwa yatukwashaña kudiza, yiidi neyi “Chumanyi Chacheni Chatañishaña Bayibolu?” yinateli kukukwasha kwikala nachikuhwelelu chakola. Iyi yitwa yinateli kukukwasha kudiza nikulumbulula yuma yiwakuhwelela kudi antu amakwawu. Nsañu yikwawu yakudiza yekala muAwake! yaApril 2009 muchibaaba chinakwila nawu “Young People Ask . . . How Can I Make Bible Reading Enjoyable?” Kudiza nikutoñojokahu chikupu kunateli kukukwasha kufwila kutambwila wamwinu.—Tañenu Masamu 119:105.

10. Muloñadi mukwaKristu wapapatishewa chatela kulombelayi?

¹⁰ Chineli kudiza kwahalwetu diyi njila yakumutiyilila Yehova, kulomba hinjila yakuhosha nindi. MukwaKristu watela wanyi kumona kulomba neyi hichidika hohu chamukunkulwayi; hela neyi ‘hiyitumbu’ yikumukwashaña muyuma yejima yikwilañayi kulonda yilumbulukeña. Ilaña, kulomba  hikuhosha naNleñi yetu. Yehova nakukeña kutiya yuma yiwunakukeña. (Tañenu Afwilipi 4:6.) Neyi wumona kukala kudi kwejima, londelaku kufumba kwamuBayibolu kwakwila nawu “umbilaku chiteli cheyi hadi Yehova.” (Mas. 55:22) Wunakuhweleli munawa mazu? Yihita yawamanakwetu niahela anamoni nawu awa mazu alala. Nineyi wunateli kumona neyi awa mazu alala!

11. Muloñadi chimwatela kumusakililaña Yehova mpinji yejima?

¹¹ Kudi yuma yikwawu yiwatela kulomba chatela wulombeña hohu wukwashu kudi Yehova. Bayibolu yahosha nawu: “Sakililenuña.” (Kol. 3:15) Mpinji yikwawu tunateli kusha maana hakukala kutukweti chakwila tujimbala ninkisu jitukweti. Komana kwila wutoñojoka hayuma yisatu yiwatela kumusakililahu hefuku-hefuku nehi? Neyi wunayitoñojoki dehi, musakilili Yehova. Kankaña wejina daAbigail, wapapatisheweli nayaaka 12 wahosheli nindi: “Namoni Yehova hohu diyi muntu itwatela kusakilila. Twatela kumusakilila mpinji yejima hayawaana yinatwinkiyi. Nanukaña awa mazu: Nukwikala nayuma yiñahi neyi nimusakililaña Yehova hayuma yoyimu mpinji yejima?”

12, 13. Muloñadi chimwatela kutoñojoka hachimwamutompa Yehova nakutiya chawahayi?

¹² Mwanta Davidi, apulwishiliwu mukukala kwakuvulu, wembili nindi: “Tompenu mutiyi chawahayi Yehova; muntu wabatamaña mudi yena nakooleki.” (Mas. 34:8) Iyi vasi yinakumwekesha chichawahila kumutompa. Neyi wutaña Bayibolu ninyikanda yetu nawa neyi wuya kukupompa kwawakwaKristu, wukudiza yakutalilahu yawantu akwashiliwu kudi Nzambi kwikala ashinshika. Ilaña chiwukupamaña kuspiritu, watela kumona chikukukwashañayi Yehova muchihandilu cheyi. Munjilanyi muwamutompahu dehi Yehova nakutiya chawahayi?

¹³ Kudi njila yimu akwaKristu ejima yamutompahu dehi Yehova nakutiya chawahayi. Kuhitila mukuyitambika kuswina kwakwihi naNzambi niMwanindi. Yesu wahosheli nindi: “Kwosi muntu wunateli kwinza kudi amiku, chiña amukoka kudi Tata wantemesheli.” (Yow. 6:44) Enu atwansi, komana mwatiyaña nenu ayikoka kudi Nzambi? Kansi nateli kutoñojoka nindi, ‘Yehova wakokeli hohu anvwali jami, ami nakumini dakuyilondela.’ Ilaña chiwadihanini kudi Yehova nikupapatishewa, wamwekesheli neyi wunekali ibwambu dindi. Ichi akwiluka chikupu kudi Nzambi. Bayibolu yatulejaña nawu: “Neyi muntu wamukeña Nzambi, dikwila nawu iwu muntu amwiluka kudi yena.” (1 Kor. 8:3) Twalekakuhu kuzata nañovu kulonda wulemesheña nikusakilila hakwikala mukuloñesha kwaYehova.

14, 15. Mudimu wakushimwina wunateli kukolesha ñahi chikuhwelelu chenu?

¹⁴ Njila yikwawu yiwunateli kumutompa Yehova nakutiya chawahayi hikumona chakukwashañayi hampinji yiwalejaña akwenu yuma yiwakuhwelela. Wunateli kwila mwenimu kuhitila mukushimwina nikushikola. Atwansi amakwawu akañanyaña kushimwina akwawu kushikola. Namoni wuneluki chaleteshaña. Wuneluki wanyi chakwilawu neyi wuyishimwina. Chakala nankashi kuyishimwina sweje-e neyi adi amavulu kubadika neyi wudi nkawindi. Chumanyi chinateli kukukwasha?

¹⁵ Chatachi, toñojokaku chaletesheli wukuhweleli. Komana ha jw.org yamwidimi diwahoshaña hadi yitwa yakwashaña kudiza? Neyi wunayiluki wanyi, yikeñakeñi. Ayisoneka munjila yikukukwasha kutoñojoka yuma yiwakuhwelela, chaletesha wukuhweleli  nichiwunateli kulumbulwila akwenu yuma yiwakuhwelela. Neyi chikuhwelelu cheyi chakola nawa wunadiloñeshi, wukwikala neyena dakushimwina heijina daYehova.—Yere. 20:8, 9.

16. Chumanyi chinateli kuyikwasha kubula kutiya woma wakushimuna yuma yimwakuhwelela?

¹⁶ Hela neyi wunaloñeshi, chinateli kukukalila kuhosha hayuma yiwakuhwelela. Muhela wudi nayaaka 18, wapapatisheweli nayaaka 13 wahosheli nindi, “Neluka yuma yinakuhwelela, ilaña mpinji yikwawu chankalilaña kuhosha yuma yinakuhwelela.” Washindaña ñahi iku kukala? Washosheli nindi, “Nesekaña kudimwekesha neyi kwosi yuma yineluka. Akwetu akashikola ahoshaña yuma yelañawu chakadi kutiya woma. Ninami natela kutiya woma wanyi. Neyi tunakuhanjeka, nombilañahu kadizu nami, ‘Nadizishaña antu Bayibolu adina ifuku, nawa . . .’ Dinu hinukutwalekahu nakuhosha yuma yinakeñaña kuhosha. Hela chakwila tunakuhanjeka wanyi hansañu yamuBayibolu, chumichi chaleteshaña akwetu kutoñojoka hayuma yinelaña neyi inakudizisha Bayibolu. Mpinji yikwawu ehulaña chinelaña. Aka kafuta kankwashileña chikupu kutachika kuhanjeka nawakwetu. Nawa neyi nahanjeki dehi nawu, natiyaña muzañalu chikupu!”

17. Chimwamonaña yuma yimwakuhwelela kunateli kuyikwasha ñahi kuhanjeka nawantu amakwawu?

¹⁷ Neyi muyilemesha nikuyikeña, akwiteja nsañu yimukuyileja. Olivia wudi nayaaka 17 nawa wapapatisheweli henohu kanda yekali kampululu, wahosheli nindi, “Mpinji yejima natiyileña woma nami neyi nitachika kuhosha nsañu yamuBayibolu, antu akumona nawu yuma yinakuhwelela yamukunkulwayi.” Watachikili kuleka kutoñojoka muniyi njila. Chatela yatwalekihu kutiya woma, Olivia watoñojokeli nindi: “Atwansi amavulu kwosi yuma yelukawu hadi aYinsahu jaYehova. Yetu hohu aYinsahu elukawu. Dichi yuma yitukwila diyi yikuletesha atutiyilili hela atukaani. Indi neyi twatiyaña woma nawa twekala nansonyi yakuhosha hayuma yitwakuhwelela, hela neyi twakañanyaña kuhosha? Chumichi chikuletesha atumoneña nawu twalemesha wanyi yuma yitwakuhwelela. Anateli nikukaana munjila yatama muloña wakubula kuhamuka kwetu. Hela chochu, neyi tuhosha mumesu awunda ninachikuhwelelu hayuma yitwakuhwelela, akutiyilila nsañu yitunakuhosha.”

18. Yumanyi yimwatela kwila hakwila nawu mukatambwila wamwinu?

¹⁸ Neyi chitunahanjeki dehi, watela kufwila kutambwila wamwinu. Hakachi kayuma yiwatela kwila hikutaña Izu daNzambi nikutoñojokahu chikupu, kumulomba Yehova nikutoñojoka hayuma yayiwahi yakwililayi Yehova halweyi. Kwila iyi yuma kukukukwasha kutwalekahu kwikala nawubwambu wawuwahi naYehova. Chumichi, chikukukwasha kulejaku amakwawu yuma yimwakuhwelela.—Tañenu Masamu 73:28.

19. Muloñadi chichalemena kuzata nañovu kufwila kutambwila wamwinu?

¹⁹ Yesu wahosheli nindi: “Neyi muntu nakukeña kunlondela, yadibondi yomweni nakusenda mutondu windi wakuyandishila nawa yatwalekihu kunlondela.” (Mat. 16:24) Mwamweni, mukwaKristu wejima watela kwikala kambanji, watela kudihana nawa watela kupapatishewa. Hela chochu, kwenzununaña chiisu chankisu jajivulu katataka nihaya nyaaka mwituña dadiha daNzambi. Muloña wayumayi, twalekakuhu kufwila kutambwila wamwinu!