1, 2. Chumanyi chakamenañawu anvwali amakwawu neyi anyanawu anakukeña kudihana nikupapatishewa?

ATUDIZI aBayibolu amavulu adihanaña kudi Yehova nikupapatishewa. Hakachi kawu hadi atwansi avwalikila muchalala nawa anatondihu njila yayiwahi yawumi. (Mas. 1:1-3) Neyi mudi nvwali mukwaKrstu, chakadi nikujina mwatalilaña ifuku dakapapatishewayi mwanenu.—Esekejenu 3 Yowanu 4.

² Hela chochu, munateli kwakamena. Hadaha mwamonahu dehi atwansi amakwawu apapatisheweli ilaña akañanya kwovwahila nshimbi jaNzambi. Amavulu afumaña muchalala. Dichi, munateli kwakama nenu hadaha mwanenu hakusambila wukwikala mukwaKristu wamuwahi ilaña mukuhita kwampinji wukaleka kukeña chalala. Nateli kufwana chipompelu chamuEfwesesa chamumafuku awapostolu, chateneniyi Yesu nindi: “Wunaleki kukeña kuwadiña naku hakusambila.” (Chim. 2:4) Munateli kutondolwela ñahi chuma chamuchidiwu nikumukwasha yakuli  “nakushika kuwamwinu”? (1 Pet. 2:2) Hakwila nawu twakuli ilu lwihu, tuhanjekenu hachakutalilahu chaTimotewu.

3. (a) Mpinjinyi Timotewu yekaliliyi mukwaKristu, nawa welilidi nantañishilu yawakwaKristu? (b) Pawulu wamukonkomweneni Timotewu hayumanyi yisatu?

³ Timotewu watela wekalili mukwaKristu mu 47 C.E., hampinji yayiliyi kapostolu Pawulu nakuhempula Lisitira. Hela chakwila Timotewu haniyi mpinji wadiña kampululu, watela wadihanini chikupu. Chimwahitili yaaka yiyedi, watachikili kwenda naPawulu. Chimwahitili yaaka kwakwihi na 16, Pawulu wamusonekeleli Timotewu nindi: “Twalekakuhu kulondela yuma yiwadizili niyuma yakushinjililiwu yakukwashili kwitiya, muloña wuneluki antu akudizishili yumiyi nawa kufuma kuwukeki wuneluki nsona jajila [Nsona jachiHeberu], jinateli kukukojeja kwikala namaana, nawa awa maana akakukwasha kumona wamwinu kuhitila mukukuhwelela mudi Kristu Yesu.” (2 Tim. 3:14, 15) Talenu yuma yateneniyi Pawulu; (1) kwiluka nsona jajila, (2) kudiza yuma yakushinjililiwu yinateli kukukwasha kwitiya, ni (3) maana akakukwasha kumona wamwinu kuhitila mukukuhwelela mudi Kristu Yesu.

4. Yitwanyi yayiwahi yimwazatishaña hakudizisha anyanenu achidi atwansi? (Talenu mwevulu wakutachikilahu.)

⁴ Anvwali akwaKristu, mwanenu watela kwiluka chikupu nsona jajila, munabombeli Nsona jachiHeberu niNsona jawakwaKristu jachiGriki. Anyana akweti wuswa washiyashana mukudiza yuma, ilaña nimwana wanyana chikupu nateli kwiluka antu ninsañu yamuBayibolu. Kuloñesha kwaYehova kwaloñesha yitwa yayivulu yinateli kukwasha anvwali kudizisha anyanawu. Yitwanyi yimweluka yimukweti mwidimi denu? Anukenu nenu, kwiluka Nsona dikwaleteshaña muntu kwikala nawubwambu wakola naYehova.

5. (a) Mazu akwila nawu ‘kushinjila kwamukwashili kwitiya’ atalisha mudihi? (b) Tuneluki ñahi netu Timotewu amushinjilili kwitiya nsañu yayiwahi yaYesu?

⁵ Kwiluka nsona jajila kwalema. Hela chochu, chakeñekaña kuzata nañovu hakwila nawu mudizishi anyanemu yuma yakunama yakuspiritu chatela muyilejaña hohu antu ninsañu yamuBayibolu. Timotewu wadizili yuma ‘yamushinjililiwu yamukwashili kwitiya.’ MuchiGiriki, awa mazu atalishili “mukuleja” hela “kwiluka chikupu yuma nikuyikuhwelela nawu yalala chikupu.” Timotewu welukili Nsona jachiHeberu kufuma kuwukeki. Ilaña mpinji yimu wakuhweleleña chikupu chadiziliyi nsañu yamwekesheleña nawu Yesu wadiña Mesiya. Munjila yikwawu, chikuhwelelu chamukwashili kwiluka. Timotewu welukili chikupu nsañu yayiwahi chakwila wekalili kambanji wapapatishewa nawa watachikili kuzata mudimu wawumishonali naPawulu.

6. Munateli kuyishinjila ñahi anyanenu kulonda etiyi yuma yinakudizawu Mwizu daNzambi?

⁶ Munateli kushinjila ñahi anyanenu kulonda etiyi neyi chamushinjililiwu Timotewu? Chatachi, ikalenu adiwunjika. Chikuhwelelu bayi neyi chenzaña neyi muchilotaku; hela chinateli kusambukila anyanenu muloña wakwila enu ayishinjilili kulonda mwitiyiku. Mwana wejima watela kuzatisha ‘wuswa windi wakutoñojoka’ kulonda yakuhweleli chalala chamuBayibolu. (Tañenu Aroma 12:1.) Enu anvwali zatenu nañovu kulonda mudizishi mwanenu, sweje-e neyi nakwihula malwihu. Talenu chakutalilahu.

7, 8. (a) Tata yawantu wumu mukwaKristu wamwekeshaña ñahi kudiwunjika neyi nakudizisha mwanindi wamumbanda? (b) Mwadiwunjikaña ñahi hakudizisha anyanenu?

 ⁷ Thomas, wukweti mwana wamumbanda wudi nayaaka 11, wahosheli nindi: “Mwanami wehulaña nindi, ‘Komana Yehova wetejeli yuma yidileñi yayeni hakuleña wumi hamaseki? hela ‘Muloñadi chitwabulilaña kudibomba nawantu ejima—munsañu jakuvota kulonda tuwahishi yuma?’ Mpinji yikwawu nahudikilaña kulonda nibuli kumuleja ñakwilu yakutwamba. Bayi neyi chikuhwelelu chenzaña muloña wakwiluka yuma yamaneni kutalisha hachalalaku. Ilaña chenzaña kuhitila mukwiluka nsañu yanyanya yayivulu.”

⁸ Neyi chinashimuniyi Thomas, kudizisha kwakeñekaña kudiwunjika. Kafwampi, akwaKristu ejima atela kwikala adiwunjika. (Kol. 3:12) Thomas weluka nindi chakeñekaña mpinji yeneni nikuhanjeka kakavulu hakwila nawu mwana yadizi. Watela kuhanjeka namwanindi haNsona kulonda yamukwashi kukuhwelela nsañu yinakudizayi. Thomas wahosheli nindi, “Neyi tunakuhanjeka hayikuma yalema, ami niñodami twafwilaña kumukwasha mwanetu yakuhweleli chikupu yuma yitunakumudizisha nawa yimulumbulukili. Neyi yehula, twatiyaña kuwaha. Kuhosha hohu chalala, chankalilaña kwiluka nami nachitiyi neyi yabula kwihula malwihu.”

9. Munateli kuleja ñahi anyana Izu daNzambi?

⁹ Neyi anvwali adiwunjika hampinji yinakudizishawu, anyana akutachika kwiluka chovu-chovu “mwatalisha wihi, kuleha, chiminu nikukunama” kwachikuhwelelu. (Efwe. 3:18) Yidizishenu nsañu yinesekani nayaaka niwuswa wukwetiwu. Chakuhwelelawu yuma yinakudizawu, akutachika kulejaku akwawu yuma yadizawu, kubombelahu niakwawu akashikola. (1 Pet. 3:15) Chakutalilahu, komana anyanenu anateli kulumbulula chahosha Bayibolu kutalisha hakufwa? Komana atiyishisha chalumbulula Bayibolu? * Mwamweni, kuleja anyana Izu daNzambi kwakeñekaña kudiwunjika, ilaña twatela kuzata nañovu.—Kuhit. 6:6, 7.

10. Yumanyi yalema yimwatela kudizisha anyanenu?

¹⁰ Hela chochu, enu anvwali yenu mwatela kutachikilahu kumwekesha chikuhwelelu hakwila nawu mukwashi anyanenu. Stephanie, wudi nawanyana awambanda asatu, wahosheli nindi: “Hadiñawu atwansi, nadihwileña nami, ‘Komana nayilejaña anyanami chaletesha nikuhweleli nami Yehova wekalakwoku, wukweti kukeña nawa nshimbi jindi jajiwahi? Komana anyanami eluka chikupu nawu namukeña chikupu Yehova?’ Hinatela kukuhwelela anyana kuyishinjila henohu amaweni hinadishinjiliku.”

11, 12. Maana atalisha mudihi, nawa muloñadi chitukuhoshela netu bayi neyi yaaka diyaleteshaña muntu kwikala namaanaku?

¹¹ Neyi chitunadizi, Timotewu (1)  welukili Nsona nawa (2)  wakuhweleli chikupu yuma yadiziliyi. Hanu Pawulu watalishili mudihi chahosheliyi nindi nsona jajila jikumukwasha Timotewu kwikala ‘namaana akumukwasha kumona wamwinu’?

¹² Mukanda waInsight on the Scriptures, Volume 2, walumbulula nawu, muBayibolu, maana abombelamu “wuswa wakuzatisha kwiluka nikutiyishisha chikupu kulonda muntu yamanishi kukala, yatondolweli wubanji, yashikiji yuma yinafuukuliyi hela kufumba akwawu kwila mwomumu. Maana  ambukaku nawusupi.” Bayibolu yahosha nawu “wusupi awukasila mumuchima wakansi.” (Yish. 22:15) Kuhosha hohu chalala, maana—diwu amwekeshaña muntu nawu nakuli bayi wusupiku. Bayi neyi yaaka diyaleteshaña muntu kwikala wapama kuspirituku, ilaña kumwakama Yehova nikwovwahila nshimbi jindi dikwamwekeshaña muntu kupama.—Tañenu Masamu 111:10.

13. Kansi nateli kumwekesha ñahi nindi wukweti maana akumukwasha kumona wamwinu?

¹³ Atwansi apama chachiwahi kuspiritu, hiyayilelujolaña “kudi mpepela nimankanda” kuhitila mukufwila kwawu hela ikakeja dawakwawu atwansiku. (Efwe. 4:14) Ilaña, atwalekañahu kwikaka ‘nañovu jawu jakutoñojoka chiwahi jakwaambula yuma yayiwahi nayatama.’ (Heb. 5:14) Amwekeshaña nawu anakupama chikupu kuhitila mukufuukula chachiwahi—hela chakwila hiyadi nawanvwali jawu hela nawantu amakwawu apamaku. (Fwi. 2:12) Maana amuchidiwu akayikwasha kupuluka. (Tañenu Yishimu 24:14.) Munateli kukwasha ñahi anyanenu kwikala namaana amuchidiwu? Chatachi, yilejenu anyanenu chalumbuluka kulema kwayuma yekala muBayibolu. Nhoshelu yenu niyuma yimwelaña, yatela kumwekesha nawu ninenu mwalemesha yuma yalema yaMwizu daNzambi.—Rom. 2:21-23.

14, 15. (a) Kansi wunakufwila kupapatishewa watela kutoñojoka hayumanyi yalema? (b) Munateli kukwasha ñahi anyanenu kutoñojoka hayuma yayiwahi yafumaña mukwovwahila nshimbi jaNzambi?

¹⁴ Hela chochu, kudi yuma yayivulu yimwatela kwila, kubadika kuyileja hohu yuma yatama niyayiwahi. Mwatela cheñi kuyikwasha kutoñojoka hamalwihu adi neyi: ‘Muloñadi Bayibolu chiyakaanishila yuma yafwilaña mujimba? Yumanyi yanletesha nikuhweleli nami nshimbi jamuBayibolu jankwashaña mpinji yejima?’—Isa. 48:17, 18.

¹⁵ Mwana wunakukeña kupapatishewa mwatela kumukwasha kutoñojoka hachuma chikwawu—hanyidimu yenzaña hakwikala mukwaKristu. Kuwahanyi kwekalamu? Kukalanyi kwekalamu? Kuwaha kwafumañamu kunabadiki ñahi kukala kwafumañamu?  (Maku 10:29, 30) Iyi diyuma yamonañayi muntu wejima wunafumi nakupapatishewa. Dichi, muntu watela kutoñojokahu chikupu henohu kanda yafukuulihu kupapatishewa. Neyi muyileja anyanenu chichawahila kwovwahila niyuma yatama yafumaña mukubula kwovwahila, awenawu akwikala nachikuhwelelu. Akukuhweleladi? Akukuhwelela nawu nshimbi jamuBayibolu jaloña mpinji yejima.—Kuhit. 30:19, 20.

16. Anvwali atela kwiladi neyi mwanawu wapapatishewa yatachika kujinooka yuma yakuhwelelayi?

¹⁶ Mukwila ñahi neyi mwanenu yatachika kujinooka hanyima yakupapatishewa? Chakutalilahu, kampululu wapapatishewa nateli kutachika kukumbwa yuma yamukaayi hela nateli kutachika kujinooka yishina yamuBayibolu. (Mas. 73:1-3, 12, 13) Enu anvwali, anukenu nenu njila yimukumukwashilamu mwanenu kubula kujinooka yikumukwasha kwikala nachikuhwelelu hela kubula kwikala nachikuhwelelu. Bayi muditadikisha namwanenu haniyi nsañuku, hela chakwila wuchidi kansi hela nashikiji dehi yaaka yawukampululu. Mwatela kumukwasha munjila yakukeña nikumukwasha kulonda yatiyishishi.

17, 18. Neyi kansi natachiki kujinooka, anvwali anateli kumukwasha ñahi?

¹⁷ Kansi chapapatishewayi, dikwila nawu nadihani kudi Yehova. Kudihana hikumukana Nzambi nawu wukumukeñaña nikutwamijaku nkeñelu yindi muyuma yejima. (Tañenu Maku 12:30.) Yehova wakeñaña nindi tushikijeña mutunakani nawa muntu wunakani niyena watela kuzata nañovu kwilamu. (Mukwa. 5:4, 5) Mwanukishenuña mwanenu yumiyi hampinji yatelela nawa munjila yayiwahi. Hela chochu, henohu kanda mumuleji, mwatela kuzatisha yitwa yamukuloñesha kwaYehova yaloñeshelawu anvwali. Neyi mwila mwenimu anyanenu akumona kulema ninkisu yakudihana kudi Yehova nikupapatishewa nakwikala mukwaKristu.

¹⁸ Chakutalilahu, munateli kuwana nsañu yikwawu yinateli kuyikwasha muapendikisi yinakwila nawu “Questions Parents Ask,” yekala kunyima yamukanda waQuestions Young People Ask—Answers That Work, Volume 1. wahosha nawu: “Bayi munyakala kuhosha nenu mwanenu nafumi muchalalaku. Kakavulu, kukala kunamoniyi dikunaleteshi.” Hekwawu ikakeja dawakwawu. Hadaha nakutiya wuudi hela nakumona nindi akwawu atwansi akwaKristu anakupaminaku yena nehi. Iyi apendikisi yatwalekahu nawu, “chasweja kulema, yuma yamuchidiwu bayi neyi yamwekeshaña nawu wunafumi dehi muchalalaku. Kumona kukala kwakuvulu hakapinji kantesha kunateli kuzeyesha chikuhwelelu cheyi.” Nawa apendikisi yashimuna yuma yayivulu yatela kwilayi nvwali mukwaKristu hakukwasha kampululu wunakujinooka.

19. Anvwali anateli kukwasha ñahi anyanawu kwikala ‘namaana akuyikwasha kumona wamwinu’?

¹⁹ Enu avnwali, ilukenu nenu mukweti mudimu weneni, nawa yenu mwatela kukulisha anyanenu kuhitila “mukuyifumba nikuyikonkomwena kwesekeja nachakeñañayi Yehova.” (Efwe. 6: 4) Neyi chitunahanjekihu dehi, chumichi chakeñekaña kuyidizisha chahosha Bayibolu nikuyikwasha kukuhwelela nsañu yinakudizawu. Mwamweni, atela kwikala nachikuhwelelu chakola chikupu chikuyiletesha adihani aweni kudi Yehova nikumukalakela namuchima wejima. Tunakuhweleli netu Izu daYehova, spiritu yindi nikuzata kwenu nañovu kukuyikwasha enu anvwali kukwasha anyanenu kwikala ‘namaana akuyikwasha kumona wamwinu.’