1-3. (a) Chumanyi chikwawu chitwatela kukuhwelela kubombela hayuma yitwakuhwelela? (b) Muloñadi kusañuka chikwalemena? (Talenu mwevulu wakutachikilahu.)

NEYI muntu yayihula nindi, ‘Chikuhwelelu chenu chashindamena hanka?’ mukwakula nenudi? Chakadi nikujina mukuhosha nenu mwakuhwelela nenu Yehova diyi Nleñi nawa Mukwakuhana Wumi. Mukuhosha cheñi hayuma yimwakuhwelela hadi Yesu Kristu, wafwili neyi ifutu danyiloña. Nawa mukuhosha namuzañalu haparadisa yakumbidi, mwakashakamaña antu jaNzambi haya nyaaka. Komana mukuhosha cheñi nenu chikuhwelelu chenu chashindamena chikupu hakusañuka?

² Kudi yuma yikuletesha tuhoshi netu kusañuka kwakekalaku hela chakwila etu twachiñejaña kupuluka halukadi lwasweja nikushakama hamaseki haya nyaaka. Kapostolu Pawulu washimwini chaletesha chikuhwelelu chetu chishindameni hakusañuka, nindi: “Neyi kwosi kusañuka kwawafu, komana dikwila nawu Kristu amusañula wanyi.” Neyi Kristu amusañwili wanyi, wadi kwikala wanyi Mwanta wetu nawa ntañishilu yetu yakwila nawu Kristu nakuyuula yadi kwikala yamukunkulwayi. (Tañenu 1 Akorinda 15:12-19.) Ilaña, tweluka netu Yesu amusañwili. Ichi chikuhwelelu chaletesha twambuki nawaSadusi aYudeya, akaanineña nawu afu hiyasañukañaku. Hela chakwila anakutuyandisha,  twatwalekañahu kukuhwelelela mukusañuka.—Maku 12:18; Yilw. 4:2, 3; 17:32; 23:6-8.

³ Pawulu chasonekeliyi hantañishilu “yatachi yahosha hadi Kristu” wabombelelihu “nintañishilu . . . yakusañuka kwawafu.” (Heb. 6:1, 2) Nawa Pawulu wamwekesheli chikupu nindi wakuhweleleli mukusañuka. (Yilw. 24:10, 15, 24, 25) Ilaña, chineli kusañuka kudi hakachi kantañishilu yetu, hela netu “yuma yakutachikilahu yansañu yajila yaNzambi,” bayi neyi chinayi mukwila nawu hintañishilu yapelaku. (Heb. 5:12) Tunahoshelidi mwenimu?

4. Malwinhwinyi ehulañawu antu kutalisha hakusañuka?

⁴ Neyi antu anakutachika kudiza Bayibolu, amavulu atañaña nsañu yakusañuka yamwekeni kunyima, yidi neyi yaLazaru. Nawa adizaña nawu Abarahama, Yoba niDanyeli akuhweleleli chikupu nawu kumbidi afu akasañuka. Hela chochu, munateli kwakula nenudi neyi ayihula nawu mushimuni wunsahu wamwekeshaña nawu yikaninu yakusañuka yashikijewaña neyi munahiti yaaka yayivulu kufuma hayikaniniwu? Nawa Bayibolu mwalala yashimuna mpinji yakekalaku kusañuka? Twatela kwiluka ñakwilu yanawa malwihu hakwila nawu twikali nachikuhwelelu chakola, dichi lekenu tuhanjeki chahosha Nsona.

5. Tukusambila kuhanjeka hakusañuka kwamuchidinyi?

⁵ Chakala nankashi kufwikija kusañula muntu wunafwi katataka. (Yow. 11:11; Yilw. 20:9, 10) Indi kukuhwelela nawu muntu wunafwi katataka akamusañula kumbidi neyi munahiti dehi yaaka yayivulu? Komana mukukuhwelela chikaninu chamudiwu chikashimbula, chamuntu wunafwi katataka hela muntu wafwili dehi? Kudi chikaninu chakusañuka chakaniniwu dehi chashikijeweli nawa mwachikuhwelela. Munjilanyi? Chinateli kuyikwasha ñahi kwiluka yuma yikamwekana kumbidi kutalisha hakusañuka?

6. Yesu washikijili ñahi Isamu 118?

⁶ Kutalisha hakusañuka kwakaniniwu dehi kunyima, toñojokenu mazu ekala Mwisamu 118, dahoshañawu antu amakwawu nawu Davidi diyi wadisonekeli. Mwekala mazu akulemba akwila nawu: “Atwamwini tunalembi, eyi Yehova . . . Kisu kisu yenowu wukwinza mwijina daYehova.” Hadaha munakwanuka nenu antu ahosheli awa mazu ahosha hadi Mesiya hampinji yakandaminiyi Yesu hachimbulu nakuya muYerusalema haNisani 9, kukamwihi nakufwa kwindi. (Mas. 118:25, 26; Mat. 21:7-9) Hanu Isamu 118 dateneneña ñahi hakusañuka kukamwekana neyi munahiti dehi yaaka? Talenu cheñi idi isamu chidaprofweteli: “Ilola dalekeli antuñi dinabalumuki dehi himutu wakwiwombu.”—Mas. 118:22.

7. A Yudeya amukaanini ñahi Yesu?

⁷ “Antuñi,” hela netu anlomboli awaYudeya, amukaanini Mesiya. Amukaanini Yesu nawu hidiyi Kristuku. Nawa aYudeya amavulu amukaanini chakwila abidikileña nawu amujahi. (Luka 23:18-23) Mwamweni, diwu aletesheli Yesu amujaheña.

8. Yesu wekalili ñahi “ilola damwiwombu dahewulu”?

⁸ Neyi Yesu amudiwili nikumujaha, hanu wekalili ñahi “ilola damwiwombu dahewulu”? Chumichi chadi kumwekana chiña hohu neyi amusañula nakuhanda cheñi. Yesu yomweni washimwini nindi akamukaana. Waheni chishimu mwadiña andimi elili chatama antemesha jamwiniitempa, neyi aIsarela chakabishiliwu atuprofwetu atemesheleliwu kudi Nzambi. Nkumininaku, mwiniitempa watemesheli mwanindi wasweja kukeñayi nawa nswana. Komana amutambwilili? Akayi mwani. Andimi amwilili chatama chakwila amujahili. Kufumahu, Yesu wakunkulwili chishimu chindi namazu awuprofwetu  ekala haMasamu 118:22. (Luka 20:9-17) Kapostolu Petulu wahosheli mazu wowamu hampinji yahosheleñayi “nawanyuuli [jawaYudeya], akulumpi niansoneki apompeli hamu muYerusalema.” Wahosheli nindi: “Yesu Kristu wakuNazareta, owu imwajahilili hamutondu ilaña asañwiliwu kudi Nzambi kufuma mudi afu.” Hohenohu, Petulu wahosheli chakubula kuhita mumbadi nindi: “Diyi ‘ilola dimwadiwili enu akwakutuña, dinekali dehi ilola damwiwombu dahewulu.’”—Yilw. 3:15; 4:5-11; 1 Pet. 2:5-7.

9. Masamu 118:22 yashimuna hachumanyi chachiwahi?

⁹ Mwamweni, henohu kuchidi yaaka yayivulu, mazu awuprofwetu ekala haMasamu 118:22 amwekesheli nawu kusañuka kukashikijewa. Mesiya akamukaana nikumujaha, ilaña akamusañula cheñi nakwikala ilola damwiwombu dahewulu. Iwu Mwana asañwiliwu wekalili muntu wukweti ijina “mukachi kawantu mutunateli kuwana wamwinu.”—Yilw. 4:12; Efwe. 1:20.

10. (a) Masamu 16:10 yashimwineñahu dehi nawudi? (b) Tukuhosheladi netu Masamu 16:10 yateneneña wanyi Davidi?

¹⁰ Tuhanjekenu cheñi havasi yikwawu yahosha hakusañuka. Iyi vasi ayisonekeli makombakaji ayaaka henohu kanda yishikijewi, nawa chumichi chikuyikwasha mukuhweleli nenu kusañuka kunateli kwikalaku neyi munahiti dehi yaaka kufuma hakwikaniniwu. Mwisamu 16, dasonekeliwu kudi Davidi, twatañañamu nawu: “Hiwakanshiya mukaluñaku; hela kumwiteja weyi wajila kumona kutokaku.” (Mas. 16:10) Davidi watalishilli wanyi mukwila nindi hakafwaku hela wakaya wanyi mwijamu mwayañawu ejima. Izu daNzambi dashimuna hatooka nawu Davidi washinakajili. Chelili nafwi dehi, “wakamini nawankakulula jindi amujiikili mumukala waDavidi.” (1 Anya. 2:1, 10) Hanu dinu Masamu 16:10 yateneneña hinyi?

11. Mpinjinyi yahosheliyi Petulu kutalisha haMasamu 16:10?

¹¹ Tweluka muntu ateneneñawu muniyi vasi. Chimwahitili yaaka kubadika ikombakaji dimu kufuma hasonekeliwu idi isamu nawa chimwahitili nyilungu kufuma hamusañwiliwu Yesu, Petulu wahosheli haMasamu 16:10 kudi aYudeya niantu ekalili aYudeya. (Tañenu Yilwilu 2:29-32.) Wahosheli nindi Davidi wafwili nawa amujiikili. Antu atiyili chahosheleñayi Petulu elukili chumichi. Nawa iyi nsañu yamwekeshaña wanyi nawu kwadiña muntu wumu hakachi kawu wamutadikili Petulu chahosheliyi nindi Davidi “welukilili chadimu kusañuka” kwaMesiya.

12. Masamu 16:10 yashikijeweli munjilanyi, nawa yamwekeshaña chumanyi kutalisha hachikaninu chakusañuka?

¹² Petulu wakolesheli chikuma chindi kuhitila mukuhosha mazu ahosheliyi Davidi haMasamu 110:1. (Tañenu Yilwilu 2:33-36.) Chahosheliyi Petulu kuzatisha Nsona chakwashili izaza dawantu kwiluka nawu Yesu wadiña “Mwanta niKristu.” Sweje-e dinu, antu elukili nawu Masamu 16:10 yashikijeweli hampinji yamusañwiliwu Yesu mudi afu. Chimwahitili mpinji, kapostolu Pawulu wahosheli hansañu yahosheliyi Petulu hampinji yahosheleñayi nawaYudeya mumusumba waAntiyoki kuPisidiya. Nsañu yahosheliyi yayitiyishili kuwaha nawa akeñeleña kutiya nsañu yayivulu. (Tañenu Yilwilu 13:32-37, 42.) Ninetu twatela kutiya kuwaha nsañu yakwila nawu wuprofwetu wamuBayibolu wahosha hakusañuka washikijeweli hela chakwila mwahitili yaaka yayivulu kufuma hawukaniniwu.

13. Antu anateli kutoñojoka nawudi kutalisha hakusañuka?

¹³ Twatela kukolelaku neyi twiluka netu kusañuka kunateli kwikalaku hela chakwila  munahiti yaaka yayivulu kufuma hakwikaniniwu. Hela chochu, muntu nateli kutoñojoka nindi: ‘Komana natela kuhembelela mpinji yayilehi hakwila nawu nakamumoni muntu inakeña? Kusañuka kunachiñejaña kwakekalaku mpinjinyi?’ Yesu walejeli apostolu indi nindi kudi yuma yateleleliwu kwiluka niyateleleliwu kubula kwiluka. Kwiluka “mpinji hela yilaaka, jenwenu wanyi, ilaña Tata wekala mwiwulu diyi wukweti wuswa wakushimuna mpinji yakamwekenamu yumiyi.” (Yilw. 1:6, 7; Yow. 16:12) Hela chochu, chumichi chinayi wanyi mukwila nawu hitunateli kwiluka mpinji yakekalaku kusañukaku.

14. Kusañuka kwaYesu kwambukili ñahi nakwawantu asañwiliwu henohu yena kanda?

¹⁴ Hakwila tutiyishishi, tuhanjekenu hakusañuka kwashimunawu muBayibolu. Kusañuka kwasweja kulema, hikusañuka kwaYesu. Neyi amusañwili wanyi, hitwadi kwikala nakuchiñeja kwakumona cheñi antu itwakeña afwa dehiku. Antu asañwiliwu henohu Yesu kanda, adi neyi asañwiliwu kudi Elija niElisha, hiyatwalekelihu kuhandaku. Afwili cheñi nawa atokeli. Kwambukaku, Yesu “amusañula dehi kufuma mudi afu, wakafwa cheñi wanyi; kufwa hikukweti cheñi wanta hadi yenaku.” Mwiwulu mwadiyi, washakamaña “haya nyaaka nanyaaka” chakubula kutoka.—Rom. 6:9; Chim. 1:5, 18; Kol. 1:18; 1 Pet. 3:18.

15. Muloñadi chichalemena Yesu kwikala “nyikabu yatachi”?

¹⁵ Kusañuka kwaYesu dikwadiña kwatachi muyina njila nawa dikusañuka kwatachi kwalema. (Yilw. 26:23) Hela chochu, hidiyi hohu akaniniwu kusañuka nakuya kwiwulu neyi chileñaleña wakuspirituku. Yesu walejeli apostolu indi ashinshika nindi akayuula hamu nindi mwiwulu. (Luka 22:28-30) Hakwila nawu atambwili iyi nkisu, atela kusambila kufwa. Kuhiñahu dinu, hiyakuyisañula namujimba waspiritu, neyi chamwililiwu Kristu. Pawulu wasonekeli nindi “Kristu amusañula kufuma mudi afu, dichi yena diyi mukabu watachi wanowu anaholokeli mutulu twakufwa.” Pawulu wamwekesheli cheñi nindi kudi amakwawu akasañuka nakuya mwiwulu chahosheliyi nindi: “Muntu-himuntu akamusañula kwesekeja nandonda yindi: Kristu diyi nyikabu yatachi, kuhiñahu antu jaKristu akayisañula hampinji yakwikalahu kwindi.”—1 Kor. 15:20, 23.

16. Chumanyi chatukwashaña kwiluka mpinji yakusañuka kwakuya mwiwulu?

¹⁶ Iyi nsañu yinatukwashi kwiluka mpinji yekalañaku kusañuka kwakuya mwiwulu. Kwakekalaku “hampinji yakwikalahu kwindi.” A Yinsahu jaYehova ashimunaña kushindamena haNsona nawu kufuma mu 1914, tunakushakama mumpinji yateneniyi Yesu nindi “kwikalahu kwindi.” Kwikalahu kwindi kunatwalekihu, nawa kukuma  kwanshakaminu yamakonu kudi mukamwihi chikupu.

17, 18. Chumanyi chikayimwekena awayishewa amakwawu hampinji yakwikalahu kwaKristu?

¹⁷ Bayibolu yashimuna cheñi kutalisha hakusañuka kwakuya mwiwulu nawu: “Tunakukeña mwiluki hansañu yawantu akaama mutulu twakufwa, . . . Muloña neyi twakuhwelela netu Yesu wafwili nawa amusañwili, dikwila nawu niantu akaama mutulu twakufwa . . . Etu amomi anakuhanda kushika nihampinji yakwikalahu kwaMwanta, hitwakatwaminañahu dehi kumbidi kubadika antu akaama mutulu twakufwaku; muloña Mwanta yomweni wakafuma mwiwulu namutambi wañovu, . . . nawa antu afwila mudi Kristu, diwu akasambila kusañuka. Kuhiñahu dinu, etu amomi tuchidi nakuhanda, tukaya nawu hamu mumavu nakudibulakana naMwanta muluzwizu; twakekalaña hamu naMwanta mpinji yejima.”—1 Tes. 4:13-17.

¹⁸ Kusañuka kwatachi kukekalaku neyi “kwikalahu” kwaKristu kunatachiki dehi. Awayishewa amomi akekalaku hampinji yalukadi lwasweja ‘akaya mumavu.’ Owu ‘akaya mumavu’ ‘hiyakakaama mutulu twakufwaku,’ munjila yikwawu hiyakafwa hadi mpinji yayilehiku. Ilaña wejima wawu akayihimpa, “mukapinji kantesha, mukulabula kwadisu, hampinji yakavuma mpuña yakukumishaku.”—1 Kor. 15:51, 52; Mat. 24:31

19. Kusañukanyi “kwabadika kuwaha” kudi hambidi?

¹⁹ Makonu, akwaKristu amavulu ashinshika awayishewa wanyi nawa ayitambika wanyi kuya nakukalakala naKristu mwiwulu. Ilaña, anakuhembelela kukuma kwashakaminu yatama yamakonu ‘hefuku daYehova.’ Kwosi muntu weluka mpinji yaniku kukuma, ilaña yuma yinakumwekesha nawu kudi mukamwihi. (1 Tes. 5:1-3) Kuhiñahu, kwakekala kusañuka kukwawu, kusañuka kwakushakama muparadisa hamaseki. Antu akasañulawu akachiñejaña kwikala awanina nawa hiyakafwa nawa cheñiku. Iku ‘kusañuka kwakawaha’ kubadika kwawantu asañwiliwu kunyima hampinji yelili “ambanda atambwilili antaña jawu afwili asañwiliwu” afwi cheñi mukuhita kwampinji.—Heb. 11:35.

20. Tuneluki ñahi netu kusañuka kwakekala mundonda?

²⁰ Bayibolu yahosha kutalisha hakusañuka kwakuya mwiwulu nawu “muntu-himuntu akamusañula kwesekeja nandonda yindi.” (1 Kor. 15:23) Tunakuhweleli netu kusañuka kwahamaseki nikwena kwakekala mundonda. Iku kuchiñeja kwakuwahi nankashi. Komana antu afwa katataka akayisañula kukamwihi nakutachika kwaChiyuulu chaKristu Chekombakaji daYaaka kulonda akayisambilileña kudi antu ayikeña? Komana amayala ashinshika akunyima adiña nakulombola akasañukañahu dehi kulonda akalomboleña antu jaNzambi mwituña dadiha? Indi antu abulili kumukalakela Yehova? Akayisañula mpinjinyi nawa akasañukila kudihi? Tunateli kwihula malwihu amavulu chikupu. Ilaña, kuhosha hohu chalala, komana yinu mpinji diyi twatela kutoñojoka hansañu yamuchidiwu? Kwila tudiwunjika nakuhembelela nehi? Tunakuhweleli netu twakatiya kuwaha chikupu kumona Yehova chakelañayi yumiyi.

21. Yumanyi yimwachiñejaña kutalisha hakusañuka?

²¹ Chayinu mpinji, twatela kumukuhwelela chikupu Yehova, watuleja kuhitila mudi Yesu nindi afu anukañayi Nzambi akayisañuka. (Yow. 5:28, 29; 11:23) Hakwila yamwekeshi nindi Yehova wukweti ñovu yakusañula afu, Yesu wahosheli nindi Abarahama, Isaka niYakoba “ejima wawu amomi.” (Luka 20:37, 38) Chayinu mpinji, tukweti wunsahu wawuwahi wukuletesha tuhoshi neyi chahosheli Pawulu nindi: “Nachiñejaña mudi Nzambi . . . nami kwamba kekala kusañuka.”—Yilw. 24:15.