Chumanyi chaletesheli anhañi? Tali niyileji chichadiña. Navwalikilili haJuly 29, 1929, nawa nakulilili mumukala mumusumba waBulacan muPhilippines. Twashakamineña chihandilu chakadi yuma muloña mwadiña maheta antesha. Njita yatachikili hinadiña kansi. Mashidika akuJapan alukukili ituña daPhilippines. Hela chochu, twashakamineña mwamweni mucholoku, dichi etu atulukilili wanyi kudi mashidika. Twadiña wanyi namawayilesi, maTV niyipapilu yansañu, dichi twatiyileña nsañu yanjita kudi antu hohu.

Twadiña anyaana 8 nawa yami wadiña chilondela wedi, hinadiña nayaaka 8 ankaka ansendeli nawu nishakameña nawu. Hela chakwila twadiña aKatolika, aNkaka awamayala atambwileña nyikanda yamboka-mboka yayinkeleñawu kudi amambwambu jawu. Nanukaña anlejeliku nyikanda yahosheleña nawu Protection, Safety, niUncoverd mwidimi daTagalog, * nawa anlejeli niBayibolu. Natiyileña kuwaha kutaña Bayibolu, sweje-e nyikanda yiwana yaNsañu Yayiwahi. Chumichi chankwashili kufwila kumulondela Yesu.—Yow. 10:27.

Njita yaminini mu 1945. Haniyi mpinji, anvwali anlejeli nawu nifunti kwitala. Nawa ankaka awamayala añitejeli nawu niyi. Dichi nafuntili kwitala.

Chimwahitili mafuku antesha, muDecember 1945, izanvu dawaYinsahu jaYehova denjili nakushimwina mumukala wetu kufuma mumbaka yaAngat. Chinsahu wumu wachikulumpi wenjili kwitala nawa walumbulwili chahosha Bayibolu kutalisha ‘hamafuku akukuminina.’ (2 Tim. 3:1-5) Watutambikili kuya nakudiza Bayibolu kumukala wadiña mukamwihi. Anvwali jami ayiliku wanyi, ilaña ami nayili. Kwenjili antu 20, nawa amakwawu enhwileña malwihu akula Bayibolu.

Natiyishishileña wanyi chatañisheleñawu, dichi nakeñeli nami nifumihu. Ilaña atachikili kwimba tumina twaWanta. Kamina kembileñawu kantiyishili  kuwaha, dichi nashakamini. Hanyima yakwimba nikulomba, wejima wetu atulejeli nawu twakayi nakupompa haMulungu kuAngat.

Etu amavulu twendeli makilomita 8 kuya nakupompa mwitala daCruz. Natiyili kuwaha chakwila niatwansi adiña hakachi kawantu 50 apompeli niwena akwileñahu nsañu yamuBayibolu. Hanyima yakuya nakupompa kakavulu, Manakwetu Damian Santos, payiniya wachikulumpi, wadiña mukulumpi waboma wanlejeli kuya nakukaama kwitala dindi. Twahanjekeleña nsañu yamuBayibolu kushika nimukachi kawufuku.

Munana mafuku, etu amavulu twelukili swayi chalala chamuBayibolu. Hanyima yakuya kakupompa mafuku antesha, amanakwetu atwihwili nawu, “Munakukeña kupapatishewa?” Nakwili nami, “Eña inakukeña.” Nakeñeleña ‘kukalakela Mwanta, Kristu.” (Kol. 3:24) Twayili kukaloña kadiña mukamwihi, nawa etu ayedi twapapatisheweli haFebruary 15, 1946.

Twelukili netu, mukwaKristu wejima watela kushimwina mpinji yejima hakumwimbujola Yesu. Chinatachikili kushimwina atata atiyili kutama, nawa ahosheli nawu, “Wuchidi kansi eyi, kwila wuya nakushimwina nehi. Nawa, chakujimikawu mumenji bayi neyi chinayi mukwila nawu watela kushimwinaku.” Nayilumbulwilili nami, hinkeñelu yaNzambi yakushimwina nsañu yayiwahi yaWanta waNzambi. (Mat. 24:14) Nayilejeli cheñi nami, “Natela kwila munamukanini Nzambi.” Dihafumini atata kuhosha mazu inatena hakusambila. Mwamweni, akeñeleña nawu nileki kushimwina. Dichaletesheli ami nishiyi katachi yuma yakumujimba nakutachika kufwila yuma yakuspiritu.

Chisaka chawaCruz chantambikili kushakama nawu muAngat. Atukolesheli hamu nakabinda kawu wamumbanda, Nora, kusonekesha wupayiniya. Wejima wetu twatachikili mudimu wawupayiniya haNovember 1, 1947. Nora wayili nakukalakela mumbaka yacheñi, ilaña ami natwalekelihu kushimwina muAngat.

Chinashikijili yaaka yisatu muwupayiniya, manakwetu wafumini kukasanji kamutayi, Earl Stewart, wahanini mpanji kudi antu 500 muAngat. Wahanini mpanji muChizungu, nawa chimwahitili mpinji nalumbulwili mpanji yindi mwidimi daTagalog. Nakuminini hohu mumañu 7 nawa antañishi yetu azatishileña hohu Chizungu. Chuma chikwawu chankwashili kwiluka Chizungu twadiña nanyikanda yashindamena haBayibolu mwidimi daTagalog. Dichi yayivulu nayidizili yejima muChizungu. Iyi nyikanda yayivulu yaChizungu yinatañileña diyakwanshili kulumbulula iyi mpanji nimpanji jikwawu.

Ifuku dinalumbulwili mpanji yaManakwetu Stewart, walejeli chipompelu nindi kasanji kamutayi kanakukeña manakwetu payiniya wumu hela ayedi kuya kuBeteli. Ayileña nakukwasha muloña amishonali ayileña kukupompa kwaTheocracy’s Increase Assembly muNew York, U.S.A. Ninami antambikili kuBeteli. Cheñi nashiyili iluña dinelukili chikupu, nayili nakukalakela kuBeteli.

Nashikili muBeteli ha June 19, 1950. Beteli yadiña yeneni, yadiña mwitala dayaaka danyeñumukiliwu nanyitondu yamaneni hadi hekita yimu. Amanakwetu ajiki 12 azatileña henaha. Chikwachili nantetemena, nayili nakuzatila kuchinsambu. Chiyashikili 9 koloku, nayili nakuzatila kwakukosela yakuvwala nawa nazatileña mudimu wakuchisa. Namwaana natwalekelihu kuzata nyidimu yoyimu. Hanyima yakwila amishonali anafunti dehi kukupompa kwayiliwu, natwalekelihu kukalakela haBeteli. Nazatileña mudimu wejima wanyinkeleñawu, nashileña magazini mujibokisi kulonda ayitemeshi, kutala janyisonku nawa nadiña mukwakutambwila enyi nijinshiña.

Mu 1952, antambikili kuShikola yaGileyadi yanamba 20 hamu nawamanakwetu 6 amuPhilippines. Yuma yayivulu yitwamweni niyitwelileña muUnited States twadiña twayinjilila wanyi. Mwamweni, yadiña yambukaku chikupu nayuma yinelukili hinadiña kumukala wetu.

Chakutalilahu, twadizili kuzatisha yuma yazatikaña namalayiti yitwabulili kwiluka. Nawa, kwadiña kutuuta nankashi. Ifuku dimu nantetemena  chinedikili hanji hejima hadiña hohu too-o. Dikadiña katachi kumona nvula yachishika yitooka. Dichi kwadiña kutuuta nankashi.

Hela chochu, yuma yejimiyi yankañesheli wanyi kudiluñisha yuma yayiwahi yinadizili kuGileyadi. Antu adiña nakutudizisha, azatishileña njila yapela hakutudizisha. Twadizili chakusandujola chiwahi nichakudiza. Yuma yinadizili kuGeleyadi yankwashili kwikala muntu wanha kuspiritu.

Chitwamanishili shikola, antemesheli kwikala payiniya wadimena hakapinji kantesha muBronx muNew York City. Dichi muJuly 1953, nayili kukupompa kwaNew World Society Assembly, kwadiña mumbaka yikwawu yaBronx. Chitwamanishili kupompa, nafuntili nakukalakela ku Philippines.

Amanakwetu amukomiti yamutayi anlejili nawu, “Ichi wunakuya nakuzata mudimu wawunkoñi wañinza.” Iwu mudimu wadi kunkwasha kulondela mumahanji aMwanta, wayileña mujimbaka nimunyisumba nakukwasha nyikoku yaYehova. (1 Pet. 2:21) Antemesheli muñinza yadiña neluña deneni mucentral Luzon, chitutu cheneni muPhilippines. Mwadiña maluña adi neyi Bulacan, Nueva, Ecija, Tarlac niZambales. Nahitileña muMpidi yaSierra Madre hakwila nawu niyi mujimbaka jikwawu. Kwayileña wanyi mabasi, dichi namunlombeli ñendeshi watraki kulonda nikandami hewulu damatimba adiña mutraki. Kakavulu añitejeleña, ilaña mwadiña mwamuwahi wanyi kwendelamu.

Yipompelu yayivulu yadiña nawantu antesha nawa yayiha. Dichi amanakwetu atiyileña kuwaha chinayikwashileña kuloñesha chiwahi kupompa nimudimu wakushimwina.

Kuhiñahu antemesheli kuya nakukalakela mwiluña daBicol dejima. Munidi iluña aYinsahu adiña kanda ashikeñamu dehi, dichi apayiniya adimena diwu atachikili kuya nakushimwinamu. Hamukala wumu, hadiña chimbusu chadiña nawina wanyitondu yiyedi hohu hakachi. Chinadatili haniyi nyitondu, yakotokeli nawa ninami naholokelelimu. Hahitili mpinji hakwila nawu nidiwahishi kulonda nidawuli.

Natachikili kwanuka Nora, wazatilileña wupayina muBulacan. Haniyi mpinji, wadiña payiniya wadimena muDumaguete City, nawa nayili nakumuhempula. Kufumahu, twatachikili kudiluka nawa twadisumbwili mu 1956. Mulungu watachi kufuma hitwadisumbwili, twendeleli chipompelu chahachitutu chaRapu Rapu. Twakandokeleña jimpidi nikwenda maluña amalehi, twatiyili kuwaha kuzata namwini kwami kukalakela amanakwetu ashakamineña kumaluña akwakulehi.

Hanyima yakukalakela hamu kwakwihi nayaaka yiwana, atutambikili kuya nakukalakela hakasanji kamutayi. Dichi, twatachikili kukalakela haBeteli muJanuary 1960. Hadi yaaka yayivulu yinahitihu, nadizilili kudi amanakwetu akalakalaña mukometi yakasanji kamutayi, nawa Nora nakalakali nyidimu yayivulu muBeteli.

HaBeteli, namoni mudimu wakushimwina chiwunayiliku hambidi muPhilippines. Mwituña dejima mwadiña akwakushimwina 10,000 hampinji yinenjili muBeteli hinadiña kansi. Ilaña chayinu mpinji, muPhilippines mudi akwakushimwina kubadika ha 200,000 nawa haBeteli hadi antu 435 anakukwasha mudimu wakushimwina.

Mudimu chiwatachikili kuyilaku hambidi, Beteli yakeheli. Dichi, Izanvu Dalombolaña datulejeli kukeña iluña hakutuña Beteli yeneni. Ami ninkoñi watalaña mudimu wakupulinta twayili kwitala nikwitala nakwihujola kwiluña kwashakamineñawu maChinese neyi kudi wunakulandisha iluña dindi. Kwosi walandishileña, ilaña muntu wumu watulejeli nindi: “MaChinese alandishaña wanyi, ilaña twalandaña hohu.”

Hela chochu, ifuku dimu, muntu wumu wabuukilileña kuUnited States, dichi watwihwili neyi tunateli kulanda iluña dindi. Watwenzunwinini njila yakulandilamu maluña amakwawu. Ntuñi nindi mukwawu niyena watulandishili iluña dindi nawa walejeli akwawu niwena kulandisha. Twalandili niiluña damuntu watulejeli nindi “maChinese alandishaña wanyi.” Mukapinji kantesha hohu, iluña ditwalandili dabadikili iluña dakasanji kapampa kasatu. Neluki nami Yehova Nzambi wakeñeleña nindi tulandi iluña damuchidiwu.

Mu 1950, yami nadiña kansi muchisaka chaBeteli. Ilaña chayinu mpinji, ami namwinikwami yetu akulumpi muchisaka chaBeteli. Naditoñeshaña wanyi kulondela mwanlejelañayi Mwanta wami nindi ilaku. Hela chakwila anvwali jami anhañili hetala, ilaña Yehova nanyinki chisaka cheneni chawakwetu akwakwitiya. Nakuhweleli chikupu nami Yehova watwinkaña yuma yejima yitwakeñaña, hichikweti muloña namudimu wunakwinkiwuku. Ami naNora tunakumusakilila Yehova hakutukwasha nawa tunakukolesha antu ejima netu amutompi Yehova.—Mal. 3:10.

Mpinji yimu, Yesu watambikili mukwakutambula nyinsoku Matewu Levi nindi: “Ikalaku mukwakunlondela.” Welili ñahi? “Chashiyiliyi yuma yejima, wanyamukili nakutachika kumulondela.” (Luka 5:27, 28) Ninami dichinelili, nawa inakukolesha ejima kwila mwomumu nawa akutambwila nkisu jajivulu.