1. Chumanyi chakuhweleleliyi Mata kutalisha hadi manakwindi? (Talenu mwevulu wakutachikilahu.)

MATA ibwambu daYesu wakeñeliyi nawa kambanji kindi wadiña nakudila. Manakwindi Lazaru, wafwili. Kwadiñahu chuma chadi kumukundeja? Eña. Yesu wamulejeli nindi: “Manakweyi wukusañuka.” Chumichi bayi neyi chamanishili chineñi chindi chejimaku, hela chochu, Mata wetejeli mwamulejeliwu kudi Yesu. Wahosheli nindi: “Neluki nami wakasañuka hampinji yakusañuka hefuku dakukumishaku.” (Yow. 11:20-24) Welukili chikupu nindi chumichi chikamwekana kumbidi. Kuhiñahu, Yesu welili chihayamisha. Wamusañwili Lazaru hadodina ifuku.

2. Muloñadi chimwatelela kwikala nachikuhwelelu neyi chadiña naMata?

² Makonu, hitwatela kuhwelela netu Yesu hela Tata yindi anateli kutwilila chihayamisha chamuchidiwuku. Hela chochu, komana mwakuhwelela nenu antu imwakeña akayisañula kumbidi neyi chakuhweleleliyi Mata? Hekwawu mwafwisha mwinikwenu, amama yenu, atata yenu hela ankaaka yenu. Hadaha mwafwisha mwanenu. Munakutalila mpinji yimwakamukumbata, kuhanjeka hela kuseha nindi. Chamuzañalu, ninenu munateli  kuhosha neyi chahosheliyi Mata nenu: ‘Neluki nami muntu inakeña wakasañuka hampinji yakusañuka.’ Hela chochu, mukwaKristu wejima watela kutoñojoka chichawahila kukuhwelela mukusañuka.

3, 4. Chikuhwelelu chaMata chakoleleliku ñahi nayuma yeliliyi Yesu?

³ Mata wadiña nakushakama kwakwihi naYerusalema. Dichi wamweni wanyi Yesu chasañwileñayi mwana kamumbanda nfwila kukamwihi naNena kuÑaliliya. Ilaña, watela watiyilihu iyi nsañu. Indi hampinji yasañwiliyi Yesu mwana kaJayirusa wamumbanda? Antu adiña mwitala mwamukamikiliwu iwu mwana, “elukili nawu nafwi.” Ilaña, Yesu wamukwatili kuchikasa nakuhosha nindi: “Eyi mwanami, hindukaku!” Nawa wahindukili hohenohu. (Luka 7:11-17; 8:41, 42, 49-55) Mata nimuhelindi Mariya, elukili nawu Yesu nateli kuuka ayeji. Hamuloña chumichi atoñojokeli nawu neyi Yesu wadiñahu, kachi Lazaru wafwili wanyi. Hanu chelili Lazaru imwambu daYesu akeñayi nafwi dehi, akuhweleleli nawudi? Anukenu nenu Mata wahosheli hadi Lazaru nindi wakasañuka kumbidi, “hefuku dakukumishaku.” Muloñadi chakuhweleleliyi mwenimu? Nawa muloñadi chimunateli kukuhwelela mukusañuka kwakumbidi kwawantu imwakeña?

⁴ Kudi yuma yaletesha mukuhweleli mukusañuka. Chitukuhanjekaña hayuma yimu, mukuwana nsañu yekala Mwizu daNzambi yimwabula kwiluka nenu yinateli kuyikwasha kuchiñeja kusañuka kwawantu imwakeña.

5. Yumanyi yaletesheli Mata yakuhweleli nindi Lazaru akamusañula?

⁵ Ilukenu nenu Mata wahosheli wanyi nindi: ‘Inakuchiñeja nami manakwami wakasañuka.’ Ilaña wahosheli nindi: “Neluki nami wakasañuka.” Mata wakuhweleleli muloña wayihayamisha yatiyiliyi henohu Yesu kanda yatachiki mudimu windi. Wayitiyili hadiñayi kansi kwitala nimusinagogi. Hadaha wanukili yihayamisha yisatu yasonekawu muNsona yonenawu.

6. Chihayamishanyi cheliliyi Elija, nawa Mata wadizililiku yumanyi?

⁶ Kusañuka kwatachi kwamwekeni hampinji yamuzatishileñawu kaprofwetu Elija kudi Nzambi kwila yihayamisha. Mumbanda nfwila kazweñi wamumwekesheleli chisambu kaprofwetu muZarefwati, musumba wakumenji wawaFwenisa. Nzambi watwalekelihu kumwinka wuña nimanji muchihayamisha, kulonda yena nimwanindi weyala atwalekihu kuhanda. (1 Anya. 17:8-16) Mukuhita kwampinji, mwanindi wakatili nawa wafwili. Elija wenjili nakumukwasha. Iku nakwati chibimbi, Elija walombeli nindi: “Nzambi yami amufuntishili cheñi mwani iwu mwana wumi windi.” Nawa wamufuntishilili! Nzambi watiyili chalombeliyi Elija, nawa mwana wahandili cheñi. Iku dikusañuka kwatachi kwashimunawu muBayibolu. (Tañenu 1 Anyanta 17:17-24.) Chakadi nikujina, Mata welukili iyi nsañu yayiwahi.

7, 8. (a) Shimunenu Elisha chamukundejiliyi mumbanda wafwishili. (b) Chihayamisha cheliliyi Elisha chamwekeshañadi hadi Yehova?

⁷ Kusañuka kwamuchiyedi kwashimunawu muNsona akwilili kudi nswana yaElija, kaprofwetu Elisha. Mumbanda waya mpuhu wakuShunemi wamumwekesheleli Elisha chisambu chasweja. Kuhitila mudiwu kaprofwetu, Nzambi wamukiswilili iwu mumbanda nshinta ninfumwindi wadiña wakula dehi kwikala namwana weyala. Chimwahitili yaaka, ona mwana wafwili. Iwu mumbanda watela waneñeli chikupu. Hanyima yakutambula lusesa kudi nfumwindi,  wendeli makilomita 30 nakuya kudi Elisha kuMpidi yaKarameli. Iwu kaprofwetu wamutemesheleñahu dehi Gehazi kalama kindi kuShunemi. Gehazi hatwesheli kumusañula mwanaku. Iwu mumbanda wafwishili washikilili hamu naElisha.—2 An. 4:8-31

⁸ Chashikiliwu muShunemi mwitala mwadiña chibimbi, Elisha walombeli. Muchihayamisha, iwu mwana wafwili wasañukili nawa wamwinkeliyi mama yindi. (Tañenu 2 Anyanta 4:32-37.) Watela wanukili chuma chalombeliyi nshinta Hana hamuleteliyi Samweli kutabanaka, walombeli nindi: “Yehova welaña . . . ashikija kwijamu asañula cheñi.” (1 Sam. 2:6) Chakadi nikujina, Nzambi diyi wamusañwili ona mwana kuShunemi, nakumwekesha nindi Wukweti ñovu jakusañula.

9. Shimunenu Elisha cheliliyi chihayamisha chakusañuka kwamuchisatu kwashimunawu muBayibolu.

⁹ Kwadiña chihayamisha chikwawu cheliliyi Elisha. Wakalakeli neyi kaprofwetu hadi yaaka 50 nawa nkumininaku watachikili ‘kukata yikatu yaletesheli yafwi.’ Kuhiñahu, chelili mujimba waElisha wunashali dehi kwamafwaha hohu, izanvu dawayilumbu denjili mwituña. A Isarela ayileña nakujiika iyala wumu wafwili. Chamweniwu ayilumbu jawu, anatilili mujimba wanona iyala mwijamu mwadiña mafwaha aElisha nawa atachikili kutemuka. Twatañaña nawu: “Muntu chanakunkiyi kumafwaha aElisha ahizumuka nikuhizumuka emana niki-ta.” (2 Anya. 13:14, 20, 21) Iyi nsañu yatela yamuletesheli Mata yakuhweleli chikupu mukusañuka. Mwamweni Nzambi wukweti ñovu hakufwa. Ninenu toñojokenu nsañu yamuchidiwu chiyinateli kuyikwasha. Yatela kuyikwasha kwiluka nenu ñovu jaNzambi jabadika nankashi.

10. Petulu wamukwashili ñahi muhela mukwaKristu wafwili?

¹⁰ MuNsona jawakwaKristu jachiGiriki, twatañañamu cheñi netu añimenu aNzambi amakwawu asañwileña. Chakutalilahu, Yesu wasañwili muntu muNena nimwitala daJayirusa. Kapostolu Petulu niyena wasañwili muntu mukwawu, mumbanda mukwaKristu Dokasi (Tabita). Petulu wayili kwaloñesheliwu mujimba kulonda awujiiki. Chashikiliyi kukamwihi nachibimbi, Petulu walombeli. Nkumininaku wahosheli nindi: “Tabita, hindukaku!” Washikeneni dakusañuka hohenohu nawa Petulu “wamuhanini . . . wamumi” kudi akwawu akwaKristu. Antu amavulu amweni ichi chihayamisha akuhweleleli chakwila “etiyili mudi Mwanta.” Elukili nawu Mwanta nawa sweje-e Yehova, akweti ñovu yakusañula afu.—Yilw. 9:36-42.

11. Ndotolu Luka washimwini wunsahwinyi kutalisha hadi kansi weyala, nawa chumichi chaletesheli antu kutiya ñahi?

¹¹ Antu amakwawu amweni kusañuka kukwawu. Mpinji yimu, kapostolu Pawulu wadiña nakupompa mwitala dahewulu muTirowasi, makonu dikabeta kaTurkey kasumbwañesha mujika naluwunda. Pawulu watañishili kushika nimukachi kawufuku. Kansi Yutikusa wadiña nakutiyilila iku washakama hanjanina. Dichi watachikili kunoñoka nawa waholokeli hamaseki kufuma hetala dahewulu damuchisatu. Hadaha ndotolu Luka diyi wadiña watachi kuya nakumutalatala Yutikusa kulonda yamoni neyi nadikatishi hela nehi. Ilaña wamupimini nindi Yutikusa nafwi! Pawulu wakunkumukili kufuma hetala dahewulu nakuya nakukumbata chibimbi nawa wabidikili nindi: “Iwu mukwenzi wamumi.” Antu amweni atela ahayamini chikupu. Chelukiliwu nawu anamusañuli, “atiyili kuwaha nankashi.”—Yilw. 20:7-12.

12, 13. Kwesekeja nansañu yakusañuka yitunahanjekihu, malwinhwinyi itwatela kuhanjekahu?

¹² Nsañu yitunahanjeki yatela kuyikwasha neyi chiyamukwashili Mata. Mwatela kukuhwelela chikupu nenu Nzambi yetu nawa Mukwakuhana Wumi wukweti ñovu jakusañula muntu. Nawa ambuña aNzambi ashinshika adi neyi Elija, Yesu hela Petulu adiñahohu hampinji yelileñayi Yehova yihayamisha. Tukuhosha netudi kutalisha hadi antu amakwawu afwili hampinji yacheñi? Neyi Nzambi wabulilihu kusañula afu, komana amayala nawambanda ashinshika adi kukuhwelela nawu Nzambi wakasañula afu kumbidi? Komana adi kutiya neyi chatiyiliyi Mata wahosheli nindi: “Neluki nami [manakwami] wakasañuka hampinji yakusañuka hefuku dakukumishaku”? Muloñadi chakuhweleleliyi chumichi nawa muloñadi chimwatelela kukuhwelela?

¹³ Mwizu daNzambi donenawu mwekala nsañu yayivulu yamwekeshaña nawu ambuñindi aYehova ashinshika elukili nawu kumbidi kwakekala kusañuka. Tuhanjekenu hadi amu.

14. Chumanyi chitwadizilaña kunsañu yaAbarahama kutalisha hakusañuka?

¹⁴ Toñojokenu mazu amulejeliwu Abarahama kudi Nzambi chakumwila Isaka, wateleleli kuhembelela hakwila yekali nswana. Yehova wahosheli nindi: “Tambulaku mwaneyi, weyi wumu hohu wakeña, yowu Isaka, . . . wakamulambuli Nzambi akeli mulambu wakushita.” (Kutach. 22:2) Iyi nshimbi yatela yayineñesheli nankashi! Yehova wakanini nindi nyuza yejima akayikiswila mudi mwana kaAbarahama. (Kutach. 13:14-16; 18:18; Rom. 4:17, 18) Cheñi, Yehova wahosheli nindi nkisu jakenjila “mudi Isaka.” (Kutach. 21:12) Hanu chumichi chadi kumwekana ñahi neyi Abarahama wamulambwili Isaka? Pawulu amoneneni kulumbulula nawu Abarahama wakuhweleleli nindi Nzambi wadi kumusañula Isaka kufuma mudi afu. (Tañenu Aheberu 11:17-19.) Bayibolu yahosha wanyi nawu neyi Abarahama wovwahilili, Isaka adi kumusañula muora yimu, mwifuku dimu hela mumulungu wumu. Abarahama welukili wanyi mpinji yadi kumusañulawu mwanindi. Ilaña wakuhweleleli nindi Yehova wukamusañula Isaka.

15. Nkakulula Yoba wadiña nakuchiñejadi?

¹⁵ Nkakulula Yoba niyena wakuhweleleli nindi kumbidi kwakekala kusañuka. Welukili nindi neyi mutondu awutema, wasapukaña cheñi nakumena mutondu wacheñi. Ilaña dichelaña muntu wanyi. (Yoba 14:7-12; 19:25-27) Muntu neyi nafwi, wukutwesha wanyi kudisañula yomweni kufuma mwijamu. (2 Sam. 12:23; Mas. 89:48)  Hela chochu, bayi neyi chinayi mukwila nawu Nzambi nateli kukañanya kusañula muntuku. Kafwampi, Yoba wakuhweleli nindi Yehova wakatoñola mpinji yakamwanukayi. (Tañenu Yoba 14:13-15.) Yoba helukili mpinji yakumbidi yakamwanukawuku. Hela chochu, wakuhweleleli nindi Owu waleñeli wumi wawantu hakusambila wakamusañula nawa wakamwanuka kulonda yakamusañuli.

16. Kañelu kaYehova wamukolesheli Danyeli nindidi?

¹⁶ Danyeli himuntu mukwawu washinshika ashimunawu muNsona jachiHeberu. Wamukalakeleli Nzambi nakashinshi hadi yaaka yayivulu nawa Yehova wamukwashili. Mpinji yimu, kañelu ntemesha yaNzambi wamukolesheli Danyeli nindi, “eyi muntu wasweja kukeñewa, bayi wutiya womaku; kuwunda kwikali naneyi.”—Dan. 9:22, 23; 10:11, 18, 19.

17, 18. Danyeli amukaninidi?

¹⁷ Danyeli wadiña nayaaka kwakwihi na 100 nawa kwakwihi nakufwa kwindi. Hadaha wadiña nakutoñojoka yuma yakamumwekena kumbidi. Komana Danyeli akamusañula? Eña! Kumakumishilu amukanda waDanyeli, twatañañamu chamukaniniwu kudi Nzambi nawu: “Yaña kweyi nichakashika kukuminina; muloña eyi wakanooka.” (Dan. 12:13) Danyeli welukili nindi afu anakunooka, mwijamu mwadiwu “mwosi kufuukula, mwosi kwiluka, mwosi maana.” Danyeli welukili nindi katataka yayimu. (Mukwa. 9:10) Ilaña welukili nindi chayamu, bayi neyi chinamaniku. Amukanini nawu akamusañula.

¹⁸ Kaprofwetu Danyeli atwalekelihu kumukana nawu: “Wakemana mwiseka deyi kwakakumina mafuku.” Amulejeli wanyi ifuku hela mpinji. Danyeli welukili nindi wukufwa nawa wukunooka. Hela chochu, mazu akwila nawu “wakemana mwiseka” dindi, atalisha kuchikaninu chakusañuka chakekala kumbidi neyi hanahiti dehi mpinji kufuma hafwiliyi. Kusañuka kwakekalaku hamba “kakumina mafuku.” Jerusalem Bible yahosha hachikaninu chamukaniniwu Danyeli nawu: “Wakasañuka nakutambula chibalu cheyi hakukuma kwampinji.”

19, 20. (a) Nsañu yitunahanjeki yinesekani ñahi namazu amulejeliwu Yesu kudi Mata? (b) Tukahanjekadi muchibaaba chinalondelihu?

¹⁹ Kudi yuma yaletesheli Mata yakuhweleli nindi manakwindi washinshika Lazaru,“wakasañuka hampinji yakusañuka hefuku dakukumishaku.” Yuma yamukaniniwu Danyeli nimazu amwakwiliwu Yesu kudi Mata, atela kuyiletasha akwaKristu makonu kwikala nakuchiñeja. Kwakekala kusañuka.

²⁰ Yuma yitunadizi yamwekeni kunyima yinatukwashi kwiluka netu muntu anateli kumusañula, nawa afu anateli kuhanda cheñi. Nawa amayala nawambanda amukalakeleli Nzambi akuhweleleli nawu kusañuka kwakekalaku kumbidi. Hela chochu, kudihu wunsahu wunakumwekesha nawu hatela kuhita mpinji hakwila nawu chikaninu chakusañuka chishikijewi? Neyi wudi kwoku, chumichi chatela kutuletesha kutalila chikupu mpinji yakusañuka, neyi cheliliyi Mata. Hela chochu, kusañuka kwakekalaku mpinjinyi? Tukahanjeka haniyi nsañu muchibaaba chinalondelihu.