1, 2. Yuma yeliliyi Tony yinakumwekesha ñahi nawu muntu nateli kuhimpa chihandilu chindi?

MUKASHIKOLA wejina daTony, wakeñeleña kuleka shikola. Iwu kansi wabula atata yindi waheleli shikola nawa wakeñeli nankashi kutala mafwilimu hela kuhema nawamabwambu jindi kunsa yamulungu. Hadiña namadombu nawa hadiña nakuzatisha yitumbu yashetanaku. Welukili wanyi yuma yateleleliyi kwila muchihandilu chindi. Wadiña nakujinoka neyi chakwila Nzambi wekala kwoku. Wahumañeni aYinsahu adisumbula nawa wahanjekeli nawu yuma yadiña nakujinokayi nimalwihu adiñayi nawu. Amwinkeli mabuloshuwa ayedi, The Origin of Life—Five Questions Worth Asking niWas Life Created?

² Awa adisumbula chamwendeleliwu Tony, awanini nahimpi yilwilu yindi. Awanini natañi mabuloshuwa ejima ayedi chakwila achikekeli nikudivuñavuña. Wahosheli nindi: “Nzambi watela wekala kwoku.” Wetejeli kumudizisha Bayibolu nawa mukuhita kwampinji wahimpili chihandilu chindi. Wekalili namaana kushikola kubadika chadiñayi hakusambila. Mukulumpi washikola wahayamini hakumona Tony nahimpi muloña wayuma yadiziliyi. Dichi wahosheli nindi: “Wunahimpi chikupu yilwilu yeyi nawa wunakuzata chiwahi mushikola. Wunahimpi muloña wakudikunda nawaYinsahu jaYehova ntahindi?” Tony  wahosheli nindi eña, kuhiñahu wamushimwinini. Wamanishili chiwahi shikola yindi nawa chayinu mpinji hipayiniya wampinji yejima cheñi hinkoñi wakuzatila. Wudi namuzañalu muloña wudi naTata yindi wamuwahi, Yehova.—Mas. 68:5.

3. Yehova wayilejaña atwansi kwiladi?

³ Yuma yamweniyi Tony muchihandilu chindi yinakumwekesha nawu Yehova wayakamenaña enu atwansi. Nakukeña nindi mwikali nachihandilu chachiwahi nawa chamuzañalu. Wayilejaña nindi: “Anukaña . . . Nleñi yeyi mumafuku awukwenzi weyi.” (Mukwa. 12:1) Chumichi chapela wanyi mukanu kaayi kamakonu. Hela chochu, kwila mukañanyi nehi. Nawukwashu waNzambi, munateli kutwesha, bayi neyi himuchidi atwansi hohuku, ilaña muchihandilu chenu chejima. Chakutalilahu, shinshikenu chuma chitunateli kudizila kudi aIsarela ayileña nakulwa kulonda atambuli Ituña daChikaninu nikudi Davidi hampinji yayileñayi nakuzuña naGoliyati.

4, 5. Chumanyi chitunateli kudizila kudi aIsarela chashindiliwu aKenani nikudi Davidi chazuñiliyi naGoliyati? (Talenu nyevulu yakutachikilahu.)

⁴ A Isarela chashikiliwu kwakwihi Netuña daChikaninu, Nzambi hayilejelihu chakuzatisha yitwa yanjita hela chakuzuña njitaku. (Kuhit. 28:1, 2) Ilaña, wayilejeli nindi atela kwovwahila nshimbi jindi nikumukuhwelela. (Yosh. 1:7-9) Kwesekeja nayitoñojoka yawantu, iyi nshimbi yamwekeneña neyi yamukunkulwayi. Ilaña, yadiña nshimbi yayiwahi, muloña Yehova wayikwashili antu jindi kuyishinda aKenani hanjita yejima yazuñileñawu. (Yosh. 24:11-13) Hakwila nawu tumwovwahileña Nzambi, twatela kwikala nachikuhwelelu, chikuhwelelu chatukwashaña mpinji yejima kwikala nachihandilu chachiwahi. Hela chakwila mukuhita mpinji yeneni, ichi chalala chahimpaña wanyi. Chichidi kuzatika nimakonu neyi chichazatikileña kunyima.

⁵ Goliyati mushidika wañovu, wadiña wamulehi mamita 2.9 nawa wadimanyekeli yitwa yanjita. (1 Sam. 17:4-7) Ilaña Davidi wadiña hohu nayuma yiyedi, mwonji wakwasa nachu nichikuhwelelu mudi Nzambi yindi, Yehova. Antu abulili chikuhwelelu, amweneña Davidi neyi hichisupi. Ilaña atoñojokeleña mwaluwa. Goliyati diyi wadiña chisupi.—1 Sam. 17:48-51.

6. Yumanyi yitukushinshikahu chikupu?

⁶ Chibaaba chinafumihu chashimwini yuma yiwana yatukwashaña kwikala namuzañalu nichihandilu chachiwahi. Yumiyi hiyakuda yakuspiritu, amabwambu amawahi atwinkayi Nzambi, kufuukulahu yuma yayiwahi yitwatela kwila nikulemesha kusubuka kutukweti etu antu jaNzambi. Ichi dinu tushinshikenu chikupu haniyi nyitu yansañu, ilaña chayinu mpinji tushinshikenu hayishina yekala mumukanda waMasamu 16.

7. (a) Munateli kumulumbulula ñahi muntu wakeña yuma yakuspiritu? (b) “Iseka” daDavidi dadiña chumanyi, nawa watiyili ñahi?

⁷ Muntu wapama kuspiritu wamukuhwelelaña Nzambi nawa wamonaña yuma neyi chayimonañayi Nzambi. Walombaña wukwashu kudi Nzambi nawa watwalekañahu kumwovwahila. (1 Kor. 2:12, 13) Dicheliliyi Davidi. Wembili nindi: “Yehova diyi iseka dami danañambwiluwu, diyi iseka damulupasa lwami.” (Mas. 16:5) Idi “iseka” mwadibombeleli wubwambu waDavidi naNzambi, muloña mudi Nzambi dimu mwabatamineñayi. (Mas. 16:1) Chumanyi chafuminimu? Wasonekeli nindi: ‘Kulema kwami hikukutiya kuwaha.’ Mwamweni, kwosi chuma chamutiyishileña Davidi kuwaha kubadika wubwambu windi naNzambiku.—Tañenu Masamu 16:9, 11.

8. Yumanyi yinateli kutukwasha kwikala namuzañalu walala?

⁸ Antu afwilaña yuma yakumujimba hela maheta hiyanateli kwikala namuzañalu wadiña naDavidiku. (1 Tim. 6:9, 10) Manakwetu  wakuCanada wahosheli nindi: “Muzañalu walala wafumaña muyuma yitwamwinkaña Mukwakuhana yawaana yayiwahi yejima, Yehova Nzambi, bayi neyi wafumaña muyuma yitwafwilaña muchihandiluku.” (Yak. 1:17) Mwamweni, neyi mumukuhwelela Yehova nikumukalakela, mukwikala namuzañalu nichihandilu chachiwahi. Munateli kwikala ñahi nachikuhwelelu? Munateli kwikala nachikuhwelelu neyi mwikalaña nampinji yakutaña Izu dindi, kushinshika yileñaleña yindi, kutoñojoka hayilwilu yindi nikukeña kwayikeñayi.—Rom. 1:20; 5:8.

9. Munateli kwiteja ñahi Izu daNzambi kuyiwumba neyi chidamuwumbili Davidi?

⁹ Mpinji yikwawu Nzambi wamwekeshaña nindi watukeña chatufumbañayi neyi chafumbaña tata yawantu anyanindi. Davidi wetejeli mwamufumbiliwu. Dichi wahosheli nindi: “Nukumukiswila Yehova nkisu, diyi nanleji maana: chalala muchima wami wanlejaña kashinshi nawufuku.” (Mas. 16:7) Mwamweni, watoñojokeli chikupu hayitoñojoka yaNzambi, kuzatisha yitoñojoka yaNzambi nikwiteja yitoñojoka yaNzambi kumuwumba. Neyi mwikala nachikuhwelelu, ninenu mukumukeña Nzambi nawa mukumwovwahilaña. Cheñi, mukwikala mukwaKristu wapama kuspiritu. Muhela Christin wahosheli nindi: “Neyi nisandujola nikutoñojoka chikupu hansañu yinnatañi, natiyaña neyi Yehova wansonekeleli ami iyi nsañu.”

10. Neyi chinashimuniwu haIsaya 26:3, yumanyi yayiwahi yafumaña mukumona yuma neyi chayimonañayi Yehova?

¹⁰ Neyi mupama kuspiritu mukumonaña kaayi niyuma yikakimwekena kumbidi neyi chamonañayi Nzambi. Muloñadi Nzambi chayinkelañayi awa maana nikashinshi? Wakeñaña nindi mutondihu chiwahi yuma yimukutwamijañaku muchihandilu chenu, kufuukulahu chiwahi nikuchiñeja yuma yakumbidi nachikuhwelelu. (Tañenu Isaya 26:3.) Manakwetu Joshua wakuUnited States wahosheli nindi: “Neyi wuswina kwakwihi naYehova wukwilaña yuma yejima munjila yatelela.” Dimu, mwafumaña muzañalu.

11. Davidi wamwekesheli ñahi chuma chinateli kutukwasha kutonda amabwambu amawahi?

¹¹ Tañenu Masamu 16:3. Davidi welukili chakuwana amabwambu amawahi. Watiyileña ‘kuwaha’ kwikala nawamabwambu amukeñeli Yehova. Wayiteneni nindi “akwakujila,” muloña alondeleleña nshimbi jaNzambi jaloña. Ñimbi yamasamu mukwawu niyena dichatiyiliyi hakutonda amabwambu. Wasonekeli nindi: “Nadikunda nanawa akwakameyi, ninanawa ahembaña muwafumbaña.” (Mas. 119:63) Neyi chitwamona muchibaaba chinafumihu, ninenu munateli kuwana amabwambu amawahi hakachi kawantu amutiyaña Yehova woma nikumwovwahila. Awa amabwambu munadibombeli antu akweti yaaka yashiyashana.

12. Wubwambu waDavidi naJonatani washindameneni hayumanyi?

¹² Ñimbi yamasamu Davidi wakwatili wubwambu nawantu adiña nayaaka yashiyashana. Munakwanukahu ijina damuntu ‘walema’ wadiña ibwambu daDavidi? Wadiña Jonatani. Wubwambu wawu wekala hakachi kawubwambu wawuwahi washimunawu muNsona. Hela chochu, Jonatani wamubadikilimu Davidi kwakwihi nayaaka 30. Hanu dinu, wubwambu wawu washindameneni hayumanyi? Washindameneni hakumukuhwelela Nzambi, kudilemesha nikuhamuka kwamweneñawu mudi wumu namukwawu hazuñileñawu nawayilumbu jaNzambi.—1 Sam. 13:3; 14:13; 17:48-50; 18:1.

13. Munateli kwikala ñahi nawamabwambu amavulu? Shimunenu chakutalilahu.

¹³ Kufwana aDavidi naJonatani, ninetu ‘twatiyaña kuwaha’ kudikunda nawantu amukeña Yehova niantu amukuhwelela. Kiera wunamukalakeli Nzambi yaaka yayivulu wahosheli nindi: “Nidi nawamabwambu mukaayi kejima, antu  akuyisemwa yacheñi nikuyitachi yashiyashana.” Neyi ninenu mwikala nawamabwambu amukeña Nzambi, mukumona nenu mwalala Izu daNzambi nispiritu yindi yatunuñañeshaña hamu.

14. (a) Yumanyi yinateli kuyikwasha kufuukulahu yuma yayiwahi yimwatela kwila muchihandilu? (b) Atwansi amakwawu ahosheli nawudi hakufuukulahu yuma yakuspiritu yatela kwilawu?

¹⁴ Tañenu Masamu 16:8. Davidi washili muchima hakumukalakela Nzambi. Ninenu munateli kwikala nachihandilu chachiwahi neyi mutwamijaku kumukalakela Yehova kwesekeja nahanakumini ñovu jenu nikwila yuma yakeñañayi. Manakwetu Steven wahosheli nindi: “Kuzatila hachuma chinafuukwili, kushikija munafuukwili nikumona yuma yinafumimu kunanleteli muzañalu.” Manakwetu wakansi wakuGermany wunakuzatila kwituña dacheñi washimwini nindi: “Inakukeña wanyi nakaditoñesheña neyi nakuli.” Tunakuhweleli ninenu dichimwatoñojokaña. Neyi dichimwatoñojokaña, zatishenuña yawaana yenu kulonda mumulemesheña nachu Nzambi nikukwasha akwenu. (Ñal. 6:10) Fuukulenu yuma yakuspiritu yimwatela kwila nawa mulombenu Yehova kulonda yayikwashi kwila yuma yimunafuukuli. Kuhwelelenu nenu Yehova wukwakula kulomba kwenu.—1 Yow. 3:22; 5:14, 15.

15. Yumanyi yimwatela kufuukulahu kwila? (Talenu chikasha chinakwila nawu, “ Yuma Yalema Yimwatela Kwila.”)

¹⁵ Yumanyi yimwatela kufuukulahu kwila? Munabombeli kwakulañahu mumazu enu hakupompa kwawakwaKristu, kuzataku wupayiniya hela kuzatilaku haBeteli. Hadaha munateli kudiza nidimi dacheñi kulonda mukazatiliku kwiluña kwazatishañawu odu idimi. Barak, kansi wudi mumudimu wampinji yejima wahosheli nindi: “Kwosi mudimu wukwawu wanzañaleshaña kubadika mudimu wakumukalakela Yehova mafuku ejima.”

16. Davidi wamweneña ñahi nshimbi jaYehova jaloña, nawa muloñadi?

¹⁶ Tañenu Masamu 16:2, 4. Neyi chitwadizili muchibaaba chinafumihu, neyi twovwahilaña nshimbi jaNzambi jaloña nikuzatisha yishina yindi, tukwikala asubuka chikupu. Cheñi, chikutukwashaña kuhela yuma yatama nawa tukukeñaña  yuma yayiwahi. (Amosa 5:15) Ñimbi yamasamu Davidi welukili nindi Yehova diyi ‘Nsulu wayuma yayiwahi’ yadiñayi nayu. Kuwaha hikwikala nayililu yayiwahi hela chilwilu chakuwaha. Davidi wazatili nañovu kumwimbujola Nzambi nawa wakeñeli yuma yakeñayi Nzambi. Cheñi, waheleli yuma yahelayi Nzambi. Iyi yuma mwabombeleli kupesha, kwinka muntu kalemesha katela kwinkawu Yehova.—Isa. 2:8, 9; Chim. 4:11.

17, 18. (a) Yumanyi yateneniyi Davidi yafumaña mukudifukula kwakutwamba? (b) Yumanyi yaleteshaña antu makonu ‘kumona kukala kwakuvulu’?

¹⁷ Mumafuku akunyima, kudifukula kwakutwamba mwabombeleli yilwilu yawuvumbi. (Hos. 4:13, 14) Kuhosha hohu walala, antu amavulu akeñeli nankashi kudifukula kwakutwamba kulonda akoñeleñamu nshidi. Ilaña hiyatwalekeleñahu kwikala namuzañaluku. Davidi wahosheli nindi: ‘Antu adifukwileña kudi anzambi adiña nakumona yuma yakala yayivulu.’ Cheñi, awa antu alambwileña anyanawu kudi anzambi akutwamba. (Isa. 57:5) Yehova watiyili kutama naniyi yilwilu yatama. (Yere. 7:31) Neyi chakwila mwadiñaku haniyi mpinji, chakadi nikujina mwadi kutiya kuwaha neyi anvwali jenu adiña amukuhwelela Yehova nikumwovwahila.

¹⁸ Nimakonu, kudifukula kwakutwamba kakavulu kwetejaña yilwilu yawuvumbi, kushilahu wuvumbi weyala neyala hela mumbanda namumbanda. Ilaña nshimbi jamuBayibolu jahosha hakuhela yuma yatama jahimpa wanyi kufuma tuhu kunyima. (1 Kor. 6:18, 19) Neyi chimunakumona, antu ‘anakumona yuma yakala yayivulu.’ Dichi enu atwansi, mutiyililenuña Tata yenu wamwiwulu. Ilukenu nenu kumwovwahila Nzambi dichuma chachiwahi chimwatela kwila. Anukenu nenu yuma yafumaña mukukoña wuvumbi yatama chikupu kubadika kuwaha kwatiyañayi muntu hakapinji kantesha. (Ñal. 6:8) Joshua itwatena hakusambila, wahosheli nindi: “Tunateli kuzatisha kusubuka kwetu munjila yitunakeñi, ilaña neyi tuzatisha chatama kusubuka kwetu mwafumaña chineñi.”

19, 20. Yumanyi yayiwahi yakatambwilawu atwansi amwovwahilaña nikumukuhwelela Yehova?

¹⁹ Yesu wayilejeli akwakumulondela nindi: “Neyi mukutwalekahu kuhemba mazu ami, chalala mudi atumbanji twami, nawa mukwiluka chalala, chalala nichena chikuyifumisha muwuduñu.” (Yow. 8:31, 32) Iku kusubuka mwabombela kusubuka kwakufuma mukudifukula kwakutwamba, kwila yuma mukubula kwiluka, kupesha kushilahu niyuma yikwawu. Neyi chitunamoni, munabombeli kwikala “[asubuka] mukulema kwawanyana kaNzambi.” (Rom. 8:21) Munateli kwikala asubuka chayinu mpinji neyi ‘mutwalekahu kuhemba mazu aKristu,’ hela ntañishilu yindi. Neyi mwila mwenimu, ninenu “mukwiluka chalala” bayi neyi mukukumina dakuchidiza hohuku ilaña mukuchizatishaña.

²⁰ Enu atwansi, lemeshenuña kusubuka kwayinkayi Nzambi. Zatishenuña iku kusubuka munjila yayiwahi kulonda mufuukuleña chiwahi yuma yimwakela kumbidi. Manakwetu wumu wakansi wahosheli nindi: “Kuzatisha chiwahi kusubuka hiwuchidi kansi kukakukwashaña kufuukula chiwahi kumbidi, chidi neyi kutonda mudimu iwatela kwiñila, kutondahu kusumbula hela kushakama wujiki hanoyu mpinji.”

21. Munateli kutwalekahu ñahi kwenda munjila yatwalaña “kuwumi walala”?

²¹ Muyinu nshakaminu yamakonu, nichihandilu chatenañawu nawu chachiwahi chekala chakampinji kantesha hohu. Twelukaña wanyi yuma yikamwekana kumadiki. (Yak. 4:13, 14) Chuma chachiwahi chimwatela kwila, hikulondela njila yatwalaña “kuwumi walala,” wumi wahaya nyaka. (1 Tim. 6:19) Hela chochu, Nzambi hatukanjikijaña kwenda muniyi njilaku. Twatela kufuukulahu etu aweni. Mwilishenu Yehova yekali “iseka” denu. Lemeshenu ‘yuma yayiwahi’ yejima yayinkayi. (Mas. 103:5) Kuhwelelenu nenu watela kuyinka “kuzañalala kwakweni” ‘nikuwaha haya nyaka.’—Mas. 16:11.