1, 2. Neyi tunakutonda yuma yitunakufwila kwila muchihandilu, muloñadi chichalemena kutiyilila kudi Nleñi yetu? (Talenu nyevulu yakutachikilahu.)

NEYI mudi atwansi, chakadi nikujina, ayikwashahu dehi kudi antu amavulu hachihandilu chenu chakumbidi. Hadaha antañishi, akwakufumba hela antu amakwawu ayilejahu dehi nawu mukatañi shikola yahewulu nikwiñila nyidimu yamali. Ilaña Yehova nakuyileja nindi mwili chuma chambukaku. Kuhosha hohu walala, wakeñaña nindi muzateña nañovu himuchidi kushikola kulonda mukatweshi kudihemba nikudikwasha muyuma yakeñekaña kumujimba. (Kol. 3:23) Hampinji yimunakutonda yuma yimunakufwila kwila muchihandilu chenu, wayikoleshaña kuzatisha yishina yikuyikwasha kwila yuma yamutiyishaña kuwaha muyinu mpinji yakukuminina.—Mat. 24:14.

² Anukenu nenu Yehova wamonaña yuma yejima. Weluka yuma yikamwekana kumbidi nawa neluki adinu ituña chididi kwakwihi nakukuma. (Isa. 46:10; Mat. 24:3, 36) Watwiluka chikupu, weluka yuma yinateli kutukwasha nikutuletela muzañalu chikupu nawa weluka yuma yinateli kutuletela kukala nichineñi. Dichi,  hela chakwila muntu nateli kutukwasha ñahi, neyi wukwashu windi wunakwendela hamu wanyi nayishina yaMwizu daNzambi, himaanaku.—Yish. 19:21.

3, 4. Kutiyilila wukwashu watama kwayiletesheli ñahi aAdama naEva kushilahu nianyanawu kwikala mukukala?

³ Wukwashu watama watachikili dehi kufuma kuyaaka yakunyima. Satana diyi muntu watachikili kuhana wukwashu watama. Muntu wadivwimba nawa waditondeli yomweni kwikala mukwakukwasha akwawu, wamulejeli Eva ninfumwindi nindi akwikala namuzañalu neyi adifuukwilaña yuma awenawu. (Kutach. 3:1-6) Hela chochu, kuhosha hohu walala, Satana wamwekesheli yilwilu yakuditiyisha kuwaha. Wakeñeleña nindi aAdama naEva kushilahu nianyanawu akavwalawu kumbidi amwovwahileña nikudifukula kudi yena chatela adifukuleña kudi Yehova. Ilaña, chumanyi chayilililiyi? Yehova diyi wayinkeli yuma yejima, kuyisumbwisha, kuyinka itempa dadiwahi ninyijimba yawu yawanina yinateli kushakama haya nyaaka.

⁴ Chawushona, aAdama naEva adikañili naNzambi nawa adambwili kudi yena. Neyi chitweluka, mwafumini yuma yatama. Neyi chomaña nkenu yinafumishiwu kumutondu, niwena atachikili kukota chovu-chovu nawa afwili. Anyanawu niwena akabakeni nawa ninetu twakabakanaña muloña weshiñu dafumini kunshidi. (Rom. 5:12) Hela chochu, antu amakwawu akaanaña kumwovwahila Nzambi. Akeñaña kudihandila awenawu. (Efwe. 2:1-3) Yuma yafumañamu yinakumwekesha nawu ‘mukudikaña naYehova himwekala maanaku.’—Yish. 21:30.

5. Yumanyi yakuhweleleliyi Nzambi hadi antu jindi, nawa yuma yakuhweleleliyi yadiña yalala?

⁵ Hela chochu, Yehova welukili nindi antu amakwawu kushilahu niatwansi adi nayilwilu yayiwahi, akamukeñakeña yena nakumukalakela. (Mas. 103:17, 18; 110:3) Wayitiyaña kuwaha antu amuchidiwu! Komana mudi hakachi kanawa antu? Neyi dimu, munakudiluñisha “nayuma yayiwahi” yayinkañayi Nzambi yaletaña muzañalu. (Tañenu Masamu 103:5; Yish. 10:22) Neyi chitukumona, iyi ‘yuma yayiwahi’ munabombeli yakuda yakuspiritu, amabwambu amawahi, yuma yayiwahi yimwatela kwila nikusubuka kwalala.

6. Muloñadi chimwatela kudila yakuda yakuspiritu, nawa Yehova wayinkaña ñahi iyi yakuda?

⁶ Kwambukaku nawatunyama, enu munateli kuda yakuda yakuspiritu nawa Nleñi yenu hohu diyi wunateli kuyinka. (Mat. 4:4) Neyi mumutiyilila nakanañachima, mukwikala nakashinshi, maana nimuzañalu. Yesu wahosheli nindi: “Adi namuzañalu wowu antu eluka nawu atela kudiza hadi Nzambi.” (Mat. 5:3) Nzambi wayinkaña yakuda yakuspiritu Mwizu dindi niyakuda yakuspiritu yayivulu yahanañayi kuhitila mudi “nduñu wamaana nikashinshi.” (Mat. 24:45) Iyi yakuda yalema nawa yayiwahi!—Isa. 65:13, 14.

7. Yumanyi yayiwahi yafumaña mukuda yakuda yakuspiritu yatwinkañayi Nzambi?

⁷ Yakuda yakuspiritu yatwinkañayi Nzambi yikuyikwasha kwikala namaana nikutoñojoka chiwahi, yuma yinateli kuyikiña munjila jashiyashana. (Tañenu Yishimu 2:10-14.) Chakutalilahu, iyi yilwilu yikuyikwasha kwiluka ntañishilu yakutwamba yakwila nawu kwosi Nleñi. Yikuyikiña kukutwamba kwakwila nawu mali nimaheta diyi yuma yinateli kuyiletela muzañalu. Yikuyikwasha cheñi kwiluka nikukaana kufwila kwatama niyilwilu yinateli kuyiletela kukala. Dichi, twalekenuhu kukeñakeña maana aNzambi niyitoñojoka yindi nawa yimonenuña nenu himaheta. Neyi mwikala  naniyi yilwilu yayiwahi, mukwiluka nenu Yehova wayikeña nawa nakukeña nindi mumukalakeleña hakumina ñovu jenu.—Mas. 34:8; Isa. 48:17, 18.

8. Muloñadi chimwatela kuswina kudi Nzambi makonu, nawa chumichi chikayikwasha ñahi kumbidi?

⁸ Katataka kaayi kaSatana akijilumuni nawa Yehova diyi hohu wakatukiña. Mwamweni, mpinji yitukashindamenaña hadi yena yinakwinza hakatwinkayi yakuda yikwawu yitukakeñaña. (Hab. 3:2, 12-19) Ayinu diyi mpinji yakuswina kwakwihi naTata yenu wamwiwulu nikumukuhwelela chikupu. (2 Pet. 2:9) Neyi mwila mwenimu, hela chakwila mukumona kukala kwamuchidinyi, mukutiya neyi chatiyiliyi ñimbi yamasamu Davidi, wasonekeli nindi: “Namushi Yehova kumesu ami mafuku ejima. Chadiyi yena kuchikasa chami chachidiilu hijikunkumaku.”—Mas. 16:8.

9. (a) Chumanyi chelañayi Yehova kwesekeja naYowanu 6:44? (b) Chambwinyi chekalañahu neyi muwana muntu wabula kwikala Chinsahu katachi nawa muwana mukwenu Chinsahu katachi?

⁹ Yehova wakokaña antu etejañayi kwikala muchisaka chindi chakuspiritu, wakokolaña chovu-chovu antu akweti nyichima yayovu kulonda enzi mukudifukula kwalala. (Tañenu Yowanu 6:44.) Neyi muwana muntu katachi wabula kwiluka chalala, yumanyi yimukwiluka hadi iwu muntu? Mukwiluka hohu ijina dindi, chinakumwekanayi, hadaha niyuma yikwawu yantesha hohu. Ilaña hakwikala chaambu neyi muwana muntu katachi wamwiluka nawa wamukeña Yehova. Hela chakwila iwu muntu wakulila kwacheñi, wafuma kwituña dacheñi, muchidi hela kuchisemwa chacheñi, mweluka dehi chekalayi nawa niyena wayiluka chimwekala.

10, 11. Chumanyi chikwetiwu antu jaYehova ejima, nawa chumichi chatukwasha ñahi?

¹⁰ Chakutalilahu, mwashikenaña kwiluka “idimi” dimwahoshaña, “idimi ditooka” dachalala. (Zef. 3:9) Chikufumamu, wejima wenu mukwiluka yuma yimwakuhwelela hadi Nzambi, yilwilu yayiwahi niyuma yakumbidi yimwachiñejaña. Hela chochu, iyi diyi yuma yasweja kulema yimwatela kwiluka hadi muntu, yuma yikuyikwasha mudikuhweleli namuntu.  Yikuyikwasha cheñi kutuña wubwambu wakola nawa wahaya nyaaka.

¹¹ Kuhosha hohu walala, chineli mwadifukulaña kudi Yehova, mukweti amabwambu amawahi nawa awa amabwambu adi mukaayi kejima hela chakwila ejima kanda mudimoneñahu dehi nawu. Kufumishaku antu jaYehova, anyi amakwawu adiluñishaña ichi chawaana chalema?

12. Nyidimwinyi yakuspiritu yimwatela kufwila kwila?

¹² Tañenu Mukwakutañisha 11:9–12:1. Komana kudihu nyidimu yakuspiritu yimunakufwila kwila? Hadaha mwafwilaña kutaña Bayibolu ifuku nifuku. Indi kwiji munakufwila kwilukisha chakuhosha hela kutañisha. Neyi mumona yuma yayiwahi yinafumimu hela antu amakwawu amona yuma yayiwahi yinafumimu nawa ayihameka, mukutiya ñahi? Chakadi nikujina mukutiya kuwaha nankashi. Munateli kuzañalala muloña munakutwamijaku kwila nkeñelu yaNzambi neyi cheliliyi Yesu.—Mas. 40:8; Yish. 27:11.

13. Muloñadi kumukalakela Nzambi chikwawahila kubadika yuma yakumujimba?

¹³ Neyi munakufwila kuzata nyidimu yakuspiritu dikwila nawu munatondi chuma chachiwahi muloña hichakakisikaku. Kapostolu Pawulu wasonekeli nindi: “Ikalenu akola mbe-e chakadi kuswijewa, mpinji yejima ikalenuña nayuma yayivulu yakuzata mumudimu waMwanta, nanochu chimuneluki nenu kudikita kwenu kumunakudikita mudi Mwanta kwamukunkulwayi wanyi.” (1 Kor. 15:58) Ilaña neyi antu afwilaña yuma yakumujimba nikuya mpuhu, ekalaña namuzañalu wanyi. Hela chakwila akwikala naniyi yuma, kakavulu ekalaña nachineñi. (Luka 9:25) Mwanta Solomoni wamwekesheli chumichi.—Rom. 15:4.

14. Chumanyi chimwatela kudizila kudi Solomoni?

¹⁴ Solomoni wadiña namaheta amavulu nawa wayili mpuhu, wamweni yuma yafumaña mukwikala nayuma yayivulu, dichi wahosheli nindi: ‘Lekaku neseki kuzañajala; nimoni yuma yayiwahi yikufumamu.’ (Mukwa. 2:1-10) Watuñili matala, maluña amawahi akunookela nawa welili yuma yejima yakeñeleñayi. Watiyili ñahi chekalili naniyi yuma? Komana wamweni nindi yinawanini? Komana watiyili muzañalu? Bayi neyi yetu tunateli kwakulaku. Solomoni yomweni watuleja ñakwilu. Wasonekeli nindi: “Hinukutala nyidimu yejima yakoñeli makasami . . . , Komana yejima yakuhemesha hohu . . . [Kwosi chuma hela chimu chalemaku].” (Mukwa. 2:11) Ichi hichikuma chalema chikupu! Kwila mudizilaku nehi?

15. Kwesekeja naMasamu 32:8, chikuhwelelu chalemenadi, nawa chatukwashaña ñahi?

¹⁵ Antu amakwawu adizaña yuma hanyima yakumona kukala kwafumaña mukuluwañesha. Ilaña Yehova hanakukeña nindi mumoneña kukala kwamuchidiwuku. Ilaña, mwatela kwikala nachikuhwelelu hakwila nawu mumwovwahileña Nzambi nikutwamijaku muchihandilu chenu yuma yakeñañayi. Ichi chikuhwelelu chalema nawa chikayileñela kwila yuma yimwakabula kuditoñesha. Mwamweni, Yehova hakavulamena “[kukeña] kumwakeñeli ijina dindiku.” (Heb. 6:10) Dichi, zatenuña nañovu kulonda mukoleshi chikuhwelelu chenu, nawa mukumona nenu Tata yenu wamwiwulu wudi nanenu.—Tañenu Masamu 32:8.

16. Muloñadi chitwatela kulemesha kusubuka nikukwizatisha chiwahi?

¹⁶ Pawulu wasonekeli nindi: “Kwejima kudi spiritu yaYehova, kwenoku dikwekala nikusubuka.” (2 Kor. 3:17) Mwamweni, Yehova wakeña kusubuka nawa washa iku kukeña munyichima yenu. Hela chochu, nakukeña nindi muzatisheña kusubuka kwenu chiwahi kulonda mwikali akiñewa. Hadaha mwelukahu  akwenu atwansi atalaña nyevulu yanzekesi hela elaña wuvumbi, ahemaña yisela yakusha wumi muwubanji hela azatishaña yitumbu chatama nikusheta walwa. Kuhosha hohu walala, anateli kudiluñisha nikwikala namuzañalu wakampinji kantesha hohu. Ilaña, kakavulu mwafumaña yuma yatama yidi neyi nyisoñu, kuteñuka nikufwa. (Ñal. 6:7, 8) Mwamweni, “kusubuka” kwawu kwalala wanyi.—Tit. 3:3.

17, 18. (a) Kumwovwahila Nzambi kwatukwashaña ñahi kwikala asubuka? (b) Tukuhosheladi netu aAdama naEva adiña asubuka kubadika antu makonu?

¹⁷ Antu añahi imweluka akatahu dehi muloña wakulondela nshimbi jamuBayibolu? Kumwovwahila Yehova kwakuwahi nawa kwatukwashaña kwikala asubuka chikupu. (Mas. 19:7-11) Chuma chasweja kulema neyi muzatishaña kusubuka kwenu chiwahi, dikwila nawu kulondela nshimbi jaNzambi jaloña nikuzatisha yishina, akuyikuhwelela kudi Nzambi nianvwali jenu nawa mukwikala asubuka. Katataka Nzambi yayinki ambuña indi ashinshika kusubuka kwalala, kwashimunawu muBayibolu nawu “[kusubuka kwalema] kwawanyana kaNzambi.”—Rom. 8:21.

¹⁸ Adama naEva adiña naniku kusubuka. Nshimbi jiñahi jayinkeliwu kudi Nzambi mwitempa daEdeni? Yimu hohu. Ayikaanishili kuda nyikabu yakumutondu wumu hohu. (Kutach. 2:9, 17) Komana iyi nshimbi yadiña yakala kulondela? Inehi! Toñojokenu hanshimbi jatuñawu kudi antu jakeñañawu nawu akwawu alondeleña nikujovwahila.

19. Yehova niYesu atudizishaña ñahi hakwila nawu tukekali asubuka?

¹⁹ Yehova wayakamenaña chiwahi antu amukalakelaña. Chatela yatwinki nshimbi jajivulu, ilaña watudizishaña nindi tulondeleña lushimbi lwakukeña. Wakeñaña nindi tuzatisheña yishina yindi nawa nindi tuheli yuma yatama. (Rom. 12:9) MuMpanji yindi yahaMpidi, Yesu washimwini chuma chaleteshaña antu akoñeña yuma yatama. (Mat. 5:27, 28) Chineli diyi Mwanta waWanta waNzambi, Kristu wakatwalekahu kutudizisha mwituña dadiha kulonda twakamoneña yuma yayiwahi niyuma yatama neyi chayimonañayi. (Heb. 1:9) Wakabalumuna cheñi nyijimba niyitoñojoka yetu kwikala yawanina. Fwikijenu chichakekala, mpinji yakela kwosi yuma yatama yikayileñela kukoña nshidi hela kukabakana muloña wanshidi. Nkumininaku, mwakekala ‘asubuka mukulema’ kwayikanayi Yehova.

20. (a) Yehova wazatishaña ñahi kusubuka kwindi? (b) Yumanyi yayiwahi yafumañamu neyi twimbujola kukeña kwaNzambi?

²⁰ Hela chochu, kusubuka kwetu kukekala namwakukumina. Iku kusubuka kwakashindamena hakukeña kutwamukeña Nzambi niakwetu antu. Yehova wakeñaña nindi tumwimbujoleña. Wekala wasubuka chikupu, ilaña muloña wakukeña wayakamenaña antu jindi chiwahi. (1 Yow. 4:7, 8) Mwamweni, tukekala asubuka chikupu neyi hohu twimbujolaña kukeña kwaNzambi.

21. (a) Davidi watiyili ñahi hayuma yamwinkeliwu kudi Yehova? (b) Twakahanjekadi muchibaaba chinalondelihu?

²¹ Komana mwamusakililaña Yehova ‘hayuma yayiwahi’ yayinkayi yidi neyi yakuda yayivulu yakuspiritu, amabwambu amawahi, yuma yayiwahi yimwatela kwila nikusubuka kwalala kwakayinkayi kumbidi? (Mas. 103:5) Neyi mwasakililaña, mukutiya neyi chatiyiliyi Davidi walombeli mazu ekala haMasamu 16:11 akwila nawu: “Wakanleja njila yawumi; hakushakama kumesu eyi kudi kuzañalala kwakweni kwamana; muchikasa cheyi chachidiilu mudi yakutiyisha nachu kuwaha haya nyaka.” Chibaaba chinalondelihu chikashimuna yuma yikwawu yalema yakuspiritu yekala haMasamu 16. Yumiyi yikatukwasha cheñi kwiluka chitunateli kwikala nachihandilu chachiwahi kumbidi.