Komana mwatañili nakanañachima yibaaba yakatataka yaKaposhi Kakutalila? Talenu neyi mukutwesha kwakula awa malwihu:

Wunsahwinyi wamuNsona wamwekeshaña nawu Nzambi watutiyilaña luwi?

Hampinji yadiñawu aIsarela muwuduñu muEjipitu, Nzambi welukili makabi amweneñawu nawa watiyili kutama chakabakeneñawu. (Kwid. 3:7; Isa. 63:9) Atuleña muchinfwana chaNzambi nawa ninetu tunateli kumwekesha luwi. Watutiyilaña luwi hela chakwila tunateli kutoñojoka netu Nzambi hanateli kutumwekeshela kukeñaku.—wp18.3, mafu. 8-9.

Ntañishilu yaYesu yayikwashili ñahi antu kumanisha chaambu?

A Yudeya amavulu mumafuku aYesu adiña nachaambu. Kristu washimwini muloña waweni wutwatela kwikalila adizoza nikubula kwikala nachaambu chekowa. Wayilejeli akwakumulonda nindi atela kudimona wumu namukwawu nawu hiyamana kwamuntu.—w18.06, mafu. 9-10.

Yumanyi yitwadizilaña kudi Nzambi chabuliliyi kumwiteja Mosi kwiñila Mwituña Dachikaninu?

Mosi wadiña nawubwambu wakola naYehova. (Kuhit. 34:10) Kwakwihi nakukuma kwayaaka 40 muchinkalampata, antu atachikili kuhoshahosha muloña wakubula menji. Nzambi wamulejeli Mosi kuhosha kwilola, Ilaña yena weteli mwilola. Hadaha Yehova wamuzuwilili Mosi muloña wakwila wakañenyi kulondela mwamulejeliyi hela muloña wakwila Mosi wamulemesheli wanyi Nzambi hachihayamisha chakoñeliyi. (Kuch. 20:6-12) Chumichi chinakutudizisha chichalemena kumwovwahila Yehova nikumulemesha.—w18.07, mafu. 13-14.

Tunateli kuluwañesha ñahi neyi tunyakala kusompesha kwesekeja nachinakumwekanayi muntu?

Kudi yuma yisatu yaluwañeshaña antu kwesekeja nachinakumwekanayi muntu: ikowa hela muchidi, maheta hela wuzweñi niyaaka yikwetiyi muntu. Twatela kumonaña akwetu neyi chayimonañayi Nzambi! (Yil. 10:34, 35)—w18.08, mafu. 8-12.

Munjilanyi akwaKristu akula dehi munateli kukwashilawu amakwawu?

MukwaKristu wakula dehi alejeliwu kuhana nyidimu yazatileñayi, anatwalekihu kumulemesha kudi Nzambi nawa nateli kuzata nyidimu yayivulu hakukwasha akwawu. Nateli kukwasha amayala abula kwitiya asumbula ahela akwaKristu, azeya, kulombola atudizi aBayibolu nikudikita nankashi mumudimu wakushimwina.—w18.09, mafu. 8-11.

AkwaKristu akweti yumanyi muChikasha chawu chaYozelu Yakuzatisha Hakudizisha?

Mwekala makaadi akulombola nachu antu niyipapilu yakutambika nachu antu. Matilakiti 8 asonekawu chiwahi kushilahu magazini yaKaposhi Kakutalila niAwake! Muchikasha mwekala cheñi maBuloshuwa antesha, ninyikanda yakudizisha nachu, mavidiyo awana kushilahu nividiyo yaMuloñadi Wutwatela Kudizila Bayibolu?—w18.10, ifu. 16.

MukwaKristu nateli ‘kulanda ñahi chalala’ kwesekeja nachashimuna Yishimu 23:23?

Hitwafwetaña mali hakulanda chalalaku. Hela chochu, twatela kuzatisha mpinji niñovu hakwila tuchilandi.—w18.11, ifu. 4.

Yumanyi yitunateli kudizila kudi Hoseya cheliliyi nañodindi Gomeri?

Gomeri watwalekelihu kwila wuvumbi, ilaña Hoseya wamwanakeneni nawa watwalekelihu kushakama nindi muwulu. Neyi akwaKristu adisumbula wumu yela wuvumbi, wunabuli muloña nateli kumwanakena mwinikwindi. Neyi yakama namwinikwindi wuneli wuvumbi, dikwila nawu muloña wamuNsona watela kudiseñelawu anawujimi.—w18.12, ifu. 13.