Ha 2 Akorinda 12:2, 3, Pawulu wadiña nakutena iyala “[wahukwiliwu] nakumutwala mwiwulu damuchisatu.” Iwu muntu wadiña hinyi? Hasonekeleliyi chipompelu chakuKorinda, Pawulu washimwini nindi Nzambi wadiña nakumuzatisha hamu neyi kapostolu. (2 Kor. 11:5, 23) Kuhiñahu, washimwini ‘yimwenu niyuma yanmwekesheleluwu kudi Mwanta.’ Muniwu mukuku wamazu, Pawulu hatenenimu amanakwindi acheñiku. Dichi, wadiña nakuditena yomwenindi nindi hiyala wamweni yimwenu niyimwekeshu.—2 Kor. 12:1, 5.

Dichi, Pawulu diyi “ahukwiliwu nakumutwala mwiwulu damuchisatu” nawa diyi ‘ahukwiliwu nakumutwala muparadisa.’ (2 Kor. 12:2-4) Wazatishili izu dakwila nawu ‘yimwekeshu,’ chuma chinakumwekesha nawu amulejeli yuma yakamwekana kumbidi.

‘Iwulu damuchisatu’ damweniyi Pawulu hichumanyi?

MuBayibolu, “mawulu” anateli kwikala mawulu itwamonaña. (Kutach. 11:4; 27:28; Mat. 6:26) Ilaña “Mawulu” anateli cheñi kwimenaku yuma yikwawu. Mpinji yikwawu anateli kwimenaku chiyuulu chawantu. (Dan. 4:20-22) Hela anateli kwimenaku chiyuulu chaNzambi, chidi neyi Wanta waNzambi.—Chim. 21:1.

Pawulu wamweni ‘iwulu damuchisatu.’ Watalishili mudihi? Mpinji yikwawu, Bayibolu yafuntishañahu izu dimu kapampa kasatu kulonda yikonkomweni chikuma hela kuchikolesha. (Isa. 6:3; Ezek. 21:27; Chim. 4:8) Chinamwekani neyi Pawulu hakuhosha ‘hewulu damuchisatu,’ wateneneña chuma chachiwahi, chiyuulu chabadika chaWanta wawuMesiya wakayuulañawu kudi Yesu Kristu nialunda nindi a 144,000. (Talenu Insight on the Scriptures, Vol. 1, mafu. 1059, 1062.) Neyi chasonekeliyi kapostolu Pawulu, twatalilaña “mawulu amaha” kwesekeja nachakaniniyi Nzambi.—2 Pet. 3:13.

Indi “paradisa” yateneniyi Pawulu?

Izu dakwila nawu “paradisa” nidena dinateli kwimenaku yuma yayivulu: (1) Kwesekeja namukala wawantu wakusambila, “paradisa” yinateli kwimenaku Paradisa yaheseki yidi kumbidi. (2) Dinateli cheñi kwimenaku yuma yayiwahi yakuspiritu yikadiluñishawu antu jaNzambi mwituña dadiha. (3) Kubombelahu, dinateli kwimenaku nkisu yayiwahi yamwiwulu, ‘paradisa yaNzambi’ yashimunawu haChimwekeshu 2:7.—Talenu Kaposhi Kakutalila kaJuly 15, 2015, ifu. 8. par. 8.

Hadaha Pawulu wadiña nakutena yikuma yejima yisatu yekala ha 2 Akorinda 12:4 hakushimuna yuma yamweniyi.

Muwihi:

“Mwiwulu damuchisatu” dashimunawu ha 2 Akorinda 12:2 datalisha kuWanta wawuMesiya wayuulañawu kudi Yesu Kristu nia 144,000, “mawulu amaha.”—2 Pet. 3:13.

‘Hiwulu damuchisatu’ muloña hiWanta wasweja kuwaha nawa hichiyuulu chabadika.

“Paradisa” ‘mwamuhukwililiwu’ Pawulu muchimwenu yatalisha (1) kuParadisa yakekalaku heseki, (2) paradisa yakuspiritu yikekalaku nawa yikatanda kwejima kubadika paradisa yakuspiritu yidiku makonu, (3) ‘niparadisa yaNzambi’ yamwiwulu yikekalaku hampinji yoyimu netuña dadiha.

Ituña dadiha dikekala mawulu amaha niiseki dadiha. Yakekala ntanjikilu yayiha, kushilahu nfulumendi yaWanta wamwiwulu niantu akamukalakelaña Yehova muparadisa heseki.