MUHELA Diana wudi nayaaka kubadika 80. Nfumwindi wakatili chikatu chaleteshaña woñu kubula kuzatika chiwahi nawa wadiña nakushakama hohu mwitala hadi yaaka yayivulu kushika nichafwiliyi. Wafwishili anyana ayedi awamayala adiñayi nawu nawa yena wakatili kansa yakumayeli. Amanakwetu niahela amuchipompelu mwayañayi Diana amonaña muzañalu wekalañayi nawu mpinji yejima, neyi wudi heTala daWanta hela neyi wudi mumudimu wakushimwina.

Manakwetu John wadiña mumudimu wakwenda kubadika yaaka 43. Wakeñeli nankashi kuzata iwu mudimu. Hela chochu, walekeli kuzata iwu mudimu kulonda yahembeña ntaña yindi wadiña wakata nawa chayinu mpinji nakukalakela muchipompelu mwekalayi. Neyi Antu amwilukili John kunyima amubulakana hakupompa kweneni hela kwanyanya, ahoshaña nawu nahimpi wanyi. Wuchidi namuzañalu.

Muloñadi aDiana naJohn chiyanatwalekelihu kwikala namuzañalu? Muntu wunakukabakana muyitoñojoka nawa wakata kumujimba nateli kwikala ñahi namuzañalu? Nawa muntu wunaleki mudimu wakeñeliyi nateli kutwalekahu ñahi kwikala namuzañalu? Bayibolu yashimuna ñakwilu nawu: “Waloña wakazañalala mudi Yehova.” (Mas. 64:10) Tunateli kutiyishisha ichi chalala neyi twiluka yuma yinateli kutuletela muzañalu wabulaña kumana niyuma yinateli kubula kutuletela muzañalu.

Mweluka dehi nenu kudi yuma yatuletelaña muzañalu mpinji yejima. Toñojokenu hadi antu ayedi anakudisumbula. Hela kuvwala anyana indi kwiji kwikala nakukooleka kudi kwejima mukuloñesha. Iyi yuma yaletaña muzañalu muloña Yehova diyi wayishaku. Washiliku wulu, kuvwala anyana nawa diyi wahanaña nyidimu muchipompelu chawakwaKristu.—Kutach. 2:18, 22; Mas. 127:3; 1 Tim. 3:1.

Hela chochu, iyi yuma yaletaña muzañalu wakampinji kantesha. Mpinji yikwawu, mwinikwenu nateli kuvulumuna hela kufwa. (Ezek. 24:18; Hos. 3:1) Anyana amakwawu ovwahilaña wanyi anvwali jawu niNzambi, hadaha anateli nikuyihaña muchipompelu. Anyana kaSamweli hiyelileña mwayilejeleñayi Yehovaku nawa yuma yakoñeliyi Davidi yamuleteleleli kukala kwakuvulu  mwitala dindi. (1 Sam. 8:1-3; 2 Sam. 12:11) Yuma yamuchidiwu yaletaña kukala nichineñi. Hiyatuletelaña muzañaluku.

Munjila yoyimu, kukooleka kukwetiwu antu jaNzambi mukuloñesha kunateli kumana, hadaha muloña wayikatu, kwakamena chisaka hela muloña wakuhimpika kudi mukuloñesha. Antu amavulu anakuhita mukukala kwamuchidiwu ahoshaña nawu hiyakweti muzañalu wadiñawu nawu hampinji yazatileñawu iwu mudimuku.

Tuneluki netu muzañalu wafumaña muniyi yuma wakampinji kantesha hohu. Hanu dinu, kudihu muzañalu wunateli kutwalekahu hela chakwila muntu nakumona kukala? Wudikoku, muloña Samweli, Davidi niantu amakwawu atwalekelihu kwikala namuzañalu hela chakwila amweneña kukala.

Yesu welukili mwatalisha muzañalu. Henohu kanda yenzi hanu heseki, yuma yadiña chiwahi nawa wadiña ‘nakuzañajala kumesu aYehova mafuku ejima.’ (Yish. 8:30) Ilaña mpinji yadiñayi hanu heseki, mpinji yikwawu wamweneña kukala kwasweja. Hela chochu, Yesu watiyileña kuwaha kwila nkeñelu yaTata yindi. (Yow. 4:34) Indi hampinji yafwileñayi? Twatañaña netu: “Muloña wamuzañalu wamuloñesheleliwu kumbidi, womikili hamutondu wakuyandishila.” (Heb. 12:2) Dichi, kuyuma yiyedi yahosheliyi Yesu hamuzañalu waweni, tunateli kudizilaku yuma yayivulu.

Hampinji yimu atumbanji 70 chamanishiliwu mudimu wakushimwina, afuntili kudi Yesu. Atiyili muzañalu muloña akoñeli nyidimu yayivulu yañovu nikufumisha andemoni. Dichi, Yesu wayilejeli nindi: “Bayi muzañalala muloña wakwila andemoni anakuyovwahila enuku, ilaña zañalalenu muloña wakwila majina enu anayisoneki mwiwulu.” (Luka 10:1-9, 17, 20) Mwamweni, kwikala nawubwambu naYehova dichuma chalema nawa chaletaña muzañalu kubadika mudimu wazatiliwu. Wakanukaña atumbanji ashinshika, chuma chaletaña muzañalu waweni.

Mpinji yimu, Yesu wahanjekeleña nezaza dawantu. Mumbanda kaYudeya wahosheli nindi mama yaniwu ntañishi, Yesu, wakooleka. Ilaña  Yesu wamulejeli nindi: “Inehi, adi namuzañalu wowu antu atiyaña izu daNzambi nikudihemba!” (Luka 11:27, 28) Anvwali atiyaña kuwaha kwikala nawanyana, ilaña chuma chasweja kulema hikwikala nawubwambu naYehova muloña kumwowahila dichuma chaletaña muzañalu.

Mwamweni, kwikala nawubwambu naYehova dichuma chinateli kutuzañalesha. Hela chakwila kukala kwaletaña chineñi, ilaña hikunateli kumanisha iwu muzañaluku. Kwambukaku, kuumika kukala nikutwalekahu kwikala nakashinshi kwaletaña muzañalu. (Rom. 5:3-5) Kubombelahu, Yehova wahanaña spiritu yindi kudi antu amukuhwelela nawa muzañalu wekala hakachi kanyikabu yaniyi spiritu. (Ñal. 5:22) Chumichi chatukwashaña kwiluka muloña waweni Masamu 64:10 chiyahoshela nawu: “Waloña wakazañalala mudi Yehova.”

Chumichi chinakulumbulula muloña waweni muhela Diana nimanakwetu John itwatena hakusambila chiyanatwalekihu kwikala namuzañalu hela chakwila adiña nakumona kukala kwakuvulu. Muhela Diana wahosheli nindi: “Nabatamaña mudi Yehova neyi chelañayi mwana nanvwali yindi.” Watiyaña ñahi hakwikala ibwambu daNzambi? Wahosheli nindi: “Wanyinkaña ñovu jankwashaña kutwalekahu kushimwina mpinji yejima namuzañalu.” Manakwetu John watwalekelihu kudikita mumudimu wakushimwina hanyima yakuleka mudimu wakwenda, walumbulwili chuma chamukwashili nindi: “Kufuma tuhu mu 1998 hanyinkeliwu mudimu wakudizisha muShikola yaKudiza Mudimu wawuNkoñi, nadizi chikupu kudiza kwankawami kubadika hakusambila.” Wabombelelihu yuma yeliliyi nañodindi nindi: “Chatupeleleli kuhimpa muloña twakeñeleña kumukalakela Yehova hadi yaaka yayivulu mumudimu wejima wadi kutwinkayi. Tuneli yuma chakadi kuditoñesha.”

Antu amavulu aneteji nawu nsañu yekala haMasamu 64:10 yalala. Chakutalilahu, shinshikenu hadi akwaKristu adisumbula anazatili haBeteli yamuUnited States hadi yaaka kubadika 30. Kuhiñahu, ayitumini kuya nakushimwina hamu neyi apayiniya adimena. Ahosheli nawu: “Muntu nateli kuneña neyi yajimbesha chuma chakeñayi, ilaña hanateli kutwalekahu kuneña haya nyaakaku.” Atachikili kushimwina hamu nachipompelu. Awa adisumbula ahosheli cheñi nawu: “Neyi tunakukeña chuma chidi chejima, twadiña nakulomba. Chitwamweneña kulomba kwetu anakukwakula, twakolesheweleña nawa chumichi chatuleteleleña muzañalu. Chitwashikili, antu amakwawu muchipompelu atachikili wupayiniya nawa twekalili nawatudizi aBayibolu ayedi akeñeli nankashi kudiza chalala.”

Kuhosha hohu walala, chapela wanyi kwikala namuzañalu mpinji yejima, kudi mpinji yikwawu yitunateli kuneña. Ilaña Yehova watukoleshaña namazu onenawu ekala haMasamu 64:10. Nihampinji yitunaneñi, twatela kwiluka netu neyi antu ‘aloña’ atwalekahu kwikala ashinshika hela chakwila anakuhita mukukala muchihandilu chawu, ‘akazañalela mudi Yehova.’ Kubombelahu, twatela kutalila kushikijewa kwachikaninu chaYehova chakwila nawu kwakekala “mawulu amaha, nimaseki amaha.” Antu ejima akekala awanina. Antu jaNzambi ejima “[akatiya] kuwaha nakuzañalala haya nyaka” muloña wayuma yejima yinakuleñayi niyinakuyinkayi.—Isa. 65:17, 18.

Fwikijenu chakekala yuma: twakekala awanina, twakahindukaña tudi nañovu nawa akola kumujimba. Hela chakwila twadiña nakuhita mukukala kwamuchidinyi, yuma yejima yitwahitileñamu hitwakayanukañaku. Nzambi watukoleshaña nindi “yuma yakusambila hiyakayanuka nawaku, hiyakenza nikumuchimaku.” Antu itwakeña ejima akayisañula. Antu amavulu akukañanya nikuchinda akatiya neyi chatiyiliwu anvwali adiña namwana wayaaka 12, wasañwiliwu kudi Yesu: “Azañaleli nankashi.” (Maku 5:42) Nkumininaku, muntu wejima hanu heseki wakekala “waloña” nawa “wakazañalala mudi Yehova.”