Yehova wayilejeli aIsarela kwikala antu ajila. Hakwila yayikwashi kwikala ajila wayilejeli nindi: “Kukimbokaña kudi akwenu nakusenda nsachi chinjila; kwimena mashi amukwenu chinjila; yami Yehova.”—Lev. 19:2, 16.

Mazu akwila nawu “kwimena  . . mukwenu” ayibalumuna chiwahi muchiHeberu, hanu dinu atalisha mudihi? Mukanda wawaYudeya wahosha hamukanda waALevi wahosha nawu: “Awa mazu amuniyi vasi akala kutiyishisha muloña akala kwiluka mwatalishawu munhoshelu yankinji yachiHeberu, aya mukwila nawu ‘bayi wimena, kwimana kwakwihiku.’”

Antu adiza amakwawu atoñojokaña nawu awa mazu anuñañana navasi 15 yahosha nawu: “Kuheñeshaña wuñaji chinjila; kumwakama kazweñi, nanochu chadiyi kazweñi hela muneni, kumulemesha nanochu chadiyi muneni chinjila; chiña wakasompeshaña mukwenu mwaloña hohu.” (Lev. 19:15) Muniyi njila, lushimbi lwekala muvasi 16 lwakwila nawu ‘kwimena mukwenu’ chinjila lwatalishili mukwila nawu antu jaNzambi hiyateleli kwila chuma chatama hakusompa muloña, munsañu jakulanda nakulandulula hela muchisaka nikudila akwawu mabula hamutuku. Hitwatela kwila iyi yumaku, ilaña kudi njila yayiwahi mutwatela kutiyishisha mazu adi muvasi 16.

Talenu mazu akutachikilahu adi muvasi 16. Nzambi nayileji antu jindi nindi kukimbokaña kudi akwenu nakusenda nsachi chinjila. Mwatela kwiluka nenu muntu watandishaña nsachi waletaña yikonkojola. (Yish. 10:19; Mukwa. 10:12-14; 1 Tim. 5:11-15; Yak. 3:6) Muntu watandishaña nsachi himuntu washimunaña nsañu yakutwamba kulonda yamutamishili mukwawu ijina. Muntu watandishaña nsachi nateli kushimuna nsañu yakutwamba hadi mukwawu hela chakwila wukusha wumi wamukwawu muwubanji. Anukenu nenu antu ashimwini nsachi ashimwini nsañu yakutwamba hadi Naboti nawa amwasili malola. (1 Anya. 21:8-13) Eña, muntu washimunaña nsachi nateli kwimena mashi amukwawu neyi chinashimuniwu muchikunku chamuchiyedi chaALevi 19:16.

Kubombelahu, muntu nateli kushimuna nsachi, muloña wakwila wamuhela mukwawu. Ha 1 Yowanu 3:15 twatañañahu nawu: “Muntu wejima wahela manakwindi, himukwakujaha antu, nawa enu mweluka nenu kwosi muntu watwalekañahu nakujaha antu wakatambwila wumi wahaya nyaakaku.” Cheñi, hanyima yakwila Nzambi nahoshi dehi mazu adi muvasi 16, wabombelelihu nindi: “Kumulamina mana kweyi nkunyi mumuchima chinjila.”—Lev. 19:17.

Dichi lushimbi lwekala haALevi 19:16 lwayifumbaña akwaKristu. Twatela kutondolwelaña kwikala nayitoñojoka yatama hela kushimuna nsachi hadi mukwetu. Dichi tukuhosha muwihi netu, neyi “twimenaña mukwetu” dikwila nawu tushimunaña nsañu yakutwamba hadi mukwetu muloña wakwila twamuhela hela twamuhembela nkunyi, chikumwekesha nawu twamuhela. AkwaKristu hiyatela kudihelaku.—Mat. 12:36, 37.