1, 2. Chelili Yesu nayi dehi mwiwulu, atumbanji twindi atela atoñojokeli nawudi?

APOSTOLU aYesu emeni haMpidi yamaOlivi, nakutala mwiwulu. Anafumi tuhu nakumona mukulumpi wawu nawa ibwambu dawu Yesu, anamutwali mwiwulu nawa amubuta nikudi ivu. (Yil.1:9, 10) Yesu wayidizishili, kuyikolesha nikuyilombola hadi yaaka yiyedi. Ichi dinu nayi dehi. Akwiladi?

² Yesu wayilejeli atumbanji twindi nindi: “Mwakekala ayinsahu jami muYerusalema, muYudeya nimuSamariya mwejima nikwakumina iseki dejima.” (Yil. 1:8) Adi kutwesha ñahi kuzata iwu mudimu? Yesu wayilejeli nindi keña atambwili spiritu yajila. (Yil.1:5) Ilaña, kampeni kakushimwina mukaayi kejima kakeñekeleña wakuyilombola nikuzatila hamu. Hakwila nawu yalomboli nikukwasha antu jindi, Yehova wazatishili añimenu jindi amwekanaña. Dichi, hadaha apostolu adinhwili nawu, ‘Komana Yehova wukutonda nlomboli mukwawu?’

3. (a) Chumanyi chafukwiliwu atumbanji ashinshika chelili Yesu yayi mwiwulu? (b) Tukuhanjekadi muchinu chibaaba?

 ³ Chimwahitili kwakwihi nanyilungu yiyedi, atumbanji twaYesu asandujoleli muNsona, kulomba wunlomboli waNzambi, kuhiñahu hiyakutonda Matiyasi kulonda yamusinsi Yudasi Isakaroti wadiña hakachi kawapostolu 12. (Yil. 1:15-26) Muloñadi iku kutonda chikwadiña kwalema kudiwena nikudi Yehova? Matiyasi wazatili mudimu weneni mukuloñesha. * Yesu watondeli apostolu indi bayi neyi yendeña nawu hohuku, ilaña azateña mudimu weneni hakachi kawantu jaNzambi. Mudimwinyi weniwu, nawa Yehova wayikwashili ñahi kuhitila mudi Yesu hakwila nawu awuzati? Yumanyi yadifwanaku yamwekanaña hakachi kawantu jaNzambi makonu? Nawa tunateli kwanuka ñahi “antu anakulombola” mukachi ketu, sweje-e ekala mwizanvu “[da]nduñu wamaana nikashinshi”?—Heb. 13:7; Mat. 24:45.

4. Apostolu niaeluda amakwawu muYerusalema azatileña mudimwinyi?

⁴ Ha Pentekosta 33 C.E., apostolu atachikili kulombola muchipompelu chawakwaKristu. Hanidi ifuku, “Petulu wemeni hamu nanowu 11” nawa washimwinini nsañu yalala yakupuluka kudi mazaza awaYudeya niantu abalumukili kwikala aYudeya. (Yil. 2:14, 15) Antu amavulu ekalili akakwitiya. Kuhiñahu, awa akwaKristu amaha “atwalekelihu kwovwahila ntañishilu yawapostolu.” (Yil. 2:42) Awa apostolu azatishileña chiwahi mali achipompelu. (Yil. 4:34, 35) Adiña nakwakamena antu jaNzambi kuspiritu, ahosheli nawu: “Tukusha maana chikupu kukulomba nikumudimu wakushimwina mazu.” (Yil. 6:4) Nawa enkeli akwaKristu ashikahu mudimu wakushimwina kumaluña amakwawu. (Yil. 8:14, 15) Mukuhita kwampinji, aeluda awayishewa amakwawu adibombeli nawapostolu hakuzata nyidimu yikwawu muchipompelu. Chineli adiña izanvu dalombolaña, adiña nakuhana nshimbi kuyipompelu yejima.—Yil.15:2.

5, 6. (a) Spiritu yajila yakwashili ñahi izanvu dalombolaña? (Talenu mwevulu wakutachikilahu.) (b) Añelu akwashili ñahi izanvu dalombolaña? (c) Izu daNzambi dakwashili ñahi izanvu dalombolaña?

⁵ AkwaKristu amumafuku awapostolu eluki nawu izanvu dalombolaña adilombweleña kudi Yehova kuhitila mudi Nlomboli Yesu. Elukili ñahi chumichi? Chatachi, spiritu yajila yakwashili izanvu dalombolaña. (Yow. 16:13) Spiritu yajila ayihuñunwini hadi akwaKristu awayishewa ejima, ilaña yakwashili hohu apostolu niaeluda amakwawu muYerusalema kuzata mudimu wakulombola. Chakutalilahu, mu 49 C.E., spiritu yajila yakwashili izanvu dalombolaña kufuukula hansañu yakwalama. Yipompelu yalondeleli mwafuukwiliwu nawa “yatwalekelihu kwikala nachikuhwelelu chakola nawa antu avulilileñaku hefuku-hefuku.” (Yil. 16:4, 5) Mumukanda wasonekeliwu haniyi nsañu mwadiña cheñi nsañu yasonekeli izanvu dalombolaña yamwekesheleña nyikabu yaspiritu yaNzambi, yidi neyi kukeña nichikuhwelelu.—Yil. 15:11, 25-29; Ñal. 5:22, 23.

⁶ Chamuchiyedi, añelu akwashili izanvu dalombolaña. Henohu Konelisu kanda yapapatishewi nakwikala kaJentili mukwaKristu  wabula kwalama, kañelu wamulombweli kuya kudi kapostolu Petulu. Chelili Petulu yamushimwini Konelisu niantaña jindi, awa amayala ayichilili spiritu yajila hela chakwila adiña abula kwalama. Chumichi chaletesheli apostolu niamanakwetu amakwawu kulondela kufumba kwaNzambi nakwiteja aJentili abula kwalama kwikala muchipompelu chawakwaKristu. (Yil. 11:13-18) Kubombelahu, añelu akwashili nikwendesha mudimu wakushimwina wadiña nakulombolawu kudi izanvu dalombolaña. (Yil. 5:19, 20) Chamuchisatu, Izu daNzambi dakwashili izanvu dalombolaña. Hela chakwila adiña nakusandujola chalala hela kuhana nshimbi mukuloñesha, awa aeluda awayishewa ayilombweli naNsona.—Yil. 1:20-22; 15:15-20.

7. Muloñadi wutukuhoshela netu Yesu walombweli akwaKristu akusambila?

⁷ Hela chakwila izanvu dalombolaña dadiña nawuswa wakulombola chipompelu, elukili nawu Nlomboli yawu hiYesu. Kapostolu Pawulu wasonekeli nindi: “[Kristu] wayihanini kwikala apostolu.” “Tupameña muyuma yejima mudi Kristu wekala mutu.” (Efwes. 4:11, 15) Chatela aditumbi ijina dakapostolu waya mpuhu, ilaña ‘atumbanji ayiteneneña nawu akwaKristu.’ (Yil. 11:26) Mwamweni, Pawulu welukili kulema “kwakukakela yaaku,” hela kwila yuma yashindamena haNsona, yayinkeliwu kudi apostolu nikudi amayala amakwawu alombweleña. Hela chochu, wabombelelihu nindi: “Ilaña inakukeña enu mwiluki nenu, mutu weyala, [kushilahu tuhu niamamembala amwizanvu dalombolaña] hiKristu; . . . nawa mutu waKristu hiNzambi.” (1 Kor. 11:2, 3) Mwamweni, kuhitila mudi Muntu windi, Yehova, Nzambi, Kristu Yesu wabulaña kumwekanas nawa alemeshawu wadiña nakulombola chipompelu.

8, 9. Mudimwinyi wazatiliyi Manakwetu Russell kufuma tuhu kumakumishilu ayaaka yamuma 1800?

⁸ Kumakumishilu ayaaka 1800, Charles Taze Russell nawalundanindi amakwawu atachikili kusolola kudifukula kwalala kwawakwaKristu. Hakwila nawu chalala chamuBayibolu chishiki mumadimi ashiyashana, atondeli Manakwetu Russell kwikala presidenti waZion’s Watch Tower Tract Society yatachikili kuzatika mu 1884. * Wadiña chikupu kadizi waBayibolu, nawa wamwekesheli hatooka makudi akudifukula kwakutwamba adi neyi Nzambi wekala musatu nawa nawu wumi wafwaña wanyi. Welukili nindi kwosi wakamona chakafuntayi Kristu nawa nindi “mpinji yatoñolawu yawakwanyuza” yakamana mu 1914. (Luka 21:24) Manakwetu Russell wadihanini kuzatisha mpinji, ñovu nimali indi kulejaku amakwawu ichi chalala. Mwamweni, haniyi mpinji, Manakwetu Russell amuzatishili kudi Yehova nikudi mutu wachipompelu.

⁹ Manakwetu Russell wakeñeli wanyi kumulemesha kudi antu. Mu 1896, wasonekeli nindi: “Hitunakukeña kutulemesha, hela kudifukula kudetu muloña wanyikanda yitunakusonekaku; hela kututena nawu Reverend hela Rabi. Hela muntu kuditumba ijina detu.” Kuhiñahu wahosheli nindi: “Iwu himudimu wamuntu wanyi.”

10. (a) Mpinjinyi Yesu yatondeliyi “nduñu wamaana nikashinshi”? (b) Shimunenu Izanvu Dalombolaña chidambuka naWatch Tower Society.

¹⁰ Mu 1919, chimwahitili yaaka yisatu kufuma hafwiliyi Manakwetu Russell, Yesu watondeli “nduñu wamaana nikashinshi.” Muloñadi? Kulonda enkeña amwitala  dindi “yakuda yawu hampinji yatelela.” (Mat. 24:45) Nihayina mpinji, kwadiña kadizanvu kanyanya kawamanakwetu azatilileña hakasanji keneni kuBrooklyn, New York, kaloñesheleña nikwinka yakuda yakuspiritu kudi atumbanji twaYesu. Mazu akwila nawu “izanvu dalombolaña” atachikili kumwekana munyikanda muma 1940, nawa chamwekeneña neyi diwu aWatch Tower Bible and Tract Society. Hela chochu, mu1971, Izanvu Dalombolaña adambwili naWatch Tower Society, aWatch Tower Society hizanvu dacheñi mwekala antu atalaña hayuma hohu bayi neyi yuma yamuNsona. Izanvu Dalombolaña mwadiña amanakwetu awayishewa abulili kwikala mwizanvu daSociety. Makonu, amanakwetu amakwawu “anyikoku acheñi” anakalakali neyi aSociety ninyidimu yikwawu yazatishaña antu jaNzambi kulonda Izanvu Dalombolaña diloñesheña nikuhana nshimbi jakuspiritu. (Yow. 10:16; Yil. 6:4) Kaposhi Kakutalila kaJuly 15, 2013, kashimwini nawu “nduñu wamaana nikashinshi” hikadizanvu kanyanya kawamanakwetu awayishewa ekala Mwizanvu Dalombolaña.

11. Izanvu Dalombolaña dazataña ñahi?

¹¹ Izanvu Dalombolaña dafuukulaña yuma yalema chiwahi. Munjilanyi? Amamembala ahumañanaña mulungu nimulungu, kulonda ahanjekeña chiwahi nawamukuwunda. (Yish. 20:18) Hachaaka-hachaaka ahimpaña cheyamani haniku kubulakana, chineli kwosi membala waMwizanvu Dalombolaña amonañawu nawu wabadika amakwawu. (1 Pet. 5:1) Nawa ahimpaña wucheyamani kumakometi ejima 6 aMwizanvu Dalombolaña hachaaka-hachaaka. Nawa membala wejima mwizanvu wadimonaña wanyi yomweni nindi hinlomboli hadi manakwindi, ilaña wadimonaña neyi “wamwitala,” adishañawu kudi nduñu wamaana nikashinshi nikudi antu azatañawu nawu.

12. Chineli Izanvu Dalombolaña hidahoshaña naspiritu yajilaku nawa hidelaña yuma yaloña mpinji yejimaku, malwihwinyi ehulañawu antu?

¹² Izanvu Dalombolaña hidahoshaña naspiritu yajilaku nawa hidelaña yuma yaloña mpinji yejimaku. Dichi, dinateli kuluwañesha munsañu yakushimuna chalala hela mukuloñesha. Watch Tower Publications Index mwekala kamutu kahoshaña nawu “Beliefs Clarified,” (Kulumbulula Ntiyishishilu yaChalala) kashimunaña kuhimpa kwantiyishishilu yamuNsona kufuma tuhu mu 1870. Hela chochu, Yesu watulejeli wanyi nindi nduñu yindi wamaana nikashinshi wakasonekaña yakuda yakuspiritu yalala. Hanu dinu tunateli kwakulaña lwihu lwaYesu lwakwila nawu: “Indi nduñu wamaana nikashinshi hinyi?” (Mat. 24:45) Wunsahwinyi wunakumwekesha nawu Izanvu Dalombolaña dinakuzata mudimu wadu? Tushinshikenu yuma yisatu yakwashili izanvu dalombolaña damumafuku awapostolu.

13. Spiritu yajila yinakwashi ñahi Izanvu Dalombolaña?

¹³ Wunsahu waspiritu yajila. Spiritu yajila yinakwashi Izanvu Dalombolaña kwiluka chalala chamuNsona chiyabulili kutiyishisha hakusambila. Chakutalilahu, toñojokenu hakulumbulula kwantiyishishilu yachalala kwatenawu muparagilafu yinafumihu. Mwamweni, kwosi muntu niwumu wunateli kuwana nikulumbulula iyi “yuma yakunama yaNzambi”! (Tañenu 1 Akorinda 2:10.) Izanvu Dalombolaña dembujolaña kapostolu Pawulu wasonekeli nindi: “Iyi yuma yitwahoshaña, hitwayihoshaña namazu iyatañishañawu namaana awantuku, ilaña namazu iyatañishañawu naspiritu yajila.” (1 Kor. 2:13) Hanyima yawakwakusekesha  nikwikala mumwidima wakuspiritu hadi yaaka yayivulu, kudihu chuma kubadika hadi spiritu yajila chinateli kulumbulula mukunyakashana ntiyishishilu yayuma yakuspiritu kufuma tuhu mu 1919?

14. Kwesekeja naChimwekeshu 14:6, 7, añelu anakukwasha ñahi antu jaNzambi makonu?

¹⁴ Wunsahu wawukwashu wawañelu. Makonu, Izanvu Dalombolaña didi namudimu weneni wakulombola akwakushimwina mukaayi kejima akubadika ha 8 miliyoni. Muloñadi iwu mudimu chiwunakuyilaku hambidi? Chatachi, añelu anakukwashana. (Tañenu Chimwekeshu 14:6, 7.) Kakavulu, akwakushimwina anashimwini antu adiña nakulomba wukwashu wakuspiritu! * Mudimu wakushimwina nikwilisha atumbanji wunakuyilaku hambidi muloña wawukwashu wawañelu hela chakwila mumatuña amakwawu anakudimbulula.

15. Chambwinyi chekala hadi Izanvu Dalombolaña nawakulumpi jaKristendomu? Shimunenu chakutalilahu.

¹⁵ Kushindamena Hezu daNzambi. (Tañenu Yowanu 17:17.) Talenu chuma chamwekeni mu 1973. Kaposhi Kakutalila kaJune 1 kehwili lwihu nawu: “Komana. . . antu achidi kunwa makanya atelela kupapatishewa?” Ñakwilu yadiña nawu: “Nsona yamwekeshaña nawu ashikilamu wanyi kupapatishewa.” Hanyima yakushimuna nsona jajivulu jahosha haniyi nsañu, Kaposhi Kakutalila kalumbulwili nawu muntu wuchidi kunwa makanya atela kumuhaña  muchipompelu. (1 Kor. 5:7; 2 Kor. 7:1) Kahosheli nawu: “Chumichi chamwekeshaña nawu nabalumuki wanyi mumuchima. Iyi nshimbi yafuma kudi Nzambi, wayihana kuhitila Mwizu dindi dasonekayi.” Kudihu nsakililu yikwawu yinakufwila kushindamena Hezu daNzambi hela chakwila kwila mwenimu kwayikalilaña antu jawu? Mukanda wasonekawu katataka kutalisha hansakililu muUnited States wahosha nawu: “Akulumpi jansakililu anahimpi ntañishilu yawu kulonda yesakani nayuma yakuhwelelawu hakwila abuli kuyishiya kudi amamembala awu.” Neyi Izanvu Dalombolaña dalondelaña Izu daNzambi kulonda diyikwashi kufuukula chatela alondeli yuma yakuhwelelawu antu, hinyi wunakulombola antu jaNzambi makonu?

16. Njilanyi yimu yakwanukilamu Izanvu Dalombolaña?

¹⁶ Tañenu Aheberu 13:7. Izu dazatishawu dakwila nawu “anukenuña” anateli cheñi kudibalumuna nawu “tenenuña.” Dichi, njila yimu yimunateli ‘kwanukilamu antu anakulombola’ hikutena Izanvu Dalombolaña mukulomba kwenu. (Efwes. 6:18) Toñojokenu hamudimu weneni wazatañawu wakuloñesha yakuda yakuspiritu, kulombola mudimu wakushimwina mukaayi kwejima nikuzatisha chiwahi mali ahanañawu amanakwetu niahela. Mwamweni anakukeñeka kuyilombelaku chikupu!

17, 18. (a) Twazatilaña ñahi hamu Nezanvu Dalombolaña? (b) Mudimu wetu wakushimwina wakwashaña ñahi nduñu wakashinshi niYesu?

¹⁷ Hela chochu, hitwatela kwanukaña hohu Izanvu Dalombolaña mumazuku ilaña twatela kulondela munakutulejawu. Izanvu Dalombolaña datulombolaña nanshimbi jasonekañawu munyikanda nijitwatambwilaña hakupompa kwachipompelu, kupompa kwañinza nikupompa kweneni. Kubombelahu, datondaña ankoñi añinza atondaña aeluda muchipompelu. Ankoñi añinza niaeluda anukaña Izanvu Dalombolaña kuhitila mukulondela chikupu nshimbi jayinkañawu. Wejima wetu twamwekeshaña kalemesha kudi Nlomboli yetu Yesu kuhitila mukwovwahila nikutiyilila amayala anakuzatishayi hakutulombola.—Heb. 13:17.

¹⁸ Njila yikwawu mutwanukilaña Izanvu Dalombolaña hikuzata nañovu mumudimu wakushimwina. Pawulu walejeli akwaKristu kwimbujola chikuhwelelu chawantu anakulombola mukachi kawu. Nduñu wakashinshi namwekeshi chikupu chikuhwelelu kuhitila mukukwasha mudimu wakutandisha nsañu yayiwahi yaWanta. Komana mudi hakachi kawanyikoku acheñi anakukwasha awayishewa muniwu mudimu walema? Mwakatiya kuwaha chakahoshayi Nlomboli yenu, Yesu nindi: “Yuma yejima yimwakoñeleli wumu hakachi kanawa anakwami akehelamu, dikwila nawu mwankoñeleli ami.”—Mat. 25:34-40.

19. Muloñadi chimunakufwila kulondela Nlomboli yetu, Yesu?

¹⁹ Yesu chafuntiliyi mwiwulu, watwalekelihu kukwasha atumbanji twindi. (Mat. 28:20) Welukili spiritu yajila, añelu niIzu daNzambi chidamukwashili kulombola hampinji yadiñayi hamaseki. Dichi, makonu nakwashi nduñu washinshika nawukwashu wowumu. AkwaKristu awayishewa ekala munidi izanvu “alondelaña Mwana kaMukoku kwejima kwayañayi.” (Chim. 14:4) Dichi neyi tunakulondela mwatulejañawu, dikwila nawu tunakulondela Nlomboli yetu, Yesu. Katataka yatulomboli kuwumi waha nyaaka. (Chim. 7:14-17) Nawa kwosi nlomboli wawuntu wunateli kutushiika mwenimu!