HA MARCH 26, 1937, amayala ayedi azeyeli adiña nakuya kuSydney, Australia natilaki. Mwahitili chaaka chimu nahafuminiwu muniwu musumba, endeli makilomita akubadika ha 19,300 kumaluña akwakulehi nawa mwatama nyikwakwa. Awa amayala bayi neyi adiña akwakwenda nakutala maluñaku. Arthur Willis naBill Newlands adiña apayiniya adikita atwalili nsañu yayiwahi yaWanta waNzambi kudi antu ashakama kwakulehi, muAustralia.

Mu 1920, Atudizi aBayibolu * antesha muAustralia ashimwinini chikupu munyisumba nimujimbaka. Musumba waInland mwekala antu antesha, hichikalampata chikwesekana nachibalu chakutoha kwetuña daUnited States. Hela chochu, amanakwetu eluka nawu atumbanji twaYesu atela kushimwina hadi yena “kwakumina iseki dejima,” kubombelahu ninidi iluña damuAustralia. (Yil. 1:8) Hanu anateli kuzata ñahi iwu mudimu wakala? Amukuhweleli Yehova nawu wukuyikiswila, dichi azatili nañovu.

Mu 1929, yipompelu yamuQueensland nikuWestern Australia alandili nyotoka yayiwahi yikweti matala kulonda ayi kunidi iluña. Iyi nyotoka ayendesheleña kudi apayiniya akola anateli kwendesha munyikwakwa yatama nawa anateli kuloñesha motoka neyi yinafwi. Awa apayiniya ashikili nikumaluña kwabulawu dehi kushimwina.

Apayiniya abulili mali akulanda nyotoka, azatishileña makinga hakuya kunidi iluña. Chakutalilahu, mu 1932, Bennett Brickell wadiña nayaaka 23 wendeli tukweji tutanu kufuma kuRockhampton, Queensland nakushimwina mumaluña akabeta kaluwunda. Wasendeli nyemba, yakuvwala, yakuda ninyikanda yayivulu hankinga yindi. Neyi mataya akinga anyoña, wamukuhweleleña Yehova chikupu nindi wukumukwasha. Wendesheli kinga yindi kakukumishaku hadi makilomita 320 mumaluña mwafwilileña antu muloña wakubula menji. Manakwetu Brickell wendeli makilomita amavulu chikupu hadi yaaka 30 nakunyeñumuka muAustralia nakinga, honda  ninamotoka. Wayibuzilili antu amuAustralia njila yakushimwinamu nawa wayikwashili kwilisha yipompelu yayivulu yayiha nawa amwilukili chikupu nikumulemesha.

Australia hituña dimu mukaayi didi namaluña mwekala antu antesha, sweje-e maluña ekala kwakulehi nambaka. Ilaña, antu jaYehova azataña nañovu kuwana antu ashakamaña kunawa maluña akwakulehi.

Apayiniya adi neyi Stuart Keltie naWilliam Torrington adikitili chikupu kuzata iwu mudimu. Mu 1933, ahitili muChinkalampata chaSimpson, mwadiña wusekulula wawuvulu, nakushimwina mumusumba waAlice Springs, wekala hakachi ketuña. Manakwetu Keltie wadiña waketuka mwendu watwalekelihu namudimu windi wakushimwina kuzatisha ngameli chelili motoka yindi yifwi. Mudimu wanawa apayiniya watachikili kusoña nyikambu chelili ashimwini muntu wadiña nahotelu kuWilliam Creek, iluña dakwimena sitima damumukala. Charles Bernhardt, mwini Hotelu wadizili chalala, walandishili Hotelu yindi, nawa wazatili wupayiniya hadi yaaka 15 mumaluña akuAustralia akwakulehi nawa mwabula menji.

Apayiniya akusambila akeñekeleña kwikala ahamuka kulonda omiki kukala kwamweneñawu. Hampinji yadiña nakushimwinawu muAustralia kumaluña akwakulehi, Arthur Willis niBill Newlands, itwatena hakusambila, akabakeni hadi nyilungu yiyedi kwenda makilomita  32 muloña njila yatamini nankashi nanvula yanokeli. Mpinji jikwawu, adiña nakuzeya nikusulwila muloña adiña nakushinjika motoka yawu muwusekulula iku kunatati nankashi, kukandwisha hanyihaña yapangikaña muwusekulula. Motoka yawu chiyafwili, endeli hamakinga mafuku amavulu hakwila ashiki mutawuni nawa achiñilili yikuñu yamotoka hadi nyilungu yayivulu hakwila nawu yishiki. Hela chakwila ahitili muniku kukala, atwalekelihu kwikala ashinshika. Arthur Willis, wahosheli mukwihihisha mazu ekala mumagazini yaThe Golden Age nindi: “Kwosi njila yatama hela yayilehi kudi ayinsahu Jindi”

Charles Harris payiniya wunashimbuli walumbulwili nindi iku kukala kwahitilimu kwamukwashili kukundama kwakwihi naYehova. Wabombelelihu nindi: “Chihandilu chawahaña neyi muntu wudi natuyuma twanti. Neyi Yesu wadihanini kukama hanji, ninetu twatela kwila chochimu hakwila tuzati chiwahi mudimu watwinkawu.” Ichi dicheliliwu apayiniya amavulu. Tunakuyihameka hanyidimu yawu yazatiliwu nañovu, nsañu yayiwahi yashikili kumaluña ejima amunidi ituña, akwashili antu amavulu kwiluka Wanta waNzambi.