Ifutu Danyiloña —‘Chawaana Chabadika Kuwaha’ Kufuma Kudi Tata
“Yuma yayiwahi yahanañawu yejima, yalala yejima, yasulukaña kwiwulu kudi Tata.”—YAK. 1:17.
TUMINA: 148, 109
1. Ifutu danyiloña datwikwasha kwikala nankiswinyi?
Mulambu wefutu danyiloña daYesu Kristu datwinka kukooleka kwakuvulu. Ntanjikilu yefutu danyiloña yenzununa njila kudi anyana kaAdama akeña kuloña nawa akekala muchisaka chaNzambi. Ifutu danyiloña datukwasha cheñi kwikala nakukooleka kwakushakama namuzañalu haya nyaaka. Nawa, ifutu danyiloña daKristu datwilila yuma yayivulu kubadika hohu nkisu jakatambwilawu antu ovwahila kumbidi. Yesu chadihaniniyi kufwa iku washinshika kudi Yehova, wahakwililiku chiyuulu chaNzambi.—Heb. 1:8, 9.
2. (a) Mukulomba kwaYesu mwekala mazwinyi amwekeshaña nawu wahakwiliku Wanta waNzambi? (Talenu mwevulu wakutachikilahu.) (b) Tukuhanjekadi muchinu chibaaba?
2 Henohu kunashali yaaka yiyedi hakwila nawu Yesu yafwi nawa yahani mulambu wefutu danyiloña, walejeli atumbanji twindi kulomba nawu: “Tata yetu wekala mwiwulu, ijina deyi diikali dajila. Wanta weyi winzi. Nkeñelu yeyi ayili hamaseki Mat. 6:9, 10) Hakwila nawu tumwekeshi kusakilila chikupu hefutu danyiloña, tutalenu chidakundama kukujilika ijina daNzambi, chiyuulu chaWanta waNzambi nikushikija nkeñelu yaNzambi.
neyi chayilañawu mwiwulu.” (“IJINA DEYI DIIKALI DAJILA”
3. Ijina daYehova damwekeshañadi, nawa Satana wasawili ñahi idi ijina dajila?
3 Yesu watachikili nakujilika ijina daNzambi mukulomba kwindi kwachitalilu. Ijina daYehova damwekeshaña kulema, wukeleñi nikujila Kwindi. Mukulomba kwindi kukwawu, Yesu wamuteneni Yehova nindi: “Tata Wajila.” (Yow. 17:11) Chineli Yehova wajila, yishina ninshimbi yindi yekala yajila. Hela chochu, mwitempa daEdeni, Satana wajinokeli wuswa waNzambi wakuyuula antu. Satana wasawili ijina daNzambi kuhitila mukumutwambila Yehova.—Kutach. 3:1-5.
4. Yesu niyena wajilikili ñahi ijina daNzambi?
4 Munjila yikwawu, Yesu wakeñeli chikupu ijina daYehova. (Yow. 17:25, 26) Yesu niyena wajilikili ijina daNzambi. (Tañenu Masamu 40:8-10.) Yesu chamwekesheliyi kashinshi hadiñayi hamaseki, wamwekesheli nindi chachiwahi nawa chaloña Yehova kwinka yileñaleña yindi yikweti maana nshimbi. Yesu watwalekelihu kwikala washinshika kudi Tata yindi wamwiwulu nihampinji yamujahileñawu kudi Satana. Yesu chashinshikiliyi, wamwekesheli nindi muntu wawanina nateli kwovwahila nshimbi jaNzambi jaloña.
5. Ninetu tunateli kumwekesha ñahi netu twajilika ijina daNzambi?
5 Tunateli kumwekesha ñahi netu twajilika ijina daYehova? Kuhitila muyilwilu yetu. Yehova wakeñaña nindi twikali ajila. (Tañenu 1 Petulu 1:15, 16.) Dichi twatela kudifuukula kudi Yehova hohu nikumwovwahila namuchima wetu wejima. Hela chakwila anakutukabisha, twatela kulondela yishina ninshimbi yindi yaloña. Neyi twilaña yuma yaloña, tukutoñeka chejeji nakuleta kalemesha hejina daYehova. (Mat. 5:14-16) Chineli twajila, chihandilu chetu chamwekeshaña nawu nshimbi yaYehova yayiwahi nawa netu Satana watwambaña. Wejima wetu twaluwañeshaña, neyi tuluwañesha, twatela kubalumuka mumuchima nakuleka yilwilu yamuneñeshaña Yehova.—Mas. 79:9.
6. Muloñadi Yehova chatumwenañayi nindi twaloña henohu twawanina wanyi?
6 Kushindamena hamulambu waKristu, Yehova wanakenaña nshidi jawantu amukuhwelela. Wetejaña antu adihanaña kudi yena kwikala chindi akwakudifukula indi. Yehova watenaña akwaKristu awayishewa aloña nindi anyanindi nawa “anyikoku amakwawu” aloña nindi amabwambu jindi. (Yow. 10:16; Rom. 5:1, 2; Yak. 2:21-25) Hela chochu, ifutu danyiloña datukwashaña kwikala nañimenu yayiwahi naTata yetu nikujilika ijina dindi.
“WANTA WEYI WINZI”
7. Nkiswinyi yitwakatambwila muchiyuulu chaWanta muloña wefutu danyiloña?
7 Mukulomba kwindi kwachitalilu, Yesu walombeli cheñi kudi Nzambi nindi: “Wanta weyi winzi.” Hanu dinu ifutu danyiloña dinakundami ñahi kuWanta waNzambi? Ifutu danyiloña daletesha kwikali a 144,000 akayuula neyi anyanta niatupristu mwiwulu hamu naKristu. (Chim. 5:9, 10; 14:1) Yesu niantu akayuulayi nawu, akekala anyuuli aWanta waNzambi, akashimuna nkisu yinafumi mwifutu danyiloña kudi antu ovwahila muyaaka ikombakaji. Iseki akadilisha kwikala paradisa, antu ashinshika ejima akekala awanina nawa chisaka chaNzambi chamwiwulu chakanuñañana nachisaka chahamaseki. (Chim. 5:13; 20:6) Yesu wakamuchika kapela kumutu nikufumishahu kudikaña kwaSatana.—Kutach. 3:15.
8. (a) Yesu wakwashili ñahi atumbanji twindi kwiluka kulema kwaWanta waNzambi? (b) Tunateli kukwasha ñahi Wanta makonu?
8 Hampinji yadiñayi hamaseki, Yesu wakwashili atumbanji twindi kwiluka kulema kwaWanta waNzambi. Hanyima yakumupapatisha hohu, Yesu washimwinini “nsañu yayiwahi yaWanta waNzambi” kwejima. (Luka 4:43) Mumazu indi akukumishaku alejeliyi atumbanji twindi henohu kanda yafunti mwiwulu, Yesu wayilejeli kushimwina “kwakumina iseki dejima.” (Yil. 1:6-8) Kuhitila mumudimu wakushimwina Wanta, antu mukaayi kejima adi nakukooleka kwakudiza hefutu danyiloña kulonda akayiyuuli kudi Wanta waNzambi. Makonu, twakwashaña Wanta kuhitila mukukwasha amanakwaKristu anenkiwu mudimu wakushimwina nsañu yayiwahi yaWanta mukaayi kejima.—Mat. 24:14; 25:40.
“NKEÑELU YEYI AYILI”
9. Muloñadi chitukukuhwelela netu Yehova wakashikija nkeñelu yindi kudantu?
9 Yesu watalishili mudihi hakuhosha nindi: “Nkeñelu yeyi ayili”? Yehova diyi Nleñi. Neyi yashiika chuma, chidi neyi kwiji wachila dehi. (Isa. 55:11) Waketeja wanyi kudikaña kwaSatana kukañeshi kushikija nkeñelu Yindi kudi antu. Kufuma tuhu kutachi, Yehova wakeñeleña nindi heseki henzali anyana kaAdama naEva awanina. (Kutach. 1:28) Neyi Adama naEva afwili chakadi kuvwala nyana, nkeñelu yaNzambi yakuwanisha iseki dejima nanyanawu yadi kushikijewa wanyi. Dichi, chelili Adama naEva avulumuni, Yehova wayitejeli kuvwala anyana. Kuhitila mwifutu danyiloña, Nzambi wenka antu amukuhwelela kukooleka kwakwikala awanina nikushakama haya nyaaka. Yehova wakeña antu, nawa wakeña nindi antu ovwahila akashakameña neyi chadiña nkeñelu yindi.
10. Ifutu danyiloña dakwashaña ñahi antu afwa?
10 Indi yihita yawantu amavulu afwili chakadi kwikala nakukooleka kwakumwiluka Yehova nikumukalakela? Ifutu danyiloña dakaletesha antu afwa dehi akayisañuli. Tata yetu wamwiwulu wukweti kukeña wakayisañula nikuyinka kukooleka kwakudiza nkeñelu yindi nikushakama haya nyaaka. (Yil. 24:15) Yehova wakeñaña nindi antu ejima ahandeña bayi kufwaku. Chineli diyi Nsulu yawumi, wekalaña Tata yawantu ejima asañukaña. (Mas. 36:9) Dichi, Yesu welili chiwahi kutuleja kulombaña netu: “Tata yetu wekala mwiwulu.” (Mat. 6:9) Yehova namwinki Yesu mudimu walema wakusañula afu. (Yow. 6:40, 44) MuParadisa, Yesu wakashikija mudimu windi hamu neyi “kusañuka niwumi.”—Yow. 11:25.
11. Nkeñelwinyi yikwetiyi Nzambi kudi “izaza deneni”?
11 Yehova wamwekeshaña wanyi chisambu kudi antu antesha hohu, muloña Yesu wahosheli nindi: “Muntu wejima welaña nkeñelu yaNzambi, yenowu diyi manakwami, diyi muhelami nawa diyi mama yami.” (Maku 3:35) Nzambi wakeñaña nindi antu amavulu ‘amwizaza deneni’ afuma kunyuza, kunyichidi yejima nikumadimi ejima kulonda ekali akwakudifukula indi. Antu akuhwelelaña mumulambu waKristu nikwila nkeñelu yaNzambi akekala hadi antu akahosha nawu: “Wamwinu wetu wafuma kudi Nzambi yetu washakama hetanda nikudi Mwana kaMukoku.”—Chim. 7:9, 10.
12. Kulomba kwachitalilu kwamwekeshaña ñahi nkeñelu yaYehova kutalisha kudi antu ovwahila?
12 Nkeñelu yaYehova kudi antu ovwahila twayiwanaña mukulomba kwaYesu kwachitalilu. Kwesekeja naniku kulomba, twatela kuzata nañovu kujilika nikulemesha ijina daYehova. (Isa. 8:13) Ijina daYesu daya mukwila nawu “Yehova Diyi Chamwinu,” nawa wamwinu wetu wafuma kwifutu danyiloña waletaña kalemesha nimpuhu hejina daYehova. Ifutu danyiloña dikazatisha Wanta waNzambi kwilila yuma yayiwahi antu ovwahila. Mwamweni, kulomba kwachitalilu kwamwekeshaña nawu kwosi chuma chinateli kukañesha nkeñelu yaNzambi kushikijewa.—Mas. 135:6; Isa. 46:9, 10.
MWEKESHENU KUSAKILILA HEFUTU DANYILOÑA
13. Neyi tupapatishewa, twamwekeshañadi?
13 Njila yimu yitwamwekeshelañamu kusakilila hefutu danyiloña hikudihana kudi Yehova kushindamena hachitwakuhwelela mwifutu danyiloña nikupapatishewa. Chipapatishu chetu chamwekeshaña nawu “tudi antu jaYehova.” (Rom. 14:8) Chamwekeshaña cheñi nawu tunakumulomba Yehova kulonda twikali nachinleji chachiwahi. (1 Pet. 3:21) Yehova wakulaña iku kulomba kuhitila mukututookesha namashi amulambu waKristu. Tunakuhweleli chikupu netu wakatwinka yuma yejima yatushiikayi.—Rom. 8:32.
Njilanyi mutwamwekeshelaña kusakilila hefutu danyiloña? (Talenu maparagilafu 13, 14)
14. Muloñadi chitwatelela kukeñela akwetu?
1 Yow. 4:8-11) Neyi tukeña akwetu tukumwekesha netu tunakukeña kwikala “anyana kaTata [yetu] wekala mwiwulu.” (Mat. 5:43-48) Lushimbi lwakukeña mukwetu dilushimbi lwamuchiyedi halushimbi lwakukeña Yehova. (Mat. 22:37-40) Njila yimu yitwamwekeshelañamu kukeña kudi akwetu hikwovwahila lushimbi lwakushimwina nsañu yayiwahi yaWanta waNzambi. Neyi tukeña akwetu antu, tukumwekesha kulema kwaNzambi. Neyi twovwahila lushimbi lwakukeña akwetu sweje-e amanakwetu, kukeña kwaNzambi ‘kukuwanina mudi etu.’—1 Yow. 4:12, 20.
14 Njilanyi yikwawu yitunateli kumwekeshelamu kusakilila hefutu danyiloña? Chineli Yehova welaña yuma yejima muloña wakukeña, wakeñaña nindi antu ejima adifukulaña kudi yena ekali nachilwilu chakukeña. (IFUTU DANYILOÑA DATULETELAÑA “YILAAKA YAKUHIZUMWISHA” YAFUMAÑA KUDI YEHOVA
15. (a) Nkiswinyi jitwatambwilaña chayinu mpinji kufuma kudi Yehova? (b) Nkiswinyi jitunakuchiñeja?
15 Tunateli kumwekesha chikupu netu twanakenaña neyi tukuhwelela mwifutu danyiloña. Izu daNzambi datukana nawu nshidi jetu anateli ‘kujijimañesha.’ (Tañenu Yilwilu 3:19-21.) Neyi chitwadiza dehi hakusambila, Yehova watenaña ambuñindi awayishewa naspiritu yindi nindi anyanindi kushindamena hefutu danyiloña. (Rom. 8:15-17) Etu amavulu twekala hadi “anyikoku acheñi” chidi neyi Yehova wasoneka majina etu hasetifiketi yakukundaminamu kudi yena. Neyi tunekali dehi awanina nawa tunahiti dehi hakweseka kwakukumishaku, Yehova wakatutambwila neyi anyanindi ahamaseki akeñewa, munjila yikwawu chidi neyi wakasayina hasetifiketi. (Rom. 8:20, 21; Chim. 20:7-9) Kukeña kwaYehova kwakeñayi anyanindi kwahaya nyaaka. Nkisu jakaleta ifutu danyiloña yahaya nyaaka. (Heb. 9:12) Ichi chawaana chakamana wanyi. Kwosi muntu wunateli kututambula.
16. Ifutu danyiloña datwikuula munjilanyi?
16 Kwosi chuma chinateli kwilayi Diyabolu hakwila nawu yakañeshi antu abalumukaña chikupu munyichima kwikala muchisaka chaYehova. Yesu wenjili hamaseki nakutufwila “kamu hohu.” Ilaña ifutu danyiloña adifwetela haya nyaaka. (Heb. 9:24-26) Dafumishahu kutama kwejima kutwaswana kudi Adama. Twasakililaña hamulambu waKristu, muloña watufumisha kuwuduñu wakaayi kaSatana nawa hitwachiinaña kufwaku.—Heb. 2:14, 15.
17. Kukeña kwaYehova kwayisañumunaña kwiladi?
17 Yikaninu yaNzambi yalala. Neyi chochabulaña kukañanya nshimbi jindi jayuulaña yileñaleña, Yehova hamba kakañanyaku. Wahimpaña wanyi. (Mal. 3:6) Yehova watwinka chawaana chawumi niyuma yikwawu yayivulu. Watwinka kukeña kwindi. “Tuneluki nikwiteja kukeña kwatukeñayi Nzambi. Nzambi hikukeña.” (1 Yow. 4:16) Iseki dejima dakekala paradisa mwakekala yuma yayiwahi nawa muntu wejima wakamwekeshaña kukeña kwaNzambi. Dichi tudibombenu nayileñaleña yaNzambi yashinshika yamwiwulu nakuhosha netu: “Kudi Nzambi yetu kwiikali kuhameka, kulema, maana, kusakilila, kalemesha, ñovu niwuswa haya nyaaka nanyaaka. Ameni.”—Chim. 7:12.