1, 2. (a) Yehova watulejadi? (b) Nsona yaIsaya 46:10, 11 ni 55:11 yatukwashaña ñahi kuchiñeja?

MAZU akutachikilahu muBayibolu apela ilaña alema akwila nawu: “Hatachi Nzambi waleñeli nimawulu nimaseki.” (Kutach. 1:1) Hayuma yayivulu yaleñayi Nzambi, twamona hohu yuma yantesha nawa yuma yitweluka yidi neyi luzwizu, chejeji niñovu yakokaña hitwayiluka chikupuku. (Mukwa. 3:11) Ilaña, Yehova watuleja chuma chaletesheli yaleñi iseki niantu. Iseki adileñeli kulonda mushakameña amayala nawambanda aleñeliwu muchinfwana chaNzambi. (Kutach. 1:26) Adi kwikala anyanindi nawa Yehova wadi kwikala Tata yawu.

² Nkeñelu yaYehova yaluwankeni neyi chalumbululawu mukapetulu kamuchisatu kamukanda waKutachika. (Kutach. 3:1-7) Hela chochu, iku kukala kwadiña kweneni wanyi kwadi kukañanyayi kumanisha. Kwosi muntu wunateli kumukañesha Yehova. (Isa. 46:10, 11; 55:11) Dichi, tunateli kukuhwelela netu nkeñelu yaYehova yikashikijewa hampinji yatoñolayi!

3. (a) Chalalanyi chalema chitweluka chamuBayibolu? (b) Muloñadi chitunakudizila cheñi iyi nsañu? (c) Malwihwinyi itukuhanjeka?

³ Chakadi nikujina, tweluka chalala chamuBayibolu chahosha hadi Nzambi chaleñeleliyi iseki niantu nimudimu  wazatañayi Yesu Kristu hakushikija nkeñelu yaNzambi. Iyi yuma yalema chikupu nawa hadaha diyi yitwatachikili kudiza hampinji yitwatachikili kudiza Izu daNzambi. Ninetu, twatela kukwasha antu kulonda eluki ichi chalala. Lelu, chitunakudiza chinu chibaaba, tunakufwila kutambika antu amavulu kuChanukishu chakufwa kwaKristu. (Luka 22:19, 20) Akenza, akadiza yuma yayivulu kutalisha hankeñelu yaNzambi. Chineli kunashali mafuku antesha naChanukishu, twatela kuloñesha malwihu amawahi akasañumuna mpwila yawatudizi etu aBayibolu niantu amakwawu kulonda akenzi kunichi chidika chalema. Tukuhanjeka malwihu asatu: Nzambi waleñelelidi iseki niantu? Chumanyi chaletesheli iyi nkeñelu yibuli kushikijewa? Nawa muloñadi mulambu waYesu wefutu danyiloña chiwekalila nsapi yakwenzununa chisu chakushikija nkeñelu yaNzambi?

4. Yileñaleña yamwekeshaña ñahi kulema kwaYehova?

⁴ Yehova hiNleñi wabadika. Yuma yejima yaleñayi yakuhayamisha. (Kutach. 1:31; Yere. 10:12) Tukudizilaku yumanyi kulubanji lwekala muyileñaleña nichayitanjikawu mundonda? Neyi tunakutala yileñaleña yaYehova yanyanya niyamaneni chiyazataña nkeñelu yindi, chatwizañaleshaña. Hinyi wabulaña kuhayama chazataña masewuzi amuntu, chamwekanaña nkemba neyi navwaliki, hela chamwekanaña itena neyi hidikuhuma? Twatiyaña kuwaha naniyi yuma muloña dichayileñeleliwu.—Tañenu Masamu 19:1; 104:24.

5. Yehova weladi hakwila nawu yuma yejima yizateña munjila yayiwahi?

⁵ Neyi chamwekeshaña yileñaleña, yelaña yuma kwesekeja nachayileñayi Yehova. Wenkaku nshimbi kulonda yuma yejima yizateña munjila yayiwahi. (Mas. 19:7-9) Hela chochu, yileñaleña yejima yekala neluña dayu nimudimu wuyazataña kwesekeja nanshimbi munkeñelu yaNzambi. Yehova washimuna nshimbi jakwashaña yileñaleña yindi kuzatila hamu. Dichi, nshimbi yekala nañovu yakokaña yakwata mpepela kwakwihi neseki, yayuulaña tuluñalwiji nawa yakwashaña yuma yejima yekala hamaseki. Yileñaleña yejima kubombelahu niantu yendaña nikwila yuma kwesekeja nachayileñawu. Mwamweni, iyi yuma chayishawu mundonda chamwekeshaña nawu Nzambi wekala nankeñelu kutalisha kwiseki niantu. Neyi tudi mumudimu wakushimwina, kwila tulejaku antu Waleñeli iyi yuma nehi?—Chim. 4:11.

6, 7. Yehova wayinkeli aAdama naEva yawaana yamuchidinyi?

⁶ Nkeñelu yaYehova yadiña yakwila nawu antu akashakameña hamaseki haya nyaaka. (Kutach. 1:28; Mas. 37:29) Wayinkeli Adama naEva yawaana yayiwahi yayivulu kulonda ashakameña chiwahi. (Tañenu Yakoba 1:17.) Yehova wayinkeli wuswa wakudifuukwila, wuswa wakutoñojoka nimuchima wakukeña kulonda adikundeña wumu namukwawu. Nleñi wahosheli naAdama nakumuleja chatela kumwovwahilayi. Adama welukili cheñi chakudakamena yomweni nikuhemba atunyama niiseki. (Kutach. 2:15-17, 19, 20) Yehova waleñeli cheñi Adama naEva namaana akutompa, kwiluka, kumona, kutiya nikwepula ivumba. Yuma yejimiyi yadi kuyikwasha kushakama chiwahi muParadisa. Awa eyala namumbanda atachi adiña nakukoleka kwakushakama haya nyaaka  nakuzata nyidimu yayiwahi nikwiluka yuma yayivulu.

⁷ Nzambi wadiña nankeñelwinyi cheñi? Yehova wayileñeli aAdama naEva nawuswa wakuvwala anyana awanina. Nzambi wakeñeleña nindi anyana kaAdama akavwaleña anyana kushika nimpinji yadi kenzeshawu iseki. Wakeñeleña Adama naEva nianvwali adi kuhiñahu kukeña anyanawu neyi Yehova chakeñeliyi anyanindi atachi awanina. Iseki didateleleli kwikala mukala wawu haya nyaaka.—Mas. 115:16.

8. Muloñadi chashililiku lushimbi lwekala haKutachika 2:16, 17?

⁸ Iyi nkeñelu yashikijeweli wanyi neyi chakeñeleñayi Nzambi. Muloñadi? Yehova wayinkeli aAdama naEva nshimbi yadi kumwekesha neyi elukili mwakumina wuswa wawu. Wahosheli nindi: “Nyitondu yamwitempa yejima wukudya tuhu. ilaña mutondu wakwiluka nachu niyayiwahi niyatama eyi bayi wakawidyaku; muloña ifuku diwakadya chalala wakafwa.” (Kutach. 2:16, 17) Chadiña chakala wanyi kudi aAdama naEva kwiluka iyi nshimbi; hela kuyovwahila. Adiña nayakuda yayivulu yiyadi nikukañanya kudawu.

9, 10. (a) Satana watwambili nindidi hadi Yehova? (b) Adama naEva afuukwilihu hodi? (Talenu mwevulu wakutachikilahu.)

⁹ Satana Diyabolu wazatishili kapela kumudimba Eva kulonda yabuli kumwovwahila Tata yindi, Yehova. (Tañenu Kutachika 3:1-5; Chim. 12:9) Satana watwambili nindi anyana kaNzambi ahamaseki ayitejeli wanyi ‘kudya kunyitondu yamwitempa.’ Chidi neyi wahosheleña nindi: ‘Kwila mwila yuma yimunakeñi nehi?’ Kuhiñahu, wamudimbili chikupu nindi: “Chalala, himwakafwaku.” Dichi wesekeli kumushinjila Eva nindi watela wanyi kumwovwahila Nzambi chahosheliyi nindi: “Nzambi neluki nindi ifuku dimukudya, mesu enu akatona.” Satana wahosheleña nindi Yehova wakeñeleña wanyi wena kuda nyikabu muloña yikuyitonesha. Kuhiñahu, Satana wayishiikili mwakutwamba nindi: “Mwakekala neyi chadiyi Nzambi, mwakeluka niyayiwahi niyatama.”

¹⁰ Adama naEva ateleleli kufuukulahu chakwila. Komana akumwovwahila Yehova tahindi akutiyilila kapela? Afuukwilihu kubula kumwovwahila Nzambi. Chabuliliwu kumwovwahila, adikañili hamu naSatana. Amukaanini Yehova kwikala Tata yawu nikuyikiña nachiyuulu chindi.—Kutach. 3:6-13.

11. Muloñadi Yehova chababeshelañayi akwakudikaña?

¹¹ Adama naEva ekalili abula kuwanina chadikañiliwu naYehova. Kubombelahu, kudikaña kwawu kwaletesheli adambuli naYehova muloña ‘mesu indi atooka abulaña kutwesha kubanjila yatama.’ Dichi, kwila ‘yeteja yuma yaheña nehi.’ (Hab. 1:13) Neyi wayilekeli, yileñaleña yejima yamumawulu niyahamaseki yadi kuluwankana. Nawa neyi Nzambi welilihu chuma wanyi hanshidi yamwekeni muEdeni, yileñaleña yadi kumukuhwelela wanyi. Ilaña Yehova welaña yuma yejima yashiikayi, wahimpaña wanyi. (Mas. 119:142) Dichi, chayinkeliwu Adama naEva wuswa wakudifuukwila hichatalishili mukwila nawu adikañi naNzambiku. Afwili nakufunta kulunkuñu kuyayifumishiliwu chadikañiliwu naYehova,.—Kutach. 3:19.

12. Chumanyi chayimwekeneni anyana kaAdama?

 ¹² Chelili Adama naEva adii kunona mukabu, adifumushili muchisaka chaNzambi. Nzambi wayihañili muEdeni nawa adiña nakuchiñeja kwakufunta cheñiku. (Kutach. 3:23, 24) Yehova welili mwenimu muloña dichuma chafuukwiliwu. (Tañenu Kuhituluka 32:4, 5.) Muntu wukutwesha wanyi kumwekesha yilwilu yaNzambi yawanina muloña wakubula kuwanina. Adama wajimbesheli chihandilu chindi chakumbidi nawa wasambwishili anyanindi kubula kuwanina, nshidi nikufwa. (Rom. 5:12) Waletesheli anyanindi abuli kwikala nakukooleka kwakushakama haya nyaaka. Kubombelahu, Adama naEva adi kwikala wanyi namwana hela ejikulwawu awanina. Kufuma tuhu hadikañiluwu Adama naEva naNzambi, Satana Diyabolu natwalekihu kudimba antu kushika nikulelu.—Yow. 8:44.

13. Yehova nakukeña antu kwiladi?

¹³ Hela chochu, Nzambi wuchidi wakeña antu. Hela chakwila Adama naEva adikañili, Yehova nakukeña antu ekali nawubwambu wawuwahi nayena. Hakeñaña antu kufwaku. (2 Pet. 3:9) Hanyima yakuvulumuna, Nzambi waloñesheli njila yakukwashilamu antu kwikala nawubwambu wawuwahi nayena hampinji yoyimu alondeleña nshimbi jindi jaloña jenkeliku. Yehova welili ñahi mwenimu?

14. (a) Kwesekeja namukanda waYowanu 3:16 chumanyi cheliliyi Nzambi hakwila nawu antu ekali nawubwambu wawuwahi nayena? (b) Malwihwinyi itwatela kuhanjeka nawantu amwekeshaña mpwila?

¹⁴ Tañenu Yowanu 3:16. Antu amavulu itwatambikaña kuChanukishu eluka iyi nsona kumutu. Ilaña lwihu ludi lwakwila nawu, mulambu waYesu watukwashaña ñahi kuchiñeja wumi wahaya nyaaka kumbidi? Kampeni yakutambika antu kuChanukishu, Chanukishu chacheni nikufuntila kudi awanikiliku kwatukwashaña kwikala nampinji yakukwasha adi nampwila kwiluka ñakwilu yanilu lwihu lwalema. Anateli kutiya kuwaha chatachikawu kwiluka maana nikukeña kwaYehova kwamwekesheliyi hakutwinka ifutu danyiloña. Yikumanyi yahosha hamulambu wefutu danyiloña yitukuhanjekahu?

15. Yesu wambukili ñahi naAdama?

¹⁵ Yehova wahanini muntu wawanina kulonda yekali mulambu wefutu danyiloña. Iwu muntu wawanina watela kwikala washinshika kudi Yehova nawa wunakufwila kuhana wumi windi kulonda yakuuli antu abula kuwanina. (Rom. 5:17-19) Yehova watuntulwili wumi wachileñaleña chatachi kufuma mwiwulu nakwinza hamaseki. (Yow. 1:14) Dichi Yesu wekalili wawanina neyi chadiñayi Adama. Ilaña kwambukaku naAdama, Yesu wamwovwahilili Yehova neyi chakeñeleña muntu wawanina kumwovwahila. Nihampinji yadiñayi mukweseka kweneni, Yesu wavulumwini wanyi hela kufumpa nshimbi jaNzambi.

16. Muloñadi ifutu danyiloña chidekalila chawaana chalema?

¹⁶ Chineli wadiña wawanina, Yesu wakuulili antu kunshidi nikukufwa kuhitila mukuyifwila. Wadiña muntu wawanina, washinshika nawa wamwovwahila Nzambi, chuma chateleliyi kwilayi Adama. (1 Tim. 2:6) Yesu wekalili mulambu wefutu danyiloña denzulwili njila yakukuulilamu “antu amavulu,” amayala ambanda nianyana. (Mat. 20:28) Mwalala, ifutu danyiloña diyi nsapi yakwenzunwina chisu chakushikija nkeñelu yaNzambi yatachi. (2 Kor. 1: 19, 20) Ifutu danyiloña dakwashaña antu ashinshika kwikala nakuchiñeja kwakwikala nawumi waha yanyaaka.

17. Ifutu danyiloña datwinka kukoolekanyi?

¹⁷ Yehova waloñesheli ifutu danyiloña hela chakwila chamuneñesheli. (1 Pet. 1:19) Walemesha chikupu antu chakwila wafwilileña kuhana mwanindi wumu hohu wakeñayi kulonda yatufwili. (1 Yow. 4:9, 10) Munjila yikwawu, Yesu wekalili tata yetu watachi bayi Adama. (1 Kor. 15:45) Yesu welili yuma yayivulu kubadika hakutwinka wumi; watwinka kukooleka kwakufunta muchisaka chaNzambi. Eña, kushindamena hamulambu waYesu, Yehova weteja antu kufunta muchisaka chindi chakadi kufumpa nshimbi jindi. Komana twazañalalaña wanyi neyi kutoñojoka mpinji yakela antu ejima ashinshika anekali awanina? Kwakekala kunuñañana kwakweni hakachi kachisaka chamwiwulu nichahamaseki. Dikwila nawu, twakekala anyana kaNzambi chikupu.—Rom. 8:21.

18. Mpinjinyi yakekalayi Yehova “yuma yejima kudi antu ejima”?

¹⁸ Kudikaña kwaSatana kwamukañesheli wanyi Yehova kukeña antu hela kukañesha antu abula kuwanina kwikala ashinshika kudi yena. Yehova wakakwasha anyanindi kwikala aloña chikupu kuhitila mumulambu wefutu danyiloña. Toñojokenu chihandilu chichakekala neyi ejima “amonaña Mwana nikumukuhwelela” anakuhanda haya nyaaka. (Yow. 6:40) Muloña wakukeña nimaana, Yehova wakelisha chisaka chawantu kwikala chawanina, neyi chadiña nkeñelu yindi. Yehova, Tata yetu, dihu hakekalayi “yuma yejima kudi antu ejima.”—1 Kor. 15:28.

19. (a) Kumwekesha kusakilila hefutu danyiloña kwatela kutuletesha kwiladi? (Talenu chikasha chinakwila nawu “Tutwalekenuhu Kukeñakeña Antu Atelela.”) (b) Yumanyi yitwakadiza hefutu danyiloña muchibaaba chinalondelihu?

¹⁹ Kumwekesha kusakilila hefutu danyiloña kukuletesha tukwashi akwetu niwena akaheteli munichi chawaana. Antu atela kwiluka nawu ifutu danyiloña diyi njila yakukeña yazatishayi Yehova hakuyinka antu kuchiñeja kwakushakama haya nyaaka. Hela chochu, mulambu wefutu danyiloña wazata yuma yayivulu. Chibaaba chinalondelihu tukashinshika hamulambu waYesu chiwamanisha kukala kwaleteli Satana mwitempa daEdeni.