1, 2. (a) Muloñadi chitunateli kudizila kudi Nowa, Danyeli niYoba? (b) Mpinjinyi yasonekeliyi Ezekeli mazu ekala haEzekeli 14:14?

KOMANA munakumona kukala kudi neyi yikatu, kubula mali hela makabisha? Komana mpinji yikwawu mwaneñaña mumudimu waYehova? Neyi dimu, dizilenu kudi Nowa, Danyeli niYoba. Adiña awanina wanyi nawa amweneña kukala kutwamonaña ninetu, nawa kukala kukwawu kwashileña wumi wawu hakatoña. Hela chochu, ahembeli kashinshi kawu nawa Nzambi wayitondeli kwikala yakutalilahu yayiwahi yachikuhwelelu nikwovwahila.—Tañenu Ezekeli 14:12-14.

² Ezekeli wasonekeli mazu adi munsona hanashindameni chinu chibaaba hadiñayi muBabiloni mu 612 B.C.E. * (Ezek. 1:1; 8:1) Yerusalema wadiña kwakwihi nakujilumuka neyi chashimwineñawu  dehi, nawa wajilumukili mu 607 B.C.E. Antu antesha hohu adiña nayilwilu neyi yaNowa, Danyeli niYoba diwu apulwishiliwu. (Ezek. 9:1-5) Hakachi kawu hadiña Yeremiya, Baruki, Ebedi Meleki, niakaRekabi.

3. Tukuhanjekadi muchinu chibaaba?

³ Munjila yoyimu, Yehova wakapulwisha hohu antu aloña, adi neyi Nowa, Danyeli niYoba, hampinji yakukuma kwanshakaminu yamakonu. (Chim. 7:9, 14) Tuhanjekenu chaletesheli Yehova yayizatishi awa antu kwikala yakutalilahu yakuloña. Chitukuhanjekaña hadi awa antu, tukushinshika (1) hakukala kwamweniwu (2) chitunateli kwimbujola chikuhwelelu nikwovwahila kwawu.

4, 5. Kukalanyi kwamweniyi Nowa, nawa tukuhosheladi netu womikili chikupu?

⁴ Kukala kwamweniyi Nowa. Mumpinji yadiñaku Enoki, nkaka yatata yaNowa, antu adiña nayilwilu yatama. Adiña nakuhosha “yuma yejima yakuhayamisha yatama” hadi Yehova. (Yuda 14, 15) Madombu aswejeli. Mumafuku aNowa “iseki dawaninini kwamadombu hohu.” Añelu atama adibalumwini nakwikala antu, asumbwili ambanda, nawa asemeni anyana ataluka. (Kutach. 6:2-4, 11, 12) Ilaña Nowa dichadiñayi wanyi. “Nowa amutoñeli kudi Yehova. . . . wadiñi muntu waloña, muntu walala hadi akwawu antu. Nowa wendeli naNzambi.”—Kutach. 6:8, 9.

⁵ Talenu awa mazu chinakumwekeshawu chadiñayi iwu muntu waloña. Chatachi, Nowa wendeli naNzambi mudina ituña datama dadiñaku henohu Dibaji kanda hadi yaaka yayivulu, bayi neyi yaaka 70 hela 80 yinakushakamawu antu makonuku. Ilaña washakamini mudina ituña kwakwihi nayaaka 600! (Kutach. 7:11) Kwambukaku nanetu makonu, hikwadiña chipompelu chawakwakwitiya chidi chejimaku nawa hadiña nawamanakwindi etiya, adi kumukwashaku kwikala ibwambu daNzambiku. *

6. Munjilanyi mwamwekesheleliyi Nowa kuhamuka?

⁶ Nowa hakuminini dakwikala muntu wamuwahiku. Wekalili cheñi “mukwakushimwina kuloña,” washimwinineña hatooka yuma yakuhweleleliyi mudi Yehova. (2 Pet. 2:5) Kapostolu Pawulu wasonekeli nindi: “Kuhitila munichi chikuhwelelu, wamwekesheli nindi aka kaayi kateleleli kujilumuka.” (Heb. 11:7) Ichi chinakumwekesha nawu Nowa amudiwili, amukañesheleña, hadaha nikumuchinisha. Ilaña ‘hatiyileña antu womaku.’ (Yish. 29:25) Yehova wamukwashili kwikala wahamuka neyi chakwashañayi ambuñindi ashinshika.

7. Kukalanyi kwamweniyi Nowa hampinji yatuñileñayi watu?

⁷ Hanyima yakwila Nowa nendi naNzambi kubadika yaaka 500, Yehova wamulejeli kutuña watu wakupulwishilamu antu niatunyama. (Kutach. 5:32; 6:14) Iwu mudimu wadiña weneni chikupu! Nawa Nowa welukili nindi antu akamuseha nikumukañesha. Hela chochu, wovwahilili mwamulejeliwu. “Dimu mweliliyi.”—Kutach. 6:22.

8. Nowa wamwekesheli ñahi nindi Yehova diyi wamwinkeleña yuma yejima?

⁸ Kukala kukwawu kwamweniyi Nowa kwadiña kwakukeñela ñodindi nianyanindi yuma yakumujimba. Henohu Dibaji kanda, antu adimineña yakuda awenawu, nawa Nowa niyena wadiña nakudima. (Kutach. 5:28, 29) Hela chochu, hashili hohu maana hayuma yakumujimbaku, ilaña washili maana nihadi Nzambi. Nihampinji yatuñileñayi watu, Nowa  watwalekelihu kwikala washinshika kudi Nzambi hela chakwila hahitili yaaka 40 hela 50. Nawa watwalekelihu kwikala washinshika hadi yaaka 350 hanyima yaDibaji. (Kutach. 9:28) Wamwekesheli chikupu chikuhwelelu nikwovwahila.

9, 10. (a) Tunateli kwimbujola ñahi chikuhwelelu nikwovwahila kwaNowa? (b) Nzambi wamonaña nahi antu ejima alondelaña nshimbi jindi?

⁹ Chitunateli kwimbujola chikuhwelelu nikwovwahila kwaNowa. Twamwimbujolaña kuhitila mukuhakwilaku kuloña kwaNzambi, kubula kwila yuma yamwituña daSatana nikutwamijaku Wanta waNzambi. (Mat. 6:33; Yow. 15:19) Kuhosha hohu chalala, kaayi katuhela muloña wayilwilu yetu yayiwahi. Nimakonu, kumaluña amakwawu atuhoshaña chatama muloña wakulondela nshimbi jaNzambi jahosha hakusumbula nihawuvumbi. (Tañenu Malaki 3:17, 18.) Kufwana Nowa, ninetu twamutiyaña Yehova woma bayi antuku. Tweluka netu yena hohu diyi wakatwinka wumi wahaya nyaaka.—Luka 12:4, 5.

¹⁰ Indi enu halwenu mukwiladi? Komana mukutwalekahu ‘kwenda naNzambi,’ hela chakwila antu amakwawu anakuyisupisha hela munakumona kukala kwamali muchihandilu? Neyi mwimbujola chikuhwelelu chaNowa, ilukenu nenu Yehova wukuyakamenaña.—Fwi. 4:6, 7.

11. Kukalanyi kwamweniyi Danyeli niamabwambu jindi asatu? (Talenu mwevulu wakutachikilahu.)

¹¹ Kukala kwamweniyi Danyeli. Danyeli wadiña nkoli muBabiloni, musumba mwenzeli kupesha nikupanda. Kubombelahu, antu amuBabiloni ayimweneña aYudeya niNzambi yawu, Yehova nawu amukunkulwayi. (Mas. 137:1, 3) Chumichi chayineñesheleña aYudeya ashinshika adi neyi Danyeli. Cheñi yena niamabwambu jindi asatu Hananiya, Mishayeli niAzariya ayilukili chikupu, muloña akeñeleña kuyidizisha mudimu wamwanta. Ayinkeleña niyakuda. Yakuda niyakunwa yadi kuleta kukala muloña Danyeli wakeñeleña wanyi “kudijilola nakudya kwamwanta.”—Dan. 1:5-8, 14-17.

12. (a) Yilwilwinyi yayiwahi yamwekesheliyi Danyeli? (b) Yehova wamumweneña ñahi Danyeli?

¹² Kukala kukwawu kwamweniyi Danyeli kwabadikili muñovu jindi, hikumwinka nyidimu yadimena, yamwekeneña neyi yapela hakusambila. (Dan. 1:19, 20) Chatela yadivwimbi nawa yashindameni hayitoñojoka yindi, yena watwalekelihu kwikala wadizoza nawa wadikehesha, washindameneni hadi Yehova mpinji yejima. (Dan. 2:30) Kafwampi, Danyeli hadiñayi kansi dihu hamuteneneniwu hamu naNowa niYoba kudi Yehova nawu wadiña waloña. Komana Danyeli walekeli kumukuhwelela Nzambi? Inehi! Danyeli watwalekelihu kwikala nachikuhwelelu nikwovwahila muchihandilu chindi chejima. Nawa Danyeli watela wadiña nayaaka yamuma 90 hamulejeliwu kudi kañelu kaNzambi nawu: “Eyi Danyeli, eyi muntu wasweja kukeñewa.”—Dan. 10:11.

13. Danyeli watela wakwashili ñahi antaña jindi aYudeya?

¹³ Nawukwashu waNzambi, Danyeli amwilishili kwikala mukulumpi muchiyuulu chawaBabiloni nichawa Mediya naPeresi. (Dan. 1:21; 6:1, 2) Hadaha Yehova welishili yuma muniyi njila kulonda Danyeli yakwasheña antaña jindi, neyi cheliliyi naYosefu muEjipitu niaEsita naModekayi muPeresi. * (Dan. 2:48) A Yudeya adiña muwunkoli atela atiyili kuwaha chikupu, kubombelahu niEzekeli, hakumona chikasa chaYehova chinakuyikwasha.

14, 15. (a) Mpinji yitunakushakamamu yinadifwani ñahi nayamumafuku aDanyeli? (b) Anvwali makonu anateli kudizila ñahi kudi anvwali jaDanyeli?

 ¹⁴ Chitunateli kwimbujola chikuhwelelu nikwovwahila kwaDanyeli. Makonu, ninetu tunakushakama neyi añiinza, mukaayi mudi yilwilu yatama yinakukojejawu kudi Babiloni Muneni, kaayi kakwitiya kwakutwamba, “iluña mwakushakama andemoni.” (Chim. 18:2) Dichi, ninetu twambukaku hela chakwila atusehaña kudi antu. (Maku 13:13) Kufwana Danyeli, tuswinenu kwakwihi naYehova, Nzambi yetu. Neyi tumukuhwelela nawa tumwovwahila mukudizoza, tukwikala alema kumesu indi.—Hag. 2:7.

¹⁵ Anvwali makonu atela kwimbujola anvwali jaDanyeli. Munjilanyi? Hela chakwila muYuda mwadiña yilwilu yatama hampinji yadiñayi Danyeli kansi, wakulili nakumukeña Nzambi. Hela chochu, bayi neyi chumichi chazatikili muñovu jindiku. Ilaña chamwekeshaña nawu anvwali jindi amudizishili chikupu. (Yish. 22:6) Nijina daDanyeli daya mukwila nawu “Nzambi diyi Nsompeshi Yami,” damwekeshaña nawu anvwali jindi adiña nakumutiya Nzambi woma. Dichi enu anvwali, bayi muleka kukwasha anyanenuku, yidizishenuña mukudiwunjika. (Efwe. 6:4) Cheñi, lombenuña hamu nawu nawa yilombelenuñaku. Neyi muzata nañovu kulonda muyidizishi chalala chamuBayibolu, Yehova wukuyikiswila.—Mas. 37:5.

16, 17. Kukalanyi kwambukaku kwamweniyi Yoba?

¹⁶ Kukala kwamweniyi Yoba. Kukala kwamweniyi Yoba kwambukaku chikupu. Henohu kanda yamoni yihuñu, “wabadikili antu akumusela ejima.” (Yoba 1:3) Wadiña namaheta chikupu, wadiña waya mpuhu nawa amulemesheli chikupu. (Yoba 29:7-16) Hela chakwila Yoba wadiña nayuma yejimiyi, wadiña wadivwimba wanyi nawa hamudiwili Nzambiku. Yehova wamuteneni nindi “kambuñami,” wabombelelihu nindi: “Muntu waakama Nzambi, waambuka kuyuma yatama.”—Yoba 1:8.

¹⁷ Chihandilu chaYoba chahimpikili neyi mukulabula kwadisu. Washikeneni kwikala kazweñi nawa muntu wamukunkulwayi. Tuneluki wakojejeli netu hiSatana mukwakutwamba, watwambili nindi Yoba wadifukulaña kudi Nzambi muloña wayuma yamwinkayi. (Tañenu Yoba 1:9, 10.) Yehova wafumishilihu wanyi kuna kutwamba kwahamesu bwi-i.  Ilaña, wamwitejeli Yoba yamwekeshi kashinshi kindi, yamwekeshi nindi wadifukwileña chakufuma hamuchima bayi muloña wayuma yamwinkeliwuku.

18. (a) Chumanyi chinayitiyishi kuwaha hakashinshi kaYoba? (b) Yuma yamwililiwu Yoba kudi Yehova yamwekeshaña nawu Nzambi wekala ñahi?

¹⁸ Satana wamuleteleli Yoba yuma yatama mukulondashana nawa waletesheli Yoba kumona nindi Nzambi diyi wunaleteshi. (Yoba 1:13-21) Kuhiñahu, akwakukundeja akutwamba asatu enjili nawa amulejeli Yoba mazu atama, hadaha ahosheleña nawu Nzambi wamubabesheleña muloña wayuma yeliliyi! (Yoba 2:11; 22:1, 5-10) Hela chochu, Yoba watwalekelihu kwikala washinshika. Hela chakwila mpinji yimu watubokeli, ilaña Yehova welukili chichamuyeñeleña Yoba. (Yoba 6:1-3) Nzambi wamumweni iyala wabulili kumufutalela, hela chakwila Satana wamukatishili Yoba nakumunata hamaseki nikumuhosha mazu akasawuntu. Chamanini kukala kwindi, Yehova wamulunjikililihu yikwawu yashikila muyakusambila nawa wamushililiku yaaka 140. (Yak. 5:11) Hayina mpinji, watwalekelihu kumutiya Yehova woma. Tuneluki ñahi mwenimu? Hampinji yasonekeli Ezekeli mazu adi munsona hanashindameni chinu chibaaba Yoba wadiña wafwa dehi nawa munahiti yaaka yayivulu.

19, 20. (a) Tunateli kwimbujola ñahi chikuhwelelu nikwovwahila kwaYoba? (b) Tunateli kumwekesha ñahi wushona waNzambi kudi akwetu antu?

¹⁹ Chitunateli kwimbujola chikuhwelelu nikwovwahila kwaYoba. Hichikweti muloña nakukala kutunakumonaku, tutwalekenu kumutwamijaku Yehova muwumi wetu, kumukuhwelela chikupu nikumwovwahila chakufuma hamuchima. Nawa tweluka yuma yayivulu yikuleñela tumukuhweleli Yehova kubadika Yoba. Chakutalilahu, twamwiluka chikupu Satana nitufuta twindi. (2 Kor. 2:11) Muwuprofwetu waDanyeli, twadizañamu netu Wanta waNzambi hinfulumendi yekala mumakasa aKristu Yesu. (Dan. 7:13, 14) Nawa tweluka netu Wanta waNzambi keña wufumishihu makabi haya nyaaka.

²⁰ Yuma yamweniyi Yoba yinakutudizisha nawu twatela kutiyila akwetu akwaKristu wushona anakuumika kukala. Kufwana Yoba, amakwawu anateli kutuboka mpinji yikwawu. (Mukwa. 7:7) Chatela tuyisompesheña, tuyimwekesheleña kashinshi niwushona. Neyi twila mwenimu, tukumwimbujola Tata yetu wukweti kukeña niluwi, Yehova.—Mas. 103:8.

21. Mazu ekala ha 1 Petulu 5:10 amwekeshaña ñahi yuma yamwekeni muchihandilu chaNowa, Danyeli niYoba?

²¹ Hela chakwila Nowa, Danyeli niYoba ashakamini mumpinji yambuka nawa amweni kukala kwashiyashana, omikili kukala kwamweniwu. Nsañu yachihandilu chawu yatwanukishaña mazu asonekeli kapostolu Petulu nindi: “Hanyima yakwila munakabakani dehi hakapinji kantesha, Nzambi waluwi lwasweja . . . wakamanisha yomweni kuyidizisha. Wakayikolesha, wakayinka ñovu, wakayishimatisha chikupu.”—1 Pet. 5:10.

22. Tukadizadi muchibaaba chinalondelihu?

²² Kuhitila mumazu aPetulu onenewa, Yehova watulejaña nindi wakayikolesha ambuñindi nikuyinka ñovu. Awa mazu anakundami nikudi antu jaNzambi makonu. Wejima wetu twakeñaña netu Yehova yatukolesheña nawa tutwalekihu muchalala. Dichi, tunakufwila kwimbujola chikuhwelelu nikwovwahila kwaNowa, Danyeli niYoba! Neyi chitukadiza muchibaaba chinalondelihu, adiña ashinshika muloña amwilukili Yehova chikupu. Kuhosha hohu chalala, ‘elukili mwaya yuma yejima’ yakeñeleñayi nindi eleña. (Yish. 28:5) Ninetu twatela kwila yuma yakeñañayi nindi twileña.