ANTU afwilaña kwikala nachihandilu chamuzañalu. Ilaña munanu mafuku akukuminina antu ejima anakumona yuma ‘yakala.’ (2 Tim. 3:1) Wuñanji waheña, yikatu, kubula nyidimu, chineñi, hela yuma yikwawu yaletaña kwakama nikudishona, yumiyi yinateli kuleñela kubula kwikala namuzañalu. Niambuña aNzambi niwena aneñaña nawa muzañalu wamanaña. Neyi mudana muzañalu chayinu mpinji, munateli kwikala ñahi cheñi namuzañalu?

Hakwila twakuli ilu lwihu, twatela kusambila kwiluka chekala muzañalu walala nichiyanatwalekihu antu amakwawu kwikala namuzañalu hela chakwila anakumona kukala. Kuhiñahu tukudiza yuma yitwatela kwila hakwila tutwalekihu kwikala namuzañalu nikusweja kwikala nawu.

Hekala chaambu hakachi kamuzañalu nakutiya kuwaha hela kuzañajala. Chakutalilahu, muntu neyi nasweji kunwa, nateli kusheta nikutachika kuseha-seha. Ilaña neyi nashetuluki dehi, walekaña kuseha nakwikala neyi chadiñayi hakusambila, waneña nikukabakana. Kuna kuzañalala kwamwekeshayi hayina mpinji hiwadiña muzañalu walalaku.—Yish. 14:13.

Ilaña, muzañalu hichilwilu chashimata mumuchima. Muzañalu awulumbulula nawu, “kuwaha hela kuzañalala mumpinji yayiwahi niyatama.” Muzañalu hikwikala azañalala mpinji yejima hela chakwila yuma yinawahi hela yinatami. (1 Tes. 1:6) Nawa, muntu nateli kuneña ilaña wukweti muzañalu mumuchima windi. Chakutalilahu, apostolu ayeteleli chahosheliwu hadi Kristu. Ilaña, “afumini kudi akwaSanihedirini iku anazañalali, muloña ayisawili hamuloña wakuzatisha ijina dindi.” (Yilw. 5:41) Chakadi nikujina, bayi neyi azañaleli nayikoti yayeteliwuku. Ilaña hakwikala ambuña aNzambi, adiña namuzañalu muloña atwalekelihu kwikala ashinshika kudi yena.

Twasemukaña wanyi namuzañalu wamuchidiwu; nawa hiwadinjilaña waweniku. Muloñadi? Muloña muzañalu walala wekala hakachi kanyikabu yaspiritu yajila yaNzambi. Nawukwashu waspiritu yaNzambi, tunateli kuvwala “wuntu wawuha,” munabombeli nimuzañalu. (Efwe. 4:24; Ñal. 5:22) Nawa neyi twikala namuzañalu, tukuumikaña kukala kutwamonaña muchihandilu.

Yehova wakeñeleña nindi hamaseki hekaleña yuma yayiwahi, bayi yuma yatama yitwamonaña makonuku. Dichi, yuma yatama yelañawu antu amakwawu hiyamuleñelaña Yehova kubula muzañaluku. Izu daNzambi dahosha nawu: “Mwindi mwekalayi mudi niñovu nikuzañajala.” (1 Kushi. 16:27) Kubombelahu, yuma yayiwahi yinakuzatawu ambuña indi yatiyishaña “muchima [waYehova] kuwaha”—Yish. 27:11.

Twatela kumwimbujola Yehova kuhitila mukubula kuneña neyi yuma yitwakuhwela yinazatiki wanyi. Chatela tubuli kwikala namuzañalu, tushenu  muchima hayuma yitukweti chakatataka nikudiwunjika nakuhembelela yuma yayiwahi yidi kumbidi. *

MuBayibolu mwekala cheñi nsañu yawantu atwalekelihu kwikala namuzañalu hela chakwila amweneña kukala muchihandilu. Abarahama womikili kukala kwasweja nawa womikili nikukala kwaleteleña antu amakwawu. (Kutach. 12:10-20; 14:8-16; 16:4, 5; 20:1-18; 21:8, 9) Hela chakwila wamweneña kuna kukala, Abarahama watwalekelihu kwikala namuzañalu mumuchima. Wekalili ñahi namuzañalu? Watoñojokeleña hakuchiñeja kwindi kwakushakama mwituña dadiha dakayuulañawu kudi Mesiya. (Kutach. 22:15-18; Heb. 11:10) Yesu wahosheli nindi: “Tata yenu Abarahama wazañaleli nankashi chachiñejeleñayi kumona ifuku dami.” (Yow. 8:56) Tunateli kumwimbujola Abarahama kuhitila mukutoñojoka hamuzañalu wakumbidi.—Rom. 8:21.

Kufwana Abarahama, kapostolu Pawulu nibwambu dindi Silasi ashinshikileña hayikaninu yaNzambi. Adiña nachikuhwelelu chakola nawa atwalekilihu kwikala namuzañalu hela chakwila ayikabishili. Chakutalilahu, hanyima yakwila anayivupoli yikoti nawa anayishi mukaleya, “kwakwihi nahakachi kawufuku, . . . alombeleña nikumulemesha Nzambi natumina.” (Yilw. 16:23-25) Kubombela hakwikala nañovu muloña wakwikala nakuchiñeja, Pawulu naSilasi adiña namuzañalu muloña adiña nakukabakana hansañu yejina daKristu. Twatela kuyimbujola aPawulu naSilasi kuhitila mukusha maana hayuma yayiwahi yenzaña muloña wakumukalakela Nzambi nakashinshi.—Fwi. 1:12-14.

Makonu, mukunuñañana kwawamakwetu mwabombela yakutalilahu yawamanakwetu anakutwalekahu kwikala namuzañalu neyi amona kukala. Chakutalilahu, muNovember 2013, mpepela yaSuper Typhoon Haiyan yahitili muPhilippines, yakisañeni matala awaYinsahu akubadika ha 1,000. George, wadiña netala dindi muTacloban, wahosheli nindi: “Hela chakwila amweni kukala, amanakwetu adi namuzañalu. Nakañanyi nimwakulumbulwila muzañalu wutunakutiya.” Neyi tumona kukala, tunateli kutwalekahu kwikala namuzañalu neyi tutoñojokaña hayuma yatwililayi Yehova. Yumanyi yikwawu yatwililayi Yehova yinateli kutuletela muzañalu?

Kudihu chuma chikwawu chinateli kutuletela muzañalu kubadika wubwambu wetu naNzambi? Toñojokenu hachumichi: Twamwiluka Mwanta Wakuleña Kwejima. Hi Tata yetu, Nzambi yetu nawa Ibwambu detu!—Mas. 71:17, 18.

Twalemesha cheñi chawaana chawumi nichitwachizatishaña. (Mukwa. 3:12, 13) Tweluka nkeñelu yaNzambi hadi antu, muloña Yehova watwinka maana. (Kol. 1:9, 10) Dichi, tweluka muloña waweni chitwekalilaku. Kwambukaku, antu amavulu eluka wanyi muloña waweni chitwekalilaku. Pawulu wamwekesheli ichi chaambu hasonekeliyi nindi: “‘Mesu akañanya kuyimona, matu niwena akañanya kuyitiya, nawa hiyeñililihu mumuchima wamuntuku.’ Muloña Nzambi natusolweliyu naspiritu yindi.” (1 Kor. 2:9, 10) Komana twazañalalaña wanyi hakwiluka nkeñelu yaNzambi kumuchidi wamuntu?

Talenu yuma yikwawu yinayililiyi Yehova antu jindi. Komana twazañalalaña wanyi hakwiluka netu anateli kutwanakena nshidi jetu? Hamuloña waluwi lwaNzambi, tukweti kuchiñeja kwakwiluka netu katataka ichi twikali mwituña dadiha. (Rom. 12:12) Nimakonu, Yehova watwinka akwetu akwakwatiya amawahi. (Mas. 133:1) Izu daNzambi datulejaña cheñi nadu Yehova wakiñaña ambuña indi kudi Satana niandemoni jindi. (Mas. 91:11) Neyi tutoñojokaña haniji nkisu jejima jatwinkañayi Nzambi, tukwikala namuzañalu chikupu.—Fwi. 4:4.

AkwaKristu adi dehi namuzañalu anateli cheñi kusweja kwikala namuzañalu? Yesu  wahosheli nindi: “Nayileji yumiyi kulonda muzañalu wami wiikali mudi enu nawa muzañalali chikupu.” (Yow. 15:11) Awa mazu hiyanakumwekesha nawu twatela kwikala namuzañalu chikupuku? Munateli kwesekeja chumichi nakusonsela kesi. Neyi munakukeña nenu kesi kabutukeña chikupu, mwatela kusonselahu, munjila yoyimu muzañalu niwena wunateli kuswejelaku neyi muzata nañovu kulonda mukoleshi wubwambu wenu naNzambi. Anukenu nenu: Spiritu yaNzambi diyatukwashaña kwikala namuzañalu chikupu. Dichi, munateli kwikala namuzañalu chikupu neyi mumulombaña Yehova spiritu yindi mpinji yejima. Nawa mwatela kulomba hampinji yimunakutoñojoka hayuma yimwadiza Mwizu dindi donenewa.—Mas. 1:1, 2; Luka 11:13.

Munateli cheñi kwikala namuzañalu chikupu neyi muzataña nyidimu yamuzañaleshaña Yehova. (Mas. 35:27; 112:1) Muloñadi? Muloña atuleña munjila ‘yakumutiya Nzambi woma, kuhemba kuleja kwindi; dichuma chatelela mudi muntu chochenichi hohu.’ (Mukwa. 12:13) Munjila yikwawu, atuleñeli nawu twileña nkeñelu yaNzambi. Dichi neyi tumukalakela Yehova, twekalaña namuzañalu muchihandilu. *

Chitukwikala namuzañalu wafumaña kudi Nzambi, tukumona yuma yayiwahi chikupu. Chakutalilahu, tukumuzañaleshaña Tata yetu wamwiwulu hampinji yitunakumukalakela namuzañalu hela chakwila tunakumona kukala. (Kuhit. 16:15; 1 Tes. 5:16-18) Cheñi hamuloña wakwikala namuzañalu walala, tukukaana kufwila maheta ilaña tukudihana kulonda tukalakeleña Wanta waNzambi. (Mat. 13:44) Neyi tumona yuma yayiwahi yafumañamu, tukwikala namuzañalu chikupu, nawa tukukwashaku akwetu niwena kwikala namuzañalu.—Yilw. 20:35; Fwi. 1:3-5.

Mukwakusandujola wumu wahaUnivesiti yaNebraska muUnited States hanyima yakudiza yuma yayivulu kutalisha hakukola kumujimba, wasonekeli nindi: “Neyi wudi namuzañalu muchihandilu chayinu mpinji, wakekala wakola kumujimba kumbidi.” Awa mazu ahosheliyi anesekani nachahosha Bayibolu nawu: “Muchima wazañajala hiyitumbu yayiwahi.” (Yish. 17:22) Eña, neyi mwikala namuzañalu chikupu mukwika akola kumujimba.

Hela chakwila tunakushakama mumpinji yatama, tunateli kwikala namuzañalu kuhitila mukulomba spiritu yajila, kudiza nikutoñojoka Hezu daYehova. Twekalaña cheñi namuzañalu neyi tutoñojoka hankisu jitukweti makonu, kwimbujola chikuhwelelu chawakwetu nikwikala neyena dakwila nkeñelu yaNzambi. Nkumininaku, tukumona kushikijewa kwamazu ekala haMasamu 64:10, ahosha nawu: “Waloña wakazañalala mudi Yehova, wakabatama mudi yena.”