1, 2. Wuspiritu wamanakwetu wumu wadiña ñahi, nawa chumanyi cheliliyi?

ROBERT wapapatisheweli henohu wuchidi kampululu, ilaña walemesheli chalala wanyi. Wahosheli nindi: “Kwosi chuma chatama chinelili, ilaña nadiña waneña mpinji yejima. Namwekeneña neyi napama kuspiritu, nayileña nakupompa mpinji yejima nawa nazatileña wupayiniya wakukwasha tukweji tukwawu muchaaka. Ilaña kudi chuma chinabulileña kwila.”

² Robert yomweni helukili chuma chaletesheleñaku sampu chasumbwiliyi. Yena niñodindi atachikili kudihula malwihu hansañu yekala muBayibolu. Ñodindi wadiña wapama kuspiritu, dichi wakwileña chiwahi malwihu, ilaña Robert watiyileña nsonyi mpinji yejima, muloña wakañenyeña kwakula. Wahosheli nindi: “Namwekeneña neyi kwosi yuma yineluka. Natoñojokeli nami, ‘neyi inakukeña kwikala mutu wañodami kuspiritu, natela kuzatilahu.’” Chalala Robert wazatililihu. Wahosheli nindi: “Nelili nidiza nidiza nidiza, sampu chinatachikili kunuñañesha nsañu yekala muBayibolu. Nadizili chikupu nawa chuma chalema nekalili nawubwambu wakola naYehova.”

3. (a) Yumanyi yitunateli kudizila kudi Robert? (b) Malwihwinyi alema itukuhanjekahu?

³ Kudi yuma yayivulu yitwatela kudizila kudi Robert. Tunateli kwiluka nsañu yayivulu yamuBayibolu nikuya kukupompa  kwawakwaKristu mpinji yejima, ilaña iyi yuma nkawayu hiyinateli kutuleñela kwikala apama kuspirituku. Indi kwiji twekala dehi apama kuspiritu, ilaña neyi tudishinshika etu aweni, tukuwana netu kudi hitwatela kuzatila kulonda tupaminiku kuspiritu. (Fwi. 3:16) Tukuhanjeka malwihu asatu alema akutukwasha kutwalekahu kupama kuspiritu: (1) Chumanyi chikutukwasha kwiluka chidi wuspiritu wetu? (2) Tunateli kwikala ñahi apama kuspiritu nikutwalekahu kupama kuspiritu? (3) Kupama kuspiritu kunateli kutukwasha ñahi muchihandilu chetu hefuku-hefuku?

4. Anyi atela kuzatisha kufumba kwekala haAefwesesa 4:23, 24?

⁴ Kudi yuma yitwahimpili hakwila twikali ambuña aNzambi. Twahimpili yuma yayivulu muchihandilu. Nawa twatwalekelihu kuhimpa hanyima yakupapatishewa. Atuleja “kutwalekahu kubalumuka nakwikala amaha muyitoñojoka nimuyilwilu.” (Efwe. 4:23, 24) Chineli twawanina wanyi, twatela kutwalekahu kuhimpa. Niambuña aNzambi anamukalakeli hadi yaaka yayivulu atela kupaminaku kuspiritu.—Fwi. 3:12, 13.

5. Malwihwinyi akutukwasha kudishinshika etu aweni?

⁵ Hakwila nawu tuwahishi nikutwalekahu nawuspiritu wawuwahi twatela kudishinshika chiwahi chikupu etu aweni. Chili tudi atwansi hela akulumpi, twatela kudihula netu: ‘Komana inakudimona ami aweni nami inakuhimpa nakwikala muntu wapama kuSpiritu? Komana wuntu wami wudi neyi waKristu? Yilwilu niyuma yinelaña hakupompa kwawakwaKristu yamwekeshaña nawu nidi muntu wamuchidinyi kuspiritu? Yuma yinahoshaña yamwekeshaña nawu nakeña yuma yamuchidinyi? Yuma yinelaña neyi inakudiza yamwekeshañadi? Nvwalilu yami nichinelaña neyi ananfumbi chamwekeshaña nawu nidi muntu wamuchidinyi? Nelaña ñahi neyi nidi mukweseka? Komana napami chikupu neyi chatela kupamayi mukwaKristu?’ (Efwe. 4:13) Kwakula awa malwihu etu aweni kukutukwasha kwiluka neyi tunakupaminaku kuspiritu hela nehi.

6. Yumanyi yikwawu yitwatela kwila hakwila twiluki chidi wuspiritu wetu?

⁶ Hakwila twiluki chitudi kuspiritu, mpinji yikwawu tunateli kwihula antu amakwawu kulonda atuleji. Kapostolu Pawulu wahosheli nindi muntu wakumujimba hanateli kumona nindi waluwañeshaña kudi Nzambiku. Kwambukaku, muntu wakuspiritu weluka chakeñañayi Nzambi nawa weluka yuma yatama yelañayi muntu wakumujimba. (1 Kor. 2:14-16; 3:1-3) Aeluda akweti yitoñojoka yaKristu amonaña swayi muntu wunakumwekesha yitoñojoka yakumujimba. Neyi atuleja yuma yinamoniwu, komana twetejaña nikuzatisha kufumba kwawu? Neyi twiteja nikuzatisha kufumba, tukumwekesha netu tunakufwila kwikala apama kuspiritu.—Mukwa. 7:5, 9.

7. Tukuhosheladi netu kupama kuspiritu hikwatalisha mukwiluka hohu nsañu yamuBayiboluku?

⁷ Ilukenu nenu kwiluka hohu nsañu yamuBayibolu hikunateli kuletesha muntu kwikala wapama kuspirituku. Mwanta Solomoni welukili yuma yayivulu hadi Yehova. Yuma yahosheliyi ayisonekeli muBayibolu. Ilaña nkumumininaku, wakañenyi kutwalekahu kwikala washinshika kudi Yehova neyi muntu wakuspiritu. (1 Anya. 4:29, 30; 11:4-6) Kubombela hakwiluka nsañu yamuBayibolu, chumanyi chikwawu chitwatela kwila? Twatela kutwalekahu kupama kuspiritu. (Kol. 2:6, 7) Hanu tunateli kushimata ñahi?

8, 9. (a) Tunateli kwila ñahi hakwila twikali ashimata kuspiritu? (b) Neyi tunakudiza nikutoñojokahu chikupu, chumanyi chitwatela kufwila kwila? (Talenu mwevulu wakutachikilahu.)

⁸ Pawulu wakolesheli akwaKristu amumafuku  awapostolu nindi “fwilenu kupama.” (Heb. 6:1) Hakwila tuzatishi kufumba kwaPawulu makonu, yumanyi yitwatela kwila? Chuma chalema chatachi, hikudiza mukanda ‘waShakamenu Mukukeña kwaNzambi.’ Neyi mumanisha iwu mukanda mukwiluka chimunateli kuzatisha yishina yamuBayibolu muchihandilu chenu. Neyi mwamanisha dehi kudiza iwu mukanda, kwila mutachika kudiza mukanda wukwawu wakudizamu wunateli kuyikwasha kwikala ashimata muchikuhwelelu nehi? (Kol. 1:23) Komana mwalombaña hampinji yimunakutojoka chikupu chimunateli kuzatisha muchihandilu chenu nsañu yimunakudiza?

⁹ Ilukenu nenu, chitunakudiza nikutoñojokahu chikupu, twatela kwikala namuchima wakufwila kumuzañalesha Yehova nikwovwahila nshimbi jindi. (Mas. 40:8; 119:97) Hampinji yoyimu, twatela kuzata nañovu kulonda tuleki yuma yejima yinateli kutukañesha kupama kuspiritu.—Tit. 2:11, 12.

10. Yumanyi yatela kwilawu atwansi hakwila nawu ekali apama kuspiritu?

¹⁰ Neyi wudi kansi, yumanyi yakuspiritu yiwafwilaña kwila? Manakwetu wumu wahaBeteli neyi nayi kukupompa kwañiinza, wahanjekaña nawantu anakukeña kupapatishewa henohu kupompa kanda. Wavula kwihula atwansi. Manakwetu wayihulaña yuma yakuspiritu yafwilañawu kwila. Ñakwilu yawatwansi amavulu yamwekeshaña nawu afwilaña kumukalakela Yehova mumudimu wampinji yejima hela kuya nakukalakela kumaluña kwekala akwakushimwina aWanta antesha. Ilaña mpinji yikwawu, atwansi amakwawu akañanyaña kwakula. Chumichi chinakumwekesha wanyi nawu kanda afuukulihu mumuchima yuma yatela kwila kuspiritu? Enu atwansi, dihulenu nenu: ‘Komana nazataña nyidimu yakuspiritu muloña anvwali dichanlejañawu? Komana inakuswina kudi Nzambi kuhitila mukwikala nawubwambu wawuwahi nayena? Iku kufumba kwakufwila yuma yakuspiritu kunakundami kudi atwansi hohu wanyi. Kwifwila yuma yakuspiritu kwakwasha ambuña aYehova ejima kwikala akola kuspiritu.—Mukwa. 12:1, 13.

11. (a) Twatela kwiladi hakwila nawu tupaminiku kuspiritu? (b) Muntwinyi ashimunawu muBayibolu itwatela kwimbujola?

¹¹ Neyi tumona netu hadi hitwazeyela, twatela kuzatilahu nikuhimpa. Neyi wuspiritu wetu wudi chiwahi, tukapuluka, ilaña neyi wuspiritu wetu wudi chiwahi wanyi tukajimbesha wumi wetu. (Rom. 8:6-8) Hela chochu, hichinayi mukwila nawu chiña twikala awanina hakwila nawu tupami kuspirituku. Spiritu yaYehova yikutukwasha kupaminaku kuspiritu. Ilaña, twatela kuzata nañovu. John Barr, wadiña membala waMwizanvu Dalombolaña wahosheli hamazu ekala haLuka 13:24 hadi yaaka yinahitihu nindi: “Amavulu akañanyaña muloña wakwila azataña wanyi nañovu kulonda apami.” Twatela kwikala neyi Yakoba, wabulili kuleka kulwisha nakañelu sampu chatambwililiyi nkisu. (Kutach. 32:26-28) Hela chakwila kutaña Bayibolu kwatiyakanaña chiwahi, bayi tuyitaña neyi mukanda mwasonekawu nsañu yakulumbishaku. Twatela kuyitaña nakuwanamu yikuma yelama yinateli kutukwasha.

12, 13. (a)Yumanyi yitwatela kwila hakwila nawu twikali neyi chahosha Aroma 15:5? (b) Chakutalilahu chakapostolu Petulu nikufumba kwindi kunateli kutukwasha ñahi? (c) Munateli kwiladi hakwila mupami kuspiritu? (Talenu chikasha chinakwila nawu “Chimunateli Kupaminiku kuSpiritu.”)

¹² Chitukuzataña nañovu kupama kuspiritu, spiritu yajila yikutwinka ñovu yakuhimpa yitoñojoka yetu. Spiritu yinateli kutukwasha kutachika kutoñojoka chovu-chovu neyi chatoñojokeleñayi Kristu. (Rom. 15:5) Kubombelahu, yikutukwasha kuleka kufwila yuma yakumujimba nakwikala nayilwilu yamuzañaleshaña Nzambi. (Ñal. 5:16, 22, 23) Bayi tuleka kulomba spiritu yaNzambi, neyi tumona  netu yitoñojoka yetu yinakututwala kukufwila maheta hela yuma yakumujimbaku. Twalekenuhu kulomba spiritu nawa Yehova wukuyikwasha kuhimpa yitoñojoka yenu nakutachika kutoñojoka yuma yayiwahi. (Luka 11:13) Anukenu kapostolu Petulu. Kapampa kakavulu muchihandilu chindi, welileña yuma neyi muntu wabula kupama kuspiritu. (Mat. 16:22, 23; Luka 22:34, 54-62; Ñal. 2:11-14) Ilaña watwalekilihu kupama. Nawukwashu waYehova, Petulu watachikili chovu-chovu kutoñojoka neyi Kristu. Ninetu tunateli kwila mwomumu.

¹³ Nkumininaku, Petulu washimwini yuma yimu yitwatela kuzatilahu. (Tañenu 2 Petulu 1:5-8.) Neyi tuzata “nañovu chikupu,” kwikala nayilwilu yidi neyi kudiyuula, kuumika, kukeña kwakukeña anakwetu, yumiyi yikutukwasha kutwalekahu kwikala antu apama kuspiritu. Dihulenu enu aweni hefuku-hefuku nenu, yumanyi yinatela kuzatilahu dalelu kulonda nipaminiku kuspiritu?

14. Kupama kuspiritu kukutukwasha ñahi muchihandilu?

¹⁴ Kwikala nayitoñojoka yaKristu kukutukwasha kumudimu, kushikola, munhoshelu nimuyuma yitwafuukulaña hefuku-hefuku. Yuma yitwafuukulaña yikumwekesha nawu twafwilaña kwikala akwakumulondela Kristu. Neyi chelañawu antu apama kuspiritu, ninetu twatela kuzata nañovu kulonda wubwambu wetu naTata yetu wamwiwulu wubuli kumana. Kwikala nayilwilu neyi yaKristu kukutukwasha kushinda neyi tudi mukweseka. Neyi tunakufuukula, twatela kutoñojoka hanawa malwihu: ‘Yishinanyi yamuBayibolu yikunkwasha kufuukula? Neyi Kristu diyi wafuukulaña wadi kufuukulahu ñahi? Yumanyi yinatela kufuukula yinateli kumutiyisha Yehova kuwaha?’ Hakwila tudizishi yitoñojoka yetu muniyi njila, tuhanjekenu hayakutalilahu yimu. Muchakutalilahu chejima, tukushinshika chishina chamuNsona chikutukwasha kufuukula mwamaana.

15, 16. Shimunenu chitunateli kuzatisha yitoñojoka yaKristu neyi tunakutonda (a) muntu wakudisumbula nindi. (b) amabwambu.

¹⁵ Kutonda muntu wakudisumbula nindi. Chishina chamuNsona chidi ha 2 Akorinda 6:14, 15. (Tañenu.) Mazu aPawulu amwekeshaña hatooka nawu muntu wakuspiritu kwila yatiyashana chiwahi namuntu wakumujimba nehi. Tunateli kuzatisha ñahi ichi chishina hakutonda muntu wakudisumbula nindi?

¹⁶ Kutonda amabwambu. Chishina chamuNsona chekala ha 1 Akorinda 15:33. (Tañenu.) Muntu wakuspiritu hadikundaña nawantu akumuletesha yazeyi kuspirituku. Malwihwinyi anateli kuyikwasha kuzatisha ichi chishina? Chakutalilahu, nateli kuzatisha ñahi intaneti? Hela munateli kwila ñahi neyi muntu imwabula kwiluka yayileja nindi muhemeña nindi yisela yahaintaneti?

17-19. Kumona yuma neyi muntu wapama kuspiritu kukutukwasha ñahi (a) kutondolwela kufwila yuma yamukunkulwayi? (b) kufwila yuma yakuspiritu muchihandilu? (c) kuleka ntaadi?

¹⁷ Nyidimu yakañeshaña muntu kupama kuspiritu. Mazu aPawulu asonekeleliyi akwawu  akwaKristu mwekala nsañu yakusoñamisha. (Tañenu Aheberu 6:1.) “Nyidimu yafwa” yamuchidinyi yitwatela kutondolwela? Nyidimu yejima yafwa kuspiritu, yamukunkulwayi hela yabulaña kusoña nyikabu. Ichi chishina chinateli kutukwasha kwakula malwihu amavulu, adi neyi: ‘Komana iwu mudimu wudi hakachi kanyidimu yakumujimba? Komana natela kudibomba muniyi bizinisi? Muloñadi chinatela kubulila kudibomba namazanvu afwilaña kuwahisha kaayi?’

¹⁸ Kufwila yuma yakuspiritu. Mazu ahosheliyi Yesu muMpanji yindi yahaMpidi atukwashaña kwiluka yuma yitwatela kwila kuspiritu. (Mat. 6:33) Muntu wakuspiritu wafwilaña kwila yuma yakuspiritu. Ichi chishina chikutukwasha kwakula malwihu adi neyi: ‘Komana natela kufwila kuya kushikola yahewulu? Komana natela kwiñila hohu mudimu wudi wejima?’

¹⁹ Ntaadi. Kufumba kwaPawulu kwafumbiliyi chipompelu chakuRoma kunateli kutukwasha ñahi kuleka ntaadi? (Rom. 12:18) Etu twamulondelaña Kristu, twatela kwikala “awunda nawantu ejima.” Neyi ntaadi yivulumuka, twelaña ñahi? Komana chatukalilaña kudiwunjika, tahindi atwiluka nawu tudi “antu aletaña kuwunda”?—Yak. 3:18.

20. Muloñadi chichalemena kupama kuspiritu?

²⁰ Iyi hiyakutalilahu yantesha hohu yinakumwekesha yishina chiyinateli kutukwasha kufuukula yuma kwesekeja nachatela kufuukulayi muntu wapama kuspiritu. Kupama kuspiritu kunateli kutukwasha kwikala namuzañalu mafuku ejima. Robert, itwahanjekahu kumatachikilu achinu chibaaba, wahosheli nindi: “Chinekalili nawubwambu wawuwahi naYehova, nekalili iyala nawa tata yawantu wamuwahi. Nazañalalaña nayuma yinikweti.” Ninetu tunateli kwikala namuzañalu neyi tufwilaña kwikala apama kuspiritu. Neyi twikala apama kuspiritu, tukwikala namuzañalu makonu nawa twakekala ‘nawumi walala’ kumbidi.—1 Tim. 6:19.