1, 2. (a) Antu amavulu ahoshaña nawudi hakupama kuspiritu? (b) Malwihwinyi alema kutalisha hakupama kuspiritu itukuhanjekahu?

MUHELA wakuCanada wahosheli nindi, “Kwikala muntu wapama kuspiritu kunankwashi kwikala namuzañalu nawa kunankwashi kuumika kukala kunamonaña hefuku-hefuku.” Manakwetu wakuBrazil niyena wahosheli nindi, “Kupama kuspiritu kunatukwashi kushakama namuzañalu muwulu hadi yaaka 23.” Nawa manakwetu wakuPhilippines wahosheli nindi, “Kukeña yuma yakuspiritu kunankwashi kwikala nakuwunda kwamuyitoñojoka nawa kunankwashi kwiluka chakuhanda nawantu akweti yitachi yashiyashana.”

² Mazu amuchidiwu amwekeshaña nawu kupama kuspiritu kwakuwahi. Dichi, tunateli kudihula netu, ‘Nateli kupama ñahi kuspiritu nawa nateli kwikala ñahi namuzañalu wutunateni hewulu?’ Hela chochu, henohu kanda twakuli ilu lwihu, twatela kwiluka chikupu chalumbulula Bayibolu muntu wakeña yuma yakuspiritu hela wanha kuspiritu. Muchinu chibaaba, tukwakula awa malwihu asatu alema. (1) Chatalisha mudihi kwikala muntu wakuspiritu? (2) Yakutalilahwinyi yikutukwasha kupama kuspiritu? (3) Kuzata nañovu kwikala ‘nayitoñojoka yaKristu’ kunateli kutukwasha ñahi kwikala muntu wapama kuspiritu?

3. Bayibolu yalumbulula ñahi chaambu chekala hadi muntu wakumujimba namuntu wakuspiritu?

³ Kapostolu Pawulu watukwasha kwiluka chekala muntu wapama kuspiritu kuhitila mukushimu chaambu chekala hadi “muntu wakuspiritu” namuntu “wakumujimba.” (Tañenu 1 Akorinda 2:14-16.) Chaambwinyi chekalahu? “Muntu wakumujimba” amulumbulula nawu yena wetejaña wanyi “yuma yaNzambi yakuspiritu, muloña kudi yena yumiyi hiwusupi; nawa hanatweshi kuyilukaku.” Ilaña, “muntu wakuspiritu,” yena “wesekaña yuma yejima,” nawa wukweti “yitoñojoka yaKristu.” Pawulu watukoleshaña kwikala antu akuspiritu. Munjilanyi cheñi antu akumujimba muyaambukila nawantu akuspiritu?

4, 5. Yilwilwinyi yekala namuntu wakumujimba?

⁴ Tuhanjekenu ntahi hayilwilu yekala namuntu wakumujimba. Mukaayi mudi yilwilu yatama yakukeña yuma yakumujimba. Pawulu wahosheli haniyi yilwilu nindi hispiritu “yinakuzatika mudi antu adikañaña.” (Efwe. 2:2) Iyi spiritu yinakuletesha antu kwikala nayilwilu yidi nawantu amavulu, kuhitila mukwimbujola antu. Asha maana hayuma yakumujimba. Chinakufumamu, antu amavulu anakwila yuma yinakeñiwu nawa chinakuyiletesha kubula kulondela nshimbi jaNzambi. Muntu wakumujimba, hela watoñojokaña hohu yuma yakumujimba, himuntu watoñojokaña hohu hakwikala namaheta hela wamonaña hohu neyi yitoñojoka yindi diyaloña.

⁵ Yumanyi yikwawu yikutukwasha kwiluka muntu wakumujimba? Antu elaña “nyidimu yamujimba” hiyantu akumujimba. (Ñal. 5:19-21) Mumukanda watachi wasonekeleliyi Pawulu chipompelu chakuKorinda washimwinimu yilwilu yayivulu yawantu akweti yilwilu yakumujimba. Mwabombela, kuleta chaambu, kuhakwilaku, kuleta ntaadi, kuditwala kuyoota, kubula kulemesha wumutu nikusha maana hayakuda nikunwa. Muntu wukweti yitoñojoka yakumujimba, neyi naholokeli mukweseka wazeyeshaña yitoñojoka nakukoña nshidi. (Yish. 7:21, 22) Yuda wahosheli hadi antu atoñojokaña yuma yakumujimba nindi “hiyasha maana kuyuma yakuspirituku.”—Yuda 18, 19.

6. Munateli kwiluka ñahi muntu wakeña yuma yakuspiritu?

⁶ Hanu dinu, chatalisha mudihi kwikala “muntu wakuspiritu”? Muntu wakuspiritu washindamena hadi Nzambi, chuma chabulaña kwila muntu wakumujimba. Muntu wakeña yuma yakuspiritu wafwilaña chikupu “kwimbujola Nzambi.” (Efwe. 5:1) Dikwila nawu wazataña nañovu kutoñojaka neyi chatoñojokaña Yehova hayuma nikumona yuma neyi chayimonañayi Nzambi. Wakuhwelela chikupu nindi Nzambi wekala kwoku. Welaña yuma yejima kwesekeja nanshimbi jaYehova, yuma yabulaña kwila muntu washa maana kuyuma yakumujimba. (Mas. 119:33; 143:10) Chatela yakeñi nyidimu yakumujimba, muntu wakeña yuma yakuspiritu wafwilaña chikupu kumwekesha “nyikabu yaspiritu.” (Ñal. 5:22, 23) Hakwila twiluki chekala “muntu wakeña yuma yakuspiritu,” toñojokenu hachumichi: Neyi muntu wavula kutiyilila kutumina, antu ahoshaña nawu wakeña tumina. Munjila yoyimu, neyi muntu walemesha yuma yakuspiritu antu ahoshaña nawu wakeña yuma yakuspiritu.

7. Bayibolu yahosha nawudi hadi antu akeña yuma yakuspiritu?

⁷ Bayibolu yahosha nankashi hadi antu akeña yuma yakuspiritu. Matewu 5:3 yahosha nawu: “Adi namuzañalu wowu antu eluka nawu atela kudiza hadi Nzambi, muloña Wanta wamwiwulu wawu.” Aroma 8:6 yamwekeshaña chichawahila kukeña yuma yakuspiritu, yahosha nawu: “Kutoñojoka hayuma  yakumujimba, kwatwalaña kukufwa, ilaña kutoñojoka hayuma yakuspiritu, kwatwalaña kuwumi nikukuwunda.” Neyi tusha maana hayuma yakuspiritu, tukwikala nakuwunda kwaNzambi yinu mpinji nawa tukuchiñejaña wumi wahaya nyaaka kumbidi.

8. Muloñadi chichakeñekelaña kuzata nañovu kwikala nayilwilu yakuspiritu nikutwalekahu kuyihemba?

⁸ Hela chochu, tunakushakama mukaayi katama. Chineli yilwilu yatama yinatunyeñumuki, twatela kuzata nañovu kulonda twikali apama kuspiritu nawa neyi tunekali dehi apama, twatela kutwalekahu kwikala apama. Neyi muntu yaleka kukeña yuma yakuspiritu, wukutachika kukeña yuma yamukaayi. Tunateli kwiladi kulonda yuma yamuchidiwu yibuli kutumwekena? Tunateli kupama ñahi kuspiritu?

9. (a) Yumanyi yikutukwasha kupama kuspiritu? (b) Yakutalilahwinyi yawantu apama kuspiritu yitukuhanjekahu?

⁹ Mwana nateli kwikala namaana kuhitila mukushinshika nikwimbujola yilwilu yayiwahi yawanvwali jindi. Munjila yoyimu, ninetu tunateli kupama kuspiritu kuhitila mukushinshika nikwimbujola antu apama kuspiritu. Ilaña, yakutalilahu yatama yawantu afwilaña yuma yakumujimba yatusoñamishaña. (1 Kor. 3:1-4) MuBayibolu mwekala yakutalilahu yejima yiyedi, yatama niyayiwahi. Ilaña chineli tunakufwila kwikala antu apama kuspiritu, tuhanjekenu yakutalilahu yayiwahi yawantu itwatela kwimbujola. Tukudiza hadi Yakoba, Mariya niYesu.

10. Yakoba wamwekesheli ñahi nindi wadiña muntu wakuspiritu?

¹⁰ Chatachi, tuhanjekenu hadi Yakoba. Neyi chitunakukabakana makonu, Yakoba niyena wakabakeneña. Womikili yilwilu yatama yamanakwindi Esawu, wakeñeleña kumujiha. Kubombelahu, atwalekelihu kumudimba nikumukabisha kudi muku windi hadi mpinji yayilehi. Hela chakwila washakamineña nawantu “akumujimba,” ilaña Yakoba wadiña muntu  wakuspiritu. Wakuhweleleli muchikaninu chamukaniniwu Abarahama nawa wadihanini kuhemba chisaka chikazata mudimu walema wakushikija nkeñelu yaYehova. (Kutach. 28:10-15) Mazu niyilwilu yaYakoba yamwekeshaña nawu walondeleli nshimbi yaNzambi ninkeñelu yindi. Chakutalilahu, hamutiyishiliwu woma kudi Esawu, Yakoba wamulejeli Nzambi nindi: “Añamwini mwani . . . Wañilili neyi, Chalala nukukwila mwamuwahi; neyi, Anyaneyi nakayivulisha neyi wusekulula wakukaluñalwiji wakañanyaña kuchindawu nanochu chiwasweja kuvula.” (Kutach. 32:6-12) Wakuhweleleli muyikaninu yamukaniniwu yena niankakulula jindi kudi Yehova nawa wakeñeleña kwila yuma kwesekeja nankeñelu yaNzambi.

11. Yumanyi yamwekeshaña nawu Mariya wadiña muntu wakuspiritu?

¹¹ Ichi tuhanjekenu hadi Mariya. Muloñadi Yehova chamutondeleliyi Mariya kwikala mama yaYesu? Chakadi nikujina, Mariya wadiña muntu wakeña yuma yakuspiritu. Tuneluki ñahi? Wamwekesheli nindi wadiña muntu wakeña yuma yakuspiritu mumazu akushimeka ahosheliyi hayendeleliyi antaña jindi aZekariya naElizabeta. (Tañenu Luka 1:46-55.) Mazu ahosheliyi Mariya amwekeshaña nawu wadiña wakeña Izu daNzambi nankashi nawa wadiña weluka Nsona yachiHeberu. (Kutach. 30:13; 1 Sam. 2:1-10; Mal. 3:12) Mariya naYosefu chadisumbwiliwu adijilikili kubula kuhumañana sampu chavwalikiliyi Yesu. Chumichi chinakumwekeshadi? Chinakumwekesha nawu wejima wawu atwamijiliku nkeñelu yaYehova ninshimbi yindi kubadika kufwila yuma yakutiyisha mujimba kuwaha. (Mat. 1:25) Chimwahitili mpinji, Mariya wamweni yuma yamwekeni muchihandilu chaYesu nawa washili maana kumazu ahosheleñayi. Kubombelahu, waswekeli “yuma yejimiyi mumuchima windi.” (Luka 2:51) Washili muchima hankeñelu yaNzambi kutalisha hadi Mesiya. Kwila twimbujola chakutalilahu chaMariya chakutwamijaku nkeñelu yaNzambi muchihandilu chetu nehi?

12. (a) Munjilanyi Yesu mwadifwaniniyi naTata yindi? (b) Tunateli kumwimbujola ñahi Yesu? (Talenu mwevulu wakutachikilahu.)

¹² Hela chochu, ejima wetu, twatela kwimbujola muntwinyi wadiña wapama chikupu kuspiritu? Yesu hohu. Muchihandilu chindi chejima nimumudimu wakushimwina, wamwekesheli nindi wafwilileña kumwimbujola Tata yindi, Yehova. Watoñojokeleña, kutiya nikwila yuma neyi chelañayi Yehova nawa welileña yuma kwesekeja nanshimbi nichakeñañayi Nzambi. (Yow. 8:29; 14:9; 15:10) Chakutalilahu, esekejenu chasonekeliyi kaprofwetu Isaya hawushona watiyañayi Yehova nachasonekeliyi nsoneki waNsañu Yayiwahi Maku chatiyiliyi Yesu. (Tañenu Isaya 63:9; Maku 6:34.) Komana twekala neyi Yesu, wadiña wadiloñesha kutiyila antu wushona neyi tuwana antu anakukeñeka kuyikwasha? Kubombelahu, Yesu wadihanini chikupu kuzata mudimu wakushimwina nikudizisha antu nsañu yayiwahi. (Luka 4:43) Kutiyila antu wushona nikuzata iyi nyidimu dikwamwekeshaña nawu owu muntu wapama kuspiritu.

13, 14. (a) Yumanyi yitunateli kudizila kudi antu amakonu akeña yuma yakuspiritu? (b) Shimunenu chakutalilahu.

¹³ Nimakonu tukweti amanakwetu niahela akeña chikupu yuma yakuspiritu, anahimpi chikupu yilwilu yawu nakwikala nawuntu neyi waKristu. Hadaha mwayimonaña chiyashimwinañawu neyena, chamwekeshañawu chisambu, wushona hela yilwilu yayiwahi. Niwena alwishaña nakuzeyazeya nikubula kuwanina hakwila ekali nayilwilu yayiwahi neyi chitwalwishaña wejima wetu. Rachel, muhela wakuBrazil wahosheli nindi: “Nakeñeli chikupu yakuvwala yamukaayi. Chafuminimu, nvwalilu yami yadiña chiwahi wanyi. Ilaña chinadizili chalala  chankwashili kuhimpa nawa nekalili muntu wakuspiritu. Chadiña chakala hakwila nawu nihimpi, ilaña nekalili namuzañalu nawa nelukili chuma chinatela kwila muchihandilu.”

¹⁴ Reylene, wakuPhilippines, niyena wadiña nakukala kwambukaku. Wakeñeleña nankashi kutaña shikola yahewulu nikwiñila mudimu wamali kulonda yekali nachihandilu chachiwahi. Wahosheli nindi: “Nalekeli kufwila yuma yakuspiritu. Ilaña natachikili kumona nami kudi chuma chinnakubula kwila muchihandilu chami, chalema kubadika mudimu wami. Dichi, natachikili kusha maana hakumukalakela Yehova.” Kufuma tuhu hayina mpinji, Reylene wamonaña nindi mazu ahosheliyi Yehova ekala haMatewu 6:33, 34 alala chikupu. Wahosheli nindi: “Neluki chikupu nami mwamweni Yehova wukuñakamenaña!” Hadaha mwelukahu antu amuchidiwu muchipompelu chenu. Komana twafwilaña kwimbujola antu amuchidiwu ashinshika amulondelaña Kristu?—1 Kor. 11:1; 2 Tes. 3:7.

15, 16. (a) Twatela kwiladi hakwila twikali neyi Kristu? (b) Tunateli kwikala ñahi ‘nayitoñojoka yaKristu’?

¹⁵ Tunateli kumwimbujola ñahi Kristu hamuntu-hamuntu? Bayibolu yahosha ha 1 Akorinda 2:16 nawu twatela kwikala ‘nayitoñojoka yaKristu.’ Nawa Aroma 15:5 yahosha nawu twatela kwikala “nayitoñojoka yoyimu neyi yadiña naKristu Yesu.” Dichi, hakwila nawu twikali neyi Kristu, twatela kwiluka chatoñojokañayi nichekalayi. Kufumahu dinu hitukulondela mumahaji indi. Yesu watoñojokeleña nankashi hawubwambu windi naNzambi. Dichi neyi twikala neyi Yesu, tukwikala neyi Yehova. Chumichi chatela kutukwasha kwiluka kulema kwakutoñojoka neyi chatoñojokañayi Yesu.

¹⁶ Tunateli ñahi kwikala nayitoñojoka yindi? Atumbanji twaYesu amweni yihayamisha yeliliyi, atiyili mpanji yahosheliyi, atalileña chelileñayi nawantu ejima nawa ashinshikili chazatishileñayi yishina yaNzambi. Ahosheli nawu: “Tudi ayinsahu ayuma yejima yakoñeliyi.” (Yilw. 10:39) Hela chochu, etu hitukutwesha kushinshika yuma yinakwilayi namesuku. Ilaña Yehova watwinka nyikanda yaNsañu Yayiwahi yatukwashaña kumona yuma yelañayi Yesu. Kutaña nikutoñojokahu chikupu hanyikanda yamuBayibolu yaMatewu, Maku, Luka, niYowanu, kukutukwasha kwikala nayitoñojoka yaKristu. Dichi twatela kulondela “chikupu muntampu jindi” nawa “[twatela kwikala] nayitoñojoka yoyimu” neyi yadiña naKristu.—1 Pet. 2:21; 4:1.

17. Kutoñojoka neyi Kristu kwatukwashaña ñahi?

¹⁷ Kutoñojoka neyi Kristu kunateli kutukwasha ñahi? Neyi chatukwashaña yakuda kumujimba, kudisha yitoñojoka yetu nayitoñojoka yaKristu kukutukwasha kwikala apama kuspiritu. Twelukaña chovu-chovu yuma yinateli kwilayi Kristu hampinji. Chumichi chikutukwasha kufuukula yuma yikutuleñela kwikala nachinleji chitooka ninawubwambu wawuwahi naNzambi. Komana mukwiteja wanyi nenu yumiyi yatukwashaña ‘kumwimbujola Mwanta Yesu Kristu.’—Rom. 13:14.

18. Yumanyi yimunadizi muchinu chibaaba chinahosheña hakupama kuspiritu?

¹⁸ Tunahanjeki muchatalisha kwikala muntu wakuspiritu. Tunadizi cheñi netu tunateli kudizila kudi antu apama kuspiritu. Nawa tunahanjeki kwikala ‘nayitoñojoka yaKristu’ chikwatukwashaña kwikala apama kuspiritu. Hela chochu, kudi njila jikwawu jajivulu jinateli kutukwasha kwikala apama kuspiritu. Chakutalilahu, tunateli kwiluka ñahi chidi wuspiritu wetu? Yumanyi yikwawu yitwatela kwila hakwila nawu twikali apama kuspiritu? Nawa kupama kuspiritu kukutukwasha ñahi muchihandilu chetu? Chibaaba chinalondelihu chikutukwasha kwakula awa malwihu.