CHIBAABA CHAKUDIZA 7
Kwiluka Wuswa Wukwetiwu Akulumpi muChipompelu
“Kristu [diyi] mutu wachipompelu, chineli yena diyi chamwinu chaniwu mujimba.”—EFWE. 5:23.
KAMINA 137 Ambanda akwaKristu, Ashinshika
NSAÑU YIDI MUCHIBAABA *
1. Chumanyi chaleteshaña chisaka chaYehova kwikala chanuñañana?
TWATIYAÑA kuwaha hakwikala muchisaka chaYehova. Chumanyi chaleteshaña twikaleña mukuwunda nawa anuñañana? Chuma chimu chaleteshaña wejima wetu twazataña nañovu kulonda twovwahileña antu atondayi Yehova kulombola chipompelu. Kafwampi, kwiluka wuswa wukwetiwu antu anakulombola, kwatuleteshaña kwikala anuñañana chikupu.
2. Tukwakula malwihwinyi muchinu chibaaba?
2 Muchinu chibaaba, tukuhanjeka hadi antu enkawu wuswa muchipompelu. Kubombelahu, tukwakula awa malwihu: Mudimwinyi wukwetiwu ahela muchipompelu? Komana manakwetu wudi wejima wekala mutu wawahela ejima? Komana wuswa wukwetiwu akulumpi hadi amanakwetu niahela, diwuswa wukweti nimutu wachisaka hadi ñodindi nianyanindi? Chatachi, tuhanjekenu chitwatela kuyimonaña ahela.
TWATELA KUYIMONAÑA ÑAHI AHELA?
3. Chumanyi chinateli kutukwasha kulemesha chikupu nyidimu yazatañawu ahela?
3 Twayisakililaña ahela azataña nañovu kwakamena yisaka yawu, kuya nakushimwina nsañu yayiwahi nikukwasha antu amakwawu muchipompelu. Tunateli kuyilemesha chikupu neyi tuyimonaña neyi chayimonañawu kudi Yehova niYesu. Cheñi chitukushinshika hadi Pawulu chayimweneñayi ambanda chikutukwasha kwiluka chitwatela kuyimonaña ninetu.
4. Bayibolu yamwekeshaña ñahi nawu Yehova wayilemesha ambanda niamayala?
4 Bayibolu yamwekeshaña nawu Yehova walemesha ambanda niamayala. Chakutalilahu, yamwekeshaña nawu mumafuku awapostolu Yehova wayinkeli ambanda niamayala spiritu yindi yajila nawa wayinkeli ñovu yakukoña nyidimu yakuhayamisha, yidi neyi kuhosha madimi ashiyashana. (Yilw. 2:1-4, 15-18) Ejima ambanda niamayala ayiwayisha naspiritu yajila kulonda akayuuli hamu naKristu. (Ñal. 3:26-29) Ambanda niamayala akayinka wumi wahaya nyaaka hanu hamaseki. (Chim. 7:9, 10, 13-15) Nawa wejima wawu ambanda niamayala ayinka mudimu wakushimwina nikudizisha nsañu yayiwahi. (Mat. 28:19, 20) Nawa, Bayibolu mumukanda waYilwilu yashimuna mudimu wazatili muhela wumu wejina daPirisila hamu nanfumwindi Akwila, kumulumbulwila chiwahi Apolosi chalala, iyala wadiña wataña chikupu.—Yilw. 18:24-26.
5. Yesu wayimweneña ñahi ambanda, kwesekeja naLuka 10:38, 39, 42?
5 Yesu walemesheleña ambanda. Yesu hadiña neyi Afwarisi adiwileña ambandaku, wena hiyahanjekeleña nawambanda hadi antu amavulu hela kuhanjeka nawu haNsonaku. Ilaña, yena wahanjekeleña nawambanda niamayala nsañu yalema yamunyikanda yajila. * (Tañenu Luka 10:38, 39, 42.) Wayitejeleña ambanda kuya hamu nindi nakushimwina. (Luka 8:1-3) Nawa Yesu wayinkeli ambanda kukooleka kwakuya nakushimuna kudi apostolu nindi anamusañuli.—Yow. 20:16-18.
6. Kapostolu Pawulu wamwekesheli ñahi nindi wayilemesheli ambanda?
6 Kapostolu Pawulu wamulejeli Timotewu nindi yalemesheña ambanda. Pawulu wamulejeli kumona “ambanda akulumpi neyi amama [jindi]” nawa “ayañadima neyi ahela [jindi].” (1 Tim. 5:1, 2) Pawulu wamukwashili nankashi Timotewu hakwila yekali mukwaKristu wapama, ilaña welukili nindi mama yaTimotewu ninkaka yindi diwu amudizishili “nsona jajila.” (2 Tim. 1:5; 3:14, 15) Pawulu wayimushili ahela nakuyitena hamajina mumukanda wayisonekeleliyi Aroma. Welukili nyidimu yazatileñawu nawa wayihamekeli hanyidimu yawu.—Rom. 16:1-4, 6, 12; Fwi. 4:3.
7. Malwihwinyi itukuhanjekahu?
7 Neyi chitunamoni mumaparagilafu itunahanjekihu, Bayibolu yamwekesha wanyi nawu amanakwetu ayibadika ahela. Aheletu akweti kukeña nichisambu akwashaña nankashi chipompelu, nawa akulumpi eluka nawu yilwilu yawu yayiwahi yaletaña kuwunda nikunuñañana muchipompelu. Ilaña kudi malwihu itwatela kwakula. Chakutalilahu: Muloñadi Yehova chakeñelañayi nindi mpinji yikwawu ahela avwaleña yitambala kunyitu? Chineli amanakwetu diwu atondañawu nakwikala akulumpi niankoñi akuzatila, komana chinayi mukwila nawu manakwetu wejima wekala mutu wawahela ejima muchipompelu?
KOMANA MANAKWETU WEJIMA WEKALA MUTU WAWAHELA EJIMA?
8. Kwesekeja naAefwesesa 5:23, komana manakwetu wejima wekala mutu wawahela ejima? Lumbululenu.
8 Inehi! Manakwetu hekala mutu wawahela ejima muchipompeluku; Kristu diyi mutu. (Tañenu Aefwesesa 5:23.) Muchisaka iyala wukweti wuswa hadi ñodindi. Mwana weyala wapapatishewa hekala mutu wamama yindiku. (Efwe. 6:1, 2) Muchipompelu, wuswa wukwetiwu akulumpi hadi amanakwetu niahela wukweti mwakukumina. (1 Tes. 5:12; Heb. 13:17) Ahela ajiki anakubula kushakama nawatata jawu niamama jawu alemeshaña anvwali jawu niakulumpi. Hela chochu, neyi chekala amayala ejima muchipompelu, akweti mutu wumu hohu, Yesu.
Ajiki anakubula kushakama nawanvwali jawu mutu wawu hiYesu (Talenu paragilafu 8)
9. Muloñadi ahela chiyatela kuvwalilawu yitambala mpinji yikwawu?
9 Yehova watonda amayala kulonda alomboleña nikutañisha chipompelu, ilaña hayinka ambanda iwu wuswaku. (1 Tim. 2:12) Muloñadi? Neyi chamutondayi Yesu kwikala mutu wawamayala, iyala niyena amutonda kulombola muchipompelu kulonda yuma yendeña mukutela. Neyi yuma yinakali nawa muhela nakuzata mudimu watela kuzata manakwetu, Yehova washimuna nindi muhela watela kuvwala chitambala kumutu. * (1 Kor. 11:4-7) Yehova wayileja ahela kuvwala yitambala, bayi neyi muloña amukunkulwayiku, ilaña wakeñaña nindi amwekesheña kalemesha hantanjikilu yawumutu yashaku. Chineli tunahanjeki dehi haniyi yuma, ichi dinu twakulenu ilu lwihu: Wuswa wamuchidinyi wukweti nyitu yayisaka niakulumpi?
WUSWA WUKWETI NYITU YAYISAKA NIAKULUMPI
10. Muloñadi mukulumpi chinateli kutoñojokelayi nindi watela kushaku nshimbi muchipompelu?
10 Akulumpi amukeña Kristu, nawa akeña ‘ninyikoku’ yayinkawu kudi Yehova niYesu nawu ayihembeña. (Yow. 21:15-17) Hamuloña wakwila mukulumpi wakamenaña chipompelu, nateli kutoñojoka nindi wudi neyi tata yawantu kudi antu adi muchipompelu. Nateli kutoñojoka nindi neyi mutu wachisaka washañaku jinshimbi jinateli kukiña chisaka chindi, mukulumpi muchipompelu niyena nateli kushaku nshimbi yinateli kukiña nyikoku yaNzambi. Nawa amanakwetu niahela amakwawu ayilaña akulumpi nawu ekali neyi mutu wawu kuspiritu, ayilejaña nawu ayikwasheñaku kufuukula. Komana akulumpi ninyitu yayisaka akweti wuswa wowumu?
Akulumpi akwashaña antu adi muchipompelu kutwalekahu kuswina kwakwihi naYehova nikwiluka nawu ayikeña. Yehova wayinka mudimu wakufumisha muchipompelu antu abulaña kubalumuka mumuchima (Talenu maparagilafu 11-12
11. Nyidimu yazataña nyitu yayisaka niakulumpi yadifwana munjilanyi?
11 Kapostolu Pawulu wamwekesheli nindi nyitu yayisaka niakulumpi muchipompelu akweti nyidimu yadifwanaku. (1 Tim. 3:4, 5) Chakutalilahu, Yehova wakeñaña chisaka chejima chovwahileña mutu wachisaka. (Kol. 3:20) Nawa wakeñaña nindi antu ejima muchipompelu ayovwahileña akulumpi. Yehova wakeñaña nindi nyitu yayisaka niakulumpi akwasheña antu akamenañawu kulonda amukeñi Yehova. Wejima wawu azataña nañovu kulonda antu anakwakamenawu amoneña nawu ayikeña. Neyi chochelaña nyitu yayisaka yayiwahi, akulumpi niwena adishañaku kulonda akwasheña antu akamenañawu neyi adi mukukala. (Yak. 2:15-17) Kubombelahu, Yehova wakeñaña nindi akulumpi ninyitu yayisaka alondeleña nshimbi jindi nawa wayileja nindi: “Bayi mubadika hayuma yasonekawu” muBayiboluku.—1 Kor. 4:6.
Nyitu yayisaka ayinka wuswa kudi Yehova wakulombola yisaka yawu. Mutu wachisaka wakeña chisaka chindi, wahanjekaña nañodindi henohu kanda yafuukulihu (Talenu paragilafu 13)
12-13. Kwesekeja naAroma 7:2, wuswa wukweti nyitu yayisaka wunambuki ñahi nawuswa wukweti akulumpi?
12 Hela chochu, hekala chaambu hawuswa wukwetiyi mukulumpi nawukwetiyi mutu wachisaka. Chakutalilahu, Yehova wayinka akulumpi wuswa wakusompesha, nawa wayinka nimudimu wakufumisha muchipompelu muntu wunabuli kubalumuka mumuchima.—1 Kor. 5:11-13.
13 Kwambukaku, Yehova wenka nyitu yayisaka wuswa wabula kwinkayi akulumpi. Chakutalilahu, wamwinka mutu wachisaka wuswa wakushaku nshimbi nikukoleshamu kulonda ejima muchisaka ayovwahili. (Tañenu Aroma 7:2.) Chakutalilahu, mutu wachisaka wukweti wuswa wakuyileja anyanindi mpinji yatela kushikañawu hetala. Wukweti cheñi wuswa wakuyibabesha anyanindi neyi abula kuyovwahila oyu nshimbi. (Efwe. 6:1) Kafwampi, mutu wachisaka wakeña chisaka chindi, wasambilaña kuhanjeka nañodindi henohu kanda yashiku nshimbi, muloña wena ayedi adi “mujimba wumu.” *—Mat. 19:6.
MULEMESHENUÑA KRISTU CHINELI DIYI MUTU WACHIPOMPELU
Yesu, amwinka mudimu kudi Yehova wakulombola chipompelu chawakwaKristu (Talenu paragilafu 14)
14. (a) Kwesekeja naMaku 10:45, muloñadi chichinekalili chatelela Yehova kumutonda Yesu kwikala mutu wachipompelu? (b) Mudimwinyi wazataña Izanvu Dalombolaña? (Talenu chikasha chinakwila nawu “ Mudimu Wazataña Izanvu Dalombolaña.”)
14 Yehova walandili antu ejima ekala muchipompelu nefutu danyiloña, kushilahu tuhu niantu ejima amukuhwelelaña Yesu. (Tañenu Maku 10:45; Yilw. 20:28; 1 Kor. 15:21, 22) Dichi chatelela chamutondeliyi Yesu kwikala mutu wachipompelu, muloña diyi wahanini wumi windi kwikala ifutu danyiloña. Chineli Yesu diyi mutu wetu, wukweti wuswa wakushaku nshimbi yatela kulondelawu antu ejima, yisaka nichipompelu chejima. (Ñal. 6:2) Yesu hakuminaña hohu dakutwinka nshimbiku. Watwakamenaña chachiwahi nawa watukeña hamuntu-hamuntu.—Efwe. 5:29.
15-16. Yumanyi yimunadizili kumazu ahosheliyi muhela Marley nimanakwetu Benjamin?
15 Ahela amwekeshaña nawu amulemesha Kristu, chovwahilañawu nshimbi yayinkañawu kudi amayala atondayi nawu ayakameneña. Muhela Marley wakuUnited States, washimwini chatiyañawu ahela amavulu. Wahosheli nindi: “Nalemesha mudimu wunazataña hakwikala mumbanda wasumbuka nawa muhela muchipompelu. Nazataña nañovu kulonda nitwalekihu kulemesha wuswa wamwinkayi Yehova nfumwami niakulumpi muchipompelu. Ilaña nfumwami niakulumpi muchipompelu aleteshaña chimpeleli kuyovwahila muloña anlemesha nawa ansakililaña hanyidimu yinazataña.”
16 Amanakwetu amwekeshaña nawu eluka mwatalisha ntanjikilu yawumutu neyi ayilemeshaña ahela. Manakwetu Benjamin wakuEngland, wahosheli nindi: “Ñakwilu yahanañawu ahela hakupompa niyuma yashimunañawu yayikwashaña hakudiza nikuzata mudimu wakushimwina yankwashaña. Mudimu wazatañawu walema chikupu.”
17. Muloñadi chitwatela kulemeshela antu enkayi Yehova wuswa?
17 Neyi amayala, ambanda, nyitu yayisaka niakulumpi muchipompelu eluka nawa alemesha antu enkayi Yehova wuswa, chipompelu chikwikala mukuwunda. Chuma chasweja kulema, tukumuhamekaña Tata yetu wamwiwulu, Yehova.—Mas. 150:6.
KAMINA 123 Twatela Kumwovwahila Nzambi
^ para. 5 Mudimwinyi wukwetiwu ahela muchipompelu? Komana manakwetu wejima wekala mutu wawahela ejima? Komana wuswa wukwetiwu akulumpi diwuswa wukweti ninyitu yayisaka? Muchinu chibaaba, Izu daNzambi dikutukwasha kwakula awa malwihu.
^ para. 5 Talenu paragilafu 6 muchibaaba chinakwila nawu “Koleshenuña Ahela Muchipompelu Chenu,” muKaposhi Kakutalila kaSeptember 2020.
^ para. 9 Talenu chikasha chinakwila nawu “ Mpinjinyi Yatela Kuvwalayi Muhela Chitambala?”
^ para. 13 Hakwila mwiluki watela kufuukulahu chipompelu mwatela kuyaña chisaka, talenu paragilafu 17-19, muchibaaba chinakwila nawu “Lemeshenuña Antu Ejima Adi Muchipompelu chaYehova,” muKaposhi Kakutalila kaAugust 2020.
^ para. 59 Neyi munakukeña kwilukilahu nsañu yayivulu haniyi nsañu, talenu mukanda “waShakamenu Mukukeña kwaNzambi,” mafu. 209-211.
^ para. 64 Neyi munakukeña kwiluka jajivulu hamudimu wazataña Izanvu Dalombolaña, talenu Kaposhi Kakutalila kaJuly 15, 2013, mafu. 20-25.
