1. Neyi muhela hakukeña muntu watela kusumbukayi nindi, malwihwinyi atela kudihulayi?

YESU KRISTU diyi mutu wawakwaKristu ejima nawa yena wawanina. Hela chochu, mumbanda mukwaKristu neyi nasumbuki, mutu windi wekalaña iyala wabula kuwanina. Chumichi chinateli kwikala chakala. Dichi neyi nakukeña muntu wakusumbuka nindi, watela kudihula nindi: ‘Yumanyi yinakumwekesha nawu iwu manakwetu wakekala mutu wachisaka wamuwahi? Komana walemesha yuma yakuspiritu muchihandilu chindi? Neyi hayilemeshaku, neluki ñahi nami wukatukwasha kutwalekahu kwikala nawubwambu wawuwahi naYehova neyi tunadisumbuli?’ Hela chochu, muhela watela kudihula cheñi nindi: ‘Yilwilwinyi yayiwahi yinikweti yikatukwasha muwulu wetu? Komana nadiwunjika nawa nekala nachisambu? Komana wubwambu wami naYehova wakola?’ (Mukwa. 4:9, 12) Mumbanda neyi yafuukulahu chiwahi henohu kanda yasumbuki, chumichi chakamukwasha kwikala namuzañalu muwulu windi.

2. Tukuhanjekadi muchinu chibaaba?

² Ahela akwaKristu amavulu ovwahilaña anfumu jawu. Twatela kuyihameka! Twatiyaña kuwaha kumukalakela Yehova hamu nanawa ambanda ashinshika. Muchinu chibaaba, tukwakula malwihu asatu: (1) Kukalanyi kwamonañawu awa ambanda? (2) Muloñadi mumbanda chatela kumwovwahilayi nfumwindi? (3) Yumanyi yinateli kudizilaku amayala akwaKristu niañodi jawu kudi Yesu, Abigayili niMariya, ñoda Yosefu mama yaYesu kutalisha hakwovwahila nikulemesha wumutu?

3. Muloñadi adisumbula ejima chamwenañawu kukala?

³ Wulu hichawaana chachiwahi chafuma kudi Nzambi, ilaña antu hiyawaninaku. (1 Yow. 1:8) Dichuma chaletesha Bayibolu  yiyisoñamisheña adi muwulu nawu akumonaña kukala, kukala kwashimunawu nawu “yihuñu mumujimba wawu.” (1 Kor. 7:28) Talenu kukala kunateli kumonayi mumbanda muwulu.

4. Muloñadi mumbanda chinateli kutoñojokelayi nindi chapela wanyi kumwovwahila nfumwindi?

⁴ Hadaha hamuloña wanochu chamukulishawu, dichi mumbanda nateli kutoñojoka nindi kwila yamwovwahila nfumwindi nehi. Muhela Marisol, wakuUnited States wahosheli nindi: “Kumukala wetu, ambanda ayilejeleña nawu esekana nawamayala muyuma yejima. Neluka nami Yehova wamutonda iyala kwikala mutu nawa waleja ambanda kwovwahila amayala, ilaña niwena atela kuyilemesha. Champelelaña wanyi kwovwahila mpinji yejima muloña antu mukaayi kahoshaña nawu eyala namumbanda esekana.”

5. Yilwilwinyi yabula muNsona yikwetiwu amayala amakwawu kutalisha hadi ambanda?

⁵ Mpinji yikwawu, mumbanda nateli kusumbuka kudi iyala watoñojokaña nindi ambanda amukunkulwayi. Muhela Ivon, wakuSouth America wahosheli nindi: “Kumukala wetu, amayala diwu asambilañahu kuda dinu himukuhiña ambanda. Atwansi awambanda diwu atelekaña nikuwahisha hamatala ilaña anyana awamayala ayikalakelaña kudi amama jawu niahela jawu nawa ayilejaña nawu wena ‘hiyanyanta hamatala.’” Muhela Yingling, washakamaña kuAsia, wahosheli nindi: “Mwidimi detu mwekala nhoshelu yakwila nawu ambanda hiyatela kwikala ababala hela nawuswaku. Wena atela kuzataña hohu nyidimu yahetala nawa hiyatela kumulejamu nfumwawu chidi yitoñojoka yawuku.” Iyala waluwankana natushidikilu twabula kwikala twamuBayibolu wamukolesheleña ñodindi chihandilu, hamwimbujolaña Yesuku, nawa wamutiyishaña Yehova kutama.—Efwe. 5:28, 29; 1 Pet. 3:7.

6. Yumanyi yatela kwilawu ambanda hakwila akoleshi wubwambu wawu naYehova?

⁶ Neyi chahosheli chibaaba chinafumihu, Yehova wakeñaña nindi amayala akeñeleña yisaka yawu yuma yakeñekaña muchisaka nikuyikwasha kwikala nawubwambu wakola naYehova. (1 Tim. 5:8) Hela chochu, ahela asumbuka atela kwikalaña nampinji yakutaña Bayibolu nikutoñojokahu chikupu nikulomba kudi Yehova ifuku niifuku. Chumichi chinateli kwikala chakala. Ambanda ekala akasika nanyidimu, dichi anateli kutoñojoka nawu hiyakweti mpinji hela ñovu yakwila iyi yumaku, ilaña chalema kwikala nampinji. Muloñadi? Muloña Yehova nakukeña wejima wetu twikali nawubwambu wakola nayena.—Yilw. 17:27.

7. Chumanyi chinateli kumukwasha mumbanda kumwovwahila nfumwindi nikumulemesha?

⁷ Mumbanda watela kuzata nañovu kulonda yamwovwahileña nfumwindi wabula kuwanina. Hela chochu, chinateli kwikala chaswayi kuzata mudimu windi wamwinkawu kudi Yehova neyi yeluka mwatalisha Nsona chiyahosha nawu yovwahileña nfumwindi nikumulemesha.

8. Neyi chinamwekeshiwu haAefwesesa 5:22-24, muloñadi mumbanda mukwaKristu chatela kumwovwahilayi nfumwindi?

⁸ Mumbanda mukwaKristu watela kumwovwahila nfumwindi muloña dichakeñañayi Yehova. (Tañenu Aefwesesa 5:22-24.) Wamukuhwelela Tata yindi wamwiwulu muloña weluka nindi wamukeña nawa wamulejaña kwila yuma yinelukiyi nindi yikumukwasha.—Kuhit. 6:24; 1 Yow. 5:3.

9. Chumanyi chamwekanaña neyi muhela mukwaKristu yovwahilaña nfumwindi?

 ⁹ Kaayi kalejaña ambanda kudiwula nshimbi jaYehova nikutoñojokaña nawu neyi ovwahilaña akuyimonaña nawu amukunkulwayi. Hela chochu, antu aletaña iyi yitoñojoka hiyamwiluka Nzambi yetu wukweti kukeñaku. Yehova hanateli kuyinka anyanindi awambanda lushimbi lunateli kuyimwekesha nawu amukunkulwayiku. Muhela wazataña nañovu kulonda yamwovwahileña nfumwindi kwesekeja nachakeñañayi Yehova waletaña kuwunda mwitala dindi. (Mas. 119:165) Yena, nfumwindi nianyanawu ekalaña namuzañalu.

10. Yumanyi yitunadizili kumazu ahosheliyi Carol?

¹⁰ Mumbanda wamwovwahilaña nfumwindi wamwekeshaña nindi wamukeña Yehova nawa wamulemesha, yena washiliku ntanjikilu yakwila nawu kwikali mutu. Muhela Carol, washakamaña kuSouth America wahosheli nindi: “Neluka nami nfumwami waluwañeshaña. Neluka cheñi nami chinelaña neyi yena naluwañeshi chamwekesha chekala wubwambu wami naYehova. Dichi namwovwahilaña muloña nakeñaña kumutiyisha kuwaha Tata yami wamwiwulu.”

11. Chumanyi chamukwashaña muhela Aneese kwanakena, nawa chumanyi chitunakudizila kumazu ahosheliyi?

¹¹ Chinateli kumukalila mumbanda kumwovwahila nfumwindi neyi chakwila nfumwindi nakushaku maana wanyi kuyuma yinakumwakamisha hela yinakukeñayi. Ilaña talenu chuma chelañayi muhela Aneese neyi chuma chamuchidiwu chinamwekani. Wahosheli nindi: “Nahilaña wanyi. Muloña neluka nami wejima wetu twaluwañeshaña. Chuma chinakeñaña hikwanakena neyi chanakenañayi Yehova. Neyi nimwanakena nekalaña nakuwunda kwamuyitoñojoka.” (Mas. 86:5) Mumbanda wanakenaña chamukalilaña wanyi kwovwahila.

12. Antu amuchidinyi ashimunawu muBayibolu?

¹² Amakwawu anateli kuhosha nawu muntu wovwahilaña wazeya. Ilaña dimu wanyi. MuBayibolu mwekala antu amavulu adiña ahamuka ilaña adiña nakwovwahila. Talenu  yuma yitunateli kudizila kudi Yesu, Abigayili niMariya.

13. Muloñadi Yesu chamwovwahilañayi Tata yindi? Lumbululenu.

¹³ Yesu wamwovwahilaña Yehova hela chakwila wukweti maana nawa weluka nyidimu. Yesu chatañishileñayi munjila yapela nawa yatiyakana chamwekeshaña nawu wekala namaana chikupu. (Yow. 7:45, 46) Yehova welukili nindi Yesu nateli kuzata mudimu nawa wamwitejeli kuzatila hamu nindi hampinji yaleñeleñayi mawulu nimaseki. (Yish. 8:30; Heb. 1:2-4) Nawa kufuma mpinji yamusañwiliwu Yesu, Yehova wamwinka Yesu ‘wuswa wakutala yuma yejima yamwiwulu niyahamaseki.’ (Mat. 28:18) Hela chakwila Yesu wukweti ñovu yakuzata yuma, walombaña wukwashu kudi Yehova. Muloñadi? Muloña wamukeña Tata yindi.—Yow. 14:31.

14. Yumanyi yinateli kudizilawu amayala (a) kudi Yehova chayimonañayi ambanda? (b) kumazu adi haYishimu 31?

¹⁴ Yuma yatela kudizilaku amayala. Yehova helili nindi ambanda ovwahileña anfumu jawu hamuloña wakuyimona nindi amukunkulwayiku. Yehova wamwekesha chumichi muloña watonda ambanda nimayala kulonda akayuuli hamu naYesu mwiwulu. (Ñal. 3:26-29) Yehova wamwekesha nindi wamukuhwelela Mwanindi muloña wamwinka wuswa. Munjila yoyimu, iyala niyena watela kumwinkahu ñodindi wuswa. Bayibolu yashimuna nyidimu yimu yatela kuzatayi mumbanda, chakutalilahu, nateli kuzata mudimu wakuhemba itala, kulanda yuma, nikulanda nakulandulula. (Tañenu Yishimu 31:15, 16, 18.) Bayi neyi hinduñu wunateli kubula kwidisha yitoñojoka yindiku. Ilaña, nfumwindi wamukuhwelela nawa watiyaña yitoñojoka yindi. (Tañenu Yishimu 31:11, 26, 27.) Neyi iyala yamulemeshaña ñodindi muniyi njila, ñodindi wukumwovwahilaña nawa wukuzañalalaña.

15. Yumanyi yatela kudizila ambanda kudi Yesu?

¹⁵ Yuma yatela kudizilaku ambanda. Hela chakwila Yesu wazatili nyidimu yamaneni, hatiyaña nsonyi yakumwovwahila Yehovaku. (1 Kor. 15:28; Fwi. 2:5, 6) Hohamu, mumbanda wamwimbujolaña Yesu hadimonaña nindi wamukunkulwayi neyi yamwovwahila nfumwindiku. Wamwovwahilaña nfumwindi hamuloña wakwila wamukeña Yehova nawa wamulemesha.

16. Kwesekeja 1 Samweli 25:3, 23-28, kukalanyi kwamweniyi Abigayili? (Talenu mwevulu wudi hakava.)

¹⁶ Abigayili wadiña ñoda Nabali. Nabali wadiña wadikeña, wadivwimba nawa wabulaña kusakilila. Hela chochu, Abigayili watwalekelihu kuhemba wulu windi. Neyi wakeñeleña nindi wulu wawu wumani kachi wamulekeli Davidi niantu jindi nindi amujahi nfumwindi. Ilaña, dimweliliyi wanyi, wazatili nañovu yejima kulonda yamukiñi Nabali niamwitala dindi. Toñojokenu hakuhamuka kwamwekesheliyi hakwila nawu yayi nakudibulakana nawamayala 400 nikuhanjika naDavidi nakalemesha. Wadanakeneni hayiluwa yakoñeliyi nfumwindi. (Tañenu 1 Samweli 25:3, 23-28.) Davidi welukili nindi Yehova wamuzatishili iwu mumbanda wahamuka kulonda yamulekeshi kukoña chiluwa chasweja.

17. Yumanyi yinateli kudizilaku amayala kunsañu yaDavidi naAbigayili?

¹⁷ Yuma yatela kudizilaku amayala. Abigayili wadiña mumbanda wamaana. Davidi watiyilili mwamulejeliyi. Chafuminimu, helili chuma chadi kumuletesha kwikala namuloña wamashiku. Munjila yoyimu, iyala wukweti maana wukusambila kutiyilila yitoñojoka yañodindi henohu kanda yafuukulihu chuma chalema. Hadaha yitoñojoka yañodindi  yinateli kumukwashaku kubula kufuukula mwaluwa.

18. Yumanyi yinateli kudizilawu ambanda kudi Abigayili?

¹⁸ Yuma yatela kudizilaku ambanda. Mumbanda wamukeña Yehova nawa wamulemesha nateli kukwasha chisaka chindi, hela chakwila nfumwindi hamukalakelaña Yehova hela halemeshaña nshimbi jaNzambiku. Wukukeña wanyi njila yidi yejima nindi yamanishilimu wulu windi. Ilaña, wukumulemeshaña nikumwovwahila nfumwindi, nawa wukumukwasha nfumwindi kulonda yamwiluki Yehova. (1 Pet. 3:1, 2) Hela neyi nfumwindi nafuukulihu wanyi kumukalakela Yehova, Yehova wukutiyaña kuwaha hakumona chamwovwahilañayi nfumwindi nichashinshikayi.

19. Mpinjinyi yatela kubula kumwovwahilayi mumbanda nfumwindi?

¹⁹ Hela chochu, mumbanda mukwaKristu wamwovu, wukwiteja wanyi neyi nfumwindi yamwila nindi yafumpi nshimbi yamuBayibolu hela yishina. Twili netu, muhela anamuleji kudi nfumwindi wabula kwitiya nindi yatwambi, yeyi, hela kwila yuma yikwawu yakaanishawu muBayibolu. AkwaKristu ejima, kushilahu niahela asumbuka, chatachi atela kumwovwahila Yehova muyuma yejima. Neyi muhela amuleja nawu yafumpi yishina yamuBayibolu, watela kukaana, watela kulumbulula nakalemesha chuma chinaleteshi yabuli kwila ochu chuma.—Yilw. 5:29.

20. Tuneluki ñahi netu Mariya wadiña nawubwambu wakola naYehova?

²⁰ Mariya wadiña nawubwambu wakola naYehova. Wadiña weluka jiNsona chikupu. Hampinji yahanjekeleñayi naElizabeta mama yaYowanu mupapatishi, Mariya wahosheli mazu ekala muNsona yachiHeberu kubadika mapampa 20. (Luka 1:46-55) Toñojokenu hachumichi: Hela chakwila Mariya amoteli kudi Yosefu, kañelu kaYehova hikasambilili kudimona naYosefuku. Kañelu kasambilili kuhosha naMariya nakumuleja nindi wakavwala Mwana kaNzambi weyala. (Luka 1:26-33) Yehova wamwilukili chikupu Mariya nawa wakuhweleleli nindi wakamukeña Mwanindi nikumuhemba chachiwahi. Nawa  chakadi nikujina, Mariya watwalekelihu kwikala nawubwambu wawuwahi naYehova nihanyima yakwila Yesu nafwi dehi nawa anamusañuli nakuya mwiwulu.—Yilw. 1:14.

21. Yumanyi yatela kudizilaku amayala kunsañu yamuBayibolu kutalisha hadi Mariya?

²¹ Yuma yatela kudizilaku amayala. Iyala watiyaña kuwaha neyi ñodindi weluka Nsona chikupu. Hatiyaña kutama hela kutoñojoka nindi akumutambula wumutuku. Weluka nindi neyi ñodindi weluka Bayibolu niyishina yekalamu nateli kumukwashaku kwakamena chisaka. Hela chakwila mumbanda wataña kubadika nfumwindi iyala diyi wukweti mudimu wakulombola kudifukula kwachisaka ninyidimu yikwawu yakundama kukudifukula.—Efwe. 6:4.

22. Yumanyi yatela kudizilawu ambanda kudi Mariya?

²² Yuma yatela kudizilaku ambanda. Mumbanda watela kumwovwahilaña nfumwindi, ilaña watela kukoleshaña chikuhwelelu chindi yomwenindi. (Ñal. 6:5) Hakwila yeli mwenimu watela kwikalaña nampinji yakudiza kwankawindi nikutoñojokahu chikupu. Chumichi chinateli kumukwasha kutwalekahu kumukeña nikumulemesha Yehova nawa wukumwovwahilaña nfumwindi.

23. Ambanda ovwahila adikwashaña ñahi aweni, yisaka yawu nichipompelu?

²³ Ambanda ovwahilaña anfumujawu muloña wakumukeña Yehova akwikalaña namuzañalu kubadika ana adikañaña nantanjikilu yaYehova yakwila nawu kwikali mutu. Ilaña yuma yayiwahi yatela kwimbujolawu atwansi awambanda niawamayala. Nawa aletaña kuwunda nimuzañalu muchisaka nimuchipompelu. (Tit 2:3-5) Hakachi kawantu anakumukalakela Yehova amavulu hiyambanda ashinshika. (Mas. 68:11) Wejima wetu, chili tudi amayala hela ambanda tukweti mudimu walema muchipompelu. Muchibaaba chinalondelihu twakahanjeka chitunateli kuzata iwu mudimu wejima wetu.