1. Yumanyi yinateli kumuluwañesha iyala?

IZU dakwila nawu “mutu” datalisha mudihi? Amayala amakwawu afuukulaña chakuhemba añodi jawu nianyanawu kwesekeja nayisemwa yawu, tushidikilu twawu hela nkulilu yawu. Talenu chahosheli muhela Yanita washakamaña kuEurope nindi, “Kunashakamaña antu atoñojokaña nawu amayala alema kubadika ambanda nawa ayimonaña nawu hiyanduñu.” Nawa Manakwetu Luke, washakamaña kuUnited States, wahosheli nindi, “Atata jawantu alejaña anyanawu awamayala nawu yuma yahoshañawu ambanda yamukunkulwayi, hiyatela kuyitiyililaku.” Hela chochu, Yehova hakeñaña nindi amayala amoneña añodijawu nawu amukunkulwayiku. (Esekejenu Maku 7:13.) Hanu dinu iyala nateli kwikala ñahi mutu wachisaka wamuwahi?

2. Chumanyi chatela kwiluka mutu wachisaka, nawa muloñadi?

² Hakwila iyala yekali mutu wachisaka wamuwahi, watela kwiluka yuma yakeñañayi Yehova nindi yeleña. Watela kwiluka cheñi chaletesheli Yehova yashiku wumutu nichatela kumwimbujolayi Yehova niYesu. Muloñadi iyala chatela kwilukilayi iyi yuma? Muloña Yehova wenka nyitu yayisaka wuswa nawa wakeñaña nindi azatisheña wuswa wawu chiwahi.—Luka 12:48b.

3. Kwesekeja namazu ekala ha 1 Akorinda 11:3, yumanyi yitwadizilañaku kutalisha hakwikala mutu?

³ Tañenu 1 Akorinda 11:3. Iyi vasi yinakushimuna Yehova chatanjikayi yisaka yindi mwiwulu nihamaseki. Kwikala mutu mwabombela yuma yiyedi, kwikala nawuswa nikuyisompeshelahu. Yehova diyi “mutu” hela diyi wukwetu wuswa wabadika  nawa anyanindi ejima, añelu niantu akakula kwesekeja nachazatishañawu wuswa wawu. (Rom. 14:10; Efwe. 3:14, 15) Yehova wamwinka Yesu wuswa hachipompelu, ilaña Yesu wakakuula kudi Yehova nanochu chatwakamenañayi. (1 Kor. 15:27) Yehova wamwinka cheñi iyala wuswa hadi ñodindi nianyanindi, ilaña iyala wakakuula kudi Yehova nikudi Yesu nanochu chakamenañayi chisaka chindi.—1 Pet. 3:7.

4. Wuswa wamuchidinyi wukweti Yehova niYesu?

⁴ Chineli Yehova diyi Mutu wayisaka yejima mwiwulu niheseki, diyi wukweti wuswa wakushaku nshimbi yatela kulondelawu anyanindi nawa wudi nañovu yakuyileja nindi chiña ayovwahili. (Isa. 33:22) Chineli Yesu niyena diyi mutu wachipompelu chawakwaKristu, wukweti wuswa wakushaku nshimbi nikumona nindi anayovwahili.—Ñal. 6:2; Kol. 1:18-20.

5. Wuswanyi wukweti mutu wachisaka, nawa wuswa windi wakumina mudihi?

⁵ Neyi chekala Yehova niYesu, mutu wachisaka wukweti wuswa wakufuukulahu yuma yatela kulondela chisaka chindi. (Rom. 7:2; Efwe. 6:4) Hela chochu, wuswa windi wukweti mwakukumina. Chakutalilahu, nshimbi jindi jatela kushindamena hayishina yekala Mwiizu daNzambi. (Yish. 3:5, 6) Nawa mutu wachisaka hakweti ñovu yakuyishilaku nshimbi antu abula kwikala muchisaka chindiku. (Rom. 14:4) Cheñi neyi anyanindi awamayala niawambanda anakuli nawa anafumi hetala, akutwalekahu kumulemesha, ilaña hiyadi cheñi mumakasa indiku.—Mat. 19:5.

6. Muloñadi Yehova chashililiku ntanjikilu yakwikala mutu?

⁶ Yehova washiliku ntanjikilu yakwikala mutu muloña wakeña chisaka chindi. Hichawaana chafuma kudi yena. Ntanjikilu yakwikala mutu yakwashaña chisaka chaYehova kuzata chiwahi mukuwunda nimukutela. (1 Kor. 14:33, 40) Neyi hikwadiña ntanjikilu yakwikala mutuku, mutenowu chisaka chaYehova hichadi kwikala chanuñañana nawa chamuzañaluku. Chakutalilahu, kwosi wadi kwiluka watela kushaku nshimbi niwatela kulombolañaku.

7. Kwesekeja naAefwesesa 5:25, 28, komana Yehova wakeñaña nindi amayala akabisheña añodi jawu?

⁷ Neyi chachiwahi iyala kwikala mutu wachisaka chindi, muloñadi ambanda amavulu chatoñojokelañawu nawu ayikabishaña kudi amayala? Chumichi chamwekanaña muloña amayala amavulu adiwulaña nshimbi jaNzambi kutalisha hayisaka nawa alondelaña tushidikilu niyisemwa yawu. Akabishaña cheñi añodi jawu kulonda aditiyisheña awenawu kuwaha. Chakutalilahu, iyala nateli kukabisha ñodindi kulonda yadimwekeshi nindi walema nawa nindi “hiyala.” Nateli kutoñojoka nindi kwila yakanjikija ñodindi kumukeña nehi, ilaña nateli kumuletesha yamutiyeña woma. Nawa nateli kumuchinisha kulonda yamuyuuleña. * Yitoñojoka niyilwilu yamuchidiwu yatama, amayala akweti yilwilu yamuchidiwu alemeshaña wanyi añodi jawu neyi chatela kuyilemeshawu nawa chumichi chinambukiku nachakeñañayi Yehova.—Tañenu Aefwesesa 5:25, 28.

8. Iyala nateli kwikala ñahi mutu wachisaka wamuwahi?

⁸ Iyala nateli kwikala mutu wachisaka wamuwahi neyi yamwimbujolaña Yehova niYesu chazatishañawu wuswa wawu. Talenu iyi yilwilu yiyedi yamwekeshañayi Yehova  niYesu, nawa talenu mutu wachisaka chinateli kumwekeshayi iyi yilwilu kudi ñodindi nianyanindi.

9. Yehova wamwekeshaña ñahi nindi wadizoza?

⁹ Kudizoza. Yehova wukweti maana kubadika muntu wudi wejima, ilaña watiyililaña niyitoñojoka yawambuña indi. (Kutach. 18:23, 24, 32) Wetejaña anyanindi kushimuna yitoñojoka yawu. (1 Anya. 22:19-22) Yehova wawanina, ilaña hakuhwelelaña nindi twikali awaninaku. Dichi wakwashaña antu abula kuwanina amukalakelaña kulonda azateña chiwahi. (Mas. 113:6, 7) Nawa Bayibolu yamutena Yehova nawu “nkwashi.” (Mas. 27:9; Heb. 13:6) Mwanta Davidi wahosheli nindi watwesheli kuzata nyidimu yamaneni muloña wakwila Yehova wadizozeli nakumukwasha.—2 Sam. 22:36.

10. Yesu wamwekesheli ñahi kudizoza?

¹⁰ Talenu cheliliyi Yesu. Hela chakwila wadiña Mwanta wawatumbanji twindi, wayiwelesheli kunyendu. Muloñadi Yehova chasonekeleliyi iyi nsañu muBayibolu? Chakadi nikujina, wasonekeleli antu ejima ninyitu yayisaka kulonda alondeleñamu. Yesu yomweni wahosheli nindi: “Ami nayileji chakutalilahu, kulonda ninenu nawa mwileña neyi chochinnayilili enu.” (Yow. 13:12-17) Hela chakwila wadiña nañovu chikupu, Yesu hakeñeleña nindi amukalakeleñaku. Ilaña wayikalakeleleña akwawu.—Mat. 20:28.

11. Indi mutu wachisaka watela kwikala ñahi wadizoza neyi chekala Yehova niYesu?

¹¹ Yuma yitwatela kudizilaku. Mutu wachisaka watela kumwekesha nindi wadizoza munjila jajivulu. Chakutalilahu, hakufwilaña nindi ñodindi nianyanindi ekali awaninaku. Watiyililaña munakutoñojoka chisaka chindi hela chakwila anakukaana yitoñojoka yindi. Muhela Marley wakuUnited States wahosheli nindi: “Ami nawanfumwami mpinji jikwawu twekalaña nayitoñojoka yambuka. Ilaña neluka nami anlemesha muloña ehulaña chidi yitoñojoka yami nawa atoñojokañahu henohu kanda afuukulihu.” Kubombelahu, iyala wadizoza wazataña nitunyidimu twahetala, hela chakwila muchituñilu mwashakamañayi antu amonaña iyi nyidimu nawu yawambanda. Chumichi chakala. Muloñadi? Muhela Rachel wahosheli nindi: “Kumukala wetu neyi  iyala yakwashaku ñodindi kukosa yeña hela kuwahisha mwitala, antuñi nindi niantaña jindi akutachika kutoñojoka nawu ‘hiyala’ wanyi. Atoñojokaña nawu wakañanyaña kuyuula ñodindi.” Neyi kumukala wenu kwekala yilwilu yamuchidi iwu, anukenuña nenu Yesu wayiwelesheli atumbanji twindi kunyendu hela chakwila iwu mudimu awumweneña nawu wawañamba. Iyala wamuwahi hakeñaña kudimwekesha nindi walemaku, ilaña wakeñaña kuzañalesha ñodindi nianyanindi. Kubombela hakudizoza, chilwilwinyi chikwawu chatela kwikala namutu wachisaka?

12. Kukeña kwamuleteshaña Yehova niYesu kwiladi?

¹² Kukeña. Yuma yejima yelañayi Yehova wayilaña muloña wakukeña. (1 Yow. 4:7, 8) Wamwekeshaña nindi watukeña chatwinkañayi yakuda yakuspiritu kuzatisha Izu dindi Bayibolu nikuloñesha kwindi. Watukwashaña kwiluka netu twakiñewa chatulejañayi nindi watukeña. Indi yuma yakumujimba? Yehova “watwinkaña chikupu yuma yejima yitwadiluñishaña.” (1 Tim. 6:17) Neyi tunaluwañeshi watufumbaña, ilaña halekaña kutukeñaku. Yehova watuloñesheleli ifutu danyiloña muloña watukeña. Yesu niyena watukeña nankashi muloña wahanini wumi windi kukoola etu. (Yow. 3:16; 15:13) Kwosi chuma chinateli kuyambula antu ashinshika kukukeña kwayikeñawu kudi Yehova niYesuku.—Yow. 13:1; Rom. 8:35, 38, 39.

13. Chalemenadi mutu wachisaka kukeña chisaka chindi? (Talenu chikasha chinakwila nawu “ Indi Iyala Wunasumbuli Nateli Kwila Ñahi Hakwila Amulemesheña Kudi Ñodindi?”)

¹³ Yuma yitwatela kudizilaku. Yuma yejima yelañayi mutu wachisaka watela kuyilaña hamuloña wakukeña. Chumichi chalemenadi? Kapostolu Yowanu wakwili nindi: “Muntu wabula kukeña manakwindi [hela amuchisaka] amonañayi namesu, hakutwesha kukeña Nzambi abula kumonayiku.” (1 Yow. 4:11, 20) Iyala wakeña chisaka chindi nawa wakeña kumwimbujola Yehova niYesu, wakwashaña chisaka chindi kwikala nawubwambu naYehova nikuyikwasha kwikala akiñewa nikuyikeñela  yuma yakumujimba. (1 Tim. 5:8) Wayidizishaña anyanindi nikuyifumba. Wafuukulaña cheñi yuma yikuleta kalemesha hadi Yehova nawa yikukwasha chisaka chindi. Tuhanjekenu haniyi yuma yakeñekaña nawa tumoni cheñi mutu wachisaka chinateli kumwimbujolayi Yehova niYesu.

14. Mutu wachisaka wakwashaña ñahi chisaka chindi kwikala nawubwambu wakola naYehova?

¹⁴ Kukwasha chisaka chindi kulonda chikali nawubwambu naNzambi. Kufwana Tata yindi, Yesu wadiña nakukwasha antu amulondeleleña kwikala nawubwambu naNzambi. (Mat. 5:3, 6; Maku 6:34) Munjila yoyimu, chuma chalema chatela kwilayi mutu wachisaka hikukwasha chisaka chindi kwikala nawubwambu wakola naYehova. (Kuhit. 6:6-9) Wakwashaña antu amuchisaka chindi kulonda atañeña nikudiza Izu daNzambi, kuya nakupompa, kushimwina nsañu yayiwahi nikuyikwasha kwikala nawubwambu wakola naYehova.

15. Munjilanyi munateli kukwashilayi mutu wachisaka chisaka chindi kwikala chakiñewa?

¹⁵ Kukwasha chisaka chindi kulonda chikali chakiñewa. Yehova wamwekesheli hamesu awantu nindi wamukeña Yesu. (Mat. 3:17) Yesu wamwekesheli nindi wayikeña atumbanji twindi muyuma yelileñayi niyahosheleñayi. Niwena amwekesheli nawu amukeña. (Yow. 15:9, 12, 13; 21:16) Mutu wachisaka nateli kumwekesha nindi wamukeña ñodindi nianyanindi muyuma yelañayi, chidi neyi kudiza nawu Bayibolu. Watela cheñi kuyileja nindi wayikeña nawa nindi wayilemesha, neyi chinatwesheki, watela kuyihamekela hamesu awantu.—Yish. 31:28, 29.

16. Chumanyi chikwawu chatela kwilayi mutu wachisaka, nawa chumanyi chatela kutondolwelayi?

¹⁶ Kukeñela chisaka chindi yuma yakumujimba. Yehova wayinkeleña aIsarela yuma yakumujimba nihampinji yayibabesheleñayi muloña wakubula kwovwahila. (Kuhit. 2:7; 29:5) Nimakonu watwinkaña yuma yitwakeñaña. (Mat. 6:31-33; 7:11) Munjila yoyimu, Yesu niyena wadiishileña antu adiña nakumulondela. (Mat. 14:17-20) Wokileña cheñi niantu akata. (Mat. 4:24) Hakwila yamuzañalesheña Yehova, mutu wachisaka watela kukeñelaña chisaka chindi yuma yakumujimba. Hela chochu, kudi chuma chatela kubula kwilayi. Bayi yeñija mutu mumudimu wakumujimba chakwila yenda yakañanya kukwasha chisaka chindi kwikala nawubwambu naYehova nikuyikwasha kwikala akiñewaku.

17. Yehova niYesu atudizishaña nikutubabesha munjilanyi?

¹⁷ Kuyidizisha. Yehova watudizishaña nikutubabesha kulonda yatukwashi. (Heb. 12:7-9) Kufwana Tata yindi, Yesu niyena wadizishaña antu adi mumakasa indi munjila yakukeña. (Yow. 15:14, 15) Wayifumbaña chakadi kuyihita mumbadi, ilaña nakukeña. (Mat. 20:24-28)  Weluka nindi twawanina wanyi nawa kakavulu twaluwañeshaña.—Mat. 26:41.

18. Iyala wamuwahi watela kwanukaña nindidi?

¹⁸ Mutu wachisaka wamwimbujolaña Yehova niYesu weluka nindi ñodindi nianyanindi awanina wanyi. ‘Halendumokelaña’ ñodindi hela anyanindiku. (Kol. 3:19) Ilaña wazatishaña chishina chekala haAñalija 6:1 nawa wayololaña “naspiritu yakwovwaha” nakwiluka nindi niyena wawanina wanyi. Kufwana Yesu, weluka nindi njila yayiwahi yatela kuyidizishilamu hikwikala chakutalilahu.—1 Pet. 2:21.

19-20. Mutu wachisaka nateli kumwimbujola ñahi Yehova niYesu hampinji yinakufuukulayi?

¹⁹ Bayi kufuukula yuma yakuditiyisha enu aweni kuwahaku. Yehova wafuukulaña yuma yinateli kukwasha antu amakwawu. Chakutalilahu, haleñeli wumi nindi yaditiyisheña yomwenindi kuwahaku, ilaña nindi tudiluñisheña. Kwosi wamukanjikijili kuhana Mwanindi kulonda yatukuuli kunshidiku. Wahanini iwu mulambu mukudikeñela kulonda wutukwashi. Yesu niyena wafuukwilihu chuma chinateli kutukwasha. (Rom. 15:3) Chakutalilahu, hampinji yazeyeliyi chatela yanooki, yena wadiña nakuyitañisha antu.—Maku 6:31-34.

²⁰ Iyala wamuwahi weluka nindi chuma chakala kwila hikufuukula chuma chatela kukwasha chisaka chindi nawa washañaku muchima chikupu. Hafuukulaña chuma kwesekeja nachinakutiyayi hela chinakutoñojokayi hanoyu mpinjiku. Ilaña walombaña wukwashu kudi Yehova kulonda yamukwashi chakufuukula. * (Yish. 2:6, 7) Neyi yela mwenimu, wukufuukula chuma chinateli kutiyisha akwawu kuwaha bayi yomweniku.—Fwi. 2:4.

21. Yumanyi yitukahanjeka muchibaaba chinalondelihu?

²¹ Yehova wayinka nyitu yayisaka mudimu wakola, dichi akakula nanochu chazatañawu iwu mudimu. Ilaña neyi iyala yamwimbujolaña Yehova niYesu, nateli kwikala mutu wachisaka wamuwahi. Nawa neyi ñodindi yazataña mudimu windi, muwulu wawu mukwikalaña muzañalu. Mumbanda watela kumonaña ñahi mudimu wanfumwindi wakwikala mutu, nawa kukalanyi kwamonañayi? Chibaaba chinalondelihu chikakula awa malwihu.