1-2. Chumanyi chadiziliyi manakwetu wumu kutalisha hakufumbana?

 HADI yaaka yayivulu yinahitihu, akulumpi ayedi amwendeleli muhela wabulileña kupompa hadi mpinji yayilehi. Mukulumpi wumu wamutañilili muhela jinsona jahosheleña nankashi hakuya nakupompa. Watoñojokeli nindi namukoleshi muhela, ilaña yena nimukwawu mukulumpi chelili nawu ashiikeña, muhela wahosheli nindi: “Enu amanakwami, muneluki wanyi kukala kunukweti.” Awa amanakwetu atachikili kumufumba muhela chakadi kumwihula ayileji kukala kwadiñayi naku nichadiña yuma. Chafuminimu, wamweni nindi kufumba kwamufumbiliwu kwamukwashili wanyi.

² Chanukiliyi, iwu mukulumpi wamutañilili muhela jinsona wahosheli nindi: “Haniyi mpinji, natoñojokeli nami muhela wasakililili wanyi. Ilaña chinatoñojokelihu, namweni nami nazatishili nsona jatelela chatela nisambili kumwihula nami, ‘Munakuhanda ñahi? Mukukeña Tuyikwashi?’” Iwu mukulumpi wadizililiku kunichi chuma chamwekeni. Chayinu mpinji hikabiña wamuwahi.

3. Muchipompelu, anyi atela kufumbana?

 ³ Chineli hiyatubiña, akulumpi akweti mudimu wakufumbana neyi hanateleli. Hela chochu, mpinji jikwawu amanakwetu muchipompelu niwena anateli kufumbana. Chakutalilahu, manakwetu hela muhela, nateli kumulejaku mukwawu chahosha Bayibolu. (Mas. 141:5; Yish. 25:12) Hela muhela wakula dehi nateli kufumba ayañadima munsañu yidi neyi yashimunawu haTitusa 2:3-5. Hela chochu, anvwali niwena atela kufumbaña nikwolola anyanawu mpinji yejima. Hela chakwila achinu chibaaba chinayikundami akulumpi alombolaña muchipompelu, nsañu yidimu yinateli kutukwasha wejima  wetu kumona njila mutunateli kufumbila munjila yinateli kumusañumuna muntu ‘nikuzañalesha muchima.’—Yish. 27:9.

4. Yumanyi yitukuhanjekahu muchinu chibaaba?

⁴ Muchinu chibaaba, tukuhanjeka malwihu awana kutalisha hakufumbana: (1) Chumanyi chikuletesha mufumbani? (2) Komana mwamweni chinakukeñeka kufumbana? (3) Hinyi watela kufumbana? (4) Munateli kufumbana ñahi hakwila nawu muntu yatambwili kufumba?

5. Muloñadi antu chinateli kwitejelawu kufumba kunakuyifumbawu kudi mukulumpi neyi ayifumba munjila yakukeña? (1 Akorinda 13:4, 7)

⁵ Akulumpi ayikeña nankashi amanakwawu niahela. Mpinji jikwawu amwekeshaña iku kukeña kwawu kuhitila mukufumba muntu wunakukeña kufuma munjila. (Ñal. 6:1) Henohu kanda ahoshi namuntu, hela chochu, mukulumpi watela kusambila kutoñojoka hayuma yahosheliyi Pawulu kutalisha hakukeña. “Kukeña kwadiwunjikaña. . . Kwabutaña yuma yejima, kwakuhwelelaña yuma yejima, kwachiñejaña yuma yejima, kwomikaña yuma yejima.” (Tañenu 1 AKorinda 13:4, 7.) Neyi mukulumpi atoñojokahu hanawa mavasi amuBayibolu, chikumukwasha kufumbana munjila yakukeña. Neyi muntu anakufumbawu amona nindi mukulumpi wamukeña, niyena wukwiteja kufumba.—Rom. 12:10.

6. Chakutalilahwinyi chachiwahi chashiliyi Pawulu?

⁶ Chineli kapostolu Pawulu wadiña mukulumpi, washili chakutalilahu chachiwahi. Chakutalilahu, chamweniyi nindi amanakwindi muTesalonika anakukeñeka kuyifumba, wayifumbili. Hela chochu, munyikanda yindi yayisonekeleliyi, wasambilili kuyihameka hamudimu wawu wazatiliwu nachikuhwelelu, nakukeña nichomikiliwu. Watoñojokeli cheñi hachihandilu chawu nakwiluka nindi chadiñi chapela wanyi nawa omikileña makabisha. (1 Tesa. 1:3; 2 Tesa. 1:4) Wayilejeli cheñi awa amanakwindi nindi elileña yuma yayiwahi yembujoleleñawu akwawu akaKristu. (1 Tesa. 1:8, 9) Atela azañaleli nankashi chayihamekeliwu kudi Pawulu! Chakadi nikujina, Pawulu wayikeñeli amanakwindi hama. Dichaletesheli ayifumbi munjila yayiwahi munyikanda yindi yejima yiyedi yayisonekeleliyi aTesalonika.—1 Tesa 4:1, 3-5, 11; 2 Tesa 3:11, 12.

7. Muloñadi antu amakwawu chabulilañawu kwiteja kufumba?

⁷ Chumanyi chikumwekana neyi tunafumbani chiwahi wanyi? Mukulumpi wapama wahosheli nindi, “Antu amakwawu etejaña wanyi kufumba bayi neyi muloña wakwila akuhanini munjila yatamaku, ilaña akuhanini munjila yakukeña wanyi.” Chumanyi chitunakudizilaku? Antu etejaña kufumba neyi anayifumbi munjila yakukeña, bayi neyi hamuloña wakuhilaku.

8. Malwihwinyi atela kudihula mukulumpi kulonda eluki neyi chakwila watela kufumbana hela nehi?

⁸ Akulumpi hiyatela kunyakala kufumbanaku. Henohu kanda afumbani, mukulumpi watela kudihula nindi: ‘Mwamweni natela kufumbana haniyi nsañu? Komana neluki chikupu nami chuma chinakwilayi iwu muntu chaluwa? Komana iwu muntu nafumpi lushimbi lwamuBayibolu? Tahindi yuma yinakwilayi yinambuki nayinadi kwila?’ Akulumpi atela kutondolwela kulusukila kuhosha. (Yish. 29:20) Neyi mukulumpi neluki wanyi neyi chakwila watela kufumbana hela  nehi, nateli kwihulaku mukwawu mukulumpi ahanjeki nakumona neyi chakwila chuma chinakwilayi muntu chinambuki nachahosha Bayibolu nawa nakukeñeka kumufumba.—2 Tim 3:16, 17.

9. Yumanyi yitunakudizila kudi Pawulu kutalisha hakufumbana hansañu yanvwalilu nikudiwahisha? (1 Timotewu 2:9, 10)

⁹ Talenu ichi chakutalilahu. Tuhoshi netu mukulumpi nakwakama hamutapu wanvwalilu yamukwawu mukakwitiya. Mukulumpi nateli kudihula nindi, ‘Hadihu nsañu yamuBayibolu yikuletesha nimufumbi haniyi nsañu? Muloña wakwila mukulumpi nakukeña wanyi kuzatisha yitoñojoka yindi, nateli kwihulaku mukwawu mukulumpi hela mukakushimwina wapama kulonda atiyi chidi yitoñojoka yindi. Anateli kushakama hamu nakuhanjeka hakufumba kwaPawulu kwahosha hanvwalilu. (Tañenu 1 Timotewu 2:9, 10.) Pawulu washimwini yishina yayivulu nakumwekesha nindi nvwalilu yamukaKristu yatela kwikala yatelela, yamweseka nawa yakalemesha. Ilaña Pawulu hashimwinihu nshimbi hayuma yatela kuvwalayi muntu hela yatela kubula kuvwalayiku. Welukili nindi amanakwindi niahela atela kuvwala yuma yinateli kutondawu, chakala hohu yinakufumpa nshimbi jamuBayibolu wanyi. Dichi hakwila eluki neyi chakwila atela kufumbana hela nehi, akulumpi atela kumona neyi chakwila yuma yinatondiyi muntu yatelela nawa yakavumbi.

10. Yumanyi yikutukwasha kulemesha munafuukuliwu akwetu?

¹⁰ Twatela kwanukaña netu akaKristu ayedi anateli kufuukula mwashiyashana, ilaña wejima wawu anafuukuli mwamuwahi. Bayi tukanjikijaña amanakwetu kwila yuma yitunakutoñojoka netu diyaloñaku.—Rom. 14:10.

11-12. Neyi chinakukeñeka kufumbana, malwihwinyi atela kudihulayi mukulumpi nawa muloñadi?

¹¹ Neyi chinakukeñeka kufumbana, lwihu ludi lwakwila nawu, Hinyi watela kufumbana? Henohu kanda afumbi muhela wasumbuka hela mwana wanyanya, mukulumpi watela kwihula mutu wachisaka, hadaha mutu wachisaka nateli kukeña kumufumba yomweni. * Hadaha hampinji yinakukeña kufumbanayi mukulumpi, mutu wachisaka nateli kukeña kwikalahu. Nawa neyi chashimuna  paragilafu 3, kunateli kwikala mpinji muhela wapama dehi yinateli kufumbayi muhela wakansi.

¹² Kudi chuma chikwawu chatela kutoñojokahu mukulumpi. Neyi nakukeña kufumbana, mukulumpi watela kudihula nindi, ‘Neyi  ami nifumbana, nateli kwiteja tahindi nateli kwiteja neyi amufumba kudi muntu wacheñi? Chakutalilahu, neyi muntu watoñojokaña nindi washikilamu wanyi, nateli kwiteja neyi amufumba kudi mukulumpi wadiña nakutiya neyi chinakutiyayi yena. Hadaha mukulumpi watiyahu dehi muniyi njila nateli kwiluka chiwahi kukala kukwetiyi iwu muntu nawa yuma yikuhoshayi nateli kuyitambwila. Hela chochu, akulumpi ejima akweti mudimu wakuyikolesha nikuyisañumuna amanakwawu niahela kulonda elaña yuma yetejawu munsona. Dichi chalema nankashi kufumbana hela chakwila mukulumpi wunakufumbana kanda amoneñahu dehi kukala kwokumuku.

13-14. Muloñadi chichalamena kudi mukulumpi kutiyilila?

¹³ Tiyililenuña. Neyi mukulumpi nakukeña kufumbana watela kudihula nindi: ‘Komana neluki chinakuhandayi manakwami? Yumanyi yinakumumwekena muchihandilu chindi? Komana nakumona kukala kwinnabuli kwiluka? Chumanyi chinakukeñeshayi chayinu mpinji?

¹⁴ Chishina chasonekawu haYakoba 1:19, chinayikundami antu afumbanaña. Yakoba wasonekeli nindi: “Muntu wejima anyakaleña kutiya, alabeña kuhosha, alabeña kuzuwa.” Mukulumpi hadaha nateli kutoñojoka nindi neluki nsañu yejima, komana mwamweni nayiluki? Yishimu 18:13 yatwanukishaña nayu: “Neyi muntu aakula henohu kanda atiyi wunsahu, chamukojejaña kusupa nikusawuka.” Chachiwahi kumwihula muntu yomweni kulonda ashimuni kukala kunakumonayi. Chumichi munabombeli kutiyilila henohu kanda tuhoshihu. Anukenu chuma chadiziliyi mukulumpi itwashimuna kumatachikilu achinu chibaaba. Wenjili nakwiluka nindi chatela asambili kushimuna nsañu yaloñesheliyi, wateleleli kusambila kumwihula muhela awa malwihu: “Munakuhanda ñahi? Mukukeña tuyikwashi? Neyi akulumpi ekala nampinji yakwiluka kukala kunakumonayi muntu, chakadi nikujina, akuyikwasha nikuyikolesha amanakwawu niahela.

15. Akulumpi anateli kuzatisha ñahi chishina chekala haYishimu 27:23?

¹⁵ Ilukenu mukanka wanyikoku. Neyi chitwashimuna hakusambila, mukufumbana kwakuwahi mwabombela yuma yayivulu kubadika hakutaña hohu jinsona hela kushimuna mwakwilila. Amanakwetu niahela atela kumona nawu twayakamenaña, twayitiyililaña nawa tunakukeña kuyikwasha. (Tañenu Yishimu 27:23.) Akulumpi atela kuzata nañovu kulonda ekali nawubwambu wakola nawamanakwawu niahela.

16. Chumanyi chikuyikwasha akulumpi kufumbana munjila yakwila antu anakufumbawu eteji?

¹⁶ Akulumpi hiyanakukeña amanakwawu kutoñojoka nawu mpinji yatela kuhanjika  nawu chiña neyi muntu naluwañeshiku. Ilaña ahanjekaña nawamanakwawu niahela mpinji yejima nawa amwekeshaña nawu ayakamenaña neyi anakumona kukala. Mukulumpi wumu wakulukila wahosheli nindi: “Neyi mwila mwenimu, mukutuña wubwambu wakola chikupu. Dichi neyi munakukeña kufumbana, chikuyipelela kumufumba muntu.” Nawa muntu imunakufumba wukutambwila kufumba.

17. Sweje-e mpinjinyi mukulumpi yatela kudiwunjikayi nikwikala naluwi?

¹⁷ Ikalenu adiwunjika nawa akaluwi. Chilwilu chakudiwunjika niluwi chakeñekaña sweje-e neyi muntu hakusambila wakaanini kufumba kwamuBayibolu. Mukulumpi watela kutondolwela chilwilu chakuhila swayi neyi kufumba kwindi anakukaani hohenohu hela anakuzatilihu wanyi. Bayibolu yahosha hadi Yesu nawu: “Hamba kakotola iteti dachikekaku, nawa hamba kajima wanda wunakufwinda wishiku.” (Mat. 12:20) Dichi neyi nakulomba nkawindi, mukulumpi watela kumulomba Yehova kulonda amukwashi muntu anakukeña kufumbayi nikumukwasha kwiluka chuma chinaleteshi amufumbi nawa azatishi kufumba. Nawa manakwetu anafumbiyi watela kwikala nampinji yakutoñojoka hamazu ahoshawu. Neyi mukulumpi wudi nachilwilu chakudiwunjika niluwi, chikwikala chaswayi kudi muntu anakukwashayi kutiyilila nikuzatisha kufumba. Hela chochu, mpinji yejima kufumba kwatela kushindamena Hezu daNzambi.

18. (a) Neyi tunakufumbana, chumanyi chitwatela kwanukaña? (b) Neyi mwevulu wudi muchikasha anvwali anakuhanjekadi?

¹⁸ Dizilenu kuyiluwa yenu. Chineli twawanina wanyi, hitukutwesha kulondela chikupu yuma yejima yinashimuniwu muchinu chibaabaku. (Yak. 3:2) Tukuluwañeshaña, ilaña neyi tunaluwañeshi twatela kudizila kuyiluwa yetu. Neyi amanakwetu niahela amona nawu twayikeña chikwikala chaswayi kutwanakena neyi tuyihukesha namazu hela yuma yituneli. —Talenu cheñi chikasha chinakuhosha nawu “ Nsañu Yinasonekeliwu Anvwali.”

19. Tunateli kuzañalesha ñahi nyichima yawamanakwetu niahela?

¹⁹ Neyi chitunamoni, kufumbana kwakala. Twawanina wanyi nawa niantu itwafumbaña niwena awanina wanyi. Anukenuña yishina yitunadizi muchinu chibaaba. Monenuña nenu kudi chuma chinakuyiletesha mufumbani. Monenuña cheñi nenu chalala chinakukeñeka kumufumba muntu nawa nenu iyenu munateli kumufumba hela nehi. Henohu kanda mufumbani, ihulenu malwihu nawa tiyililenu nakanañachima kulonda mwiluki kukala kunakumonayi muntu. Monenuña yuma neyi chinakuyimonayi. Ikalenu amwovu, nawa dikundenuña nawamanakwenu niahela. Anukenuña nenu: Tunakukeña kufumba kwetu kwikali kwakuwahi nawa ‘kwakuzañalesha muchima.’—Yish. 27:9.