1. Chilwilwinyi chachiwahi chitwamonaña mudi antu jaYehova?

 BAYIBOLU yashimwineñahu dehi nawu antu jaNzambi “akadihana namuchima wumu” hakumukalakela Yehova iku anakulondela wunlomboli waYesu. (Mas. 110:3) Chakadi nikujina, iwu wuprofwetu wunakushikijewa makonu. Chaaka nichaaka, ambuña aYehova azataña maora amavulu mumudimu wakushimwina. Ayifwetaña wanyi ilaña azataña mukudikeñela. Awanañaku cheñi mpinji kulonda akwasheña akwawu akakwitiya kuhitila mukuyikolesha nikuyikwasha kulonda amukeñi chikupu Yehova. Akulumpi niankoñi akuzatila azatishaña mpinji yeneni nakuloñesha jimpanji nikuya nakubiña akwawu akakwitiya. Chumanyi chayikojejaña antu jaNzambi kuzata iyi nyidimu? Muloña amukeña Yehova niakwawu antu.—Mat. 22:37-39.

2. Chakutalilahwinyi chatushililiyi Yesu kwesekeja nachinalumbululiwu haARoma 15:1-3?

² Yesu watwamijileñaku yuma yakeñeleñawu antu kubadika yakeñeleñayi. Tunakuzata hakumina ñovu yetu kulonda tumwimbujoleña. (Tañenu ARoma 15:1-3.) Neyi tumwimbujolaña mukafuma yuma yayiwahi. Yesu wahosheli nindi: “Mukuhana mwekala muzañalu chikupu kubadika wekala mukutambwila.”—Yilw. 20:35.

3. Tukuhanjekadi muchinu chibaaba?

³ Muchinu chibaaba, tukuhanjeka yuma yimu yeliliyi Yesu kulonda yakwashi antu nawa tukumona chitunateli kumwimbujola. Tukuhanjeka cheñi chitunateli kwikala nampwila yakukeña kukalakela akwetu.

4. Yesu wayakameneneña ñahi antu kubadika yuma yafwilileñayi?

⁴ Yesu wakwashileña antu hela chakwila wazeyeleña. Toñojokenu chuma cheliliyi Yesu hampinji yelili mazaza awantu enzi nakumuwana kumpidi, hadaha kwakwihi naKaperinamu. Yesu wachishili wufuku wejima nakulomba. Hadaha wazeyeli nankashi, ilaña chamweniyi izaza dawantu wayitiyilili luwi atuzweñi niantu akata adiña hakachi kawu. Hakuminini hohu dakuyikoleshaku ilaña wahanini cheñi mpanji yakukolesha yelukawu nawu Mpanji yahaMpidi.—Luka 6:12-20.

5. Nyitu yayisaka yamwimbujolaña ñahi Yesu mukumwekesha kukeña hela chakwila nakutiya kuzeya?

⁵ Nyitu yayisaka chiyinakumwimbujola Yesu. Toñojokenu hanichi chakutalilahu, hanyima yakuzata nañovu ifuku damukuma mutu wachisaka nenzi hetala iku nazeyi. Hela chakwila nakutoñojoka nindi abuli kwikala naKudifukula kwaChisaka hanodu ifuku, namulombi Yehova kulonda amwinki ñovu yakulombola kudifukula kwachisaka. Yehova nakuli kulomba kwindi nawa anekali nakudifukula kwachisaka. Anyana anadiziliku chuma chalema hanidi ifuku nawu kudifukula kudi Yehova dichuma chalema.

6. Shimunenu chakutalilahu chinakumwekesha chadihanineñayi Yesu kulonda yakwashi antu.

⁶ Yesu wekalileña nawantu hela chakwila niyena wakeñeleña mpinji yakwikala nkawindi. Fwikijenu chatiliyi Yesu chelukiliyi nindi ibwambu dindi Yowanu mpapatishu anamujahi. Chumichi chamuneñesheli Yesu. Bayibolu yahosha nawu: “Chachitiyiliyi [nindi Yowanu nafwi], wafumini kwenoku nawatu nakuya kwiluña kwakankawindi.” (Mat. 14:10-13) Hadaha muneluki chuma chamuletesheli yakeñi kuya kwiluña kwankawindi. Etu amavulu twakeñaña kudilila kwankawetu. Ilaña Yesu hatwesheli kwikala kankawindiku. Izaza deneni dashikileñahu dehi henohu yena kanda ashiki. Yesu welili ñahi? Watoñojokeli hayuma yakeñeleña izaza nawa  waditiyilili wushona. Yesu wamweni nindi dakeñekeleña kudikwasha nikudikundeja kudi Nzambi nawa dichuma cheliliyi. Kafwampi, watachikili kuyitañisha bayi neyi “[yuma yanteshaku] ilaña yuma yayivulu.”—Maku 6:31-34; Luka 9:10, 11.

7-8. Hanenu chakutalilahu chinakumwekesha akulumpi akweti kukeña chamwimbujolañawu Yesu neyi anakukeña kukwasha muntu.

⁷ Akulumpi akweti kukeña chamwimbujolañawu Yesu. Twasakililaña nankashi hamudimu watuzatilañawu akulumpi. Amanakwetu niahela amonaña wanyi nyidimu yejima yazatañawu. Chakutalilahu, neyi muntu nakati amanakwetu azataña naKomiti Yatiyañanaña naYipatela ayaña swayi-swayi nakuyikwasha amanakwawu niahela. Kakavulu yuma yamuchidiwu yavula kumwekana mukachi kawufuku. Ilaña hamuloña wakutiyila wushona manakwawu hela muhela wunakuhita mukukala awa akulumpi akweti kukeña hamu niyisaka yawu, atwamijañaku yuma yakeñañawu akwawu akakwitiya kubadika yuma yakeñañawu.

⁸ Akulumpi cheñi akwashanañaku mumudimu wakutuña Matala aWanta nimatala akupompela kushilahu nikukwashana kunamwekani wubanji. Nawa azataña maora amavulu kulonda atutañishi nikutukolesha. Twatela kuyihamekaña awa amanakwetu ejima niyisaka yawu. Yehova ayikiswili hamuloña wakudihana kwawu. Hela chochu, kufwana wejima wetu akulumpi niwena atela kwilaña yuma mukwesekeja bayi azatishaña mpinji yeneni nakwililamu yuma yakuchipompelu chakwila akañanyeña nikwikala nampinji yakukwasha chisaka chawu muyuma yejimaku.

9. Kwesekeja naAFwilipi 2:4, 5, chilwilwinyi chatela kwikalawu nachu akaKristu ejima?

⁹ Tañenu AFwilipi 2:4, 5. Wejima wetu hitudi akulumpiku, ilaña wejima wetu tunateli kumwimbujola Yesu chakwikala namuchima wakudihana. Bayibolu yahoshaña nawu “wadibalumwini neyi nduñu.” (Fwili. 2:7) Toñojokenu chuma chimunateli kudizilaku kuniyi vasi. Nduñu hela ñamba nateli kuzata nañovu kulonda yamutiyisheña nkaka yindi kuwaha. Hakwikala anduñu jaYehova nihakukalakela amanakwetu, chakadi nikujina, munakukeña kuyizatisha kudi Yehova nikukalakela amanakwenu. Iyi yuma yinalondelihu yikuyikwasha kwila mwenimu.

10. Malwihwinyi itwatela kudihula?

¹⁰ Toñojokenu hayilwilu yenu. Dihulenu nenu: ‘Komana nazatishaña mpinji yami niñovu yami kulonda nikwashi nachu akwetu? Chakutalilahu, nelaña ñahi neyi añila nawu niyi nakuhempula manakwetu wakula dehi wekala kwitala kwahembelañawu atushinakaji, hela kuya nakusenda muhela wakula dehi kulonda enzi nakupompa? Komana nadihanaña swayi-swayi neyi kudi antu anakukeñeka atela kuya nakuwahisha iluña dakupompela kupompa kweneni hela Hetala daWanta?’ Yehova watiyaña kuwaha neyi tuzatishaña mpinji yetu nimaheta etu kulonda tukwashi nachu akwetu. Neyi tunamoni netu hadi hitwatela kuzatila twatela kwiladi?

11. Kulomba kunateli kutukwasha ñahi kwikala namuchima wakudihana?

¹¹ Mulombenu chikupu Yehova. Twili netu munamoni nenu hadi himwatela kuzatila kulonda mudihaneña ilaña munakutoñojoka nenu mukutwesha wanyi kuhimpa. Neyi dikukala kumukweti, mulombenu Yehova chakufuma hamuchima. Kumuswekahu chuma chidi chejima nehi. Mulejenumu Yehova chimunakutiya nawa mulombenu yayinki “muchima wakufwila kukoña yuma niñovu yakwilamu.”—Fwili. 2:13.

12. Amanakwetu atwansi apapatishewa anateli kukwasha ñahi yipompelu yawu?

¹² Neyi wudi manakwetu wakansi wapapatishewa, mulombi Yehova akwinki muchima wakukwasha amanakweyi niahela muchipompelu. Mumatuña amakwawu mwekala akulumpi amavulu kubadika ankoñi akuzatila nawa ankoñi akuzatila wenawa amavulu hiyatwansi hela hiyakulumpi muyaaka. Chineli antu mukuloñesha anakuvulilaku tunakukeña amanakwetu atwansi kulonda akwasheñaku akulumpi kwakamena nyikoku yaYehova. Mukwikala namuzañalu neyi mudihana kukalakela kwejima kunayitumiwu. Muloñadi? Muloña mukumutiyisha Yehova kuwaha nawa mukwikala nejina dadiwahi nawa mukwikala namuzañalu wafumaña mukukwasha antu.

13-14. Yumanyi yitwatela kwila hakwila tukwashi amanakwetu niahela? (Talenu mwevulu wudi hakava.)

¹³ Ikalenu asoñama kulonda mwiluki antu anakukeña kuyikwasha. Kapostolu Pawulu wayilejeli AHeberu nindi: “Bayi mulalamena kwila yuma yayiwahi nikwanzañana nawakwenu yuma yimukwetiku, muloña Nzambi watiyaña kuwaha chikupu nanyilambu yamuchidiwu.” (Heb. 13:16) Iku kufumba kwadiña kwakuwahi. Hashimbwili wanyi hanyima yakutambwila iwu mukanda. AkaKristu ashakamineña muYudeya ashili matala awu, nyidimu yawu yakuselujola, niantaña jawu abula kwitiya nawa ‘atachikili kutemukila kumapidi.’ (Mat. 24:16) Chakadi nikujina, iyi yadiña mpinji yalema yakudikwasha wumu namukwawu. Henohu ichi chuma chakutemukila kumapidi kanda chimwekani,  neyi azatishileña kufumba kwaPawulu nikwanzañana yuma yadiñawu nayu nawakwawu, chakadi nikujina chayipeleleli kwila mwenimu.

¹⁴ Bayi neyi mpinji yejima amanakwetu niahela akutulejaña yuma yinakukeña kwilawuku. Chakutalilahu ñoda manakwetu nateli kufwa nakumushila nfumwindi chineñi. Komana manakwetu wukukeña kumukwasha munsañu yandilu? Muñendelu? Hela kumukwashaku tunyidimu twahetala? Nateli kutuleja wanyi chuma chidi chejima, kuchina nindi wukutukabisha. Ilaña wukusakilila chikupu neyi tukumukwasha henohu yena kanda atulombi nindi tumukwashi. Bayi tutoñojokaña netu akumukwasha kudi muntu mukwawu hela kutoñojoka netu wukutulejaña mpinji yejima neyi nakukeña kumukwashaku. Dihulenu nenu: ‘Neyi iyami nadiña nakukala kukwetiyi, chumanyi chinadi kukeña antu kuñilila?’

15. Chumanyi chitwatela kwila hakwila tukwasheña akwetu?

¹⁵ Ikalenu aswayi kuyisolomoka. Chakadi nikujina, mweluka amanakwenu niahela muchipompelu chenu akwashanaña mpinji yejima. Hiyatuleteshaña etu kutiya neyi tunakuyikabishaku. Tweluka netu mpinji yejima yitudi mukukala anateli kutukwasha nawa tunakufwila kwikala neyi wena. Alan mukulumpi wudi nayaaka 45 nakukeña kwikala waswayi kusolomoka, wahosheli hachakutalilahu chaYesu nindi: “Yesu wadiña nanyidimu yayivulu ilaña antu akweti yaaka yashiyashana amukeñeli chikupu. Nawa hiyatiyileña woma kulomba nawu yayikwashiku elukili nawu wayakameneneña chikupu. Innakukeña kwikala neyi Yesu. Innakukeña añiluki nawu nekala waswayi kusolomoka, wachisambu nawa nakamenaña.”

16. Indi kuzatisha Masamu 119:59, 60 kunateli kutukwasha ñahi kumwimbujola Yesu chikupu?

 ¹⁶ Bayi tuneñaku neyi tunakumwimbujola wanyi Yesu chikupu. (Yak. 3:2) Kadizi hanateli kwila yuma yejima yelañayi ntañishi yindiku. Ilaña chikudizilañayi kuyiluwa yindi nikumwimbujola ntañishi yindi, kadizi wukuyilañaku hambidi chovu-chovu mukudiza kwindi. Munjila yoyimu, neyi tuzatishaña yuma yitwadizaña muBayibolu nikuhimpa chovu-chovu, tukulondelaña chakutalilahu chaYesu chikupu.—Tañenu Masamu 119:59, 60.

17-18. Chitukwimbujolaña chilwilu chaYesu chakudihana yumanyi yayiwahi yikufumamu?

¹⁷ Neyi tudihanaña chikuyisañumuna cheñi antu amakwawu kwila chuma chochimu. Mukulumpi wejina daTim wahosheli nindi: “Tukweti atwansi atondawu kwikala ankoñi akuzatila amakwawu ayitondeli nawansi nawa chuma chayiletesheli ekali ankoñi akuzatila himuloña wakwila amweni akwawu atwansi chadihanineñawu mukukwasha akwawu. Nawa niwena akeñeleña kwila chuma chochimu. Dichi hamuloña wakudihana kwawu awa amanakwetu atwansi, anakukwasha chipompelu chetu nikuyikwashaku akulumpi.”

¹⁸ Tunakushakama mukaayi munatandi chilwilu chakudikeña. Ilaña antu jaYehova ambukaku. Chilwilu chaYesu chakudihana chinatushiki hamuchima nawa tunakufwila kumwimbujola. Kwila twila yuma yejima yelileñayi Yesu nehi, ilaña tunateli “kulondela chikupu mumahaji indi.” (1 Pet. 2:21) Chitukwimbujolaña chilwilu chaYesu chakudihana, ninetu tukwikala namuzañalu wenzaña hamuloña wakumutiyisha Yehova kuwaha.