KUNYIMA, kalemba hela chisaka chindi, ahanineña nsewu kuchisaka chakankaña neyi chakwila yisaka yejima yiyedi yineteji nawu atela kudisumbula. Muniyi nsewu mwabombeleli yuma yalema wuseya, anyama hela mali. Mpinji jikwawu, iyi nsewu ayihanineña kuhitila mukuzata nyidimu yakola, chidi neyi cheliliyi Yakoba, wetejeli kuzatila tata yaRacheli hadi yaaka 7 kulonda amusumbuli Racheli. (Kutach. 29:17, 18, 20) Muloñadi chiyahaninineñawu nsewu?

Muntu wadiza chikupu jaBayibolu Carol Meyers wahosheli nindi: “Nsewu yahanineñawu yadiña nakusinsa hamudimu wazatileñayi kankaña kuchisaka chindi, chuma chadiñi chalema mujawundimi.” Nsewu yakolesheleña wulunda wekalileña hakachi kayisaka yiyedi kuhitila mukusumbwañana. Antu amuyisaka yeniyi adikwashileña wumu namukwawu mumpinji jakala. Kubombelahu, nsewu yamwekesheleña nawu owu mumbanda anamwoti nawa wukufuma mumakasa atata yindi nakuya kudi nfumwindi.

Kuhana nsewu hikwatalishili mukwila nawu mumbanda hichuma chatela kulandawu hela kuchilandishaku. Mukanda waAncient Israel—Its Life and Institutions wahosha nawu: “Ichi chaaku chakuhana nsewu hela yuma yashikila munsewu kuchisaka chamumbanda, chakadi nikujina chaletesheli wulu wakaIsarela kumwekana neyi anakulanda. Ilaña chinakumwekana neyi [nsewu] ayimweneña neyi nfwetu yahanineñahu kuchisaka chamumbanda nawa bayi neyi wuseya wafweteleleñawu mumbandaku.”

Makonu, mumatuña amakwawu antu anatwalekihu kwila chuma chochimu chakuhana nsewu. Anvwali akaKristu neyi anakukeña nawu ayinki nsewu, ‘amwekeshaña kwovwaha kwawu kudi antu ejima’ kuhitila mukubula kulomba nawu ayinki nsewu yeneni chikupu. (Fwili. 4:5; 1 Kor. 10:32, 33) Kwila mwenimu kwamwekeshaña nawu hiyasweja ‘kukeña mali’ hela kwikala nalwisuku. (2 Tim. 3:2) Kubombelahu, neyi anvwali akaKristu abula kulomba mali ansewu amavulu, iyala wunekukeña kusumbula wukwimikaku chanti chawiji wanyi kulonda nindi asambili ntahi kukeñelahu mali amavulu hakwila dinu akekaleña nachawija chawulu. Hela iyala hakutoñojoka nindi aleki mudimu windi wawupayiniya, kulonda azateña mpinji yejima mudimu wakumujimba hakwila awani mali ansewu amavulu anamupiminiwuku.

Mumatuña amakwawu, mali ansewu ayihanaña kwesekeja nanshimbi jiyashaku kudi akawuswa. Dichi, kumatuña amuchidiwu anvwali akaKristu alondelaña iji nshimbi. Muloñadi? Izu daNzambi dalejaña akaKristu nawu “ovwahileña akweti wuswa wabadika” nikovwahila nshimbi yabulaña kuditadikisha nanshimbi jaNzambi.—Rom. 13:1; Yilw. 5:29.