MUNSHIMBI, antu ayitejeli kumulambula Yehova nyilambu yatuteela nitupompa. Mpinji yejima awa atuda ayedi hayiteneneña hamu munshimbi hakuyilambula nawa elileña neyi wukweti kateela wanyi, wukulambula kapompa. (Lev. 1:14; 12:8; 14:30) Chumichi chawahililidi? Muloña wumu wudi wakwila nawu tuteela twavulileña kumwekana wanyi. Muloñadi?

Tuteela hituda twabuukaña twashakamaña muIsarela mumpinji yeyena. MuOctober twabuukilaña kumatuña akukabeta kakuchidiilu kutaata nawa twafuntaña muIsarela mumpinji yanyilemba. (Kami. 2:11, 12; Yere. 8:7) Chumichi chinayi mukwila nawu, mumpinji yawaIsarela akushankulu, chadiña chakala kudi aIsarela kulambula tuteela mumpinji yachishika.

Ilaña tupompa twena twavula kubuuka wanyi, dichi yaaka yejima twekalileñamu muIsarela. Kubombelahu, tupompa atutadikileña. (Esekejenu Yowanu 2:14, 16.) Kwesekeja namukanda waBible Plants and Animals, wahosha nawu “nyikala yejima ninyisumba yamuPalesitini yatadikileña tupompa. Muntu wejima wadiña netala wadiña nachikalaña hela washileña ipwata hambañu, mwashakamineña itu tuda.”—Esekejenu Isaya 60:8.

Dichi Yehova wamwekesheli nindi wayikeñeli nawa wayitoñojokeleleñaku aIsarela chetejeleñayi nyilambu yawatujila adiñaku muchaaka hanoyu mpinji.