MUHELA Yomara niamanakwindi aMarcelo naHiver ashakamaña mumukala wanyanya muGuatemala. Yomara watachikili kudiza Bayibolu nawaYinsahu, nkumininaku amanakwindi niwena atachikili kudiza. Ilaña kwadiña kukala. Wejima wawu asatu hiyamputamesu, nawa hiyatwesheleña kutaña nsona jawamputamesuku. Dichi muntu wayidizishileña Bayibolu wadiña nakuyitañila nsañu yadizileñawu nimavasi amuBayibolu adiña mukudiza.

Cheñi, chadiña nakuyikalila kuya nakupompa. Akañenyeña kuya nkawawu Hetala daWanta damukamwihi hadiña hakwenda maminiti 40. Ilaña amanakwetu muchipompelu aloñesheli njila yakuyitwalilamu kukupompa. Nawa chatachikiliwu kuhana mpanji jamushikola jakupompa kwamukachi kamulungu, amanakwetu ayikwashileña kukwatila mpanji jawu kumutu.

MuMay 2019, atachikili kupompela mumukala wawu. Haniyi mpinji, mumukala wawu mwenjili apayiniya ampinji yejima adisumbula. Atachikili kuyidizisha wejima wawu asatu chakutaña nikusoneka mwidimi dawamputamesu, hela chakwila awa adisumbula hiyelukili idimi dawamputamesuku. Ayili kulayibulali nakusenda nyikanda yawamputamesu kulonda adizi chakudizisha akwawu mwakuyizatishila.

Mutukweji twantesha hohu, iwu muhela niamanakwindi atachikili kutaña chiwahi idimi dawamputamesu, nawa chumichi chayikwashili kupaminaku kuspiritu. a Ichi muhela Yomara, manakwetu Marcelo niHiver hiyapayiniya ampinji yejima. Manakwetu Marcelo hinkoñi wakuzatila. Mulungu wejima azataña nyidimu yakuspiritu. Iyena dawu dinakwashi antu amavulu.

Iwu muhela niamanakwindi asakililaña chikupu hachayikwashañawu kudi amanakwetu muchipompelu. Muhela Yomara wahosheli nindi: “Kufuma tuhu ifuku datachi datwendeleliwu, aYinsahu anatwalekihu kutumwekeshela kukeña kwalala kwawakaKristu.” Manakwetu Marcelo wabombelelihu nindi: “Tukweti amabwambu amawahi muchipompelu chetu, nawa tudi hakachi kawamanakwetu mukaayi kejima anuñañeshawu nakukeña.” Muhela Yomara nawamanakwindi atalilaña ifuku dakamonawu iseki anakudibalumuna nakwikala paradisa.—Mas. 37:10, 11; Isa. 35:5.