1. Yesu wayilejeli nindidi atumbanji twindi kutalisha hampinji yakukuma, nawa wayisoñamishili nindidi?

 CHIKWASHALILI mafuku antesha hakwila nawu Yesu afwi, atumbanji twindi awana amwihwili nawu: “Chinjikijilwinyi chikamwekesha . . . kukuma kwanshakaminu yamakonu?” (Mat. 24:3) Ana atumbanji atela ajinokeleña chakelukawu mpinji yakukuma kwanshakaminu yawaYudeya. Muñakwilu yindi, Yesu wahosheli hakukuma kwanshakaminu yawaYudeya “[nihakukuma] kwanshakaminu yamakonu” yitudimu. Kutalisha hakukuma kwaniyi mpinji, Yesu wahosheli nindi: “Kutalisha hanodu ifuku hela ora, hikudi muntu niwumu welukaku, chili añelu adi mwiwulu hela Mwana, chiña Tata.” Kuhiñahu wayisoñamishili atumbanji twindi ejima nindi ‘atoneña.’—Maku 13:32-37.

2. Muloñadi chichalemeneni kudi ana adiñaku munshakaminu yawaYudeya kutwalekahu kwikala atona?

² AkaKristu akusambila aYudeya ateleleli kutwalekahu kwikala atona hakwila akahandi. Yesu wayilejeli akakumulondela yinjikijilu yadi kuyikwasha kwiluka nawu kukuma kwanshakaminu yawaYudeya kudi kwakwihi. Wahosheli nindi: “Chimwakamona amashidika anatuñi yilombu nakumunyeñumuka Yerusalema, mwakeluki nenu kujilumuka kwindi kunaswini dehi kwakwihi.” Hayina mpinji, ateleleli kwovwahila kusoñamisha kwaYesu ‘nakutachika kutemukila kumapidi.’ (Luka 21:20, 21) Ana atiyilili kuniku kusoñamisha apulukili helili aRoma akisañani Yerusalema.

3. Yumanyi yitukuhanjekahu muchinu chibaaba?

³ Makonu tunakushakama mumafuku akukuma kwakanu kaayi katama. Dichi ninetu twatela kuhemba yitoñojoka yetu nikutwalekahu kwikala atona. Muchinu chibaaba, tukuhanjeka hachitunateli kutwalekahu kuhemba yitoñojoka  yetu hampinji yitunakutala yuma yinakumwekana mukaayi, chitunateli kudihemba etu aweni nichitunateli kuzatisha chiwahi mpinji yinashaliku.

4. Muloñadi chitunakukeñeshela kumona yuma yinakumwekana mukaayi chayinu mpinji chiyinakushikija wuprofwetu wamuBayibolu?

⁴ Kudi yuma yinakuletesha tukeñesheña kumona yuma yinakumwekana mukaayi chiyinakushikija wuprofwetu wamuBayibolu. Chakutalilahu, Yesu washimwini yuma yikamwekana yikutukwasha kwiluka netu kukuma kwakaayi kaSatana kudi kwakwihi. (Mat. 24:3-14) Kapostolu Petulu watukolesheli kusha muchima hachinakushikijewa wuprofwetu kulonda chikuhwelelu chetu chitwalekihu kwikala chakola. (2 Pet. 1:19-21) Mukanda wakukumishaku wamuBayibolu watachika namazu akwila nawu: “Chimwekeshu chaYesu Kristu, chamwinkeliwu kudi Nzambi kulonda amwekeshi kudi anduñu jindi yuma yikukeña kumwekana.” (Chim. 1:1) Dichi tunakukeña kwiluka chikupu yuma yinakumwekana mukaayi nikwiluka chiyinateli kushikija wuprofwetu wamuBayibolu. Nawa hadaha tunateli kukeña kuhanjeka nawakwetu haniyi yuma yinakumwekana.

5. Chumanyi chitwatela kutondolwela, nawa chumanyi chitwatela kwila? (Talenu cheñi nyevulu.)

⁵ Hela chochu, neyi tunakuhanjeka hawuprofwetu wamuBayibolu, twatela kutondolwela kuboka yuma yikamwekana. Muloñadi? Muloña hitunakukeña kuhosha hachuma chinateli kuluwañesha kunuñañana muchipompeluku. Chakutalilahu, tunateli kutiya anlomboli amukaayi anakuhanjeka hachinateli kumanishawu kukala kumu kulonda aleti kuwunda nikukiñewa. Chatela tuboki nakuhosha netu awa mazu anakushikija wuprofwetu wekala ha 1 ATesalonika 5:3, twatela kwendela hamu nansañu yayiha yinahaniwu. Neyi kuhanjeka kwetu kushindamenaña hayuma yedishaña kuloñesha kwaYehova, tukukwasha chipompelu kutwalekahu kwikala chanuñañana ‘nakutoñojoka hayuma yoyimu.’—1 Kor. 1:10; 4:6.

6. Yumanyi yitwatela kudizila kunsona ya 2 Petulu 3:11-13?

⁶ Tañenu 2 Petulu 3:11-13. Kapostolu Petulu watukwashaña kutwalekahu kuhemba yitoñojoka yetu hampinji yitunakushinshika hawuprofwetu wamuBayibolu. Watukonkomwenaña “[kwanuka] chikupu kwikalahu kwefuku daYehova.” Muloñadi? Muloña hitunakufwila kwiluka “ifuku niora” yakaletayi Yehova Amagedoniku, ilaña tunakukeña kuzatisha mpinji yitunashali nayu kumwekeshelamu ‘yilwilu yakujila ninyidimu yakumwakama Nzambi.’ (Mat. 24:36; Luka 12:40) Munjila yikwawu, twatela kutwalekahu kwikala nayilwilu yayiwahi nikumwekesha netu nyidimu yitwamukalakelaña Yehova twayizataña muloña twamukeña chikupu. Hakwila tutwalekihu kwila mwenimu, twatela kudihembaña etu aweni.

7. Twamwekeshaña ñahi netu tunakudihemba etu aweni? (Luka 21:34)

⁷ Yesu walejeli atumbanji twindi nindi hiyatela hohu kushaña maana kuyuma yinakumwekana mukaayiku, ilaña atela cheñi kudihembaña awenawu. Ichi chikuma achimwekesha hatooka mukusoñamisha kwekala haLuka 21:34. (Tañenu.) Talenu mazu ahosheliyi Yesu nindi: “Dihembenuña enu aweni.” Muntu wadihembaña yomweni wekalaña  wasoñama kuwubanji wudi wejima wunateli kukisañana wubwambu windi naYehova, nawa welañahu yuma yimu kulonda chumichi chibuli kumumwekena. Neyi ela mwenimu, washakamaña mukukeña kwaNzambi.—Yish. 22:3; Yuda 20, 21.

8. Kapostolu Pawulu wayikonkomweneni akaKristu nindidi?

⁸ Kapostolu Pawulu wayikonkomweneni akaKristu nindi adihembeña awenawu. Chakutalilahu, wayilejeli akaKristu amuEfwesesa nindi: “Ilukenu chimwendaña, bayi mwendeña neyi antu abula maanaku, ilaña neyi akamaana.” (Efwe. 5:15, 16) Mpinji yejima Satana wafwilaña kukisañana wubwambu wetu naYehova. Dihafuma Bayibolu yitwanukisheña nawu “[twilukeña] chidi nkeñelu yaYehova” kulonda tudikiñeña kunyihetu yejima yaSatana.—Efwe. 5:17.

9. Twelukaña ñahi yuma yakeñañayi Yehova nindi twileña?

⁹ Bayibolu hiyashimuna wubanji wejima wunateli kuluwañesha wubwambu wetu naYehovaku. Kakavulu twatela kufuukula nihansañu yabula kushimunawu jiika muNsona. Hakwila tufuukuli chiwahi, twatela kwiluka hela kutoñojoka ‘hankeñelu yaYehova.’ Twatela kwila mwenimu kuhitila mukudiza Izu daNzambi mpinji yejima nikutoñojokahu chikupu. Chitwasweja kwiluka nkeñelu yaYehova nikwikala ‘nayitoñojoka yaKristu,’ tukwendaña “neyi akamaana,” hela chakwila hitukweti nshimbi jatela kutuleja jiika yuma yitwatela kwilaku. (1 Kor. 2:14-16) Wubanji wukwawu waswayi kwiluka, ilaña wukwawu wakala.

10. Wubanjinyi wukwawu wutwatela kutondolwela?

¹⁰ Wubanji wukwawu wutwatela kutondolwela wunabombelimu wusensi, kusweja kunwa walwa, kusweja kuda, nhoshelu yakuneñesha akwetu, kushilahu nikutala yisela yamadombu, nyevulu yanzekesi niyuma yikwawu. (Mas. 101:3) Mukankunyi netu, Diyabolu, mpinji yejima wakeñakeñaña njila yakuluwañeshelamu wubwambu wetu naYehova. (1 Pet. 5:8) Neyi tubula kwikala atona, Satana nateli kutuletesha kutachika kwikala nechima, kubula kwikala ashinshika, kwikala nalwisu, kuhelañana, kudivwimba ninkunyi. (Ñal. 5:19-21) Hakusambila, tunateli kutoñojoka netu iyi yilwilu yikutuluwañesha wanyi. Ilaña neyi tubula kuyibwitamu swayi-swayi, yinateli kukula neyi mutondu wafwana nawa mukufuma kukala.—Yak. 1:14, 15.

11. Wubanjinyi wunateli kumwekana neyi wanyanya wutwatela kutondolwela, nawa muloñadi?

¹¹ Wubanjinyi wumu wunateli kumwekana neyi wanyanya hikudikunda nawantu atama. Talenu ichi chakutalilahu. Mwazataña namuntu wabula kwikala Chinsahu chaYehova. Munakukeña mukwenu imwazataña nindi ayimoneña aYinsahu jaYehova munjila yayiwahi, dichi mudi namuchima wawuwahi nawa wakukeña kukwashana. Hadaha mpinji yikwawu mwadiilaña hamu naniwu muntu hachayili. Chihanalehi chanti, mutachika nikudiila hamu mpinji yejima. Mpinji yikwawu, owu muntu atachika kuhosha hayuma yatama, nawa hakusambila enu himunakukeña kutiya kunoyu nsañuku. Mukuhita kwampinji, mwinjilila kutiya kunoyu nsañu nawa muleka nikutiya kutama. Kufumahu, ifuku dimu mukwenu mumwazatilaña ayitambika nindi muyi nakudiila hamu nindi kwiluña dacheñi hanyima yakukomboka kumudimu, nawa mwiteja. Nkumininaku, mutachika kutoñojoka neyi mukwenu imwazataña nindi. Haniyi mpinji, mukushimbula wanyi kutachika kwila yuma neyi yelañayi. Chidi hohu chiwahi kwikala namuchima wawuwahi nikulemesha antu ejima, ilaña twatela kwanuka  netu antu itwadikundaña nawu anateli kutuletesha kwila yuma yayiwahi hela yatama. (1 Kor. 15:33) Neyi tudihembaña etu aweni neyi chatulejeliyi Yesu, hitukudikundaña nawantu abulaña kwovwahila nshimbi jaYehovaku. (2 Kor. 6:15) Tukwiluka wubanji wunateli kufumamu nawa tukuwutondolwela.

12. Mudimwinyi wateleleli kuzatawu atumbanji twaYesu hampinji yahembeleleñawu kukuma kwakaayi?

¹² Atumbanji twaYesu hiyateleleli kushakama hohu hampinji yahembeleleñawu kukuma kwakaayi kwinzaku. Yesu wayinkeli mudimu wakuzata. Wayilejeli kushimwina nsañu yayiwahi “muYerusalema, muYudeya nimuSamariya mwejima nikwakumina iseki dejima.” (Yilw. 1:6-8) Iwu wadiña himudimu weneni nankashi watambwililiwu akakumulondela Yesu! Chazatileñawu nankashi mumudimu wayinkeliwu, amwekesheli nawu azatishileña chiwahi mpinji yawu.

13. Muloñadi chitwatela kuzatishila chiwahi mpinji yetu? (AKolosi 4:5)

¹³ Tañenu AKolosi 4:5. Hakwila tudihembeña etu aweni, twatela kutoñojoka chikupu hachitwazatishaña mpinji yetu. “[Yuma] yamwekanaña chakubula kukuhwelela” yinateli kutumwekena wejima wetu. (Mukwa. 9:11) Hadaha tunateli kushikena dakufwa.

14-15. Tunateli kuzatisha ñahi chiwahi mpinji yetu? (AHeberu 6:11, 12) (Talenu cheñi mwevulu.)

 ¹⁴ Tunateli kuzatisha chiwahi mpinji yetu kuhitila mukwila nkeñelu yaYehova nikukolesha wubwambu wetu nayena. (Yow. 14:21) Twatela ‘kwikala akola mbe-e chakadi kuswijewa, mpinji yejima twikaleña nayuma yayivulu yakuzata mumudimu waMwanta.’ (1 Kor. 15:58) Dichi neyi kukuma kunenzi, chili hikukuma kwawumi wetu indi kwiji kukuma kwakanu kaayi katama, hitwakaditoñeshaku.—Mat. 24:13; Rom. 14:8.

¹⁵ Makonu, Yesu natwalekihu kulombola atumbanji twindi hampinji yinakushimwinawu haWanta waNzambi mukaayi kejima. Yena nazati dehi mudimu windi. Kuhitila mukuloñesha kwaYehova, Yesu watudizishaña chakushimwina nawa watwinkaña yozelu yakeñekaña hakwila tutaandishi nsañu yayiwahi. (Mat. 28:18-20) Twazataña mudimu wetu kuhitila mukudikita chikupu mumudimu wakushimwina nikudizisha antu, nikuhitila mukwikala atona hampinji yitunakuhembelela Yehova kuleta kukuma kwayuma yanshakaminu yamakonu. Neyi tuzatishaña kufumba kwekala haAHeberu 6:11, 12, tukukakelaña chikupu kukuchiñeja kwetu “ndo-o nikunsa.”—Tañenu.

16. Twatela kutwalekahu kwiladi?

¹⁶ Yehova watoñola dehi ifuku niora yakajilumunayi kanu kaayi kaSatana. Neyi idi ifuku dinashiki, Yehova wakashikija wuprofwetu wejima wasonekayi Mwizu dindi. Chayinu mpinji, mpinji yikwawu tunateli kumona neyi kukuma kwanshakaminu yamakonu kunakwinza swayi wanyi. Hela chochu, ifuku daYehova ‘hidakalabaku!’ (Hab. 2:3) Dichi tutwalekenuhu “kumuhembelela Yehova,” nakumwekesha muchima ‘wakumuchiñilila Nzambi yawamwinu wetu.’—Mika 7:7.