Naseheli, muloña nelukili wanyi nami ibwambu dami wadiña weluka nsañu yamuBayibolu. Namwihwili nami: “Nsañwinyi yiweluka kutalisha haBayibolu?” Hashikeneni kwakulaku. Nkumininaku, wanlejeli nindi amama yindi adiña aChinsahu chaYehova; dichi kudi yuma yadizililiyi kudi wena. Nakeñeleña kwiluka nsañu yayivulu, namwihwili nami anleji.

Twahanjekeli kushika niwufuku. Ibwambu dami wanlejeli nindi Bayibolu yamutenaña Satana nawu diyi Nyuuli wakaayi. (Yow. 14:30) Hadaha enu mwelukili iyi nsañu kufuma tuhu kuwansi wenu, ilaña kuda ami yadiña yayiha nawa yakuhayamisha. Mpinji yejima natiyileña nawu Nzambi waluwi nawa wamuwahi diyi wayuulileña kaayi. Ilaña iyi nsañu yambukiliku chikupu nayuma yinamweneña muchihandilu chami. Hela chakwila nadiña hohu nayaaka 26, namweneña yuma yayivulu yanneñesheleña.

Atata endesheleña madeki kukampani yaUnited States Air Force. Chineli nadiña mukwenzi, nelukili chikupu nami njita yanyitendanzumbu yinateli kutachika, muloña amashidika adiña adiloñesha kunata nyitendanzumbu hadi mpinji yidi yejima. Njita yadiña muVietnam yatachikili hampinji yinadiña kukoleji muCalifornia. Nadinuñili hadi akwetu akashikola adikañileña nanfulumendi. Akapokola atukumpishili natubama nawa twatemukili. Nawa twatwesheleña kumona chiwahi wanyi muloña wamatiyagasi. Yadiña mpinji yamapumba nikudikaña. Anlomboli jamapolitiki ayijahileña, antu adikañileña nanfulumendi nikuleta madombu. Muntu wejima wadiña nayitoñojoka yindi hayuma yatela kwilawu. Kwadiña kuluwankana chikupu.

Mu 1970, neñilili mudimu kukabeta kakuchimunswa kachikumu chaAlaska nawa nekalili namali amavulu nankashi. Kuhiñahu nayili kuLondon nandeki, nalandili honda nawa diyinazatishili hakuya kukabeta kakuchidiilu chakadi kwiluka kunayileña. Chimwahitili tukweji, nashikili kuAfrica. Chinayileña munjila, nawanini antu atoñojokeleña nawu niwena anateli kutemuka kukala kwejima kwadiñawu naku.

Dichi muloña wayuma yinamweni nikutiya, nenjili nakwiteja chatañishaña Bayibolu nawu chileñaleña watama wakuspiritu diyi wayuulaña yuma yejima mukaayi.  Hanu dinu Nzambi wadiña nakwiladi? Nakeñeleña kwiluka.

Mutukweji twalondelelihu, nenjili nakwiluka ñakwilu. Nawa cheñi mukuhita kwampinji, nenjili nakwiluka nikukeña amayala niambanda amavulu amwekeshaña nawu ashinshika kudi Nzambi walala wumu muyuma yejima.

Chinafuntili kuLondon, nayili nakudimona nawamama yebwambu dami nawa anyinkeli Bayibolu. Mukuhita kwampinji, chinayili muAmsterdam, kuNetherlands, Chinsahu wumu wammweni inakuhita iku nidi mwishina denoñu dakumukwakwa nawa wankwashili kwilukilahu yuma yayivulu. Kufumahu, nayili muDublin, kuIreland, nawa nawanini kasanji kamutayi kawaYinsahu jaYehova. Nadondomweneni hachiisu chahambidi. Dihinadimweneni naArthur Matthews manakwetu wadiña namaana nawa weluka yuma. Namulombeli nami andizisheña Bayibolu, nawa wetejeli.

Nashiliku muchima kukudiza nawa natañileña chikupu nyikanda nimagazini edishileñawu kudi aYinsahu. Hela chochu, natañileña niBayibolu. Natiyileña kuwaha nankashi! Hakupompa kwachipompelu namweneña nianyana anyana elukili ñakwilu yamalwihu abulili kwilukawu antu adiza hadi yaaka yayivulu, akwila nawu: ‘Muloñadi chikwekalila kutama? Nzambi hinyi? Chumanyi chamumwekenaña muntu wunafwi?’ Nadikundileña chikupu nawaYinsahu. Chumichi champeleleli, muloña hinadilukilihu nawantu acheñi mwituña dejimaku. Ankwashili kumukeña Yehova nikwila nkeñelu yindi.

Mu 1972, napapatisheweli. Chimwahitili chaaka chimu, nekalili payiniya nawa natachikili kupompa nachipompelu chanyanya muNewry, Northern Ireland. Nasonkeleleña itala dakutuña namalola dadiña kwakwihi nampidi. Mwisaña dadiña kwakwihi mwadiña añombi nawa nahitulukileña mumpanji jami iku nemani kumbidi yawu. Amwekeneña neyi anakutiyilila nakanañachima iku anakubukula nakutafunya cheñi yakuda yadawu. Hiyanfumbileñaku, ilaña ankwashileña kwiluka chakutala izaza neyi inakuhana mpanji jami. Mu 1974, antondeli kwikala payiniya wadimena nawa natachikili kuzatila hamu naNigel Pitt, owu wenjili nakwikala ibwambu dami hadi mpinji yayilehi.

Haniyi mpinji, muNorthern Ireland mwadiña kukala kwakuvulu. Antu amakwawu ateneneña Northern Ireland nawu “ituña danyitendanzumbu niyidaña.” Antu azuñileña munyikwakwa, kubelamina antu, kudiloza nikukisañana nyotoka nanyitendanzumbu. Kukala kwakuvulu kwenjileña muloña wamapolitiki nihansañu jakudifukula. Hela chochu, aProtestant niaKatolika elukili nawu aYinsahu hiyadiñijaña munsañu jamapolitikiku, dichi twashimwinineña mukukasunuka nawa twadiña akiñewa. Antu itwashimwinineña  kakavulu elukileña mpinji niiluña kukwikala wubanji nawa atusoñamishileña kulonda tubuli kwikala mukukala.

Hela chochu, mpinji jikwawu twakeñeleña kuholokela muwubanji. Ifuku dimu, ami nimukwetu payiniya, Denis Carrigan, twadiña nakushimwina mutawuni yamukamwihi mwabulili aYinsahu nawa kunidi iluña twadiña twayaku dehi kamu hohu. Mumbanda wumu watwinkeleña nyiloña nindi twadiña amashidika akuBritain adiswekeleña, hadaha muloña wejima wetu twelukili wanyi kuhosha chiwahi idimi daIrish. Chumichi chatutiyishili woma chikupu. Neyi wudikunda namashidika, anateli kukujaha hela kukuloza mumanuñu. Chitwemeni hanji nkawetu nakuhembelela basi iku kunatuuti, twamweni motoka yenjili nakwimana kusitolu kwadiña mumbanda watwinkeleña nyiloña. Wedikili hanji nawa watachikili kuhosha nawamayala ayedi adiña mumotoka nakutwinyika nyinu iku nazañalali. Kufumahu, awa amayala enjili chovu-chovu namotoka kudi etu nawa atachikili kutwihula mpinji yenzaña basi. Basi chiyashikili, ahanjekeli nañendeshi. Hitwatiyili yuma yahanjekeleñawuku. Mubasi himwadiña antu amakwawuku, dichi twelukili chikupu netu anakukeña kuya nakutubabeshela hanji yatawuni. Ilaña dichuma chamwekeni wanyi. Chinasulukileña mubasi, namwihwili ñendeshi nami: “Ana amayala itunashiyi, ahoshaña hadi etu?” Yena waakwili nindi: “Nayiluka chimwekala, nawa nayileja. Kwakama nehi. Kwosi chuma chatama chikuyimwekena.”

Mu 1976 hakupompa kwankambi a muDublin, twadibulakeni naPauline Lomax, payiniya wadimena wafumini kuEngland. Wadiña muhela wapama kuspiritu, wadizoza nawa wukweti muchima wawuwahi. Yena nimanakwindi Ray adizili chalala kufuma tuhu kuwansi wawu. Chimwahitili chaaka chimu, ami naPauline twadisumbwili nawa twatwalekelihu kuzata wupayiniya wadimena muBallymena, Northern Ireland.

Twazatili mumudimu wakwenda hadi yaaka yayivulu, nakukalakela amanakwetu muBelfast, Londonderry nimumaluña amakwawu mwekala wubanji. Twakolesheweli chikupu nachikuhwelelu chawamanakwetu niahela alekeli yuma yashimatili chikupu mumuchima yakuhweleleliwu, chaambu nikuhelañana kulonda amukalakeli Yehova. Wayikiswilili nawa wayikiñileña.

Nashakamini muIreland hadi yaaka 10. Kufumahu mu 1981 atutambikili kuya kushikola yaGiliyadi yanaamba 72. Chitwamanishili, atutemesheli kuya nakuzatila Sierra Leone, kuWest Africa.

Twashakamineña mwitala dawamishonali nawantu 11 amawahi muchima. Twazatishileña kapeka kakutelekelamu kamu, yimbusu yisatu, tupeka twakuwelelamu tuyedi, foni yimu, ikina dakukosela dimu niikina dakuumishilamu yakuvwala dimu. Malayiti ayileña mumpinji-mumpinji nawa chakukasumwisha. Mwiwulu detala mwadiña nyilonda nawa heseki hendeleña tupela.

Hela chakwila twashakamineña chiwahi nankashi wanyi, twadiluñisheleña mudimu wakushimwina. Antu alemesheleña Bayibolu nawa adiña nakutiyilila nakanañachima. Amavulu adizileña nawa ekalili aYinsahu. Antu amuchituñilu anteneneña nawu “Mukulumpi Robert.” Pauline amuteneneña nawu “Ñoda Mukulumpi Robert.” Ilaña chimwahitili mpinji, chineli mudimu wunazatileña hakasanji wansendeleleña nankashi mpinji nawa nayileña nakushimwina nankashi wanyi, antu atachikili kumutena Pauline nawu “Ñoda Mukulumpi Pauline.” Ami atachikili kuntena nawu “Mukulumpi Pauline.” Chumichi chamutiyishileña Pauline kuwaha!

 Amanakwetu amavulu adiña atuzweñi, ilaña mpinji yejima Yehova wayinkeleña yuma yakeñekeleña, mpinji jikwawu munjila jakuhayamisha. (Mat. 6:33) Inakwanuka muhela wumu wadiña hohu namali antesha akulandamu yakuda yatela kudayi yomweni nianyanindi hanodu ifuku, ilaña wayihanini ejima kudi manakwetu wadiña wakata wabulili mali akulandamu yitumbu yachikatu chamashika. Chimwahitili mpinji hadodenodu ifuku, kwenjili mumbanda wumu kudi iwu muhela chakadi kukuhwelela nawa wamwinkeli mali nindi amuyindi nsuki. Kwamwekeneña kukala kwakuvulu kwadifwana naniku.

MuSierra Leone twashakaminimu yaaka 9. Kufumahu atulejeli kuya nakuzatila haBeteli muNigeria. Ichi dinu twekalili hakasanji kamutayi keneni. Nazatileña mudimu wowumu wamukasanji wunazatileña muSierra Leone, ilaña kudi Pauline kwadiña hikuhimpika kweneni nawa kwakala. Wadiña nakuzata maora 130 hakakweji-hikakweji mumudimu wakushimwina nawa wadiña nawatudizi aBayibolu apaminineñaku. Haniyi mpinji amwinkeli mudimu wakuzatila mukapeka kakuchimina, mwazatilileñayi mafuku indi ejima kuwahisha yakuvwala yataboka. Hashimbwili hakwila enjilili, ilaña wenjili nakwiluka nindi amanakwetu niahela asakilileña chikupu hamudimu wazatileñayi nawa watwalekelihu kuzata nañovu kukolesha akwawu akaBeteli.

Chisemwa chakuNigeria chadiña chachiha kudi etu nawa kwadiña yuma yayivulu yitwateleleli kudiza. Ifuku dimu, manakwetu wumu wenjili mukasanji kami nakulumbulula muhela afuminiwu tuhu nakutambika haBeteli. Chinelili nami nimwimushi iwu muhela washikeneni kufukama kunyendu yami. Nahayamini. Nanukili nsona jiyedi: Yilwilu 10:25, 26 niChimwekeshu 19:10. Nadihwili nami, ‘Nimuleji aleki chinakwilayi?’ Ilaña, nanukili nami anamutambiki haBeteli, weluka chadizishaña Bayibolu.

Natiyili nsonyi haniyi mpinji yejima yadilumbulwileñayi, nkumininaku nehujoleli haniyi nsañu. Nenjili nakwiluka nami iwu muhela walondeleleña chisemwa chadiñaku hayina mpinji chalondeleleñawu antu mumaluña amakwawu mwituña. Amayala niwena adiña nakufukama. Yadiña hinjila yakumwekeshelamu kavumbi. Hikwadiña kudifukulaku; muBayibolu mwekala yakutalilahu yawantu elili chuma chamuchidiwu. (1 Sam. 24:8) Natiyili kuwaha nankashi chinabulili kuhosha mazu adi ejima adi kumutiyisha muhelami nsonyi muloña wakubula kwiluka.

Twadilukili nawamanakwetu amavulu akuNigeria amwekesheli chikuhwelelu chakola hadi yaaka  yayivulu. Talenu chakutalilahu chaIsaiah Adagbona. b Wadizili chalala hadiñayi mukwenzi, ilaña mukuhita kwampinji amukwatili namusoñu wambumba. Amutwalili kwiluña kwadiña nakuhembelawu akambumba, nawa kweniku yena diyi wadiña hohu Chinsahu. Hela chakwila amudimbulwileña, wakwashili akambumba kubadika ha 30 kwikala aYinsahu nawa atachikili chipompelu kunidi iluña.

Mu 1996 atutemesheli kuya nakuzatila hakasanji kamutayi kamuKenya. Aka dikadiña katachi kufunta munidi ituña kufuma hinayiliku neyi chinashimuna kumatachikilu. Twashakamineña haBeteli. Nawa hakasanji henjileña niansoku. Adiña “nakusompola” ahela asendeleña nyikaabu. Ifuku dimu, muhela wumu haBeteli washili windu yindi yawashi. Chafuntiliyi, wawanini mukanka wawansoku wunakuda yakuda yawaniniwu mukapeka. Wakalukili nakwidikamu lufuchi. Ansoku akalokeli nakwidikila hawindu.

Ami naPauline twatachikili kupompa nachipompelu chaSwahili. Haleheli wanyi, anyinkeli mudimu wakulombola Kudiza kwaMukanda haChipompelu (kunakutenawu nawu Kudiza Bayibolu haChipompelu). Hela chochu, nachidiña kudiza idi idimi. Nadiña nakuhitulukilamu chadimu munsañu yitukudiza kulonda nitwesheña kutaña malwihu. Ilaña neyi ñakwilu yawantu mwizaza yambukaku chanti nayasonekeliwu mumukanda, ñakwilu yawu nayitiyileña wanyi. Natiyileña sonyi! Nayitiyilileñaku amanakwetu niahela luwi. Natiyili kuwaha muloña etejeli iyi ntanjikilu nakudiwunjika nikudizoza.

MuKenya twashakaminimu hohu tukweji. Kuhiñahu mu 1997 atutambikili kuya nakuzatila haBeteli muBrooklyn, New York. Ichi twadiña mwituña mwadiña maheta amavulu, anateli kuleta kukala kwashiyashana. (Yish. 30:8, 9) Ilaña nimwituña didi neyi idi, amanakwetu niahela anakumwekesha chikuhwelelu chakola. Amanakwetu azatishaña mpinji yawu niyuma yikwetiwu, bayi neyi kudihetesha awenawuku, ilaña kukwasha mudimu wawuwahi wamukuloñesha kwaYehova.

Hadi yaaka yayivulu, tunamoni akwetu aYinsahu chinakumwekeshawu chikuhwelelu munjila jashiyashana. MuIreland, amanakwetu amwekesheleña chikuhwelelu hela chakwila mwadiña madombu. MuAfrica, amanakwetu amwekesheleña chikuhwelelu hela chakwila adiña atuzweñi nawa adiña kwakankawawu. MuUnited States, amanakwetu amwekesheleña chikuhwelelu hela chakwila adiña aheta. Chakadi nikujina, Yehova wazañalalaña chikupu chatalayi hamaseki nakumona amanakwetu amwekeshaña nawu amukeña mumpinji yayiwahi niyakala!

Yaaka yinatemuki “nankashi kubadika chatemukaña ikina dakuchima nachu.” (Yoba 7:6) Ichi twazataña nawamanakwetu hakasanji keneni kamukaayi muWarwick, New York, nawa twazañalalaña hakutwalekahu kuzatila hamu nawantu adikeña chikupu wumu namukwawu. Twazañalalaña nayuma yitukweti nawa tukweti muzañalu wakuzata kwesekeja nahakumina ñovu jetu kulonda tukwashi Mwanta wetu, Kristu Yesu, wukusomwena katataka antu jindi amavulu nankashi akweti chikuhwelelu.—Mat. 25:34.