1. Muloñadi chimwasakililaña hakwikala naBayibolu?

 TWAMUSAKILILAÑA chikupu Yehova Nzambi hakutwinka Bayibolu! Watwinka kufumba kwakuwahi muBayibolu kunateli kutukwasha kuumika kukala kutwamonaña makonu. Watukana cheñi kutwilila yuma yayiwahi kumbidi. Chasweja kulema, Yehova wazatisha Bayibolu kumwekeshelamu yilwilu yayivulu yekalayi nayu. Chitwatoñojoka hayilwilu yindi yayiwahi, nyichima yetu yazañalalaña chikupu nawa twaswinaña kwakwihi naNzambi yetu kuhitila mukwikala nawubwambu wakola nayena.—Mas. 25:14.

2. Njilanyi jashiyashana mwadimwekeshelayi Yehova kudi antu?

² Yehova wakeñaña antu amwiluki. Kunyima, wadimwekesheleña yomweni kuhitila muyilota, yimwenu nimudi añelu. (Kuch. 12:6; Yilw. 10:3, 4) Indi iyi yilota, yimwenu hela nsañu yashimwineñawu añelu twadi kuyidizaña ñahi neyi hiyayisonekeliku? Dichaletesheli Yehova aleji antu nindi ‘asoneki mumukanda’ yuma yakeñeleñayi nindi tuyiluki. (Yere. 30:2) Chineli “njila yaNzambi walala yaloña,” twatela kukuhwelela netu iyi njila yakuhanjekelamu nanetu yayiwahi chikupu nawa yatukwashaña.—Mas. 18:30.

3. Yehova welili ñahi hakwila Bayibolu yinatwalekihu nimakonu? (Isaya 40:8)

³ Tañenu Isaya 40:8. Izu daNzambi dinalomboli chiwahi amayala niambanda ashinshika hadi yaaka yayivulu. Chumichi chatweshekaña ñahi? Ilu hilwihu lwaluwahi, muloña Nsona ajisonekeli dehi kunyima hayuma yakisikaña, dichi kwosi nyivuñilu yayeni yatachi yidiku makonuku. Ilaña Yehova walejeli antu kukopolola nsona yajila. Hela chakwila akakukopolola adiña awanina wanyi, ilaña ashiliku muchima nankashi. Chakutalilahu, kutalisha haNsona jachiHeberu, muntu  wumu wadiza chikupu wasonekeli nindi: “Tuneluki netu kwosi mukanda wukwawu wakushankulu wabalumunawu choloka neyi Bayiboluku.” Dichi hela chakwila hahitili mpinji yeneni, ayisonekeli hayuma yakisikaña nawa antu ayikopolweli adiña awanina wanyi, tunateli kukuhwelela chikupu netu mazu itwatañaña muBayibolu yetu makonu amwekeshaña yitoñojoka yaNsoneki yachu, Yehova.

4. Tukuhanjekadi muchinu chibaaba?

⁴ Yehova diyi wahanaña “chawaana chejima chachiwahi nichawaana chejima chabadika kuwaha.” (Yak. 1:17) Bayibolu yidi hakachi kayawaana yayiwahi yatwinkayi Yehova. Chawaana chamwekeshaña chatwilukayi muntu wunakutwinka nichelukayi kukala kutukweti. Dichekalayi niMuntu watwinka Bayibolu. Neyi tushinshika hanichi chawaana, twelukaña yuma yayivulu kutalisha hachekalayi Yehova. Twelukaña netu watwiluka chiwahi nawa weluka niyuma yitwakeñaña. Muchinu chibaaba, tukuhanjeka hachamwekeshaña Bayibolu yilwilu yisatu yikwetiyi Yehova: maana indi, wuñanji windi nikukeña kwindi. Tuhanjekenu ntahi hanjila mwamwekeshelaña Bayibolu maana aNzambi.

5. Njilanyi yimu mwamwekeshelaña Bayibolu maana aNzambi?

⁵ Yehova weluka nindi twakeñekaña kufumba kwindi kwakuwahi. Nawa chawaana chatwinkayi, Bayibolu, mwenzala maana indi. Kufumba kwekala muBayibolu kwakwashaña antu. Bayibolu yahimpaña yihandilu yawantu. Nyikanda yatachi yamuBayibolu hayisonekeliwu, Mosi wayilejeli antu jaNzambi aIsarela nindi: “Awa bayi neyi himazu amukunkulwayiku, ilaña hiwumi wenu.” (Kuhit. 32:47) Antu ovwahilileña chahosha Nsona, yuma yayiwahilileña nawa adiña namuzañalu. (Mas. 1:2, 3) Hela chakwila Izu daNzambi adisonekeli dehi kunyima kwakweni, dichidi nañovu yakuhimpa yihandilu yawantu. Chakutalilahu, ha jw.org, muyibaaba yinakuhosha nawu “Bayibolu Yahimpaña Yihandilu Yawantu,” mukuwanahu yakutalilahu yawantu akubadika ha 30 yamwekeshaña ñovu yikweti Bayibolu ‘chiyinakuzatika mudi akakwitiya’ makonu.—1 Tes. 2:13.

6. Tukuhosheladi netu kwosi mukanda wukwesekana naBayiboluku?

⁶ Kwosi mukanda wukwawu wukwesekana Nezu daNzambiku. Muloñadi? Muloña Nsoneki yaniwu mukanda, Yehova Nzambi, wañovu jejima, wahaya nyaaka nawa kwosi wudi namaana neyi yenaku. Nyikanda yayivulu yashimbulaña kubadika ayisonekeli, ilaña kakavulu kufumba kwekalañamu kwalekaña kuzatika mukuhita kwampinji. Munjila yikwawu,yishina yamaana yekala muBayibolu yahaya nyaaka, nawa yinatwalekihu kukwasha antu mumakiñu ejima. Hampinji yitwatañaña iwu mukanda wajila nikutoñojokahu chikupu hayuma yitunadizi, Nsoneki yachu wazatishaña spiritu yindi yajila yikweti ñovu kulonda atukwashi twiluki chakuzatisha kufumba kwamuBayibolu muchihandilu chetu. (Mas. 119:27; Mal. 3:16; Heb. 4:12) Mwamweni, Nsoneki yaBayibolu watwalekañahu kuhanda, nakufwila kuyikwasha. Chumichi chikutuletesha tufwileña kutaña Bayibolu mpinji yejima!

7. Bayibolu yanuñañesheli ñahi antu jaNzambi kunyima?

⁷ Njila yikwawu yabadika mwamwekeshelaña Bayibolu maana aNzambi, hiñovu yiyikweti yakunuñañesha antu jaNzambi. AIsarela cheñililiwu Mwituña daChikaninu, atachikili kushakama mumaluña ashiyashana. Amakwawu ekalili ayibinda anshi, amakwawu ahembeleña yimuna nawa amakwawu ekalili andimi. AIsarela ashakamineña mwiluña dimu chadi kwikala chaswayi kubula kusha maana kudi akwawu aIsarela ashakamineña mumaluña amakwawu  mwituña. Ilaña Yehova washiliku ntanjikilu kulonda aIsarela apompeña hamu hampinji jashiyashana nakutiyilila chatañileñawu Izu dasonekewa nichadilumbulwileñawu. (Kuhit. 31:10-13; Nehe. 8:2, 8, 18) Fwikijenu chinatiyiyi kaIsarela washinshika hampinji yinashikiyi muYerusalema nawa hadaha namoni akwawu akakudifukula amavulu nankashi anafumi kumaluña ashiyashana mwituña! Muniyi njila, Yehova wayikwashileña antu jindi kutwalekahu kwikala anuñañana. Chimwahitili mpinji, chelili chipompelu chawakaKristu achituñi, mwadiña amayala niambanda ahosheleña madimi ashiyashana nawa adiña nachihandilu ninkulilu yashiyashana. Ilaña hamuloña wakwila adiña akeña nankashi Nsona, adifukwileña kudi Nzambi walala mukunuñañana. Antu etiyileña hakwila atiyishishi Izu daNzambi ayikwashileña kudi akwawu akakudifukula nikuhitila mukupompa hamu nawena.—Yilw. 2:42; 8:30, 31.

8. Bayibolu yanuñañeshaña ñahi antu jaYehova makonu?

⁸ Nzambi yetu wukweti maana natwalekihu kudizisha antu jindi nikuyinuñañesha hamu kuhitila muBayibolu. Dimwekala chalala chatukwashaña kumwiluka Yehova nankashi. Mpinji yejima twapompaña hamu kupompa kwachipompelu, kupompa kwanyanya nikwamaneni kulonda tutiyeña chinakutañawu Nsona, kujilumbulula nikujihanjekahu. Dichi Bayibolu hichitwa chalema nankashi chazatishañayi  Yehova hakukwasha akakudifukula indi “[kumukalakela] namuchima wumu.”—Zef. 3:9.

9. Chilwilwinyi chitwatela kwikala nachu hakwila tutiyishishi nsañu yamuBayibolu? (Luka 10:21)

⁹ Talenu wunsahu wukwawu wamwekeshaña maana aYehova. Waletesheli Nsona jajivulu ajisoneki munjila yakwila ajitiyishisheña hohu kudi antañi adizoza. (Tañenu Luka 10:21.) Antu atañaña Bayibolu kwejima. Neyi chahosheli muntu wumu wadiza chikupu nindi, Bayibolu “himukanda watañañawu nankashi kudi antu nawa awutañaña nakanañachima.” Ilaña antu adizoza hohu diwu atiyishishaña Bayibolu nikwovwahila muyahoshaña.—2 Kor. 3:15, 16.

10. Njilanyi yikwawu mwamwekeshelaña Bayibolu maana aYehova?

¹⁰ Kudi cheñi njila yikwawu mutwamwenaña maana aYehova muBayibolu. Yehova hazatishaña hohu Nsona hakutukundeja hamu neyi izanvuku, ilaña watudizishaña cheñi nikutukundeja hamuntu-hamuntu. Wejima wetu tunateli kumona Yehova chatwakamenañayi hamuntu-hamuntu hampinji yitwatañaña Izu dindi. (Isa. 30:21) Neyi munakuhita mukukala, mapampa añahi imwabakulahu dehi muNsona nawa mutaña vasi yamwekeni tuhu neyi ayisonekeleli enu? Hela chochu, Bayibolu yayishikaña antu amavulu hamuchima. Hanu dinu chumanyi chaleteshaña yitwalekihu kwikala nansañu yikuyikwasha kwesekeja nakukala kumukweti? Chuma chaleteshaña muloña wakwila Nsoneki yaBayibolu wukweti maana chikupu.—2 Tim. 3:16, 17.

11. Nzambi wamwekesheli ñahi kubula chaambu hampinji yasonekeleñawu Bayibolu?

¹¹ Wuñanji hichilwilu chikwawu chekala naYehova. (Kuhit. 32:4) Chilwilu chawuñanji chendelaña hamu chikupu nakubula chaambu, nawa Yehova hakweti chaambuku. (Yilw. 10:34, 35; Rom. 2:11) Chilwilu chindi chakubula chaambu chamwekenaña mumadimi azatishiliwu hakusoneka Bayibolu. Nyikanda yatachi yamuBayibolu 39 yayivulu ayisonekeli muchiHeberu, idimi dadiña daswayi kutiya kudi antu jaNzambi hayina mpinji. Hela chochu, mumpinji yawakaKristu akusambila antu amavulu ahosheleña idimi dachiGiriki. Dichi nyikanda yakukumishaku 27 yamuBayibolu ayisonekeli munidi idimi. Yehova hetejeli Izu dindi kudisoneka mwidimi dimu hohuku. Makonu kwakwihi nawantu 8 biliyoni hamaseki ahoshaña madimi ashiyashana. Indi awa antu amavulu ñana anateli kumwiluka ñahi Yehova?

12. Njilanyi yimu munakushikijewela Danyeli 12:4 munanu mafuku akukuminina?

¹² Yehova wakanini kuhitila mudi kaprofwetu Danyeli nindi mumpinji yakukuminina, “kwiluka kwalala” kwekala muBayibolu “kwakavula.” Antu amavulu akatiyishisha Bayibolu. (Tañenu Danyeli 12:4.) Chuma chimu chinaleteshi iku kwiluka kuvulilaku hikuhitila mukubalumuna, kwidisha nikuhana maBayibolu ninyikanda yashindamena haBayibolu. Bayibolu dimukanda wunabalumuniwu nankashi nikuhana mukaayi. MaBayibolu edishañawu kudi akajibizinisi mpinji yikwawu ekalaña nawuseya chikupu. Antu jaYehova anabalumuni Bayibolu, yamukuma hela yachibalu, mumadimi kubadika ha 240 nawa muntu wejima nateli kutambula Bayibolu chawaana. Chinakufumamu, antu akunyuza yejima anakutambwila “nsañu yayiwahi yaWanta” henohu kukuma kanda kwinzi. (Mat. 24:14) Nzambi yetu wawuñanji nakukeña kwinka antu amavulu kukooleka kwakumwiluka kuhitila mukutaña Izu dindi. Muloña wakwila watukeña wejima wetu.

13. Tukuhosheladi netu Bayibolu yamwekeshaña kukeña kwaYehova? (Yowanu 21:25)

¹³ Bayibolu yatukwashaña kwiluka nawu chilwilu chaYehova chabadika, hikukeña. (1 Yow. 4:8) Talenu yuma yashiliyi Yehova muBayibolu niyabuliliyi kushamu. Washilimu yuma yikutukwasha kwikala nawubwambu nayena, kwikala nachihandilu chamuzañalu niyikutukwasha kulonda twakekali nawumi wahaya nyaaka. Hela chochu, muloña wakutukeña, Yehova hatwinkeli nsañu yayivulu nankashi yikubula kukeñeka hakwila tumukalakeliku.—Tañenu Yowanu 21:25.

14. Njilanyi jikwawu mwamwekeshelaña yuma yekala muBayibolu nawu Nzambi watukeña?

¹⁴ Yehova wamwekesheli cheñi nindi watukeña kuhitila mukuhanjeka nanetu munjila yamwekeshaña nawu twalema. Watuvulishila nshimbi wanyi muBayibolu, nakutuleja yuma yejima yitwatela kwila hela yitwatela kubula kwila muchihandilu chetu chejima. Ilaña, wazatishaña yuma yamwekeni kunyima, wuprofwetu watusañumunaña nikufumba kwakuwahi kulonda yatukwashi kufuukula mwamuwahi. Izu daNzambi datusañumunaña kumukeña nikumwovwahila chakufuma hamuchima kuhitila muniji njila.

15. (a) Yehova wamwekeshaña ñahi nindi wakamenaña antu atañaña Izu dindi? (b) Muniwu mwevulu, muntwinyi ashimunawu muBayibolu anakutoñojokahu chikupu kudi iwu kansi wamumbanda, iwu manakwetu wakansi niniwu muhela wakula dehi? (Kutach. 39:1, 10-12; 2 Anya. 5:1-3; Luka 2:25-38)

¹⁵ Bayibolu yamwekeshaña nawu Yehova watwakamenaña chikupu. Munjilanyi? Mwizu dindi mwenzala nsañu yashimunaña chatiyañawu antu. Tunateli kwiluka chatiyileñawu  antu ashimunawu muBayibolu muloña niwena “atiyileña neyi chitwatiyaña etu.” (Yak. 5:17) Chasweja kubadika, neyi tutoñojokaña chayakameneneñayi antu adiña neyi etu, tukwiluka chikupu netu “Yehova wukweti wushona chikupu niluwi.”—Yak. 5:11.

16. Twelukaña netu Yehova wekala ñahi neyi tutaña muBayibolu hadi antu aluwañesheleña? (Isaya 55:7)

¹⁶ Bayibolu yamwekeshaña njila yikwawu mwamwekeshelañayi Yehova nindi watukeña. Nsona yatulejaña nawu neyi tuluwañesha Nzambi yetu wakatushiya wanyi. AIsarela amuvulumwineña Yehova kakavulu, ilaña neyi abalumuka chikupu mumuchima, Nzambi wayanakeneneña. (Tañenu Isaya 55:7.) AkaKristu akusambila niwena elukili nawu Nzambi wayikeña. Chamoneneniwu, kapostolu Pawulu wayilejeli akwawu akakwitiya nindi atela “kumwanakena nikumukundeja” muntu wakoñeleña nshidi yasweja, ilaña abalumuka mumuchima. (2 Kor. 2:6, 7; 1 Kor. 5:1-5) Twazañalalaña hakwiluka chikupu netu Yehova hayikaanineña akakudifukula indi muloña wakwila aluwañesheleñaku! Ilaña, wayikwashileña munjila yakukeña, kuyolola nikuyitambika kulonda ekali cheñi amabwambu jindi. Dichayishiikayi niakanshidi ejima abalumukaña mumuchima makonu.—Yak. 4:8-10.

17. Muloñadi Bayibolu chiyekalila chawaana chachiwahi nankashi?

¹⁷ Yehova watwinka chawaana chachiwahi. Muloñadi Izu dindi chidawahila nankashi? Neyi chitunadizi, Bayibolu yamwekeshaña maana aNzambi, wuñanji windi nikukeña kwindi. Iwu mukanda wamwekeshaña nawu Yehova wakeñaña nindi tumwiluki. Wakeñaña twiikali amabwambu jindi.

18. Tunateli kumwekesha ñahi netu twasakililaña hakwikala naBayibolu ‘chawaana chachiwahi’ chatwinkayi Yehova?

¹⁸ Hitunakukeña kudiwula kulema ‘kwachawaana chachiwahi’ Chezu daNzambiku. (Yak. 1:17) Dichi tutwalekenuhu kumwekesha kusakilila hanichi chawaana. Tunateli kwila mwenimu kuhitila mukutaña nakanañachima mazu ajila ekalamu nikutoñojokahu chikupu. Neyi twilaña mwenimu, twatela kwiluka chikupu netu Nsoneki yachu wabadika wukutukwashaña chitukuzataña nañovu nawa ‘tukumwiluka Nzambi.”—Yish. 2:5.